港援 Hong Kong Aid

熱烈祝賀袁同志喜提鐵窗雅座🎉 袁同志多年來默默耕耘，為跨境鎮壓工作作出「傑出貢獻」，聽朝終於迎嚟豐碩成果。 由警隊走到經貿辦，唯獨案底能夠令佢精彩人生錦上添花，現誠邀各界朋友聽朝蒞臨中央刑事法院，為袁同志迎接精彩人生嘅新章節送上祝福。 地點：中央刑事法院Central Criminal Court, The, Old Bailey, London EC4M 7EH 日期：18-06-2026(聽朝) 時間：上午十點正

雨傘不倒，並肩同行：反修例七周年 24 小時接力撐傘 七年過去，無論身處香港定係海外，港人嘅抗爭步伐尚未完結。面對政權嘅壓逼同埋生活環境轉變，抗爭路上絕不容易。早前爆發嘅倫敦經貿辦（HKETO）間諜案，更徹底暴露中共將黑手伸延海外，企圖利用駐外機構監視、威嚇流散港人。面對呢種赤裸裸嘅跨境鎮壓，我哋絕不退縮，並藉此強烈要求英國政府立即關閉已經淪為特務機關嘅香港經貿辦！ 昔日街頭上嘅畫面已成歷史，香港人唯有將抗爭「個人化」。雖然獨自修煉同不斷自省必有其好處，但面對茫茫人海嘅消散，我哋難免會問：現時仲有幾多同路人？ 要砥礪前行，香港人勢必堅守記憶。但堅守從來都唔係單打獨鬥。就如同舉起雨傘一樣，一個人固然可以堅持，但唯有靠大家接力、有人同行，條路先可以行得更遠。 我哋計劃喺 2026年6月12日 於 倫敦，舉行24小時接力舉黃傘行動，紀念反修例運動七周年。以24小時不間斷撐起黃傘，代表香港人即使流散各地，依然有人願意承擔、願意記得、願意企出嚟。黃傘唔只係一件物件，更係七年前無數港人喺街頭互相守護嘅象徵。 光復香港從來唔係一件容易嘅事，亦都唔係某幾個人嘅責任。一個人去堅持高舉雨傘係好困難，但越多人去分擔呢份重擔，呢件事就越容易達成。 我哋誠邀公眾參與接力舉傘：無論你停留五分鐘、一小時，定係陪伴我哋走過深夜同清晨，每一次接力，都象徵住仲有同路人一齊行一齊捱；都代表有人仍然記得612，相信香港人精神唔會被磨滅。 或者今日嘅我哋已經唔再身處同一條街道；但只要仍然有人願意撐起把傘，記憶就唔會孤單，抗爭亦未曾完結。 活動詳情： 日期：2026年6月12日（星期五） 時間：下午5點30分集合 , 下午6點12分開始，連續舉傘24小時 地點： Parliament Square , London SW1P 3JX 參加表格 : https://forms.gle/enSQYducQu7HuZGA7

​【BNO 定居申請 (ILR) 系統更新 ⚠️】長者/未成年人士免考英文「過渡性」填表方案 ​跟進返早前關於年滿 65 歲或未滿 18 歲申請人，喺填寫 ILR 表格時遇到「英文能力要求」卡關嘅情況。 內政部 (Home Office) 了解後，確認，目前申請系統喺處理「年齡豁免 (Age Exemption)」選項時出現技術問題。技術團隊目前努力解決緊，期望喺下星期底前修復。 ​⚠️ 內政部強調：團隊即將解決此問題，以下提及嘅方案絕非永久解決辦法 (Not a permanent solution)。 ​如果你或者你嘅屋企人（因年滿 65 歲或未滿 18 歲而獲豁免）急需要喺呢段時間遞交申請，內政部提供咗一個暫時性嘅過渡方案 (Interim fix)，令你可以順利去到填表嘅下一步： ​👉 當畫面去到「How will you prove your English language ability?」呢一頁時（參考附圖）： ✅ 內政部建議嘅暫時解決方法係選擇第一個選項 「An English language or literature qualification from a UK school」。 ​揀咗呢個選項之後，系統就會容許你繼續填寫落去。由於你喺表格其他位置已經填報咗真實嘅出生日期，系統同審批人員最終都會識別到你屬於因年齡而豁免嘅類別。 ​如果你嘅申請並非極度緊急，你亦可以考慮稍候一至兩星期，待內政部修正表格系統後，才繼續填寫表格。 ​⚠️ 【免責聲明 / Disclaimer】 本帖文內容僅為如實轉達英國內政部 (Home Office) 提供之最新系統過渡方案及一般資訊分享 (General Information)，並不構成任何正式嘅法律或移民建議 (Immigration Advice)。英國內政部嘅表格設計及系統政策可能會隨時更新，請各位申請人遞交申請前，務必仔細閱讀官方最新指引及按個人真實情況評估。如有複雜嘅個人簽證個案，請尋求受 IAA 監管之合資格移民意見協助。

【BNO 簽證轉 ILR 定居 📝】長者填表常見卡關位：英文能力證明點樣揀？ 收到唔少滿 65 歲嘅老友記查詢，表示喺填寫定居 (ILR) 申請表時遇到疑問。明明年滿 65 歲已經符合資格豁免英文同 Life in the UK 考試，但去到 "English Language Ability" 嗰一頁，面對以下呢條問題就唔知點揀好： ❓ "Have you provided evidence of your English language ability previously in a successful application?" (你之前喺成功獲批嘅申請中有冇提供過英文能力證明？) 好多長者會猶豫應該揀 "No" 定係 "I was exempt..."。其實根據字面意思同 BNO 簽證嘅歷史，對於絕大部分 BNO 申請人，按事實填寫嘅答案通常係 「No」。 💡 點解係「No」？ 因為呢條問題係問緊你之前申請簽證（即係當初申請 BNO 簽證）嗰陣，有冇向內政部遞交過英文考試成績。由於 BNO 簽證本身係唔需要證明英文語言能力嘅，所以你之前並冇提供過相關證明。因此，按事實回答就係「No」。 💡 揀「No」會唔會影響豁免資格？ 請各位老友記放心，揀「No」係絕對唔會影響你基於年齡嘅豁免資格。Home Office 嘅申請系統之後會根據你喺表格其他部分填寫嘅「出生日期」，自動識別出你已經年滿 65 歲，並會喺後續步驟自動為你豁免英文及 Life in the UK 嘅要求。 🪖免責聲明 / Disclaimer This post is for general information and sharing of common experiences only and does not constitute formal immigration advice. Home Office policies and application forms are subject to change. Please refer to the latest official guidance before applying. For complex cases, please consult an IAA-regulated immigration adviser.

誠邀在英港人盡力為香港內的不公不義發聲： ✍️ 請簽署並轉發英國國會聯署： https://petition.parliament.uk/petitions/752777 聯署簡介-- 宏福苑火災再次反映：香港已變成一個人民連了解和探討真相嘅權利都被完全剝奪嘅地方，所以我哋聯署促請英國政府（作為中英聯合聲明的一個簽署方）： 1: 制裁令香港行政透明度盡失及阻止彰顯公義的嘅人員 2: 重新審視倫敦香港經貿辦（HKETO)嘅特殊外交待遇 3: 擴大BNO visa 計劃，以支援為公義發聲的香港人 聯署是最底門檻的發聲工具。如果我哋集合10000簽名，便可促英國政府作出回應。

【港援向國會提交《Routes to Settlement》書面證供 呼籲大家2月12前踴躍向政府提交意見】 港援12月時已向英國國會內政事務委員會提交、並獲正式刊登就《Routes to Settlement》政策嘅書面證供。 這份證供建基於我哋多年以嚟嘅前線個案工作、社群數據及真實案例，反映政策建議將對港人帶嚟嘅實際影響。 ‼️現行「Earned Settlement」建議，將會對大量 BN(O) 家庭 以及 無法使用 BN(O) 路線的香港難民與庇護者 造成長期不穩定，甚至陷入幾十年嘅居留困局。 📄證供中，我哋明確向政府倡議： • BN(O) 持有人及家屬應全面豁免最低收入或經濟貢獻要求 • BN(O) 路線應維持 B1 英文要求，並設充足過渡期 • 所有香港公約難民應保留最長 5 年永居路徑 • 以訪客身份入境、因政治迫害而尋求庇護嘅港人，不應被施加懲罰性加年期 • 承認照顧工作、義務服務等非金錢形式嘅實質貢獻 長期不確定兼具懲罰性嘅永居制度唔會促進大家融入，只會削弱大家嘅安全感、經濟參與及社會穩定。 我哋將會繼續在政策層面為香港社群發聲。 如果你正身處英國、或因政治原因需要離開香港，歡迎聯絡我哋取得免費、保密、受規管嘅移民法律意見。 所有相關政策書面證供已刊登於國會網站。 https://committees.parliament.uk/work/9389/routes-to-settlement/publications/written-evidence/ 港援證供傳送門： https://committees.parliament.uk/writtenevidence/155923/pdf/ 同時，我哋鼓勵喺英國嘅大家運用自己嘅力量同聲音，就住英國政府嘅永居諮詢提交意見。每個人都可以提交意見，表達對政策改變嘅睇法同建議。呢個諮詢嚟緊2月12就會截止，希望大家都可以踴躍向政府表達自己嘅想法。 ✍🏻2月12截止！提交你對永居政策改變嘅意見：https://www.gov.uk/government/consultations/earned-settlement

港援嚴厲譴責英國政府批准中國於皇家鑄幣局舊址興建「超級大使館」  有關決定導致數萬名受香港當局政治迫害或監視嘅港裔英國居民同難民陷入安全威脅同恐慌 港援對英國政府決定批准中國於具有歷史保存價值嘅皇家鑄幣局舊址（Royal Mint Court）興建新大使館表示反對。當局無視國安憂慮以及居民反對聲音，以外交原因為由對中共獻媚而批准「超級大使館」，嚴重威脅流散族群嘅人身安全，亦違反英國政府曾向香港族群所作出嘅承諾，破壞誠信且損害契約精神。 中共今次獲利嘅唔單止係一座外交建築，而係成功喺一個以法治為本，影響英聯邦全球五分之一土地安全嘅政治中心，建立一個法外之地。從中共一直以嚟脅迫利誘嘅行為及隱瞞交代大使館房間用途嘅舉措，更可以突顯中共想透過「超級大使館」喺英國建立用作間諜監視、跨境鎮壓嘅堡壘嘅野心。英國政府此舉完全係將外交利益置於國民安全之上。 此外，皇家鑄幣局舊址嘅環境亦極唔適合行使和平示威嘅民主權利。同現時嘅大使館位置唔同，嗰度街道狹窄，又鄰近主要幹道，勢必會被用作藉口去嚴格限制和平集會。我哋擔心呢種地理限制會被武器化，用嚟打壓異見，變相劃出一個令港人、維吾爾人、西藏人同中國異見人士被滅聲嘅禁區。 對英國而言，批准呢個項目係道德嘅淪陷。當中共政權繼續摧毀香港嘅自由、囚禁包括黎智英在內等多名英國公民之際，英國政府竟然選擇向一個敵視民主價值嘅政權大獻殷勤。 當地面臨迫遷威脅、被迫生活喺監控堡壘陰影下嘅塔村（Tower Hamlets）居民，正就呢個錯誤決定進行籌款，準備發起司法覆核，我哋會同佢哋並肩同行。我哋敦促英國政府取消決定，緊急重新審視其國安方針，並將保護逃離極權嘅社群置於同北京嘅商業及外交利益之上。 我哋絕對唔會被噤聲。無論中共喺英國土地上建立幾大嘅實體據點，我哋都會繼續連結受中共壓迫嘅族群，壯大力量，以此捍衛我哋嘅自由。 立即支持當地居民司法覆核眾籌：https://www.gofundme.com/f/stop-the-megaembassy-and-support-our-legal-challenge

【1月11日 倫敦追思及軍事默哀儀式｜Silent Memorial & March】 本週末；我哋會喺倫敦舉行紀念儀式，向兩位為捍衛自由、遠赴烏克蘭作戰犧牲嘅香港人 「Pin」 同 「Water」致敬。 與上次於倫敦烏克蘭主教座堂舉行嘅安魂彌撒不同，今次追思活動將以非宗教嘅軍事悼念形式進行，烏克蘭駐英大使館國防辦公室駐外武官Vitalii Hutsuliak上校亦會出席悼念。大家可以以最莊重嘅靜默，向兩位英靈表達哀思、堅持與敬意。 我哋誠摯邀請倫敦及英國各地嘅香港及烏克蘭族群、以及其他自由世界嘅盟友出席，同行者可自備鮮花或蠟燭等以表心意。另外，亦都準備咗弔唁冊供出席人士向兩位烈士嘅至愛表達慰問同埋支持。 安排如下： 🗓 日期：2026 年 1 月 11 日（星期日） 📍 地點：24 Abbotsbury Rd London W14 8ER 🕯 時間：3:00 pm 活動將以靜默進行，請參加者着深色為主衣服，保持莊嚴。 其志可敬，其行可傳； 浩氣長存，銘記不忘。 Slava Ukraini. Heroyam Slava. Glory to Hong Kong.

【1月3日 倫敦追思彌撒 設香港語祈禱儀式】 倫敦烏克蘭天主教主教座堂（Ukrainian Catholic Cathedral in London），神父 Fr Vitaliy 應允於本週六嘅 Panakhyda（追思儀式）同隨後彌撒中，特別誦讀兩位隸屬烏克蘭陸軍第 141 機械化旅殉職港人志願軍（Callsign：Pin 及 Water）名字，為兩位英魂祈禱。 儀式以烏克蘭語同莊嚴嘅追思悼念儀式進行，神父亦非常重視同理解香港族群嘅心意，特意安排設香港語祈禱環節，我哋亦都會設置弔唁冊以便大家傳達心意。我地誠邀喺倫敦嘅香港人出席，聯同烏克蘭族群，一齊送別兩位義士，為佢哋嘅犧牲同埋奉獻精神致敬。 詳細安排如下： 🗓 日期：2026 年 1 月 3 日（星期六） 📍 地點：Ukrainian Catholic Cathedral, Duke St, London W1K 5BQ 🕯 時間：18:15（Panakhyda 追思儀式，隨後為 Divine Liturgy 彌撒） 願榮光歸於烏克蘭，願榮光歸於香港。 永垂不朽，浩氣長存。 Slava Ukraini. Heroyam Slava.

【修咸頓街坊嘅講座】 City Life Church 舉辦《申請英國永居及入籍講座》，講解一下大家準備申請ILR的時候要有何文件及注意事項，盼望大家一齊參加此講座，內容如下： 《申請英國永居及入籍講座》 講者: Dan - 港援 Hong Kong Aid 日期: 2026年1月3日（星期六） 時間: 下午二時至四時 地點: Winchester圖書館 （The Arc Winchester, Jewry Street, Winchester SO23 8SB) 報名連結： https://forms.gle/d2QW1RKSEfFQ4PPi9 查詢: 可電郵與活動負責人Brenda聯絡 brenda@citylife.org.uk 希望大家支持我哋的活動🥰 預祝大家新年快樂🎊身心平安💞

【倫敦追思彌撒：悼念兩位香港英魂烏克蘭殉職手足】 倫敦烏克蘭天主教主教座堂（Ukrainian Catholic Cathedral in London），神父 Fr Vitaliy 應允於本週六的 Panakhyda（追思儀式）及隨後的彌撒中，特別誦讀兩位隸屬烏克蘭陸軍第 141 機械化旅的殉職港人志願軍（Callsign：Pin 及 Water）的名字，為兩位英魂祈禱。 儀式以烏克蘭語及傳統儀式進行，我地誠邀喺倫敦嘅香港人出席，一同送別兩位義士，感謝佢哋為自由奉獻。 詳細安排如下： 🗓 日期：2025 年 1 月 3 日（星期六） 📍 地點：Ukrainian Catholic Cathedral, Duke St, London W1K 5BQ 🕯 時間：18:15（Panakhyda 追思儀式，隨後為 Divine Liturgy 彌撒） 願榮光歸於烏克蘭，願榮光歸於香港。 永垂不朽，浩氣長存。 Slava Ukraini. Heroyam Slava. *以香港語為主，無宗教儀式嘅倫敦悼念定於2026年1月11日舉行，地點：24 Abbotsbury Road, London, W14 8ER（仍有待確定，請留意最新公佈）。

沉重宣布，有兩位烏克蘭參軍香港人不幸陣亡，容許我哋致以最崇高敬意，同埋最沉重嘅哀悼。 呢兩位手足用生命去實行咩叫知行合一，為公義而戰。 我哋嘅烏克蘭軍admin 已經著手了解緊有咩可以幫到手，希望可以用最高嘅規格送走兩位手足。 2026，香港人要繼續參軍，繼續報仇。 Till Valhalla.

英格蘭東南移民策略合作夥伴（又名東南部BNO港人歡迎中心）將與西北肯特公民諮詢局（CANWK）一同為居英香港BNO人士舉行下節有關申請永久居留 (ILR) 的程序與注意事項的網上講座。    歡迎任何有興趣的BNO港人、任何支援BNO港人的志願，社區和社會企業（VCSE）團體或社區組織人員參加。     講座內容包括:    -如何計算居留日子？ -如何為申請ILR作準備- 包括提供居住證明，考試等等？ -申請ILR的程序 - 常見問題 - 包括BNO簽證家庭可否獨立於主簽證申請人自行申請ILR?  * 講座亦會包括內政部就移民諮詢文件對香港BNO簽證持有人的影響作出的最新回應 日期：2025年12月10日 時間：下午6-7時 形式：MS Teams (不需預先報名） https://bit.ly/3Y0HRWb 日期：2025年12月18日 時間：下午12-1時 形式：MS Teams (不需預先報名） https://bit.ly/4oo89wh 由於時間所限，我們只能夠在講座後問答環節回答首10條問題。如有任何有關參加講座的疑問，歡迎聯絡：hkenquiries@secouncils.gov.uk     Follow 我哋IG: https://bit.ly/3qu0Mf5  加入我地Telegram broadcast: https://t.me/southeastwelcomehub

【冬至・圍爐】亂流下，確認彼此安好 今個月，大家嘅心情都好沉重。 由內政部反覆無常嘅政策風聲，令大家對前景感到焦慮；到大埔傳來嘅沉重噩耗，更令香港人心痛。面對政策嘅不確定，我哋感到不安；面對遠方嘅無常，我哋感到無力。 我哋知道，身在英國，有唔少朋友正處於一種漫長嘅「等待」。 等待一個審批結果，等待一個安穩居所，或者單純係等緊一個「留下來」嘅肯定。 呢種前路未明嘅焦慮，我哋明，亦想同你分擔。 今個冬至，不如一齊圍爐取暖？ 我哋喺倫敦 Golden Lane 準備咗一個溫暖嘅角落。當日有團聚、有嘢食、有熱辣辣嘅湯圓，仲有 K 唱。無論你正處於咩境況，我哋都無任歡迎。 喺呢段艱難時刻，我哋只想製造一個機會，讓大家容易啲聚埋一齊。 📝 活動詳情 🗓 日期： 2025年12月21日 (星期日・冬至) ⏰ 時間： 下午 4:00 - 8:30 📍 地點： Golden Lane Community Centre, Fann Street, London EC1Y 0SA 👥 名額： 40 人 歡迎所有居留身份人士，名額優先給予等候政治庇護人士及難民 💰 費用： 全免 未有工作收入嘅庇護同難民朋友，可額外申請活動車費津貼 👉 報名連結：https://forms.gle/MceUbKHW7u7o4oBc9 ⚠️ 溫馨提示 飲食申報： 請於表格內註明食物敏感或特定飲食習慣。 點歌環節： 唱 K 將使用正版歌曲庫，如有「飲歌」想唱，歡迎預先喺表格填寫。 活動守則： 現場奉行「無煙、無酒、少粗口」政策，大家互相尊重。 關於缺席： 由於名額有限，報名後請盡量出席。如臨時未能參加，請盡早通知，將寶貴位置留俾有需要嘅同路人。 願亂流之中，大家都能平安、保重。

⚠️ 捍衛港人永居權，我哋嘅未來，我哋自己守護！ 英國永居政策隨時收緊，最低收入門檻、B2英語要求⋯⋯ 唔少努力貢獻緊嘅香港人，都可能因為新政策而無法順利獲得永居。 面對空前挑戰，我哋唔可以坐以待斃！ 《「貢獻換永居」社區行動手冊》已經準備好，一步步教你點樣由零開始，將我哋嘅聲音帶入英國國會。 我哋呼籲，每一位喺英國嘅香港人： 1️⃣ 立即喺下載手冊，了解完整嘅政策背景同行動細節。 2️⃣ 組織你同一選區嘅香港人、配合港人組織，組成屬於你哋社區嘅倡議團隊。 3️⃣ 參考手冊，約見你嘅當區國會議員 (MP)，用我哋嘅故事，清晰表達我哋嘅核心訴求！ 一個人行可能好難，但一班人行就唔同講法。 手冊連結，立即行動💪🏻：https://action4hkers.hkaid.org.uk/ 想搵同路人？對約見MP冇從入手？唔使驚，我哋會全力支援！我哋亦即將舉辦 【社區倡議實戰工作坊】，俾大家一齊交流、了解更多實際操作同細節。 時間無多，諮詢期好快就完。唔好猶豫，立即透過以下方法聯絡我哋，為守護我哋嘅未來出一分力： 👉 Telegram: @uniteuniteunite👉 Email: uniteuniteunite@protonmail.com #雖流離不失所

【大埔奪命大火　港援致以深切哀悼】 大埔宏福苑發生火警，造成嚴重傷亡，包括一名英勇消防員在救援期間殉職。對於今次事件帶來嘅傷痛，我哋深感難過，並向所有受影響嘅人士致以最深切嘅哀悼與慰問。 喺呢段艱難時刻，我哋與在岸香港人同在。願傷者能早日康復，居民亦能夠獲得足夠支援，慢慢渡過難關。 【喺英國受影響人士的支援】 呢段時間，大家都可能經歷緊唔同程度嘅情緒反應，希望彼此多加關顧，同行支持。 英國嘅街坊有唔少都密切留意事件發展，並與香港嘅家人朋友保持聯繫。如果你有需要，我哋可以免費提供附有數據、能長途致電香港嘅電話卡，亦有入門手提電話可供派發。 如需申請，可以 SMS、WhatsApp 或致電：+447377765552。 如果你喺英國，而你嘅家屬、朋友，或者你本身曾住喺宏福苑，因事件而感到情緒困擾，歡迎聯絡我哋。我哋會提供適切支援，並提供合適轉介。 你亦可以直接聯絡英國香港輔導員協會，當中嘅輔導人員具備輔導背景，能提供創傷與情緒需要： https://hkcounsellorshub.org.uk/ 請記住，如果你或你身邊嘅人因事件而感到不安，你並唔孤單。適時同信任嘅人傾訴，或者尋求幫助。 香港人，平安、保重。 🕯️

【關注所有在英香港人權益嘅一人一信】 無論你係以咩身份逗留喺英國，呢封信嘅內容都會適用於你！ 聯署信件內容已經涵蓋三大關注： 1. 維持BNO港人原有定居條件，包括語言能力要求、無收入門檻 2. 為任何改變設立合適過渡期 3. 確保現時喺英國嘅香港政庇手足同公約難民維持居住五年嘅定居申請條件 大家只需要撳入去下面嘅網址，填番自己個名、電郵同埋地址就可以直接自動send俾你選區嘅MP：https://win.newmode.net/hongkongersinuk 但係要注意！入面有一個選項係授權個平台後續可以send宣傳資料畀你，大家選擇No就得㗎喇！send咗之後佢會出現一個捐款頁面，但係要留意呢個捐款嘅受益機構唔係我哋！ 如果你唔想將個人資料經過第三方？冇問題！以下連結係我哋一人一信嘅草稿：https://docs.google.com/document/d/1nIS1Ny44MQZJ3mbyMzCHm7vHuNcI7nJidvm2iJekQ9U/edit?usp=sharing 大家可以喺https://members.parliament.uk/members/commons 搵返自己MP嘅電郵之後，通過電郵send畀你嘅MP！

【關於內政部最新發佈諮詢文件：公約難民部分】 港援歡迎內政大臣表明BN(O)簽證持有人同家屬會繼續享有較快嘅永居途徑，大部分人依然維持5+1安排。 但係，我哋對文件中有關香港公約難民嘅建議政策感到極度憂慮，原因來自文件中嘅兩點： 1️⃣公約難民的永居起點拉到 20 年； 2️⃣以遊客身份入境再尋求庇護嘅人，更可能被增加居留年期，最多增至20 年。 對大部分無法申請 BN(O)、當初以訪客身份入境後先尋求庇護嘅香港政治流亡者，呢個安排等同 最長 40 年 先能申請永居。 一眾為逃離政治迫害嘅手足，好唔容易嚟到英國境內尋求保護，突如其來要面臨延長居留年期嘅懲罰，加多廿年，甚至最長四十年嘅等待期，對一班最有需要幫助嘅人唔公平，亦唔合理，更與英國對香港嘅道義責任完全不符。 港援會就新政策諮詢作出回應，亦希望大家可以積極參與公眾諮詢，同埋寫信畀你哋選區嘅 MP表達你嘅擔憂同訴求。大家可以 scan 圖5 QR code 直接去填政府嘅公眾諮詢問卷🙌🏼 ⚠️溫馨提示：填諮詢問卷時，要小心閱讀題目及選擇，如果有問題用咗double negative問法，選擇答案時要小心，唔好倒轉咗原本答題嘅意思！ 如果你正在考慮或已經喺英國尋求庇護，或者係難民身份，都歡迎隨時聯絡我哋，亦歡迎參與我哋嚟緊星期日嘅圍爐傾活動（活動資訊詳見我哋上一個post)。

【第二輪 港裔英國難民/尋求庇護者網上政策研討及圍爐傾】 係星期三第一次嘅討論會入面，我哋簡略分析咗內政大臣最近發表嘅一份難民政策文件。係第一輪嘅討論入面有超過50名持份者報名，我哋知道仍然有好多朋友有意參加，所以我哋喺今個星期日舉辦第二輪研討。 我哋無法接受政府建議將難民申請定居（ILR）所需居住年期由 5年延長至20年，並加入定期審查制度。政府意圖並非只針對被政府稱為「非法入境經濟移民」嘅人士，而係包括真正因政治、人道原因而受迫害嘅群體。 我哋希望大家留意現屆政府過去已經試過突然終止阿富汗安置及家庭團聚計劃。即係部分政策提案指出嘅改變係有可能透過移民規則附錄修改下，跳過諮詢同埋立法程序直接生效。 我哋感受到難民身份逗留或者等緊庇護結果嘅大家對於係呢份文件嘅不安。所以我哋邀請大家係星期日夜晚join我哋嘅網上討論圍爐取暖。一齊討論點樣面對、有咩出路、下一步嘅行動。 日期：2025年11月23日 時間：晚上九點至十一點 會議平台：jitsi 報名連結（提交後會顯示會議連結，請務必自行保存）： https://forms.gle/zWivJzdJ51revKjF8 *請自行考量個人資料風險填妥表格內容。