Жастар Рухы

«Таза QAZAQSTAN» жобасы Қытайдағы халықаралық алаңда таныстырылды. «Жастар Рухы» Жастар қанаты жүзеге асырып жатқан «Таза QAZAQSTAN» Road-эстафетасы жобасы Қытайда өткен Acceleration Week for Global Youth Development Programs халықаралық бағдарламасында таныстырылды. 11–17 маусым аралығында ұйымдастырылған ауқымды бағдарламаға әлемнің 100-ден астам елінен келген 200-ге жуық жас көшбасшы, халықаралық сарапшылар және әлеуметтік жобалардың жетекшілері қатысты. Бағдарлама аясында қатысушылар Сиань, Шанхай, Ухань және Бейжің қалаларында болып, тұрақты даму, жастар саясаты және халықаралық ынтымақтастық бағытындағы тәжірибелерімен бөлісті. Қазақстан атынан бағдарламаға «Жастар Рухының» белсендісі Диана Жұлмұхамбетова қатысып, халықаралық қауымдастыққа «Таза QAZAQSTAN» жобасын таныстырды. Өз сөзінде ол еліміздің түкпір-түкпірінде жүзеге асырылып жатқан экологиялық акциялар, жастардың қоршаған ортаға жауапкершілігін арттыру бағытындағы жұмыстар және мыңдаған рухтастардың еңбегі туралы баяндады. Жобаның нәтижелері мен әлеуметтік әсері халықаралық сарапшылар тарапынан жоғары бағаланды. Нәтижесінде Диана Жұлмұхамбетова форумның негізгі алаңында сөз сөйлеу мүмкіндігіне ие болған 5 қатысушының қатарына енді. Ол халықаралық аудитория алдында «Таза QAZAQSTAN» Road-эстафетасы жобасының тәжірибесін таныстырып, қазақстандық жастардың экологиялық бастамаларды дамытудағы үлесін көрсетті. Айта кетеміз, бүгінде «Таза QAZAQSTAN» - еліміздің түкпір-түкпіріндегі мыңдаған жасты ортақ мақсатқа жұмылдырып отырған ауқымды экологиялық қозғалыс. Жоба қоршаған ортаны қорғау мәдениетін қалыптастырумен қатар, еріктілік қызметті дамытуға және жастардың азаматтық белсенділігін арттыруға бағытталған.