صفوة الأفكار في اللغة العربية

السلام عليكم ورحمة الله وبركاته❤️💙 اي حد م اللي موجود ف القناة لو عنده دور ثاني للعربي، هبدا معاه إن شاء الله نراجع وبإذن الله ينجح ويلحق كلية كويسه، بس لو في حد يعمل كومنت💙 عشان اعرف بس، وعادي م نهاية العالم ولا دليل انك انسان فاشل، محدش عارف الخير فين.💙😁

هنرجع له ف شهر 8 كدا😅

العربي وحشني😹❤️

الاجابات الرسمية لامتحان الهربي نزلت نصيحة اياك تشوفها واول ما تقابلك غير البوست على طول ومتبقاش فضولي🙂

محدش ينتظر اجابات الامتحان ومحدش يناقش أسئلته هتستفيد اي للي اتحل خلاص اتحل

حرف ( حتى) حتى و أنواعها في المنهج بس وده اللي هنحتاجه :-) :- 1- حتى حرف نصب و دي علامتها سهلة وهى أنها بييجي بعديها فعل مضارع . اذهب إلى المدرسة حتى أتعلم.. مثلا . 2- حتي حرف عطف و دي بييجي بعديها اسم لازما وكمان لازم يدي عطف خاص على عام .. يعني ايه يعني مثلا .. شمل عدل عمر الناس جميعا حتى الطغاة .. اختصيت الطغاة ( الخاص ) من الناس ( العام ) .فبنعرب الطغاة معطوف منصوب بالفتحة . 3- حتى حرف جر دي بردو بييجي بعديها اسم و بتبقي بمعني إلى أو من ... وممكن تريح دماغك وتشوف فيها خاص و عام ولا لا لو في خاص و عام تبقي عطف و لو ما فيش تبقي حرف جر ... مثال زي . " سانتظرك حتى ميعاد رجوعك" أو " سانتظرك حتى الفجر ." ميعاد والفجر بنعربهم اسم مجرور . غير كدة مالناش دعوة :-) النهاية

الفرق بين لا العاطفة والنافية للجنس لو قلت (اشتريت قلما واحدا لا قلمين) ... معنى الجمل إنك اشتريت قلم واحد مش قلمين ... لما تلاقي إن (لا) بمعنى (مش) أعرف إنها حرف عطف ع طول ... عشان كدة إعراب (قلمين) معطوف منصوب بالياء. أما لا النافية للجنس مش بيكون معناها (مش) ... ودا الفرق. فلو قلنا (في تاريخنا وقفات كلها عظة لا تسلية) .... فكلمة (تسلية) معطوف مرفوع وعلامة رفعه الضمة. أما لو قلنا (في تاريخنا وقفات كلها عظة لا تسلية فيها) ... فكلمة (تسلية) اسم لا مبني عل الفتح في محل نصب. ملحوظة: كلمة (كلها) مش توكيد لأنك لو حذفتها الجملة هتبوظ ... (كلها) مبتدأ ووضحنا دا في درس التوكيد تقدر ترجعله ... ثم كلمة (عظة) خبر للمبتدأ ... وجملة (كلها عظة) في محل رفع نعت لكلمة (وقفات).

المفعول معه لو بصينا في الأمثلة دي :- 1- استيقظ النائم وأذان الفجر . 2- مشيت وشاطئ النيل . 3- سار القطار وخط السكة الحديد . 4- ذهبت إلى المدرسة وطلوع الشمس . - في المثال الأول (استيقظ النائم وأذان الفجر) ... مستحيل الواو تبقي واو عطف ... لأنها لو واو عطف هيبقي المعني ان النائم استيقظ وكمان الفجر استيقظ !! ... دي مش واو عطف ... دي حاجة جديدة اسمها واو المعية واللي بييجي بعدها اسمه مفعول معه ... وده موضوع الدرس ... واو معية يعني معني الجملة (استيقظت مع أذان الفجر) حشنا الواو وحطينا بدالها (مع) ... طالما المعني فضل سليم تبقى دي واو معية واللي بعدها مفعول معه ... وكدة يبقى اعراب (استيقظ النائم وأذان الفجر) ... (وأذان الفجر) الواو واو معية ... أذان مفعول معه منصوب بالفتحة ... الفجر مضاف إليه. - في الأمثلة الباقية (مشيت وشاطئ النيل) – (سار القطار وخط السكة الحديد) – (ذهبت إلى المدرسة وطلوع الشمس) ... نفس الكلام الواو مستحيل تبقي واو عطف لنفس سبب المثال الأول ... وكمان ينفع نشيل الواو ونحط بدالها (مع) ويفضل المعني سليم ... فكدة تبقي (شاطئ – خط – طلوع) مفعول معه منصوب بالفتحة. - واو المعية ليه تلات شروط ... أولهم إنها تكون بمعنى (مع) ... ثانيهم إن ييجي بعدها اسم صريح ... ثالثهم إنها تيجي بعد الفعل أو حاجة مشتقة من الفعل زي (أنا مسافر والفجر). - الفرق بين واو المعية وواو الحالية 1- واو المعية : يأتي بعدها اسم (مضاف ومضاف اليه – نعت ومنعوت ... الخ الخ) ... ولا يأتي بعدها جملة (مبتدأ وخبر- فعل وفاعل) ... ويمكن استبدالها ب (مع) ... زي (جئت وهطول المطر) – (ذكرتك وتوديع النهار) – (رحلت وشروق الشمس) .... هنا (هطول المطر – توديع النهار – شروق الشمس) دول كلهم أسماء عشان كدة اعرب (هطول – توديع – شروق) مفعول معه منصوب بالفتحة. 2- واو الحالية : يأتي بعدها جملة ... ولا يمكن استبدالها ب (مع) ... زي (جئت والمطر يهطل) – (ذكرتك والنهار مودع) – (رحلت والشمس تشرق) ... هنا (المطر يهطل – النهار مودع – الشمس تشرق) دول كلهم جمل عشان كدة كلهم جمل اسمية في محل نصب حال.

من شرح كشف المعجم - الكلمات اللي بتتكون من تلات حروف وآخرها تاء مربوطة ... دي تلات فرق: الحرف اللي في النص مشدد زي (جنَّة – أُمَّة – سُنَّة) بنكشف عنهم بأننا نحذف التاء ونكرر الحرف التاني مرتين فيبقوا في مادة (جنن – أمم – سنن). الحرف الأول مكسور والتاني متحرك زي (ثقة – صلة – سِنة) بنكشف عنها بأننا نحذف آخر حرف ونحط بداله واو في الأول فبنقول مادة (وثق – وصل – وسن). لو مش من الفريقين اللي فوق زي (سَنَة – أَمَة -لغة) فالغالب فيهم إننا بنحذف الحرف الأخير وبنحط مكانه (واو) فبالتالي على الترتيب في مادة (سنو – أمو -لغو). ملحوظة: يستثنى من الكلمات دي (رئة – فئة – مئة ]مائة[) نبحث عنهم في (وري – فأي – مأي).

التوكيد المعنوي - لو قلنا مثلا (قرأت القرآن الكريم اليوم.) ... البعض هيتخيل مثلا إنه قرا شوية منه... معظمه ... أغلبه ... الكلام مشكوك في أنه يكون خلصه ... رغم إنه ممكن يكون عمل كدة فعلا وخلصه ... عشان كدة كان الأحسن يقول (قرأت القرآن الكريم كله اليوم.). - اللي عايز اوصلهولك إن ألفاظ التوكيد دي ألفاظ بنستخدمها عشان نأكد على حاجة مشكوك فيها أو حاجة متأكدين منها بس بردو يستحسن نأكدها أكتر وأكتر. - ألفاظ التوكيد دي هي (كل – جميع – نفس – عين – كلا – كلتا) ... بس لاااازم يكون متصل بيهم ضمير ... لاااازم... وإلا ماينفعش يبقوا توكيد. كام مثال: 1- حضر الضيوف كلهم الحفلة. 2- قابلت اللاعبين جميعهم. 3- هذا هو القاتل نفسه. 4- ذهبت إلى المسجد عينه. 5- ضربت الولدين كليهما. 6- الطالبتان كلتاهما مجتهدتان. - التوكيد المعنوي لما بنحذفه من الجملة بتفضل الجملة سليمة ... أما لو حذفناه والجملة باظت ما يبقاش توكيد ... مثلا: 1- (إننا كلنا ثقة بأن نصر الله قريب لا محالة.) هنا (كلنا) مش توكيد ... لو حذفتها الجملة هتبوظ خااالص خااالص .... أول حاجة تفكر مع (كل- كلا- كلتا) لما مش تبقي توكيد ... أول حاجة تفكر فيها إنها ممكن تبقي مبتدأ ... (كلنا ثقة) دي جملة صح؟ ....يبقي (كلنا) مبتدأ والضمير في محل مضاف إليه ... (ثقة) خبر ..والجملة الأسمية (كلنا ثقة) في محل رفع خبر إن. 2- (إننا كلنا نثق بأن نصر الله قريب لا محالة.) هنا (كلنا) توكيد منصوب ... لو حذفناها هتفضل الجملة سليمة. 3- (الطالبان كلاهما مجتهدان.) (كلاهما) توكيد مرفوع بالألف لأنه ملحق بالمثنى. 4- (الطالبان كلاهما مجتهد.).... (كلاهما) مبتدأ مرفوع بالألف. - حرف (الباء) بييجي زائد مع (نفس- عين) ... مثلا (رأيت الطلاب بأنفسهم)....إعراب (أنفسهم) توكيد معنوي مجرور لفظا منصوب محلا.