"Akkuma Dubbate Guyyaa Sadaffaatti Ka'e" (Maat 28:6 +1Qor 15:4)
👏"Ni Ka’e Waaqayyoon akka waan hirribaa dammaquutti
Akka nama cimaa machiin wayinii dhiisettis
Diinota Isaas rukute duuba isaaniin" (Faar 77/8:65)👏
✍Barumsa amantaa kiristaanaa manni kiristaana Ortodoksii barsiistu keessaa inni guddaanii fi hundee amantaa ishee ta’e, Ifa du’aa ka’uu Gooftaa keenya Iyyasuus Kiristoosidha. Duuti amalamummaa isaa osoo hin taane, jaalala Ilma namaaf qabuuf, jalqabattis akkasumaan dhala namaa waan jaallateef, uumamoota biraa teessoo isaa irra taa’ee yaadaa fi jechaan kan uume yoo ta’u, dhala namaa garuu, bifaa fi fakkeenya Isaatiin yeroo uumuuf jedhetti, teessoo isaa irraa bu’ee gara biyya lafaa dhufuun, biyyoo qabatee harkaan bocee, funyaan isaattis Afuura jireenyaa itti baasuudhaan jiraataa taasise.
✍Yeroo Addaam muka balas nyaatee qullaa turettis, gannata keessa barbaacha dhufee, qullaa ta’uusaa argees wayaa gogaarraa hojjatame itti uffise. Kanarra darbuun dhala namaa fayyisuu kan danda’u akka hin jirre yeroo argetti gara keenya dhufee nu gargaare.
✍Akkuma qulqullichi phaawuloos, “Bifa Waaqayyootiin osoo jiruu, bifa garbicha isaa qabatee gad of qabee, ulfina isaas dhiisee, dhufee hanga du’aatti qaqqabe (Fil 2:6) jedhe, foon namaa waliin tokkummaa’ee dhufee dhalatee rakkoo fi gidiraas simate, dhukkubbii keenya baatee (Isaa 53:4) nuuf du’ee awwaalame. Inni qulqulluun Daawwit, “Waaqayyoon garuu addunyaan durayyuu mootii ture, garaa lafaa jidduus qoricha kaa'e” (Faar 74:12) kan jedhes awwaalamuu Isaan ni raawwate.
✍Waaqayyoon keenyas ni du’e yeroo jennu Waaqummaa fi lubbuu Isaatiin miti. Inni kan du’e foon Isaatiin ta’us, Waaqummaan garuu foonii fi lubbuu isaa irraa adda hin baane (#Qeerloos). Pheexiroosis, Inni yakka tokkollees osoo hin qabaatiin egaa cubbamootaatiif yeroo tokko sababa cubbuutiif du’eera, Innis fooniin du’e malee lubbuu Isaatiin garuu jiraataa ta’e. Isumaanis immoo deemee mana hidhaa (Si’ool) keessa lubbuuwwan jiraniif lallabeef; (1Phex 3:18-19) jechuun dhugoomseera. Lallabni Isaa kunis isa raajonni Waaqayyoo kanneen akka Isaayyaas fa’aa, “Kan isinitti cufame ba’aa; warreen dukkana keessa taa’aniinis mul’adhaa akka jedhuuf kakuu taasisee sabichaaf kenneera, (Isay 49:9), jedhetu raawwate.
✍Addaamis, waggoota kennameef lakkaa'ee waan xumureef, lubbuuwwan isa waliin Si’ool keessa jiraniin, “Waggaan 5500 xumurameeraatii kadhannaaf ka’aa, yommuu jedhutti, lubbuuwwan isa waliin jiranis maaloo nu maarii jedhan. Waaqayyos qaama lubbuutiin argamee nagaan isiniif haa ta’u yeroo jedhutti, akkuma qulqulluun Yaareed, “Akkuma Yohaanniis garaa haadha isaa keessatti si argee gammachuun utaale, lubbuuwwanis ni utaalan,” jedhe lubbuuwwan gammachuu bilisummaa argataniin gammadanii burraaqanii utaalan. Sanaan boodas, isa Isaayyaas dubbate raawwachuudhaaf jecha, ba’aa Gara gannataa galaa jedhe, Isaanis Waaqayyoof galanni haa ta’u, jechaa biyya gammachuu burqisiistutti galan.
✍Barumsa keenya, kana kessattis waa’ee (dhimma) Du’aa ka’umsa Gooftaa fi fayyisaa keenya Iyyasuus Kiristoos ilaalla. Waaqayyo keenya, akkuma ergamoonni, Maariyamii ishee Maqdallaa fa’aatiin “Isa jiraataa warreen du’an jidduu maaliif barbaaddu?” Luq 24:5 jedhan, Inni Waaqqyyo jiraataa dha malee kan du’u miti. Inni warreen du’aniyyuu Waaqayyo du’aa kaasuudha. Alaazaar fa’iis guyyaa afuriin booda humna Waaqummaa Isaatiin ka’i jechuun kaase. Dhugumatti, "du’aa ka’umsii fi jireenyi anadha,” Yoh 11:25 jedhee Waaqni barsiise, guyyaa sadaffaatti du’aa ka’eera.
✍Gooftaan keenya osoo xoofoo du’aa hin dhamdhamiiniin dura, Waaqummaa Isaatiin hunda gochuu wanta danda’uuf, waa’ee dhimma du’aa ka’uu ofii isaa barumsa Isaa keessatti barsiisaa tureera. Kanneen keessaas akka fakkeenyaatti yoo fudhannu:
👉"Ilma namaa ni ajjeesu, Inni garuu guyyaa sadaffaatti deebi’ee ni ka’a." (Maat 17:23)
👉"Akkuma Yoonaas garaa qurxummii keessa halkan sadii fi guyyaa sadii bule, Ilmi namaas halkan sadii fi guyyaa sadiif garaa lafaa keessa ni bula." (Maat 12:40)