تنمية وردية"🌸💗

شوفتي الواد وشقاوته بيضر. بني في بطني إزاي! الجملة دي سلفتي مكنتش بتبطل تقولها في وشي طول فترة حملها وده عشان أنا معايا أربع بنات.. كنت بشوف اللي بتعمله معايا من هنا وأقعد أعيط لتاني يوم! كنت بحس بنقص من ناحيتها رهيب.. فكنت طول الوقت حاسة بغصة في قلبي.. مع إني بحب بناتي ومدلعاهم وجوزي مش فارق معاه فـ تقريبًا هي حاسة إن معاملة جوزي ليا ومعاملتي لبناتي قد إيه حلوة فبتطلع العُقد دي عليا.. كأنها بتقولي: إنتي إزاي مخلفة بنات ومتشالة فوق الراس وأنا مخلفة لجوزي السند والضهر ومبهدلني كدا؟ فضلت تزيد في تصرفاتها لحد ما اتخانقت معاها فقالتلي في نص الخناقة: يلا ياللي بطنك صحرا فاضية.. ومش عارفة تجيبي حتة عيل. فضلت صابرة لحد ما جيت في يوم وإيماني ضعف ورفعت إيدي للسماء ساعة الفجر وقولت: يارب حتة عيل.. نفسي أحس أني أم لطفل ولد حتى لو لمدة إسبوع واحد يارب. وفعلاً حملت في الولد.. وفرحت بيه جدًا، بس جه يوم السبوع ومات!!! ساعتها إفتكرت دعوتي وأنا بقول: نفسي ترزقني طفل لو لمدة إسبوع واحد؟ جه على بالي واحدة ست كانت كل ما تدعي لنفسها تقول: يارب ارزقني فلوس كتير ومش عاوزة حاجة تاني! ربنا رزقها بفلوس كتير أوي بس ولادها وجوزها عملوا حاد.ثة وإتوفوا .. هي دلوقتي معاها فلوس بس عايشة وحيدة وحزينة! كان في شيخ بيقول: لما تيجوا تطلبوا من ربنا خلوا طلبكم بكرم وعشم.. بلاش تقشف في الدعاء.. إنت بتطلب من العزيز الكريم! لما تقول لربنا إرزقني كذا بس يارب.. دي رؤية محدودة جدًا عن كرم ربنا.. لما تدعي قوله يارب نفسي في كذا وكذا وكذا وقول كل اللي في نفسك.. اطمع في كرمه هيزيدك ويرزقك! إنت مش بتتعامل مع إنسان هيرد حاجتك ولا هيشوفك شخص طماع.. ولله المثل الأعلى. إنت بتتعامل مع ربنا.. رب عظيم بيفرح بعبده اللحوح. بخيلٌ يطلب من كريمٍ فيُرد خائبًا وكريمٌ يطلب من كريمٍ فيرزقه المطلبِ ♥ #عزة_العمروسي