عيادة الدكتور خالد النفسية

أول خطوة للعلاج من أي مشكلة هي الاعتراف بوجود المشكلة ..  للتحكم بالضغوطات أبدا حدد مصادرها و واجهها .. لوحدك أو مع معالج  .. هنا في الصورة تلقى أمثلة لمصادر الضغوطات و التوترات .. صحتك النفسية صمام أمانك  عيادة الدكتور خالــد النفسية

السلام عليكم د. خالد  عندي استفسار  انا واضعه لي ٢٦ يوم وضعت عمليه قيصريه ولاده مبكرة في الشهرالثامن من الحمل نتيجه ارتفاع ضغط الدم وظهور بروتين في البول  بعد الولاده جاتني حاله بكاء لا اراديه وشعور بالحيرة والقلق والخوف وتشتت الانتباه وفقدان الشهيه  وكنت غير راضيه عن نفسي كأم ..  استمرت الحاله ١٥ يوم الاعراضت خفت ولكن ما زلت اعاني من اضطرابات النوم والتفكير والهلاويس وفقدان الشهيه وعدم القدرة على اتخاذ القرارات ..  ما وجه نظرك الطبيه في الاستشارة وشكرا مقدمآ .. و عليكم السلام  دي اسمها *كآبة الأمومة او النفاس* .. بتحصل بعد الولادة .. بتحصل بسبب تقلبات الهرمونات بعد الولادة ــ في الغالب مؤقتة .. مافي مشكلة و في فرق بينها و بين *اكتئاب بعد الولادة* راحة تامة و تهتمي بصحتك العامة .. التغذية و النوم و زول يساعدك في العناية بالمولود .. بالذات في موضوع تظبيط مواعيد نومك .. اي حاجة ممتعة ترفع مزاجك تعمليها .. تحكي و تفضفضي لزول ثقة ــ لو استمرت اعراضك او زادت اكتر و اتحولت لاكتئاب ما بعد الولادة تقابلي طبيب نفسي للعلاج.  *صحتك النفسية صمام أمانك* *عيادة الدكتور خالــد النفسية*

سلام أنا محتاجه مساعده م عارفه مشكلتي دي ليها جانب نفسي ولا لالا لكن قلتا استشير أنا عصبيه شديد .. مرات بكون بتناقش عادي فجأه بتعصب وبكورك والموضوع بكون م بستاهل كل العصبيه دي. وصوتي بجيب كل الموجودين في البيت عشان يعرفو في شنوو ومرات نتيجة العصبيه والصوت العالي بلقى نفسي بتنفس بسرعه زي الكنت جاريه ولا حاجه عاوزه اغير الموضوع دا عاوزه اخت اعصابي في تلاجه لانو فترته شديد من الموضوع دا قدر ما حولتا اني م انفعل واتعصب لا اراديه بلقى روحي اتعصبتا آخر فتره بقيت بقعد ببكي لاني بكون متضايقه وم قادره اتحكم في اعصابي  مع انو عموما انا زوله هادئه جدا وم بحب الازعاج و عليكم السلام  كم عمرك .. مجالك .. حالتك الاجتماعية  في مشاكل في البيت .. ضغط حالي ؟ في صدمات قديمة؟ في تراكمات ؟ في محاولات تأذي نفسك بأي شكل ؟ تفكير كثير؟ خوف ؟ علاقة عاطفية فيها مشاكل ؟ تقلبات مزاجية؟ اسباب العصبية متعددة .. منها نفسي و اجتماعي .. الاكتئاب و القلق ابرز الاضطرابات .. و انواع من اضطرابات الشخصية .. الشعور بالإهانة و الدونية نتيجة تمييز او تنمر قديم او صدمات قديمة.. البداية هي إنه نحدد السبب و يتعالج ابدي اكتبي عن مشكتك اكتر و اعرضي المكتوب على مختص نفسي و ناقشي  صحتك النفسية صمام أمانك  عيادة الدكتور خالد النفسية

تقدم شنو لعيالك ؟ احسن حاجة يقدموها ابوين لأولادهم مع أكلهم و شرابهم و قبل تعليمهم .. انو يحبوا ويحترموا بعض قدام اولادهم ..حب و احترام واضحين في الكلام و الحركات .. يعبروا عن الحاجات دي قدام الأولاد من غير خجل .. دائرة الاجيال المعقدة ممكن تنكسر هنا .. ابدا اكسرها انت و اتفرج على انخفاض نسبة الاضطرابات النفسية و حالات الإدمان بعد كده .. و 🔥ما تخجل إنك تتكلم مع مجتمعك عن الصحة النفسية🔥 🚨صحتك النفسية صمام أمانك🚨 🫂عيادة الدكتور خالد النفسية🫂

مدمنين الكحول المجهولين (بالإنجليزية: Alcoholics Anonymous)‏ منظمة عالمية تساعد في علاج إدمان الكحول .. اتأسست في مدينة شيكاغو الأمريكية عام ١٩٣٥.. و بيجتمع الناس الفيها دوريا عشان يدعموا بعض. بتضم أكتر من مئة ألف مجموعة، في أكثر من 100 دولة.. وهي أشهر النماذج لمعالجة إدمان الكحول، نشأت على فكرة أنو الكحولية هي مرض ويجب على الكحوليين أنو يعترفوا بإدمانهم للكحول وتأثيره المدمر على حياتهم. و بيحتوي "دستور" المنظمة دي ١٢ بند، وفي معظمهم اعترافات للخالق بأنهم اختاروا الطريق الغلط بشرب الخمر. ‏ويطلبوا من الله أنو يساعدهم يبطلوه. ممكن تشوف ليك مجموعة .. بالذات الناس الاتعالجت من العرقي قبل كده .. بيساعدوا كتير .. و بيدعموا .. و خت في بالك انك ممكن تنتكس في أي لحظة و ترجع تشرب تاني .. اعمل حسابك.. اتواصل مع المعالج طوالي او مع زول وقف قبل كده .. بيساعدوك. كيف تحمي ولدك من السكر و الشراب ؟ 🌺خليك قدوة بالنسبة ليهو. 🌺اتكلم معاهو و اخد راحتك في الكلام معاهو و خليهو مرتاح في الكلام معاك. 🌺خُت ليهو قواعد يمشي عليها و ما يكسرها. 🌹مهما كان تأثير العرقي عليك و مهما كنت سكران ما تفقد الأمل في انك تتعالج .. 🌹حتتعالج و تبقى كويس لو انت عاوز .. و مهما كانت حياتك هسي ضايعة و كعبة في أمل انك تتحسن و تسيطر على نفسك و حياتك من جديد .. 🌹شوف زول يساعدك .. اتواصل مع دكتور و معالج نفسي .. حيوجهوك تعمل شنو .. ابدا من هسي. ❤عيادة الدكتور خالد النفسية❤

إدمان شراب الكحول .. العرقي .. الجزء الثاني.. في الصورة الفوق 👆دي حالة إسمها الهذيان الارتعاشي Delirium tremens ..حالة من الارتباك بتحصل بسبب انو الزول يوقف الشراب فجأة.. بتحصل بعد تلاتة يوم و بتستمر تلاتة يوم .. ممكن الزول يشوف و يسمع حاجات مافي .. الجسم يتهز شديد و يرجف ودقات القلب ما منتظمة و يعرق كتير و تجيهو حمى و ممكن الزول يموت. اسباب الإدمان على العرقي او الكحول عامة : ♦️حسب البيئة و المجتمع بتاع الزول .. لما تتربى وسط ناس بيشربوا و يسكروا .. لما يكون بيتباع قريب منك .. و التوترات. ♦️حسب الجينات بتاعتك .. لما يكون من أهلك القريبين في زول سكرجي .. أول ما تبدا الشراب .. بتبدا بكباية حاجة بسيطة .. تسكر .. و لما تواصل و تشرب كل يوم .. كل مرة حتزيد الكمية .. كبايتين .. تلاتة .. كريستالة .. و اتنين .. و تزيد .. لحدي ما تتعود و تدمن .. العرقي (الكحول) ممكن يسبب موت الاعصاب و الخلايا العصبية و بيسبب أمراض نفسية .. زي القلق و الإكتئاب.. شنو الاعراض و العلامات اللي بتدل على انو الزول سكرجي مدمن و عنده مشكلة ؟ 🔹️يشتهي العرقي .. يشرب اي وقت. 🔹️الرجفة 🔹️الأرق .. عدم النوم 🔹️القلق 🔹️الطمام 🔹️الاستفراغ 🔹️مشاكل في انو يتذكر .. ما بيتذكر لما كان سكران (غياب العقل) 🔹️مشاكل الجفاف الشديد 🔹️تليف الكبد 🔹️قرحة المعدة 🔹️انخفاض السكر في الدم بالذات لو عندك سكري 🔹️ضعف الانتصاب 🔹️مشاكل في العيون اذا المرأة بتشرب و هي حامل ممكن يعمل مشاكل في الجنين و يتولد ناقص. 🔹️هشاشة العظام. علامات تانية بتظهر في الزول: 🔹️بقى ما بيشتغل بالحاجات الكان بيستمتع بيها 🔹️ظاهر عليهو سكران معظم الوقت .. يشرب بالنهار .. يشرب بالصباح .. يشرب في الشغل. 🔹️لازم يشرب اكتر عشان يتكيف اكتر 🔹️شكلو تعبان و متوتر 🔹️اكتئاب او قلق 🔹️يبقى زول بتاع لف و دوران 🔹️مشاكل في القراية أو الشغل. الادمان على العرقي ممكن يسبب شنو؟ ♦️مرض نفسي ♦️مرض اسمو متلازمة فيرنيك كورساكوف Wernicke–Korsakoff syndrome اللي هو نتيجة لنقص فيتامين B1 الثيامين .. و بيكون الزول عندو مشكلة في المخ .. شلل في عضلات العين و ارتباك و الزول يترنح و يترتع في المشي .. فقدان الذاكرة ..فقدان القدرة على الكلام .. عجز عن تنفيذ الوظائف التنفيذية في المخ. ‏و اذا ما اتعالج بيعمل غيبوبة و ممكن الزول يموت. ♦️عدم انتظام في ضربات القلب ‏♦️تليف في الكبد ‏♦️سرطان ‏♦️مشاكل و أمراض جنسية ‏♦️مشاكل في مناعة الجسم ‏♦️‏ممكن يأذي نفسو أو غيرو ‏♦️مشاكل مع البوليس ‏♦️ممكن ينتحر ‏ ‏♦️‏في زول ممكن يحصل ليهو وجع بطن مع الشراب و يمشي ياخد فلاجيل .. ده بيسبب مشكلة مع العرقي و الزول ممكن يموت. ‏ ♦️و في زول ممكن يشرب سيجارة بنقو او حشيش مع العرقي و ده ممكن يسبب تسمم بالبنقو. و ممكن يعمل مشاكل مع ادوية و علاجات كتيرة. ♦️اذا انت او زول بيهمك .. عندكم مشكلة ادمان على العرقي (الكحول) لازم تتواصل مع دكتور او اخصائي نفسي .. عشان يوجهوك تتصرف كيف و تعمل شنو .. ♦️العزيمة و الارادة براهم ما كفاية عشان انت تتعالج .. لازم دكتور يكون متابع معاك. ♦️الأعراض الانسحابية ممكن تكون خطيرة جدا و تعمل مشاكل و بلاوي في الجسم عشان كده ما توقف براك بدون مساعدة من دكتور. شنو الأعراض الانسحابية البتحصل لما توقف شراب؟ 🔹️بتاخد من ساعات لغاية خمسة يوم 🔹️تعرق كتير 🔹️قلبك يضرب شديد 🔹️يدك ترجف 🔹️مشكلة في النوم 🔹️طمام و استفراغ 🔹️هلوسات 🔹️قلق و عصبية 🔹️و ممكن ما تقدر تشتغل وللا تتفاهم مع زول. 🔹️في حاجة إسمها الهذيان الارتعاشي Delirium tremens واضح في الصورة ..حالة من الارتباك بتحصل بسبب انو الزول يوقف الشراب فجأة.. بتحصل بعد تلاتة يوم و بتستمر تلاتة يوم .. ممكن الزول يشوف و يسمع حاجات مافي .. الجسم يتهز شديد و يرجف ودقات القلب ما منتظمة و يعرق كتير و تجيهو حمى و ممكن الزول يموت. العلاج يتكون من حاجتين .. ✔ازالة السموم Detoxification و السيطرة على أعراض انسحاب العرقي ..عشان نسيطر على اعتماد الجسم على العرقي. و بتاخد من يومين لسبعة يوم. و لازم تكون راقد مستشفى. ✔و العلاج النفسي.. عشان نعرف الاسباب الخلتك تدمن الشراب. و العلاج الأسري عشان الأهل كمان بيساعدوك العلاج ممكن يكون في مستشفى و ياخد شهرين تلاتة .. و ممكن يكون برة المستشفى في عيادة .. العلاجات البتاخدها في الفترة الاولى بتكون عشان تعالج الادمان و في نفس الوقت تساعدك مع الاعراض الانسحابية و تكون مرتاح و ما تحصل ليك مضاعفات و مشاكل لما توقف الشراب. و برضو اذا كان عندك مشاكل صحية تانية. برضو التغذية مهمة في العلاج عشان نقص التغذية البيحصل بسبب الشراب. و خليك عارف انو طريق العلاج طويل و ممكن يكون متعب .. محتاج ارادة قوية منك.

إدمان شراب الكحول.. العرقي #الإدمان_على_الشراب الجزء الأول اذا في زول بسكر طوالي .. بيشرب العرقي ( الكحول ..الخمر ) ليو زمن و حاول انو يوقف و ما قدر .. يبقى عندو مشكلة إدمان على الكحول .. ممكن يكون هسي كويس و مستمتع و ما عندو عوجة .. لكن قدام حتضرو أكيد.. عشان صحتو و عشان الحولو .. خليهو يقرا الكلام ده 👇 المادة الشغالة و المسؤلة عن السكر و الإدمان في الكحول هي الإيثانول Ethanol. الإدمان هو عملية معقدة .. مشكلة في نظام المكافأة في المخ .. بتخلينا دايما و بطريقة قهرية نفتش عن الحاجة الممتعة و نعملها حتى لو كانت مضرة زي المخدرات .. الإدمان addiction بيختلف عن الاعتماد أو الإتكال dependence (يعني جسمك او عقلك يعتمدوا على حاجة معينة و تاخدها) .. لكن الاتنين بيكونوا مربوطات مع بعض .. متلازمة الاعتماد على الكحول: Alcohol dependence syndrome ده تصنيف بتاع المرض في الدليل العالمي لتصنيف الامراض ICD بتاع منظمة الصحة العالمية .. بيقول شنو ؟ بيقول .. مرض مزمن بيكون فيهو الزول بيشرب العرقي و مشتهيهو .. و ما قادر يوقف الشراب و يسيطر عليهو .. و الشراب ده بيعمل ليهو مشاكل في البيت و الأهل و في علاقاتو مع الناس و في الشغل .. في الدليل الامريكي الخامس للاحصاء و التشخيص بتاع الامراض النفسية .. في حاجة اسمها إضطراب تعاطي الكحول Alcohol use disorder .. و بيجمع حاجتين .. الاعتماد على الكحول و سوء استخدام الكحول .. الاعتماد على الكحول .. يعني الجسم يتعود على وجود الكحول .. و بيعتمد عليهو .. عشان كده لما توقف بتحصل اعراض انسحابية و الزول بيتعب .. لما نقول فلان ده سكرجي Alcoholic .. معناها بيستخدم العرقي بكميات كبيرة و بيسكر طول الوقت .. و بيسبب ليهو مشاكل صحية و نفسية .. و يشيل و يسكر رغم المشاكل الصحية دي .. يعني بقى مدمن على الكحول .. ليه الناس بتشرب ؟ ♦️عشان الاحساس الحلو بتاع العرقي او الكحول .. بيخلي الزول منتشي و مبسوط .. ♦️يشيل التوتر و الزهج و الملل.. ♦️بيساعد في مواجهة الناس و التعامل مع الجمهور .. ♦️طريقة للاحتفال في بعض الثقافات.. زي المريسة في السودان و الفودكا بره .. ♦️مواجهة ضغوط الحياة و مشاكلها ♦️بعض الناس العندهم مشاكل نفسية بيستخدموه عشان يرتاحوا. 🛑صحتك النفسية صمام أمانك 🛑 🫂عيادة الدكتور خالد النفسية 🫂 و نواصل ان شاء الله

انت شاعر بحاجة ـ نعم شعور موجود ـ لكن ما ضروري يكون شعورك واقع أو حقيقي .. انت شخص سيئ .. ما بتستاهل الخير .. انت ما مجتهد ـ ما عملت العليك .. كونك تشعر بالحاجة ـ ما معناه إنه شعورك صاح ..  في افكار أو مشاعر عن نفسك بتحصل بسبب مزاج ـ او وضعك الحالي ـ أو ظروف حولك .. عاين ليها ـ اقراها ـ خليها تمشي زي سحابة راحلة و واصل حياتك .. صحتك النفسية صمام أمانك  عيادة الدكتور خالد النفسية

السلام عليكم انا بواجه مشكلة ( انت بتبقي اجتماعي متين ؟ ) ماحاسي بنفسي مختلف غير انو الناس لسة بتعاملني علي اساس اني الولد الفي عمر ٨ سنة الماسك توب امو مهما حاولت مقدرت هل الغلط فيني ام الغلط في البيئة و عليكم السلام  كم عمرك مجال دراستك او شغلك هل في خوف من الناس يدل على وجود رهاب اجتماعي؟ و دا بيتعالج بالمناسبة .. ما تحاول او تجتهد تعجب زول او تلقى تقدير من زول .. بتفرض وضعك و شخصيتك لما يزيد تقديرك لنفسك و ما يكون مربوط برضا زول .. الفترة الجاية قلل احتكاك مع المحيط الحولك لأقل مستوى ..  واشتغل على نفسك .. لو بتدرس ركز على دراستك و حاول القى مساحة اشتغل اي مهنة بسيطة .. بتزيد ثقتك في نفسك و تزيد وعيك الإجتماعي .. صحتك النفسية صمام أمانك عيادة الدكتور خالــد النفسية