WEB CODES

QULLIK RAMZLARIGA QAYTISHGA YO‘L YO‘Q! O‘zbekiston mustaqillikka erishganiga 34 yil to‘ldi. Bu vaqt xalqimiz uchun erkinlikning, orzularimizning, tarixiy haqiqatimizning tiklangan yillaridir. Ammo afsuski, bugun ham ayrim kishilar mustaqillikning qadriga yetmayapti. Ular bilib-bilmay, ba’zan ataylab sobiq SSSRni ideallashtirishga urinadi. Eng achinarlisi, mustaqillik yillarida tug‘ilgan yoshlar ham shu yolg‘on tasavvur domiga tushib, terror tuzum ramzlarini kiyib ko‘chada yurmoqda. Aslida SSSR nima edi? U qon ustiga qurilgan, millionlab begunohlarning hayoti evaziga shakllangan tuzum edi. Fuqarolar urushi, milliy ozodlik harakatlari – barchasi qon bilan bostirildi. Bizning yurtda ham ozodlik uchun kurashgan qahramonlar “bosmachi” deb ataldi. O‘z xalqini aldash, tarixni soxtalashtirish – bu tuzumning siyosiy quroliga aylangan edi. Keyin esa kollektivlashtirish balosi boshlandi. Dehqonning qo‘lidagi borini tortib olishdi, xalqni ochlikka mahkum qilishdi. Millionlab odamlar nobud bo‘ldi. Bu kamlik qilgandek, butun ziyolilar, olimlar, fermerlar, hunarmandlar, vatanparvar harbiylar “xalq dushmani” deya qatag‘on qilindi, otilib o‘ldirildi yoki surgun qilindi. Qonxo‘r siyosat oqibatida xalqning bilimli qatlami yo‘q qilindi. Bu jinoyatlar Ikkinchi jahon urushi paytida ham o‘zini ko‘rsatdi: kadrlar yetishmasligi sababli mislsiz yo‘qotishlarga duch kelindi. SSSR mintaqamiz uchun faqat ochlik va qatag‘on emas, balki ma’naviy qullikni ham olib keldi. Alifbomiz necha bor o‘zgartirildi, xalqning xotirasi uzildi. Maktab o‘quvchilari paxta dalasiga haydaldi. “Oq oltin” deya paxtaga sig‘inish oqibatida Orol dengizi quridi, butun dunyoni larzaga solayotgan ekologik falokat yuz berdi. Endi savol: bugun mustaqillikning 34-yilligida SSSR emblemasini kiyib yurish nimani anglatadi? Bu – xalqimizning qonli tarixini oyoq osti qilishdir! Bu – ozodlik uchun jon bergan avlodlar xotirasini haqorat qilishdir! Bu – qullik kishanlarini yana qo‘lga olishdir! “Bu mening tanlovim”, deydiganlarga savol: begunoh millionlarning qoni evaziga qurilgan terror ramzini targ‘ib qilish qanday qilib “tanlov” bo‘lishi mumkin? Qanday qilib ozodlik farzandi bo‘lib turib, qullik timsolini ko‘tarib yurish mumkin? Yo‘q! Biz bunga befarq bo‘lolmaymiz. Bu nafaqat Milliy gvardiya yoki ichki ishlar masalasi – bu har bir fuqaroning burchidir. Mustaqillikka qarshi har qanday ramzga, har qanday targ‘ibotga qarshi turish – milliy g‘ururimizni asrashdir. Unutmang: biz mustaqil O‘zbekiston farzandlarimiz. Mustaqillik – bu millatning or-nomusi va kelajagi, SSSR esa xalqlarni qullikka, ochlikka va qirg‘inga mahkum etgan qonxo‘r imperiya sifatida abadiy la’nat ostida qoladi! 👉 @Jasur_Usmon