Ethio BookBites-ኢትዮ ቡክባይትስ

አንድ በዓለማችን ‹‹የተሳካለት›› የሚባል ሰው ነው፡፡ በ56 ዓመቱ የመሞቻው አልጋ ላይ እያለ ከ10 ቢሊየን ዶላር በላይ በካዝናው አኑሯል፡፡ ዝነኛ ስም፤ ገናና ቢዝነስ፤ ብዙ አድናቆት፤ ብዙ ክብር እና ገንዘብ ሊገዛ የሚችላቸውን የዚህችን ዓለም ድንቅ በረከቶች ሁሉ ከፊቱ ደርድሯል፡፡ ግን ጤና የለውም፡፡ እና ዕድሜ! በዚያች አልጋው ላይ እያለ ነበር የሰበሰበው፣ የለፋለት፣ የሚኮራበት ነገር ሁሉ ብላሽ እንደሆነ ወለል ብሎ የታየው፡፡ ‹‹ከሞት ጋር ስለማይቀረው ጉዞህ ውይይት ስትቀመጥ፣ ሌሎች ነገሮችህ ሁሉ ፍፁም ትርጉም-አልባ ይሆኑብሃል›› ይላል፡፡ ሥራህን እንዲሠራልህ ሰው ልትቀጥር ትችላለህ፡፡ እንዲያስብልህ ሰው ልታዘጋጅ ትችላለህ፡፡ ወዳሰኘህ ቦታ የሚወስድህን አሽከርካሪ ልትቀጥር ትችላለህ፡፡ ሌላ ቀርቶ ከፊት ከፊትህ እየቀደመ ምንጣፍ የሚዘረጋልህ ሰውን ልታሠማራ፣ አሊያም ትዕዛዝህን ተቀብሎ ያሻህን ሁሉ በጣት ምልክት የሚያቀርብልህን ሰው ከፊትህ በተጠንቀቅ ልታቆም ትችል ይሆናል፡፡ ወዘተ ወዘተ ወዘተ...! ነገር ግን ህመምህን የሚታመምልህ ሰው አታገኝም፡፡ ህመምህን የሚዋስህ፡፡ በካንሰር የተጠቃ የሰውነት አካልህን ከነህመሙ እጁን ዘርግቶ የሚቀበልልህ፡፡ እና የማትቀረዋን ሞትህን የሚሞትልህ፡፡ ሰው የለም፡፡ ማንም! ደግሞም በዚህ ዓለም ስትኖር ሀብትን ብታጣ በሃብት ትተካዋለህ፡፡ ወርቅ ብትጥል ሌላ ወርቅ ትገዛለህ፡፡ ብትከስር ታንሰራራለህ፡፡ ብትወድቅ ትነሳለህ፡፡ አንዱ ባይሆንልህ ሌላ ደሞ ትጀምራለህ፡፡ ሁሉም በዚህ ዓለም ያለ ነገር ሁሉ ምትክ አለው፡፡ ከአንዲት ምትክ አልባዋ ህይወትህ በስተቀር፡፡ ህይወትህ ከጠፋች ጠፋች ነው፡፡ አትተካም፡፡ ሺኅ፣ ሚሊየን፣ ትሪሊየን ብትደረድር.... ህይወት አንድ ነች፡፡ ከጠፋች የማትተካ፡፡ ምትክ የሌላት፡፡ ካጣሃት መልሰህ የማታገኛት! አንድ! እና - ይላል ይህ ሰው - በዚህ ዓለም ላይ የምታገኘው እጅግ የመጨረሻው ታላቁ ደስታ - ከምትሰበስባቸው ውጫዊ ቁሳቁሶችና ሀብቶች አይመነጭም፡፡ እውነተኛ ደስታ ያለው ከውስጥህ ነው፡፡ ያ የውስጥህ ደስታ ደግሞ ብቻህን የምታጣጥመው ደስታ አይደለም፡፡ እውነተኛ ደስታ ከሌሎች ሰዎች ጋር ሆነህ የምታጣጥመው ደስታ ነው፡፡ በምሳሌ ሲያስረዳ እንዲህ ይላል፡፡ በአውሮፕላን ተሳፍረህ አውሮፕላኑ ቢከሰከስ፣ በርካሹ የኢኮኖሚ ክላስ ትኬት ቆረጥክ፣ ወይ በውዱ የለግዠሪ ክላስ ትኬት ቆረጥክ፣ አብረህ ከሌላው ተሳፋሪ ጋር ትከሰከሳለህ፡፡ ያ ያንተ ውዱን ትኬት መግዛት፣ ወይም ያማረህን እያዘዝክና እየተቀበልክ መጓዝ፣ መጨረሻህን አያረዝመውም፡፡ ያው እንደሌላው ሰው አብረህ ትከሰከሳለህ፡፡ እንደልብህ ስለመነዘርክ፣ አንዲትም ስንዝር ዕድሜህን አታስረዝማትም! በዕድሜ እየገፋህ ስትመጣ የምትገነዘበው ብዙ የህይወት ሀቅ አለ፡፡ ያንን በጊዜ ተረዳው፡፡ ዕድሜ ስትጨምር፣ የእጅ ሰዓትህን በ30 ብርም ገዛህ አሊያ በ3ሺህ ብር፣ ሁለቱም የሚቆጥሩት ያንኑ ተመሣሣይ ሰዓት መሆኑ ይገባሃል! ምራቅ ስትውጥ፣ ውድ መኪና ገዛህም፣ ርካሽ መኪና ገዛህም፣ በርካሽ ትኬት ቆርጠህ ተሳፈርክም፣ መነሻህም ሆነ መድረሻህ፣ አሊያም የምትጓዝበት መንገድ ያው ራሱ መሆኑ ይገባሃል! ዕድሜ ስትጨምር፣ የ3ሺህ ብር ወይን ገዝተህ ጠጣህም፣ የ10 ብር ቢራ ጠጣህም - በማግስቱ የሚያላጋህ ሃንጎቨር የመጠጡን ዋጋ ከግምት እንደማያስገባና፣ አንድ ዓይነት እንደሆነ ይገለጥልሃል! ዕድሜ ስትጨምር፣ መኖሪያ ቤትህ በ300 ካሬ ሜትር ላይ ያረፈም ይሁን፣ አሊያም በ3ሺህ ካሬ ሜትር ላይ ያረፈ፣ አሊያም አንዲት መተናፈሻ የሌላት ዛኒጋባ ቤትም ትሁን፣ ወይም አንዲት ነጠላ መደብ፣... በመጨረሻ... የቤትህ ካርታ ስፋትና ጥበት፣ ወይም የቤትህ ወርድ፣ አሊያም የአልጋህ አግድመት.. ብቸኝነት የሚባለውን ነገር እንደማያስቀርልህ ወለል ብሎ ይገለጥልሃል፣ በህይወት ስትገፋ፣ ደስታ የሚባለው ነገር ሁሉ በዙሪያህ ካከማቸኸው ገንዘብና ቁሳቁስ የሚገኝ ሳይሆን፣ በዙሪያህ አብረህ ካሳለፍካቸው ሰዎች ጋር በመሆን የሚገኝ መሆኑን የምትረዳበት ዕድሜ ይመጣል! ያንን መረዳት፣ እንደእኔ ዘግይተህ፣ ከዘገየ እንዳትረዳው ከልቤ እመኛለሁ! በጊዜ ይህን ጥበብ እወቀው! ዕድሜ የሚያስተምረህን፣ በጊዜ፣ በጉብዝናህ ወራት ድረስበት! በነገራችን ላይ - ይላል - ዕድሜ ስለጨመርክ ብቻ ባንዴ እንደ ሽበት አናት ላይ አይወጣም ጥበብ፡፡ ከዕድሜ መጨመር ጋር ባንዴ የሚመጣው የቆዳ መሸብሸብ፣ ወይም የግንባር መስመሮች ናቸው፡፡ ጥበብ አይደለም፡፡ ህይወትን ስትራመዳት እያስተዋልክ ካልተራመድክ፣ በስተመጨረሻ አርጅተህም የምታመጣው ጥበብ የለም፡፡ በእርግጥ መልካም ወይን እያደር ይጣፍጣል ይባላል፡፡ ግን ቀድሞውኑ ወይኑ ጥሩ ወይን ከነበረ ነው፡፡ ስለ ዕድሜና ስለ ጥበብ አንድ የተረዳሁትን ነገር ላካፍልህ፡፡ በህይወት ውስጥ ማንኛውም መማር ያቆመ ሰው ሁሉ፣ ያረጀ ሰው ነው፡፡ ሸምግሏል፡፡ በህይወት እስካለ ድረስ መማሩን ያላቆመ ማንኛውም ሰው ደግሞ፣ ገና ወጣት ነው፡፡ ገና የሚጎናፀፈው ጥበብ አለ፡፡ በህይወት ውስጥ ትልቁ ነገር፣ ጭንቅላትህን ወጣት አድርገህ ማቆየት ነው፡፡ ያንንም ዕድሜ አያግደውም፡፡ ይህን በጊዜ አውቀህ፣ ሁልጊዜ ወጣት ሁን፡፡ ደግሞም ይህቺን የማሃትመ ጋንዲ አባባል አስታውሳት፡፡ ‹‹ምድር የሁሉንም ሰው ፍላጎት ለማሟላት አስፈላጊ የሆኑ ነገሮችን ሁሉ ይዛለች፣ የሁሉንም ሰው ስግብግብነት ለማርካት የሚበቃ ነገር ግን የላትም!››፡፡ እና ይህን ልብ በል፡፡ ‹‹ድሃ የሚባለው ሰው ከአስፈላጊው መጠን በላይ ለማግኘት አብዝቶ የሚፈልግ ሰው ነው፡፡ ይህ ሰው የቱንም ያህል ቢያገኝ ደሃ ነው፡፡ ምክንያቱም ለከት የሌላት ፍላጎቱ፣ በቃኝን አታውቅም፡፡ አጣም አገኘም፣ ሁልጊዜ እንደተራበ ይኖራል፡፡ ደግሞም ስለ ‹‹አካባቢህ›› ትኩረት ስጥ፡፡ በዙሪያህ ካሉ ነገሮች ተማር፡፡ ካለህ ላይ በዙሪያህ ላሉት አቋድስ፡፡ ለብቻህ ኖረህ ብቻህን አከማችተህ በመሞት የሚገኝ ግዑዝ መጋዘንነት እንጂ፣ እውነተኛ ሰብዓዊ ዘላቂ ደስታ የለም፡፡ በእንቅስቃሴዎችህ ሁሉ፣ ለአካባቢህ ንጽህና፣ ለንፁህ ተፈጥሮና፣ ለንፁህ አየር ትኩረት ስጥ፡፡ ‹‹ለሰው ልጅ ጠቃሚው የኋላ ኪሱ እንጂ የከበበው አየር አይደለም!›› ለሚሉት ‹‹ዛሬን በልቼ ልሙት›› ባዮች ጆሮ አትስጥ፡፡ አባባላቸው እንደሚያስኬድና እንደማያስኬድ ሞክረህ ለማየት ከፈለግክ ደግሞ፣ ሩቅ ሳትሄድ፣ የአፍንጫና አፍህን ትንፋሽ ደፍነህ ብርህን መቁጠር ጀምር እስቲ! እስከ ስንት ብር ትቆጥራለህ? ስንት ገንዘብህን ቆጥረህ፣ ስንት ብር ላይ ስትደርስ ነው ትንፋሽ የሚያጥርህ? ከቀላል ነገሮች ጠቃሚ ነገሮችን ተማር! ዕድሜ ያለ ጥበብ፣ ሀብትም ያለ ህይወት፣ ደስታም ያለ ሰው ከንቱ ነው፡፡ ደግሞ ‹‹ሀብት›› ሲባል 5ቱን ሀብቶች አሟልተህ ለማግኘት ራስህን አትጋ፡- 1ኛ/ የቁስ ሀብት (በቂ ገንዘብ ኖሮህ ለመገኘት)፣ 2ኛ/ ማህበራዊ ሀብት (በሰው ዘንድ ታማኝ፣ ቅቡል፣ ደራሽ ሆነህ ለመገኘት)፣ 3ኛ/ የጊዜ ሀብት (የምታስባቸውን ነገሮች ለማድረግ በቂ ጊዜ ያለህ ሆነህ ለመገኘት)፣ 4ኛ/ አካላዊ ሀብት (ጥሩ ጤና ኖሮህ ለመገኘት፣ በቂ ዕድሜ ለመኖር)፣ እና 5ኛ/ መንፈሳዊ ሀብት (እምነት፣ እና ፈሪሀ እግዜር ኖሮህ ለመገኘት) ራስህን አትጋ! እና ከእነዚህ ሁሉ ትጋቶችህ መካከል ደግሞ፣ 1ኛውንና 2ኛውን ብቻ ሰጥቶ የተቀሩትን ከሚነሳህ ሥራም ሆነ የህይወት መንገድ ራስህን ማራቁን እወቅበት!

እና ይመክርሃል! ያቺ በመጨረሻ የምታቃስትባት ቀን ሳትመጣ! በአልጋ የምትያዝባት አይምሬዋ ቀንህ ሳትመጣብህ! ከሥራ ባልደረባህ ጋር እስቲ የልብህን አውራው፡፡ እስቲ አብረህ ሻይ ጠጣ፡፡ እስቲ የልብ ትርታውን ስማው! እስቲ ዙሪያህ ያሉ ሰዎችን አተኩረህ እያቸው፡፡ እስቲ ሁሌ በፊትህ የሚመላለሰውን ችግረኛ ለአንዲት ቀን ቀርበህ በፈገግታ ሠላም በለው፡፡ አብረኸው ቁጭ ብለህ አውጋ፡፡ የህይወት ታሪኩን ጠይቀው፡፡ ... እስቲ ፊትህ የምታያትን ምስኪን ለአንዲት ቀን ስለ ልጇ ትምህርት ቤት ጠይቃት፡፡ አዋራት፡፡ እስቲ የበታች ሠራተኞችህን ስታገኛቸው ጥሩ ስለሆኑባት፣ ጎበዝ ስለሆኑባት አንዲት ጎናቸው አንስተህ አመስግናቸው፡፡ አድንቃቸው፡፡ እስቲ የድሮ ጓደኞችህን አስታውሰህ፣ አፈላልገህ... እንደምንም ለአንዲት ቀን የሻይ ቡና አፍታ ፍጠርና አውራቸው፡፡ ተጫወት የድሮውን እያነሳህ፡፡ ጠይቃቸው ህይወት አሁን እንዴት እንደያዘቻቸው፡፡ ወንድሞችህን፡፡ እህቶችህን፡፡ እስቲ ካሉበት ቀረብ ብለህ፡፡ ካልቻልክም ስልክ ደውለህ፡፡ አውራቸው እስቲ፡፡ እንዴት ናችሁ በላቸው፡፡ እናት አባቶችህን አስታውስ፡፡ እስቲ ለአፍታ ተጫወት የባጥ የቆጡን እያነሳህ፡፡ አብራችሁ ያሳለፋችኋትን ውብ ልጅነት እያሰብክ፡፡ እያነሳህ፡፡ እስቲ ከራስህ ቅፅርና ሰብዕና ወጣ በልና ከጓደኞችህ ጋር የሚሆኑትን ሆነህ፣ ወይ ወደ አንተ ጎትተህ፣ እስቲ አንዲት የጋራ ትዝታ የምትሆናችሁን ደስ የምትል ቀን አሳልፍ፡፡ ክብርህን፣ ዝናህን፣ ኩራትህን እስቲ ለአፍታ እርሳውና እንደ ጓደኛ ተጫወት፡፡ በቃ አውራ፡፡ ለፍልፍ፡፡ ሳቅ፡፡ አንጎራጉር፡፡ ስለ ሰሜን ወይ ስለ ደቡብ አውራ፡፡ ካሻህ ስለ ገነት፣ ካላሻህም ስለ ገሃነም አውራ እስቲ ከሰው ጋር! የምታወራው ስለ ሰማዩ ሆነ ስለ ምድሩ... ዋናው የምታወራው ነገር ሚዛን ላይ አይደለም ዋጋው ያለው! አይደለም! ማውራትህ፣ ከሰው ጋር መጫወትህ፣ ሀሳብህን መጋራትህ፣ ለአንዲት ቀንም ስሜትህን መጋራትህ ነው ዋናው ትልቁ የደስታ ሙላት! አንተ ውስጥህ ያለውን ደስታ ስታወጣው፣ ሌሎችም የየራሳቸውን ያወጣሉ! እነዚያ ቅፅበቶች ናቸው በእውነት የኖርካቸው የደስታ ቅፅበቶችህ! ሌላው የሰበሰብከው ሀብት፣ ያፈራኸው የዚህች ዓለም ቅራቅንቦ ሁሉ... ሁሉም ትርፍ ነው! በዚህች ዓለም ላይ ስትኖር አራት ፈፅሞ ልትረሳቸው የማይገቡ እውነታዎች አሉ፡- 1ኛ/ ልጆችህን ሀብታም እንዲሆኑ አታስተምራቸው! ደስተኛ መሆንን አስተምራቸው! ያን ስታደርግ ልጆችህ ሲያድጉ የነገሮችን ዋጋ ሳይሆን፣ በህይወት ውስጥ ዋጋ ያላቸውን ነገሮች አሳምረው የሚያውቁ ይሆናሉ! 2ኛ/ ወደ አፍህ የምታስገባውን ምግብ ሁሉ፣ ልክ እንደ መድኃኒት ቆጥረህ፣ በጥንቃቄ እየመረጥክ ብላ፣ ጠጣ! ምግብን እንደ መድኃኒት ሳትቆጥር ሁሉን እያግበሰበስክ ብትኖር.. በመጨረሻ፣ መድኃኒቶች ቋሚ ምግቦችህ ይሆናሉ፡፡ መድኃኒትን እንደ ምግብ እየቃምክ ህይወትህን ታገባድዳለህ! 3ኛ/ በሰዎች መካከል ልዩነት መኖሩን ልብ ብለህ አስተውል! አንተን በእውነት የሚወዱህ፣ እና ስላንተ ደስታ የሚጨነቁ ሰዎች፣ ካንተ ጠፍተው አይጠፉም! ባንተ ተስፋ አይቆርጡም! ሁሉነገርህ ተስፋ የሚያስቆርጥ ሆኖ ቢያገኙት እንኳ፣ የሆነች ባንተ ተስፋ የሚያደርጉባትን ምክንያት ያገኙ (እና ካንተ ርቀው ያልራቁ) ሰዎችን የከበረውን የልብህን ክፍል ቆርሰህ ሁልጊዜም በደስታህ ሰዓት አስባቸው! ይበልጥ አስጠጋቸው! ሰው ከሰው ይለያል! 4ኛ/ አንድ ነገር በጣም ልብ ብለህ አስተውል! ባዶ እጅህን ወደዚህች ዓለም ስትመጣ፣ ገና በእንቦቃቅላነትህ፣ ሁሉም ሰው ወዶህ ነው ጨቅላዋን ዕድሜህን ያለፍካት! ባዶ እጅህን ተወልደህ ሳለ፣ ሁሉም ይወድሃል፡፡ ፍቅርን ያዘንብልሃል፡፡ ይሳሳልሃል፡፡ ምንም ባልነበረህ የህይወትህ ጅማሮ ሰዎች ሁሉ በባዶህ እንደወደዱህ አስታውስ፡፡ ደግሞም ስትሞት ስለመለየትህ ብቻ ብለው ሁልጊዜም አንተን በሀዘኔታና በፍቅር የሚያስቡህ ብዙ ሰዎች እንዳሉ እመን፡፡ ሁሉን የዚህችን ዓለም ነገር ጥለህ ባዶ እጅህን በሞት ስታሸልብም አንተን በትዝታቸው የሚያስቡ፣ የሚናፍቁ፣ ክፉህን ማየት የማይሹ፣ ብዙ ሰዎች እንደሚኖሩ እወቅ፡፡ ሁልጊዜ ሀብት ስላለህ ብቻ፣ በቁሳቁስ ስለተከበብክ ብቻ ሰዎች የሚወዱህ ከመሰለህ፣ እነዚህን ሁለቱን አስታውስ፡፡ በእነዚህ ሁለቱ - በውልደትህና በሞትህ ሰዎች ወደውሃል፡፡ ይወዱሃልም፡፡ በሁለቱ መካከል ያለውን ጊዜ እንዳጀማመርህና እንዳጨራረስህ አሳምረህ መጠቀም ያንተ ፋንታ መሆኑንም ሁልጊዜ አስታውስ! በመሐል ባለው መንገድህ ይቺን የቆየች ምክር አትርሳት፡- ‹‹ቅርብ አዳሪ ብቻውን፣ ሩቅ አዳሪ ግን ከሰው ጋር ይሄዳል!›› በመጨረሻም ለሰው ልጆች ሁሉ በፈጣሪ በነፃ የተበረከቱለት፣ እና በምንም ውድ ዋጋ የማይተኩ፣ በዚህ ዓለም ላይ የሚገኙ 6ቱ እጅግ የረቀቁ፣ የመጠቁ ዶክተሮች እነዚህ ናቸው በማለት ይደመድማል ነገሩን (የህይወት ልምዱን፣ በጎ ምክሩን)፡- ዶክተር ቁጥር 1፦ የፀሐይ ብርሃን! ዶክተር ቁጥር 2፦ ዕረፍት! ዶክተር ቁጥር 3፦ የአካል እንቅስቃሴ! ዶክተር ቁጥር 4፦ ጤናማ አመጋገብ! ዶክተር ቁጥር 5፦ በራስ ማመን! ዶክተር ቁጥር 6፦ ጓደኞች! እኔ ደግሞ ደራሲው ቀድሞ አንስቶ የረሳውን፣ ከሁሉ የቀደመውንና ከሁሉም የሚከተለውን የመጨረሻውን እጅግ የረቀቀ 7ኛውን ዶክተር ስም ጠርቼ ልሰናበት፦ ዶክተር ቁጥር 7፦ ፈጣሪ አምላክ! ኤልሻዳዩ! ሁሉን ቻዩ! የምድር የሠማይ ጌታ! ደራሲውን አመሰገንኩ፡፡ ትዕግሥት የተላበሱ አንባቢዎችንም አመሰገንኩ፡፡ (በአሰፍ ሃይሉ)

ለአንድ ግለሰብም ሆነ ኅብረተሰብ፣ ቤተሰብም ሆነ አገር የዕድገትም ሆነ የውድቀት ቁልፉ መሬቱ ሳይሆን አዕምሮ ላይ ነው። መሬቱ የሚቆለፈው የሰው አዕምሮ ሲቆለፍ ነው። አንድ ሰው አዕምሮው ሲከፈትለት ሁሉ ነገር ይከፈትለታል። የአንድ ሀገር ሕዝብ አዕምሮው ሲቆለፍ፣ ሁሉ እያለው ምንም እንደሌለው ሁሉም ነገር ይዘጋጋል። .... ሌብነት ብትይ ሙስና፣ አምባገነንነት ብትይ ጦርነት፣ ዘረኝነት ብትይ የሐይማኖት ግጭት፣ ሁሉም የአዕምሮ መቆለፍ ምልክት ናቸው። ስለዚህ አሁን አንገብጋቢውና ትልቁ ቁም ነገር መንገድ መሥራት ወይም ሕንጻ መገንባት ሳይሆን ይህንኑ ማድረግም ሆነ በተሰራው በቅጡ መጠቀም የሚቻለው የሰው አዕምሮ ሲከፈትና ከተኛበት የዘመናት እንቅልፍ ሲነቃ ብቻ መሆኑ ላይ ነው።" ... ምንጭ:- "የተቆለፈበት ቁልፍ" በምሕረት ደበበ (ዶ/ር) ይህን ሃሳብ አስተማሪ ሆኖ ካገኛችሁት በርካቶች ይማሩበት ዘንድ #like #copylink #share ማድረግን አትርሱ

አንድ እጅግ በስጦታዎች የተሞላ ጠንካራ ገበሬ ነበር። እናም አንድ ቀን አምላክ ለዚህ ገበሬ ተገልጦ ሶስት ምኞቶችን ሊያሳካለት እንደሚችል ነገረው። ነገር ግን አንድ መደራደሪያም አቀረበለት። ለእሱ የሰጠውን ለጎረቤቱ እጥፍ አድርጎ ለመስጠት። ገበሬው እየፈራም ቢሆን መቶ ከብቶችን እንዲሰጠው ተመኘ። ወዲያው መቶ ከብቶች አገኘ፤ ባየው ነገርም እጅግ ተደሰተ። ጎረቤቱ ሁለት መቶ እንደተሰጠው ሲያይ ግን ደስታው ሁሉ ጠፋ። ስለዚህ መቶ ካሬ መሬት እንዲሰጠው ጸለየ፤ አሁንም ጎረቤቱ የእሱ እጥፍ እንደተሰጠው እስኪያይ ድረስ ተደስቶ ነበር። ይህ ቅናት ያንገበገበው ገበሬ በተሰጠው ነገር ከመደሰትና የአምላኩን ደግነት ከማድነቅ ይልቅ በመበለጡ እጅግ ተከፋ። ብዙ ነገርም አሰበ፤ አንድ ምኞት እንደቀረው ያውቃል፤ በሚቀጥለው ምኞቱም መበለጥ አልፈለገም። የመጨረሻና ሶስተኛ ምኞቱም አንድ ዓይኔን አጥፋልኝ የሚል ሆነ። አምላክም በገበሬው ድርጊት እጅግ አዘነ። ሕይወት ፉክክር አይደለችም። የአንተ በረከት ያንተ፣ የሌላው ደግሞ የሌላው ነው። ባለህ፣ ባገኘኸውና በተሰጠህ ተደሰት፣ አመስግን እንጂ የሌሎችን እያየህ አትቅና። ቅናት እውር ያደርጋል። የራስን ጸጋ እንዳያዩ ይከለክላልና ራስህን ከአጉል ቅናት ጠብቅ። አስተማሪ ሆኖ ካገኛችሁት ሌሎችም ይማሩበት ዘንድ #like #repost #copylink #share እያደረጋችሁ🙏

ቻርሊ ቻፕሊን አንድ ቀን ህዝብ ተሰብስቦ ወደሚጠብቀው አዳራሽ አመራ። በጭብጨባ ከተቀበሉት በኋላ ወደ መድረክ እንዲወጣ ተጋበዘ። #በመጀመርያ የሚያምር ቀልድ ነገራቸው። አዳራሹ በፉጨት ተቀወጠ በሳቅ ደመቀ። ከዚያም ያንኑ ቀልድ #ለሁለተኛ ጊዜ ደገመላቸው። ግማሾቹ ሳቁ፤ ግማሾቹ ደግሞ ግራ ተጋቡ.... #ለሶስተኛ ጊዜ አሁንም ያንኑ ቀልድ ደገመው። በዚህ ጊዜ ግን አንድም የሚስቅ ሰው አልነበረም። ያኔ ቻርሊ በጣም ደስ አለው። ከዛም የሚከተለውን ንግግር ተናገረ.. "በአንድ ቀልድ ደጋግማችሁ እንደማትስቁ ሁሉ ስለምን በአንድ ነገር ደጋግማችሁ ታለቅሳላችሁ? ህይወትኮ እጅግ ውብ ናት" ዛሬ በህይወት ካላችሁ ነጋችሁን ማስተካከል ትችላላችሁ። በትላንት ውስጥ ስላጣችሁት ነገር አታስቡ ዛሬን ብቻ በህይወት በመኖራችሁ ፈጣሪን አመስግኑ። ዛሬ ጠንካራ ከሆናችሁ ነጋችሁ የተዋበ ይሆናል፤ ነጋችሁ የሚጥም ይሆናል። አሁንም አሁንም አሁንም በህይወት መኖራችሁን ብቻ እያያችሁ ፈጣሪን አመስግኑ! #ወዳጆቼ ከተሰጠን ስጦታዎች ሁሉ ህይወታችን ይበልጣልና በህይወት ካላችሁ በነጋችሁ ላይ ለውጥ መፍጠር ትችላላችሁ።" --------------------------------- አስተማሪ ሆኖ ካገኛችሁት ሌሎችም ይማሩበት ዘንድ #copylink #share ማድረግን #አትርሱ🙏

ይህን ማስፈንጠሪያ/link 👉👉👉 https://www.tiktok.com/@ethio_bookbites?_t=8nnEnT1iW0r&_r=1 መጫን ብቻ!

👉👉https://vm.tiktok.com/ZMrkqMpBG/

በቅርብ ቀን የተመረጡ መፃሕፍትን በቀላሉ ልትረዷቸው በምትችሉበት አቀራረብ መዳሰስ የምንጀምርባቸውን ገፆች በመቀላቀል ቤተሰብ ሁኑ! ታተርፋላችሁ! tiktok 👉 https://www.tiktok.com/@ethio_bookbites?_t=8ndJ7sINvHR&_r=1 Youtube 👉 https://youtube.com/@ethio_bookbites?si=3Esv5XyHqVZCDBk-