المكتبة الهندسية الشاملة

إزاي تستعد لمقابلة الشغل وإنت لسه حديث تخرج؟ التقديم على أول شغلانة بعد التخرج فيه رهبة كبيرة لأي مهندس جديد. ودايما بيجي على بالنا "هيسألوني في إيه وأنا معنديش خبرة !" بس عاوز اطمنك واقولك ان في الحالة دي , انت مش هتتسأل اسئلة عميقة او محتاجة خبرة والكلام ده , ولكن التركيز كله هيكون على شخصيتك لأن دى النقطة الوحيدة ال الشركة هتستفيد منك فيها, ازاى؟ بطبيعة الحياة , مش كل الشغل ال بيتم بيكون محتاج حد ذو خبرة وبالتالي فمن مصلحة الشركة دايماً انها علشان توفر مرتبات ومصاريف انها تعين ناس بخبرة بسيطة او بدون خبرة في جزء الشغل ال ممكن اى حد فريش ممكن يتعلمه وينجز فيه وبالتالى فهنا بيجي دور حد زي حضرتك. فالانترفيو في الحالة دي بيتم التركيز فيه على كام نقطة بسيطة وهم: مدى جديتك وقابليتك للشغل ، لأن للأسف مش كل الناس بتاعة شغل, وفي النقطة دي هيتم سؤالك في عدة اسئلة تتمحور حوالين اذا كنت تقدر تشيل مسئولية وال لا لأن في النهاية حضرتك مهندس فلو ال بيعملك انترفيو حس انك مش جاد كفاية فدى هتبقى نقطة مش كويسة. محدش متوقع منك تكون "تنين" يعني، بس متوقعين يشوفوا مهندس مرن وعنده شغف يتعلم، مش شخص متخيل إنه ختم العلم بمجرد ما استلم شهادة البكالوريوس. خبرتك هي مشروع تخرجك ,دي أكتر حاجة احتكيت بيها عملياً في الكلية، فطبيعي تتسأل في تفاصيلها عشان يقيموا فهمك للمشروع، ويعرفوا كنت واخد الموضوع بجدية ولا مجرد "تقضية واجب. طبيعي ممكن يكون فيه اسئلة بسيطة زي رسومات المومنت (العزوم) على الكمرات والعناصر المختلفة او مبادئ في الخرسانة. دي بتبقى أسئلة "فلترة" لأن في النهاية انت مهندس ومينفعش حاجات اساسية زي دى تفوتك. اسئلة الـ HR , ودي الأسئلة الروتينية اللي بيقيسوا بيها ثقتك في نفسك، ثباتك الانفعالي، وطريقتك في التواصل وهل هتعرف تتأقلم مع التيم ولا هتبقى مصدر مشاكل.