Madina Mo'minova

"Агар қандайдир қўрқув сабабли ўз ҳаққингизни талаб қилишдан ожиз бўлсангиз бу ҳаққингизни ўзгалар эҳтиром қилишини кутиб ҳам ўтирманг. Агар ҳаққингизни ололмасангиз ҳам талаб қилсангиз иккинчи томонни сизга эътибор қилишга, сизга ўйлаб, ҳурмат билан муомала қилишга мажбур қилган бўласиз!". Мамдуҳ Удвон

Муҳаббат билан яшаш учун, ҳаётингиз албатта комфорт бўлиши шарт эмас. Кўксингизда бир дақиқада 60 та ураётган юракда самимият ва фақат Аллоҳга суяниш бўлса бас. Сиз Бахтлисиз!

рикмаяпсизми опа, дейди бир синглим. Болаларни соғинмай ўтирибсизми, дейди- яна бирлари. Қийналмаяпсизми, ўзингиз? . Келинларингизга мазза-а, дейишади. Ёлғизмасмисиз, дея давомий саволлар беришади. Мен эса доим кулиб туриб, “алҳамдулиллаҳ” дейман. Тонг отса тушлик бўлишини кутаман, болалар бирин кетин овоз юборишади, тушликда кеч бўлишини, болалар жонли видео қилишади. Кеч бўлганда эса харамдан лавҳалар юборишади. Шулар билан бу умр ўтиб бормоқда. Баъзан жуда катта шаҳарга сиғмай кетаман. Гўё ҳеч ким йўқдек. Жажжи қўлчаларини силкитиб “чапак-чапак” қилаётган дўмбоқчамни қучоқлаб олгиларим келади… узоқда узоооқ. Ким у томонларга кетаркин деб кўз тутаман, бир шингил насиба илиниб. Кеча бозордан гилос олгандим. Марван гилос сувини оқизиб ейиши кўз олдимга келиб, бўғзимга ёш қадалди. Алҳамдулиллаҳ дейман. Мақсадсиз соғинч эмаску ахир дейман. Илм ва муқаддас масканларда яшашлик саодати насибасику бу… дейман ўзимга-ўзим. Баъзида эса ўзимдан мақсад тополмай қоламан ва яна “Сен дарахтсан, сенга суяниб турганлар бор, чида, сабр қил, дунё айрилиқлардан иборат..” дейман! Умр эса ўтиб бормоқда.. Алҳамдулиллаҳ..!

Барака недир?! У Аллоҳ таолонинг яширин қўшинларидан биридир. Уни бандаларидан хоҳлаганига юборади. Агар у мол-мулкка тушса, уни кўпайтиради. Фарзандга тушса, солиҳ бўлади. Жисмга тушса қувватга киради. Вақтга тушса узаяди. Ва қалбга тушса фараҳ-севинчга тўлади. Шайх Али Тантовий

Отам раҳматли масжидга кетаётганларида, йўлда сотувчилар билан ҳазиллашар ва уларнинг арзон молларини қимматга сотиб олардилар. Бир марта мен эътироз билдиргандим: "Қўявер ўғлим, бу иззат ва қадр-қиммат ерга урилмаган садақа бўлади", дедилар. Ҳишам Амудий

Яхши эслатмалар, гўзал учрашувлар, яхшиларнинг ҳамроҳлиги, хонадонимизга янги меҳмон-қизимнинг келиши, Марванимнинг эркаланиши,Асия қизимни ўрмалаб кетиши, эҳее айтсам адо бўлмас қувончлар ила Май ойини ўтказиб олдик. Бир совиб, бир қиздириб хуш кайфият улашган Майнинг майин иси ўз ўрнини ёзга топшириб, секин тавозе билан юриб кетмоқда. Нима ҳам деймиз. Хайр Май! Кейинги йил сенгача Рамазонни қаршилаймиз, насиб бўлса. Сенинг ҳам жонинг (фаслинг) соғ бўлсин! Май-бирам ёқимлисанки!

Ҳар қандай ўғил фарзанд келажакдаги севгилисини ёки турмуш ўртоқ танлаётганда , қизда ўз онасини қидиради. Ўзи билмаган холда онасининг белгилари, кўриниши, гап сўзларини топишни истайди. Шунинг учун ҳам Она -фарзанд учун энг катта мактаб. Агар у ақлли, аҳлоқли ва тажрибали бўлса ўғиллар ўз йўлини ва йўлдошини топиши, топганида эса гўзал яшаши аниқ! Яна бир энг муҳим эслатма бор! Ўғил фарзандми, қизми номақбул иш (гуноҳ) қилганда, шунга ўхшаш яъни онаси кўрса ранжийдиган иш қилса, у онасига узр хати, ёки келажакда уни бошига кўтариб юриши ҳақида гапиради, ёки ёзади. Чунки унинг фитрати ўзи қилаётган бу ёмон ишини қоралайди, ўз-ўзидан кўз ўнгига онасининг холати келади. Ва дарров виждонини сал тинчлантириш учун онасига узрхонлик ва буюк келажак ваьда қилишни бошлаб юборади. Шу вақтда она ўта хушёр бўлиши, кўнгли сезиши ва боласи билан тинмай мулоқатга киришиб дардлашиши шарт. Агар бола эътиборсиз холда (она узр манзур гапларга алданиб, қувониб ўтираверса) ёмон ишлари бора бора оддий , кундалик тарзига айланади. Шунинг учун ҳам муҳтарам оналарга, ёш оналарга айтаманки, сизнинг асосий ишингиз эр ёки иш, пул топиш, уй юмуши, пишир куйдир, ижтимоий тармоқ янгиликлари эмас…Фарзанд бўлиши керак! Айниқса улар балоғат ёшида бўлса! Янаям бизнинг миллатда урф-одат, катталарга хурмат, кичикни иззатлаш бор. Сизнинг фарзандингиз оилада тарбияланиб чиқса, махаллада ҳам бу бола хурматли бўлади. “Эээ фалончини боласимисан, отанга раҳмат”,- дейдиган қавм махалладир. Уйингиз остонасида йиғилиб турган ахлат челакни устидан бир сакраб ўтиб кетаверадиган ўғил, ёки махалладаги тўй-тўрқин, аза маросимларини билмайдиган бола- ўзининг келгусидаги ҳаётида яхшигина қоқилади, чунки унга у қадрятлар ўргатилмаган, кўрсатилмаган. Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам: «Ҳар бир туғилган бола фақат фитрат (соф табиат) ила туғилади. Бас, ота-онаси уни яҳудий ёки насроний, ёки мажусий қилади. Бу худди ҳайвоннинг бус-бутун ҳайвон туғишига ўхшайди. Сиз унда қулоқ-бурни кесилганини ҳис қилганмисиз?» дедилар». Сўнгра Абу Ҳурайра: «Агар хоҳласангиз, «(Бу) Аллоҳ одамларни яратган асл табиатдир. Аллоҳнинг яратганини ўзгартириб бўлмас. Мана шу тўғри диндир», деган оятни ўқинг», дер эди». Тўртовлари ривоят қилишган.

Зулм манзараси. Менга кўп хатлар келади, асосан маслаҳат беринг маъносида. ⚡️ Оила. Энг гўзал ва энг синовли маскан. Унинг ичидаги яхши ишлар ҳам, ёмонлари ҳам, пасти ҳам, баланди ҳам бор, бу маскан эр-хотиннинг ўзаро келишуви, тушиниши ва муҳаббати асносига қурилади. Хўш унда муаммо нимада? Муаммо шу оилага бурнини тиқадиган, ахилликни кўра олмайдиган бадбахт қайнсингил, қайниопа , қайниака ё ука кабиларда. У хоҳ акаси бўлсин, хоҳ укаси, синглиси, опасими унинг оиласига аралишишга ҳақлими? Ҳақли! Қачон? Зулм манзарасини кўргандагина аралашса бўлади. Демак у оилада жигарпораси қийналяпти, эридан (хотинидан) жабр кўряпти, шундагина баъзи бировларни ўпкасини босиб қўйиш учунгина аралашса ярашади. Лекин ўзбек оиласида сал бошқача. Ўзининг катта бурнини акаси, укасининг оиласига тиқиб , яхши яшаётган оилани чилпарчин қилиши керак. У шунинг учунгина яралгандек гўё. Аканинг, ука, опа, синглисининг ҳаётида у лидер бўлиши керак. На ота, на она, на ака, на ука айтмайдики; “хооой барака топгур, бу менинг ҳаётим, илтимос унда ўзим яшай, аралашмагин, фитна қилавермагин, ўзингни оиланг, боларингни келажагини ўйла”, -демайди. Оиладаги энг муҳим инсон бу -эркак! Демак эркак оиласига лочин, бургут, арслон бўлиб қараши керак. Агар қарай олмаса у оиладаги аёллар унинг ўрнини эгаллайди. Аёл сиз учун ким? Турмуш ўртоқ, болаларингиз онаси, йўқ фақат шу эмас. У сиз учун яшаётган бировнинг боласи. Ота-онасига , жигарларига беролмаётган меҳрни,эътиборни сизга кўрсатяпти, сизнинг пуштикамарингиздан бўлган болаларни оқ ювиб, оқ тараяпти. Кунингзу, тунингизда энг яқин ҳамрох! Яна нимадир қилиб берсинми? Балки унга хужум қилаётган яқинларингизни йиғиштириб олиш вақти келгандир?... Ёки охиригича тишлатиб, кўнглини қонатиб хотиржам бўласизми? Эй уйнинг соҳиби! Унутманг зулм сиздан келадими, яқинларингиданми фарқсиз! Унинг номи барибир Зулмдир! Бунинг учун аввал Сиз, кейин ўша жонажон яқинларингиз жавоб берасиз, қўллар ёқаларга ёпишадиган вақтгача ёқангизни йиғиштириб олинг! Пайғамбар соллаллоҳу алайҳи васаллам айтганлар: «Қиёмат кунида ҳақлар ҳақдорларга олиб берилади. Ҳатто шохли қўйдан шохсиз қўйнинг ўчи олиб берилади» (Муслим ривояти) «Фақат Аллоҳ улар(нинг жазолари)ни кўзлар(даҳшатдан) қотиб қоладиган (қўрқинчли қиёмат) кунига қолдирмоқда, холос».

Мен ҳам бир куни шундай кириб бораман, қувончдан отилиб кираман. Лаббайка Аллоҳим деб кираман. Ўғилларим эса ўша жойда мени интиқ кутиб турган бўлади. Ин шаа Аллоҳ. Нусрат келади!

Икки кунга водийга, яъни андижонга бориб келишимиз ичида турфа инсонларни кўрдим. Ибрат олса арзигулик инсонлар жуда кўп ва буни ибрат учун албатта ёзаман. Лекин мени энг кўп дилимни хуфтон қиладиган холат, қиз-аёлларни ўзини тутиши, ахлоқи ва гаплашиш маданияти бўлади. Жамият шунақа нарсаки ундаги асосий восита бу аҳлоқ бўлади. Агар эркак бузуқ бўлса, унга маълум сабаб ва оқибатлар топилади, бу ёқа ушлагулик ходиса бўлмайди, аслида унинг ўз жинсидан қайтаётганини хатто ўзи сезмаслиги ҳам мумкин. Чунки унинг оти-Эркак! Аммо энг оғриқли ва ёмон оқибат бор, бу аёлнинг аҳлоқи! Агар у бузуқ бўлса, унда унинг атрофидагилар асло соғ бўлмайди. Аллоҳ таоло аёл ва эркакни бир бирига муҳтож ва бир бирларини маънан тўлдириш учун яратган. Аёлни эркакка овунчоқ, эркакни аёлга қалқон қилиб. Бу қачон халол бўлса, ўшандагина тотимли бўлади. Андижондан қайтишда Наманганга кириб ўтдик. Меҳмонга киришдан олдин намангандаги миллий таомларга кириб у ердан буюртма қилиш учун сотувчига гапирсам (эркак киши бўлгани) боис, жавобни терс қараб қайтарди, доим намангандаги шу андиша ва муносабатга хурсанд бўламан. Кейин давонга қараб йўлга отландик. Машинани қувватлантириш ва намоз бахона халол деб кафиллик берган, хавоси ажойиб емакхонада тўхтадик. Табиийки ўтиб қайтувчилар бу ерга кўп қўниб ўтади. Биз ўтирган суппанинг ёнида икки аёл ва эркакнинг суҳбатлари эшитилиб турибти, эшитилиши маълумлигини билсада бемалол аёллар қўйворган. Ўзи шоптоли қоқига айланай деса ҳам кўнгли йўрға тилайдиган бу икки нусха суҳбатидан одамни эти жунжикиб кетади. Ёши ҳам 39-42 атрофида, дамак оиласи ва болалари бор.. Жуда хунук мақол бор. …кўзини сузмаса, ипини узмайди деган.. Доим таъкидлайман, эркакларни йўлдан оздирувчи хилқат аёл бўлган. Агар аёлда шаън ва андиша бўлмаса у истаса .. истаган куйига ўйната олади. Бир қарасанг мазлума, бир қарасанг эътиборсиз “атиргул”, бир қарасанг боқувчиси йўқ бечора.. эркакдан вафо, севги топмаган “ хурлиқо”.. Қарабсизки бир зумда унга “қалқон” бўлувчилар топилади. Биронтаси сўрамайдики “оилангда эркак борми”? Аммо бу дунё яхшиям хисоб китобли! Яхшиям Аллоҳнинг мезон ўлчагичи бор. Қўл остидагилардан сўралувчи сифатида тафтиш қилиб яшаш мўминга фарз бўлиб қолди. Атрофда эса шайтонлар тингани йўқ..