قلب سليم 🤍🌿

من حُسن الخُلُق إنك تقبل العُذر من الشخص المُعتذر.. والأصل إنك تلتمس لأخيك العُذر حتى لو لم يعتذر، فما بالك بمن اعتذر! فبلاش تخلي الوصول ليك صعب، وخصامك طويل.. ولو حد زعلك في حاجة واعتذر منك؛ اقبل منه ومتزودهاش؛ لأن دا بيزود الفجوة بينك وبينه وبيسبب جفاء، لكن قبول العُذر بيطيب القلوب ويمنع الضغينة. قال الله تعالى: ﴿...وَلۡیَعۡفُوا۟ وَلۡیَصۡفَحُوۤا۟ۗ أَلَا تُحِبُّونَ أَن یَغۡفِرَ ٱللَّهُ لَكُمۡۚ وَٱللَّهُ غَفُورࣱ رَّحِیمٌ﴾. وقبول العُذر من الأخلاق اللي كان معروف بيها النبي ﷺ؛ فاتبع هديه! وافتكر إن الإنسان بطبيعته خطَّاء، ولو إنت اللي كنت غلطان أكيد هتحب إن عذرك يتقبل والشخص يسامحك بدون تعنت. واعرف إن فيه صفات وأخلاق هتلاقيها جزء من شخصيتك، وفيه أخلاق تانية هتحتاج تكتسبها وتبذل فيها مجهود وتدرّب نفسك عليها. بس الموضوع يستاهل، وإنت محتاج تسعى لرضا ربك ولصلاح آخرتك، وافتكر كلام نبيك ﷺ: "إنَّ اللهَ تعالى يُحِبُّ مَعاليَ الأُمورِ، وأَشرافَها، ويَكرَهُ سَفْسافَها".. فاسع لمعالي الأخلاق، ولا تيأس من نفسك. #خياركم #دمحمد_الغليظ