قصص الصلاة على النبي صلى الله عليه وسلم

قيام الليل سر قضاء حاجتي 🤍 أنا واحدة من الناس كل أموري في الدنيا بقضيها بقيام الليل قيام الليل عندي ثابت ولله الحمد، حتى لو ما عندي مشكلة في حياتي لكن لما يكون عندي مشكلة بكثف قيام الليل أكتر أحكي ليكم موقف حصل معاي في عمرتي قبل أسبوعين دي زوجي بيشتغل دوام ليلي، وهو طالع الشغل قلت ليهو: أنا عايزة أمشي عمرة قال لي: العمرة ما في طريقة ليها هسي، أنا أخدت إجازة قريب والناس ديل عندنا شغل مفروض نسلمو قريب، عذر الرجال ما في طريقة ياهو.. قلت ليهو: طيب أنا بدعي، والله أقوى منك انت وناس شغلك😂 في الوقت ده أنا كنت مارة بظروف صعبة وظروف مرضية بالذات، وقدمت لكذا شغل في كذا مركز تحفيظ بعد ما وقفت من المركز القديم وربنا ما وفقني فيهم، يعني نفسيا كنت محتاجة للعمرة شديد في نفس اليوم من دون الأيام نمت بدري، وقمت زي الساعة اتنين صليت قيام الليل ودعيت ربنا ييسرها لي من غير حول مني ولا قوة، لأن كل الأسباب الحوالي بتقول ما في طريقة الصباح قبل ما يجي من الدوام قال لي: انتي دعيتي علينا ولا شنو؟ دعيتي لينا ولا شنو بالضبط؟😂 في شنو؟ قال لي: والله ناس الشغل مطلعني مأمورية والليلة مفروض أطلع، ومأجرين لي فندق هناك، المأمورية في مكة، جهزي شنطتك وجهزي الأولاد سبحان الله العظيم والله العظيم أنا سجدت لله شكر، لأنه دي الحاجة الأنا قمت ليها الليل ونفسي فيها ودعيت ربنا يرزقني ليها من غير حول ولا قوة، ولما جات جات من ناس الشغل نفسهم الكنا خايفين ما يدونا إجازة فأنا بقول ليكم قيموا الليل وصلوا وادعوا لو ربنا ما استجاب الليلة بيستجيب بكرة، ولو ما بكرة بعد بكرة ولو أخر ليك الاستجابة بيأخرها لمصلحتك انت ربنا بيحب العبد القريب ليهو، بيحب العبد الصلاي القوام، بيحب العبد البيتقرب ليهو بكل الطرق صلاة الليل ما تفرطي فيها مهما يحصل، دعاءك ما تفرطي فيهو مهما يحصل ومهما كنتي بعيدة من ربنا حاولي تقربي بالصلاة، الصلاة ما حاجة صعبة ولا الدعاء حاجة صعبة وأطلبي العايزاه من ربنا، ربنا واسع الكرم قادر يعمل أي حاجة في الدنيا 🤍