Najmiddin Turon

Men eski dunyoning yangi isyoni... @Najmiddin_Ermatov

Ohidan dunyosi kuymasin, desang, Mendayin oshiqni yaratma, Xudo... @Najmiddin_Ermatov

Кечикдим, ҳилолга одам из босган, Тақдирим кечикиб ичикишми ё?.. Eнди кўз ёшимни элама, шамол, Eнди ОҲларимга чидаб бер, дунё. «Ким айтди эркаклар йиғламайди деб», Ким айтган ҳар дардга бордир деб даво?.. Боряпман бағрингга жуфт булоқ олиб, Eнди ботқоқликка тайёр тур, саҳро. Номозшом маҳали келган мен эдим, У эди қуёшнинг тонгги қурбони. У ўша шафаққа топинган гулруҳ, Мен эски дунёнинг янги исёни. Одамлик рутбасин отдим елкамдан, Фиғоним рутбангга бўлмаяпти жо. ОҲидан дунёси куймасин десанг, Мендайин ошиқни яратма, Худо. Eнди ОҲларимга чидайсан, дунё... ©Нажмиддин Эрматов @Najmiddin_Ermatov

қандай йиғламайин, чекмайин нола, қушлар учиб кетган боғлардан уя топиб олди бир бола. қандай тўхтатайин ёшимни юм-юм, хазонлар остидан бир тошни олиб, шодланса болакай, топдим деб тухум. қандай ўкинмайин, чекмайин фиғон, ул тошни авайлаб уяга солиб, термулиб ўлтирса кутиб полапон. ёшларим қуйилар, тошнинг йўқ жони, мўжиза кутётган умидвор кўнгил нима деб ўйлайди ҳали дунёни. қара, йиғлаяпман, қалтираб дир-дир, боланинг покиза хаёли ҳаққи, эй, Худо, кел мени қушга айлантир. 2018 йил, ноябрь ©Нажмиддин Эрматов @Najmiddin_Ermatov

Кел, бургут, пастга туш, қанотингдан кеч, Кўксингга ботмасми шундай тиниқ кун? Зиндон кўрсатаман туби қирқ қулоч, Осмонга энтикиб яшамоқ учун... @Najmiddin_Ermatov

*** Эй, арча, минг йилдир кўкайинг кўкдай, Келгин, дард берайин умрингдек узун- тирилгин, кетайлик саҳролар сари, Тоғларни соғиниб яшамоқ учун. Кел, бургут, пастга туш, қанотингдан кеч, Кўксингга ботмасми шундай тиниқ кун? Зиндон кўрсатаман туби қирқ қулоч, Осмонга энтикиб яшамоқ учун. Нега келмагайсиз, билмайсизми ё, Шундай яшаяпти боши эгиклар. Уларнинг қаддига куч беринг, ахир Юксакдан боқмагай мунгга тириклар. Ҳа, шундай яшадик, яшаётирмиз, Нега қарамайсиз титраган тизга? Кўкайимиз куйиб юрган бу замон, Шунча бахт оғирлик қилмасми сизга... ©Нажмиддин Эрматов 2018 йил, ноябрь @Najmiddin_Ermatov

СЎРОВ Ҳайронман, ким кимга отаяпти ўқ, На ўқни тўхтатдим, на бўлдим қалқон. Кеча oкопидан чиқмаган аскар, Бугун тирикман деб бўлса қаҳрамон... Ҳайронман, не учун Ҳақ демас тилим, Ёки ўчирдимми дилдаги чўғни? Нега кўнаяпман ҳақсизликка жим, Менга бир қаранглар, ўлганим йўқми? ©Нажмиддин Эрматов @Najmiddin_Ermatov

borsa kelmas sari yo‘l tortsang, ishonsang yonishiga, kimdir seni izlab borishiga... @Najmiddin_Ermatov

yig‘lashni boshlasang, to‘xtamay yig‘lasang. kimningdir yupatishidan ko‘ngling to‘q bo‘lsa... @Najmiddin_Ermatov

*** Eski daftardan... Uchishni oʻrgansang Uchib ketsang. Yerda seni kimdir sogʻinsa Intizor kutsa. Yig'lashni boshlasang Toʻxtamay yigʻlasang. Kimningdir yupatishidan Ko'ngling toʻq boʻlsa. Borsa kelmas sari Yoʻl tortsang. Ishonsang, yonishiga Kimdir seni izlab borishiga. Ammo Uchsang, kutmasa Yigʻlasang, yupatmasa Ketsang, bormasa Baribir uchish kerak Baribir yigʻlash Baribir ketish kerak. Bo'lmasa qolishing joningga jabr Kimdirsiz yashab bo'lmaydi axir. ©Najmiddin_Ermatov @Najmiddin_Ermatov

*** Qovogʻingga kimdir don sepgan, Kiprigingga qushlar qoʻnibdi. Dil yedirib boqdingmi, gulim, Bo'ldi uchir... ular toʻyibdi. Oʻzing tusab, axir dilingni tutaversang qushlar ketmaydi. Seni yolgʻiz bu ogʻriqlardan qutqarishga kuchim yetmaydi. ©Najmiddin Ermatov @Najmiddin_Ermatov

Bahorga yoqmasdi uyqudagilar, Bahorga yoqmadi uyg‘onganlar ham... @Najmiddin_Ermatov

Ҳали кетмаганди қишнинг нафаси, Баҳор ҳайрон бўлиб келди ўша чоғ. Майсалар уйқуда, дарахт уйқуда, “Уйғоон”, деб қичқирди момоқалдироқ. Ёқмас-кан баҳорга уйқудагилар, Сув сепди мудраган замин юзига. “Уйғон, хавотирли қағратон ўтди, Ишон”, деб термилди унинг кўзига. Бошида ҳар бир жон секанди, ахир қинсиз қиш қиличи чўчитганди-да. Уйғониб бошидан жудо бўлгунча, Яшашга кўникди тушда, уйқуда. “Уйғооон”, деб қичқирди момоқалдироқ, “Уйғон”, деб шивирлаб ёғди ёмғирлар. Узоқ уйқудан сўнг кўзин очгани, Балки замин қўрқар, балки оғринар. Ва ниҳоят кўз очди новда, Ишончи оқ эди, кўзлари оппоқ. Ҳеч ким кутмаганди, Қўзғалаётганди, Ёндириб юборди новдани чақмоқ. Яна қўрқув босди қора булутдек, Яна юракларда ишончсизлик жам. Баҳорга ёқмасди уйқудагилар, Баҳорга ёқмади уйғонганлар ҳам. ©Нажмиддин Эрматов @Najmiddin_Ermatov

Кенгликларга кўз тикмоқ керак, кетишни исташ керак ундан-да нари: овчи қопқонида сўнги нафасини олаётган бўри сингари.

*** Ёмғирни кузатмоқ керак: айвон четидаги устунга илиб, мато ёпиб қўйилган қафас ичидаги бедана бўлиб. Кенгликларга кўз тикмоқ керак, кетишни исташ керак ундан-да нари: овчи қопқонида сўнги нафасини олаётган бўри сингари. Баҳорни соғинмоқ керак: жонидан ўтканча қаҳратон қаҳри охирги кучини сарф этганича дон излаётган мусича каби. Севмоқ керак ўша сулувни— дардсизликдан даволаниб ўлиминг каби худди рад этилишинг бўйнингга олиб. ©Нажмиддин Эрматов @Najmiddin_Ermatov

Olti oymas, oʻn asrlik yo'l tortib keldim, Oʻlik qumli sahro uzra toʻlgʻonib keldim, Eshitganni uygʻotguvchi soʻz olib keldim, Panjasida xabar tutib uchgan gʻoz mana: "Alpomish zindonda yotibdi". Alp yigit bir noma bitti, joyi chox edi, Bitgunicha koʻzi namli, boʻgʻzi OH edi, Ming yildirki bandi ekan, kim ogoh edi, Yolgʻon emas HAQ yozilgan bir qogʻoz mana: "Alpomish zindonda yotibdi". Yoʻl toʻsarlar oʻq otishdi oʻt ketdi yondim, Ming yildirki, oyoq osti yerlarda qoldim, Zindondagi bandi oʻgʻlon qayta jo'natdi, Chanqovuzdan sado bo'lib yana taraldim, Oh, boʻxchada qolib ketgan mungli soz mana: "Alpomish zindonda yotibdi". Oʻn ming uyli eling Oʻzdan ko'chib ketibdi, Koʻk ruhini asrolmabdi, oʻchib ketibdi, oybarchining ultontozni quchib ketibdi, Meni hatto tanimadi kuntugʻmish checha, Bugun hech kim eshitmagan bir ovoz mana: "Alpomish zindonda yotibdi". Xabaringdan hech kim seni olmadi tanib, Zindoningda yotarsan-a endi oʻrtanib, Senku ruhan ozod eding, ammo bilmaysan, Oʻz tanidan zindon yasab, qoʻrqib, berkinib, Boychiborning chilbir dumin kesib "mardona", Odamlar zindonda yotibdi. Oʻn asrlik yo'ldan keldim, ortga kuchim qolmaydi, Isyonini koʻmgan eling seni taniy olmaydi, Boychiborning dumin uzgan bovuringdan umid uz, Seni izlab qutqargani endi hech kim bormaydi, Asrlarning orasida qolgan sas mana: "Odamlar zindonda yotibdi". ©Najmiddin Ermatov @Najmiddin_Ermatov

*** қарсак бу- олқиш эмасдир балки балки у исёндир етганча мажол минбардан учган сўзларни қўймасдан қўнишига ҳуркитишга урунишдир эҳтимол ©Нажмиддин Эрматов @Najmiddin_Ermatov

Hech kim yashamagandek yashaymiz keyin, Faqat yashayotganing unutsang bo‘ldi... @Najmiddin_Ermatov

*** Кел, бир зумга унутайлик ҳаётни, У ширин суҳбатларимизга қўяр панжара. Яшаш азобидан чекингин бир зум, Мен сенга қарайман, сен манга қара. Фақат шу қарашга борлиғинг сарф эт, Фақат шу қарашга атагин умринг. Унда дард, изтироб, бор унда қайғу, Ва яна қайғуга чайилган қувонч. Тасаввурингга эрк бериб юбор, Менинг тасаввурим сен билан тўлди. Ҳеч ким яшамагандек яшаймиз кейин, Фақат яшаётганинг унутсанг бўлди. ©Нажмиддин Эрматов @Najmiddin_Ermatov