طبٌّ وأشياءٌ أخرى.

جرّبت قبل كده تحمد ربنا على نعمة إحساسك بالألم وإن عينك دمّعت أو فضلت ترمش؟ كلنا بنتضايق لما يحصلنا كده بس الفكرة بقى إن اللي مضايقك دا غالبًا هو السبب إنك لسه شايف لحد دلوقتي سُبحان الله! تخيل تبقى عينك بتتجرح وتتآكل وفيها قرحة خطيرة، وأنت مش حاسس بأي ألم! مرعب صح؟ بس دا فعلًا اللي ممكن يحصل للناس اللي فقدوا الإحساس في قرنية العين - ربنا يشفيهم ويعافينا - القرنية من أكتر الأماكن الحساسة في جسم الإنسان لإنها مليئة بالأعصاب لدرجة إن لو رمش واحد دخل في عينك أو ذرة تراب صغيرة تخليك تدمّع وتقفل عينك بسرعة غصب عنك وتبقى هتتجنن لحد ما تخرج .. وسبحان الله الإحساس بالألم دا نعمة كبيرة جدًا لإن لو مافيش ألم، الحاجة الصغيرة اللي دخلت عينك دي تفضل جوا وتعمل التهابات لحد ما الشخص ممكن يخسر جزء من نظره وهو أصلًا مش حاسس بحاجة! فالمرة الجاية لما الألم يضايقك جامد، احمد ربنا و افتكر إن فيه ناس نفسها تحس بالألم دا، لأن غياب الألم عندهم كان أخطر بكتير من وجوده ..

وعن أنس رضي الله عنه، أن النبي ﷺ قال: «قالَ اللّٰه: إِذَا ابْتَلَيْتُ عَبْدِي بحَبِيبَتَيْهِ فَصَبَرَ، عَوَّضْتُهُ منهما الجَنَّة» ( وحبيبتاه هما عيناه، وسميتا بذلك لأنهما أحب أعضاء الإنسان إليه وأغلاها عنده ) في القرآن والسُّنة ما يدل على علو قدر نعمة العين، وعلى عِظم البلاء في فَقدها، حتى إن اللي بيصبر على الابتلاء ده، ربنا بيعوّضه بالجنة جزاءً لصبره واحتسابه! ربنا يُعيننا على شُكره وحمده على نِعمه، كما ينبغي لجلاله وكماله.. وما تنسوش تدعولنا امتحان الراوند يعدي على خير

بمناسبة إننا بنودّع الرمد خلاص «ي ألف بركة» 🌹 لو خرجنا من الراوند ده بحاجة واحدة، فهي إن العين من أجلّ وأعظم النِعم اللي ربنا وهبها لينا! عندك عين شكلها جميل، وفي مكانها الطبيعي.. مش بتوجعك، وبتشوف بيها كويس.. الصورة عندك واحدة مش مزغللة، ومظبوطة ومفهومة.. الألوان واضحة، ومجال رؤيتك واسع.. كل تفصيلة من دول، فيه غيرك فاقدها «ومنهم حياته واقفة» وبيجيلنا المستشفى علشان نساعده يرجع طبيعي تاني -بإذن اللّٰه- كل دول نِعم مش نعمة واحدة! تستحق منك الحمد والشُكر مرة واتنين وعشرات المرات.. ربنا لما عدّد نِعم أنعمها على بني آدم في سُورة البلد بدأها بالعينين: ﴿ أَلَمْ نَجْعَلْ لَهُ عَيْنَيْنِ ۝ وَلِسَانًا وَشَفَتَيْنِ ۝ وَهَدَيْنَاهُ النَّجْدَيْنِ ﴾

ذكّرني بحديث الرسول ﷺ: ​"مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى" مثل الجسد إذا اشتكى منه عضو، تداعى له سائر الجسد! سبحان الله على الوصف، الاستجابات المناعية في جسمنا بتكون systemic بتشمل الجسم كله، علشان مافيش خلية معزولة عن التانية! لدرجة إن العين السليمة اللي ما لمسهاش الجرح، تألمت وخدت رد فعل لإنها بتشترك مع أختها في نفس الجسد ونفس الدم ونفس الهوية.. زي المؤمن كده، يكون آمِن في بيته، ولكنه يتألم لحال أخيه المؤمن المستضعف، لإن بتجمّعهم رابطة العقيدة اللي أقوى من رابطة الدم!! فما تنسوش أخواتنا في غـ.ـزة من دعواتكم، الواحد حزين على وضعهم، ومش عارف يعمل إيه غير الدعاء ليهم! وبفكّركم بالمقاطعة، والصدقات للمؤسسات المضمونة اللي بتوصّلهم مساعدات..

بمناسبة آخر يوم حضور هشارككم وقفة من وقفات الرمد ☝🏻 في شابتر التروما (اللي جابلي تروما) حالة طبية مُذهلة بنسمّيها التهاب العين التعاطفي (Sympathetic ophthalmitis) ودي بتحصل لما عين واحدة بتتعور بسبب خبطة شديدة فيها أو جرح عميق، فبيحصل رد فِعل من الجسم وبيظهر عليها التهابات واحمرار ودموع ورؤية ملغوشة.. الغريب فين بقى؟ إن دكتور العيون لما بيفحص العينين بيلاقي فيهم نفس الأعراض بالظبط! كأن التانية "السليمة" اتخبطت هي كمان! اللي حصل ده ليه تفسير عِلمي.. لما العين اتخبطت، ده أدى إلى إن بروتينات مُعينة كانت في العين، اتزحزحت من مكانها ووصلت الدم،وهي كانت معزولة عنه، فالمناعة مش عارفاها وبالتالي اعتبرتها أجسام غريبة لازم تتخلص منها قبل ما تضر الجسم.. فالمناعة بدأت تثور وتفور، وتهاجم البروتينات دي، اللي وصل منها للدم، والمتبقي في العين المُصابة، وحتى اللي موجود في العين السليمة! الجسم فهم إن البروتينات دي حاجة غريبة ومُؤذية لـ "جزء منه" وبالتالي بقت عدو للجسم كله ولازم يتخلص منها.. عدو "الجزء" منه، عدوّه كله!

نيجي لتفصيلة مهمة جدًا .. وهي إن الـ Blinking بيتم بسرعة جدًا جدًا جدًا، بياخد أجزاء من الثانية.. تصميم رباني علشان المُخ ما يلحقش يترجم القَفلة دي إنها ضلمة، فما يقطعش الصورة أو يعطّل مجال الرؤية المُستمر.. سبحان اللّٰه! ​ده ياخدنا لآيتين اتذكر فيهم سرعة الرَمش: «وَمَا أَمْرُ السَّاعَةِ إِلَّا كَلَمْحِ الْبَصَرِ أَوْ هُوَ أَقْرَبُ إِنَّ اللَّهَ عَلَى كُلِّ شَيْءٍ قَدِيرٌ» ​يوم القيامة هييجي أسرع مما تتخيل، كأنك رمشت عينك وفتحتها .. مش هتلحق تُدرِك من سرعته إنه جه! «وَمَا أَمْرُنَا إِلَّا وَاحِدَةٌ كَلَمْحٍ بِالْبَصَرِ» اللّٰه إذا أراد شيئًا يقول له كُن، فيكون في لمح البصر! سبحانه قادر لا يُعجزه شيء.. مُنبهرة إن ربنا وصفهم برَمش العين لإنه من أسرع الحاجات المرئية اللي ممكن نستوعبها بمحدودية عِلمنا كبشر! ربنا يجعل علمنا سبب في زيادة إيماننا وفهمنا للقرآن ولعظيم آياته! 💕

​ربنا ﷻ خلقلنا فسيولوچية العين مُتكاملة وبتحافظ عليها، اللي من ضمنها: حركة الـ Blinking = رَمش العين ​حركة بسيطة، سريعة، ومزيج بين الإرادي واللا إرادي مش بنحس بيها تقريبًا .. بس بدونها تحصل مشاكل! وده ياخدنا لسؤال مهم، إيه فايدة الـ Blinking؟ ​دموعنا عبارة عن 3 طبقات (ومترتبين بمنتهى الروعة، سبحان الله!) مُهمة الـ Blinking بقى إنه يدمج الـ 3 طبقات دول ويوّزعهم بالتساوي على القرنية؛ علشان يحميها من الجفاف والالتهابات.. ​وكمان بيعمل تنضيف سريع لأي ميكروب أو تراب دخل العين، مع كل قفلة للعين بيتسحبوا في القنوات الدمعية ونتخلص منهم وترجع عيننا نضيفة.. ​المهم بقى إيه؟ ربنا خلقنا بنرمش من 15 لـ 20 مرة في الدقيقة .. لو قلّوا عن كده، بنفقد الدور اللي بيعمله، وبالتالي يحصل جفاف في العين، والتهابات، واحمرار، وشعور بإن فيها رملة! ​ده بالظبط اللي بيحصل لو حد قعد مركز في حاجة جامد لدرجة إن الـ Blinking ممكن ما يحصلش لدقايق! زي اللي بيقعدوا قدام الشاشات كتير وهم مُندمجين.. العين بتوجعنا هنا علشان مش بنرمش، مش لأن الشاشات بتطلع أشعة وبتوجعلنا عينينا والكلام ده (بنلعب في الأساسيات اللي اتربينا عليها 🤏🏻)

عيد أضحى مُبارك عليكم جميعًا 🤎 ينعاد عليكم بالخير واليُمن والبركات، ووسط كل حبايبكم 🤎 أحيوا سُنَّة التَكبِير، أحيوا تكبِيرَات العِيد ( ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ )

ما تنسوناش من صالح دعائكم ي شباب 💕

​﴿ اللَّهُ الَّذِي خَلَقَكُم مِّن ضَعْفٍ ثُمَّ جَعَلَ مِن بَعْدِ ضَعْفٍ قُوَّةً ثُمَّ جَعَلَ مِن بَعْدِ قُوَّةٍ ضَعْفًا وَشَيْبًا ۚ يَخْلُقُ مَا يَشَاءُ ۖ وَهُوَ الْعَلِيمُ الْقَدِيرُ ﴾

من كام يوم قرأت حديث ​ "نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ: الصِّحَّةُ وَالْفَرَاغُ" ولفتني إن النعمتين دول تحديدًا من النِعم اللي بتقل وتفنى مع الوقت، ووقت ما هتروح مش هترجع تاني.. فتلاقي عندنا في الدين، نصح مُستمر لاستغلال فترة الشباب والصحة ​"اغْتَنِمْ خَمْسًا قَبْلَ خَمْسٍ: شَبَابَكَ قَبْلَ هَرَمِكَ، وَصِحَّتَكَ قَبْلَ سَقَمِكَ، وَغِنَاكَ قَبْلَ فَقْرِكَ، وَفَرَاغَكَ قَبْلَ شُغْلِكَ، وَحَيَاتَكَ قَبْلَ مَوْتِكَ"

​النهاردة الدكتور كان بيشرحلنا محاضرة الـ Cataract (المايّة البيضا على العين) ومن ضمن أنواعها Senile Cataract، وكلمة Senile معناها إنه مرتبط بتقدُّم السِّن ​علميًا مع مرور السنين، عدسة العين بتفقد شفافيتها تدريجيًا نتيجة تغيُّرات بيولوجية واستهلاك بروتينات العين.. ​الدكتور ختم شرح الجزئية دي بآية: ﴿ومَن نُّعَمِّرهُ نُنكِّسهُ في الخَلقِ أفلا يَعقِلون﴾ ​في التفسير المُيّسر: «ومن نُطِلْ عمره حتى يهرم نُعِدْه إلى الحالة التي ابتدأ منها حالة ضعف العقل وضعف الجسد، أفلا يعقلون أنَّ مَن فعل مثل هذا بهم قادر على بعثهم؟» ​لفت نظري دِقة الوصف .. سبحان اللّٰه! أطراف الأعمار (الأطفال الصغيرين والناس الكُبار) هم أكتر فئتين ضُعفاء وبالتالي عُرضة للكثير والكثير من الأمراض.. بنبدأ حياتنا بضعف وبِنية ومناعة لسه ما اكتملوش، بعدين نوصل لقمة القوة والصحة في الشباب، ثم نرجع تاني للشيخوخة بنفس الضعف الأولاني ولكن لأسباب مختلفة! ​ده بالظبط "الانتكاس في الخلق" اللي ربنا ﷻ وصفه في كتابه! ذِكر الدكتور للآية في الموضع ده، خلانا نشوفها من جانب طبي وإيماني جميل! ربنا يُعلمنا ما ينفعنا وينفعنا بما علّمنا ويزيدنا به عِلمًا! 💕

من كام يوم قرأت حديث ​"نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ: الصِّحَّةُ وَالْفَرَاغُ" ولفتني إن النعمتين دول تحديدًا من النِعم اللي بتقل وتفنى مع الوقت، ووقت ما هتروح مش هترجع تاني.. فتلاقي عندنا في الدين، نصح مُستمر لاستغلال فترة الشباب والصحة ​"اغْتَنِمْ خَمْسًا قَبْلَ خَمْسٍ: شَبَابَكَ قَبْلَ هَرَمِكَ، وَصِحَّتَكَ قَبْلَ سَقَمِكَ، وَغِنَاكَ قَبْلَ فَقْرِكَ، وَفَرَاغَكَ قَبْلَ شُغْلِكَ، وَحَيَاتَكَ قَبْلَ مَوْتِكَ"

لسه عارفة المعلومة دي دلوقتي إن الموضع الوحيد اللي تقدّم فيه البصر على السمع موجود في سورة السجدة الآية رقم 12: "وَ لَوْ تَرى‏ إِذِ الْمُجْرِمُونَ ناكِسُوا رُؤُسِهِمْ عِنْدَ رَبِّهِمْ رَبَّنا أَبْصَرْنا وَ سَمِعْنا فَارْجِعْنا نَعْمَلْ صالِحاً إِنَّا مُوقِنون " يعني حاسة البصر هتعمل قبل السمع يوم القيامة، الإنسان هيرىٰ الأهوال وبعد كده لا يسمع إلا همسًا سبحان الله! جزىٰ الله خيرًا من ذكّرني بها ..

الحديث بيشرح حقوق المسلم على أخيه شرحه له معنى قريب من اللي بتناقش فيه المسلم مرآة المسلم معناها شامل وواسع، وهي إنك شايفه حاسس بإيه، عامل ازاي، وضعه إيه، وبناءً عليه تاخد رد فِعل، تنصحه، تنهيه عن منكر، تأمره بمعروف، تقضيله حاجة.. طب بناءً على إيه؟ بالرابطة اللي تجمّعكم كما ذكر الرسول ﷺ = الأخوة بما تقتضيه من محبة وإيثار ورحمة، مش مصلحة ولا زمالة وآخر جملتين شاملين لكل اللي المفروض تعمله.. يسد الخلل في حالة غياب أخيه ويحميه من كل الجوانب!

وأنا قاعدة كده افتكرت معلومة قالها لينا دكتور نفسيّ في أول محاضرة نفسيّة.. فيه نوع أعصاب عندنا اسمها mirror neurons = الأعصاب المرآتية بتشارك في ترجمة وانتقال إحساس اللي قدامك ليك ازاي؟ تشوف حد متضايق، متعصب، بيضحك، بيعيط ينتقلك الإحساس وتفهمه وبناءً عليه تاخد رد فعل صح.. نوع الأعصاب ده أحيانًا بيكون فيه خلل عند مرضى التوحد -ربنا يعافي مرضاه- فما ينفعش في تعاملاتنا معاهم تكون بالعصبية أو أي رد فعل عنيف نهائي، لإنهم مش هيفهموا إنك اتعصبت = إذًا ده غلط وماينفعش أعمله! هم مش مُدركين ده، بالعكس ممكن يقلب معاهم بخوف وشعور بعدم أمان وهم مش فاهمين ليه.. المهم بقى إيه إن بعض الناس ( الحسّاسين ) عندهم الجزء ده بيشتغل بكفاءة ومهارة فتلاقيهم أسرع وأفهم ناس يقدروا يلقطوا اللي قدامهم حاسس بإيه وبيعرفوا ياخدوا رد فعل سريع ومناسب قبل أي حد، لدرجة اللي قدامهم ممكن يستغرب ازاي لاحظوا؟ فسُبحان اللّٰه هي نعمة مَنّ اللّٰه عليهم بها.. المعلومة فكّرتني بحديث للرسول ﷺ: ​"المؤمنُ مِرآةُ المؤمنِ، والمؤمنُ أخو المؤمنِ، يَكُفُّ عليه ضَيْعتَه، ويَحوطه من ورائِه"

كل مرة هتقرأ القُرآن هتكتشف إن مافيش حاجة كده وخلاص! ربنا لما قال في كتابه العزيز: " إن السمع والبصر والفؤاد كل أولئك كان عنه مسؤولا " ذكر السمع قبل البصر وترتيب السمع قبل البصر في الآية دا اللي بيحصل فعلًا، الإنسان بيكتسب حاسة السمع قبل البصر سبحان الله! خدنا معلومة إن الـ cochlea (القوقعة) الموجودة في الأذن الداخلية والمسؤولة عن السمع بتكون موجودة وقادرة تشتغل - إلى حد ما - أثناء التكوين الجنيني للإنسان! يعني البيبي بيسمع وبيحس بالأصوات اللي حواليه وبيرتبط بصوت مامته على وجه الخصوص لإنه بيسمعه كتير من قبل ما يتولد سبحان الله! ودا بيحصل قبل حاسة البصر اللي بتكون شغالة بعد الولادة، يعني أول حاجة بتواجه بيها الدنيا هي السمع مش البصر ودا اللي موجود دايمًا على الترتيب في القرآن سبحان الله! “وجعل لكم السمع والأبصار والأفئدة” (سورة النحل: 78) “وهو الذي أنشأ لكم السمع والأبصار والأفئدة” (سورة المؤمنون: 78) “ختم الله على قلوبهم وعلى سمعهم وعلى أبصارهم غشاوة” (سورة البقرة: 7) “قل هو الذي أنشأكم وجعل لكم السمع والأبصار والأفئدة” (سورة الملك: 23 ) سُبحانك ربنا! 💗

كل مديول / راوند بستتقل محاضرة الـ Tumors = الأورام! مرض زي الكانسر بيشقلب حياة الواحد ١٨٠ درجة أنا كدكتور هقوله أو لأهله خبر زي ده ازاي؟ ولا ما أقولش أساسًا؟ أصل هقول إيه بجد؟ ( الخبر نفسه بيبقى صعب على اللي بيقوله مابالك باللي هيسمعه؟ ) بحسني خارجة من المحاضرة دي مُستهلكة نفسيًّا من كَم المشاعر التقيلة اللي بحس بيها، ولا مرة عدت عادي كده.. من رحمة ربنا بينا إن ميعاد وفاتنـ.ـا لا يعلمه إلا هو! ﴿ اللّٰه يتوفى الأنفس حين موتها والتي لم تمت في منامها فيُمسك التي قضى عليها الموت ويُرسل الأخرى إلى أجل مُسمى.. ﴾ تخيّل لو عارف ميعاد أجلك؟ متهيألك بقى إنك هتعيش حياتك بالطول والعرض وتيجي قبله بكام يوم ما تخرجش من المسجد، وتعمل كل الطاعات اللي تقدر عليها وزيادة؟ بالعكس، هتلاقيك عايش في ترقُّب وخوف وانتظار، لوفاتك أو وفاة عزيز عليك وهتفضل مركز كل ما الميعاد يقرب ومش عارف تعيش من أساسه! الحمد للّٰه، كل تفاصيل ديننا من أكبرها لأصغرها فهي رحمة لينا، وأمثل حاجة لبشريتنا يجي ختام الآية .. إن في ذلك لآياتٍ لقومٍ يتفكّرون! ربنا يشفي ويعافي كل مريض ولا يُرينا مكروهًا في أحبابنا

وأنا بذاكر ENT لفتت نظري معلومة.. إن عضمة الـ Stapes هي أصغر عضمة في الجسم لا تتعدى المللي مترات ومع ذلك بتقوم بأهم دور في عملية السمع! بتنقل الموجات الصوتية اللي جاية من برا للقوقعة اللي بعد كده بتتحول لإشارات كهربية توصل للمخ.. العضمة الصغيرة دي بتقوم بدور كبير في حاسة السمع اللي هي من أهم الحواس للتواصل مع اللي حواليك.. بدونها حرفيًا الإنسان أصمّ! سُبحان مَن جعل في أصغر تفاصيلنا آية عظيمة! سُبحان مَن قال وقوله الحق: "إنّا كل شيءٍ خلقناه بقَدر" 💗

من كام يوم كنا بناخد الـ otalgia = وجع في الودن اللي ليه أسباب كتيرة بالمناسبة بس من أشهر الأسباب هي دخول المية في الودن اللي بيخلي البيئة اللي جوا رطبة ومثالية لنمو البكتيريا والفطريات وبالتالي التهابات.. فاستحضرني إن في مجالس الفِقه الأُولىٰ كانت عن الطهارة والوضوء اتذكر إن المسح على الأذن مُستحب عند الجمهور والطريقة الصحيحة في حديث ابن عباس في وصفه لوضوء الرسول ﷺ: أن النبيّ ﷺ مسح رأسه وأذنيه: داخلهما بالسبابتين، وخالف بإبهاميه إلى ظاهر أذنيه. بالسبابة بنمسح الجزء الخارجي اللي هي التعرجات الخفيفة اللي برا، لكن مش بندخّله جوا، وبالإبهام المنطقة اللي ورا الودن.. قلت أقلكم وتاخدوا بالكم زيادة، علشان شوفت ناس بتدخّل مية جوا ودانها بجد، بتعاملها معاملة الاستنشاق 🫠 فده مش من صفات الوضوء + مُضر جدًا جدًا جدًا للودان خاصة مع تكرارها في كل وضوء..