Ethiopian Technical Excellence Institute

የኢንስቲትዩቱ አዲስ ሰልጣኞች ወደ ኢንስቲትዩቱ እየገቡ ነው። *ጥቅምት 25/2019** በኢትዮጵያ የቴክኒክ ልህቀት ኢንስቲትዩት የ2019 የስልጠና ዓመት ስልጠና ለመጀመር የተመዘገቡ አዲስ የደረጃ 6 (መጀመሪያ ዲግሪ) ሰልጣኞቻችን ወደ ኢንስቲትዩታችን መግባት ጀምረዋል። ውድ ሰልጣኞቻችን እንኳን በደህና መጣችሁ! ስኬታማ ጊዜ እንድታሳልፉ እንመኛለን!

የኢንስቲትዩቱ ሀዋሳ ካምፓስ ለቴክኒክና ሙያ ስልጠና አሠልጣኞች የአቅም ግንባታ ስልጠና እየሠጠ እንደሚገኝ ተገለጸ። **ጥቅምት 19/2019* የኢትዮጵያ ቴክኒክ ልሕቀት ኢንስቲትዩት ሀዋሳ ካምፓስ በበጀት ዓመቱ የመጀመሪያ ዙር ዓለም አቀፍ ብየዳ ስልጠና ከተለያዩ ተቋማት ለተወጣጡ መሪ አሰልጣኞች ስልጠና መስጠት ጀምሯል። የካምፓስ ኃላፊ አቶ ስንሻው ብርሃኑ ካምፓሱ ለቴክኒክና ሙያ ስልጠና ተቋማትና ኢንዱስትሪዎች በተለያዩ የስልጠና መስኮች ስልጠናዎችን በመስጠት አቅም እየገነባ እንደሚገኝ ገልፀዋል። በአርክ ወልዲንግ ስልጠና የሚወስዱት መሪ አሰልጣኞች ስልጠናው ወስደው ሲጨርሱ ከሚሰሩት የመንግስት ስራ ባለፈ የራሳቸውን ተጨማሪ የስራ ዕድል የሚያገኙበት እንደሆነ ገልፀዋል። ኢትዮጵያ ከቅርብ ዓመታት ወዲህ የዓለም አቀፍ ብየዳ (ወልዲንግ ሶሳይቲ) አባል መሆኗን የሚናገሩት በኢትዮጵያ ቴክኒካል ልህቀት ኢንስቲትዩት ሀዋሳ ካምፓስ የዓለም አቀፍ ብየዳ መሪ ስራ አስፈፃሚና አሰልጣኝ አቶ አየነው ጥምቀቱ ናቸው። ይህም በሶስት ዋና ዋና ዘርፎች እንደሚሰራም ጠቁመዋል።

ኢንስቲትዩቱ ከገላን ጉራ ኢንዱስትሪ ፓርክ ጋር በትብብር ለመስራት ያለመ ጉብኝት ተካሄደ። *ጥቅምት 11/2019 ዓ.ም* የኢትዮጵያ ቴክኒክ ልሕቀት የኢንስቲትዩቱ ዋና ዳይሬክተር የተከበሩ ብሩክ ከድር (ዶ/ር) የገላን ጉራ ኢንዱስትሪ ፓርክን ጎብኝተዋል። ጉብኝቱ በኢንስቲትዩቱ የስኪል ኢትዮጵያ ፕሮግራም ላይ እየተሳተፉ ያሉ የቴክኖሎጂ ፈጣሪዎች ልምድ እንዲያገኙና ፈጠራዎችን ወደ ምርት ለማስገባት በጋራ ለመስራት በሚቻልበት ሁኔታ ላይ ትኩረት ማድረጉን ዋና ዳይሬክተሩ ገልጸዋል። የፓርኩ ከፍተኛ የስራ ሃላፊዎች የፓርኩን የስራ እንቅስቃሴ ያስጎበኙ ሲሆነ በጉብኝቱ የዋና ዳይሬክተር ጽ/ቤት ሃላፊ አቶ ፍጹም ግርማ እና የስኪል ኢትዮጵያ የቴክኖሎጂ ፈጠራ ፕሮግራም የፈጠራ ባለሙያዎች ተሳትፈዋል።

ወደ ቴክኒካል ልሕቀት ለሚደረግ ጉዞ ተቋማዊ አቅሞች *ጥቅምት 4/2019*** የኢንስቲትዩቱ ዋና ዳይሬክተር ዶ/ር ብሩክ ከድር በዓለምባንክ የገንዘብ ድጋፍ የሚገነቡትን የስልጠና እና የአስተዳደር የልሕቀት ማዕከላት ህንጻዎች አፈጻጸም ምልከታ አድርገዋል። ዋና ዳይሬክተሩ ከምልከታ በኋላ አፈጻጸሙን የገመገሙ ሲሆን በተያዘላቸው ጊዜ ተጠናቅቀው ሥራ ለማስጀመር አስፈላጊው ሁሉ እንደሚሠራ ገልጸው በህንጻና በህንጻ ዙሪያ ያሉ መሠረተልማቶች በጥራት እየተሠሩ መሆኑን አንስተዋል። የኢንስቲትዩቱ የልህቀት ማዕከላት ለስልጠና በተመቸ ሁኔታ የተገነቡ ሲሆን ዘመኑን የዋጁ የስልጠና ማሽነሪዎች እንደሚሟሉላቸው ተገልጿል። የልህቀት ማዕከላቱ አጠቃላይ አፈጻጸማቸው ከ91 %በላይ መሆኑ በግምገማው ላይ ተገልጿል።

19ኛው የኢፌዲሪ ሰንደቅዓለማ ቀን በኢንስቲትዩቱ ተከበረ፡፡ ጥቅምት 02/2019 ዓ.ም   የኢትዮጵያ ቴክኒክ ልህቀት ኢንስቲትዩት ማህበረሰብ አባላት 19ኛውን የብሄራዊ ሰንደቅ አለማ ቀንን አክብረዋል።   በኢንስቲትዩቱ ምክትል ዋና ዳይሬክተር አቶ ኤሊያስ አዋቶ እና በፌደራል ፖሊስ አባላት ለሰንደቅአለማችን ልዩ ክብር የተሰጠ ሲሆን “ሰንደቅ ዓላማችን ለብሔራዊ መግባባትና ለአንድነታችን” በሚል መሪ ቃል ተከብሯል።   በፕሮግራሙ ላይ የኢንስቲትዩቱ  አመራሮች፣ የፌደራል ፖሊስ አባላት፣  ሰራተኞች፣ ሰልጣኞች እና ተገልጋዮች በጋራ በመሆንን ቀኑን አክብረዋል፡፡

አንድ ተጨማሪ የስኪል ኢትዮጵያ ችግር ፈቺ ቴክኖሎጂ "የመገልገያ ሞዴል ምስክር ወረቀት" እውቅና አገኘ። ጥቅምት 1/2019* በኢትዮጵያ የቴክኒክ ልሕቀት ኢንስቲትዩት የስኪል ኢትዮጵያ ፕሮግራም ለተሠራው “ሁለገብ አነስተኛ ትራክተር” (Multipurpose Mini Tractor)፣ የኢትዮጵያ አእምሯዊ ንብረት ባለሥልጣን በማመልከቻ ቁጥር ET/U/2025/4826 የመገልገያ ሞዴል ምስክር ወረቀት ለመስጠት መወሰኑን አሳውቋል። ይህ ውሳኔ የሀገር ውስጥ የፈጠራ ሥራዎችን ለመጠበቅ፣ ፈጣሪዎችን ለማበረታታትና ቴክኖሎጂውን ወደ ሰፊ ምርትና ገበያ ለማሸጋገር የሚደረገውን ጥረት የሚያጠናክር አስፈላጊ እርምጃ እንደሆነ ታምኖበታል። ይህ ሁለገብ አነስተኛ ትራክተር” (Multipurpose Mini Tractor)፣ የአርሶ አደሮች የጉልበትና የጊዜ ብክነት በመፍታት ዘመናዊነትን ለማሳደግ ታስቦ የተሠራ ሲሆን ከእርሻ ዝግጅት ጀምሮ እስከ ድህረ ምርት ድረስ ያሉ ማረስ፣ ማጨድ፣ መውቃት፣ ማጓጓዝ፣ ለመስኖ ውሀ መሳቢያ ሆኖ ማገልገልን ጨምሮ ሰባት ያህል አገልግሎቶችን አቀናጅቶ ለመሥራት በሚያስችል ሁኔታ ተሻሽሎ የቀረበ እንደሆነ ባለሙያዎች ገልጸዋል። ውጤታማነቱም በተለያዩ የግብርና ቦታዎች ላይ ተሞክሮ ተረጋግጧል። ለፈጠራ ባለቤቶቹ፣ ለኢንስቲትዩቱ ማኅበረሰብና ለሁሉም ደጋፊ አካላት እንኳን ደስ አላችሁ! የዛሬ ፕሮቶታይፕ፣ የነገ ኢንዱስትሪ!

የኢፌዲሪ ቴክኒክና ሙያ ስልጠና ኢንስቲትዩት ስያሜ ወደ "የኢትዮጵያ ቴክኒክ ልሕቀት ኢንስቲትዩት" (Ethiopian Technical Excellence Institute) ተቀየረ። የፌደራል መንግስት አስፈጻሚ አካላትን ስያሜ፣ አደረጃጀት፣ ስልጣንና ተግባር ለመወሰን በወጣው አዋጅ በተደነገገው መሠረት የኢፌዲሪ ቴክኒክና ሙያ ስልጠና ኢንስቲትዩት ስያሜው "የኢትዮጵያ ቴክኒክ ልሕቀት ኢንስቲትዩት" ሆኖ መቀየሩ ተደንግጓል። የኢትዮጵያ ቴክኒክ ልህቀት ኢንስቲትዩት በሀገራችን የቴክኒክና ሙያ ስልጠና ዘርፍ በስልጠና እና አቅም ግንባታ፣ በጥናትና ምርምር እና ማህበረሰብ አገልግሎት፣ በቴክኖሎጂና ኢንተርፕራይዝ ልማት መስኮች የመሪነት ሚና የመወጣት ተልዕኮ ተጥቶታል። የአስፈጻሚ አካላትን ሥልጣንና ተግባር መወሰኛ አዋጅ 1263/2014 በተደነገገው መሠረት የተሰጡ ተልዕኮዎችን ይዞ ይቀጥላል።