Najmiddin Turon

* * * Sen kelmagan uyga sig‘masdan, Tentisam, bo‘zlasam visoling tilab. Bizlar birga yurgan yo‘llardan, Izlaringni tersam bittalab. So‘ngra qaytsam yana shu uyga, Izlaringni qo‘ygani ekib. Kunduzlar boshida parvona bo‘lsam, Tunlari sug‘orsam tinmay yosh to‘kib. Sen kelmagan uyda har kun zax yutib, Sog‘insam, o‘tinsam bilmasdan tinim, Bahor kelganida ushbu izlardan O‘sib chiqasanmi, sevgilim?.. ©Najmiddin Ermatov

Qanoti siniqku, ucholmas bulbul, Tillari kesilgan, tumshug‘ida zang. Sendan kattalarning hadigi sabab, Sening zamoningdan quvilgan ohang. Dilginang hapqirar hayajon yutib, Sezasan nimadir chekishin nola. Tinmay entikasan mo‘jiza kutib, Qafasning sayrashin kutyotgan bola. ©Najmiddin Ermatov 2018 yil, oktyabr

Hijron, bog‘ing buncha cheksiz, kengliklarda kezib toldim. Visol, o‘zing baland olma, qashshoqliging sezib qoldim... ©Najmiddin Ermatov

тун гувоҳ. ой пичоқ. азроил мирзо илвироқ нигоҳга бир тукин қўйиб, сўнгги нафасида, сўнгсиз умид-ла кўзига хат ёзиб қўйди. очиқ хат. боққувчи қаҳат. увишар кўнгил. ахир бўладими бу хатни ўқиб... ҳеч ким қаролмасдан, аста мактубнинг хатжилтини ёпиб қўйди. ©Нажмиддин Эрматов декабрь, 2018

* * * Тун. Ёмғир. Қоришиқ ифор. Учқур хаёл, қадамлар аста. Борлиққа сочилиб келади кетгинг, Ёмғир бўлсам керак, аслида. Сен йўқсан. Ҳеч ким йўқ. Нималардир бор. Ненидир туярсан ёмғир остида. Мен ахир осмонда яшаганманку, Не қилиб юрибман замин устида. Шайтон. Таъқиқ. Ва ўша мева— Афсус бор қувғинди одам наслида. Негадир уларга алоқам йўқдек, Ёмғир бўлсам керак, аслида. ©Нажмиддин Эрматов

*** Мени бир қудуққа экиб қўйинглар, Токи занжирини узгунча тилим, Семурғга ўзини тутгунча дилим, Эгилган бошидан тўйгунча элим, Мени бир қудуққа экиб қўйинглар. ©Нажмиддин Эрматов

*** Мени бир қудуққа экиб қўйинглар, Токи занжирини узгунча тилим, Семурғга ўзини тутгунча дилим, Эгилган бошидан тўйгунча элим, Мени бир қудуққа экиб қўйинглар. Мен ҳали ўсишга улгуришим шарт, Осмонга термулиб кўзи тинмасдан, Сиёҳли тарихни ўқиб қўймасдан, Бир бола келгунча, бунга кўнмасдан, Мен ҳали ўсишга улгуришим шарт. Ҳеч йўқса айтишга ярайин Унга, Қовурғам най бўлиб инграган пайтда, Кўзидан осмонни сидириб шартта, Унут ўтмишини майли бир марта, Ҳеч йўқса айтишга ярайин Унга. ©Нажмиддин Эрматов декабрь, 2018

Бир қиз келди хаёлдан чиқиб, Тўрт томоним мисли кўк эди. Осмонларга кетдим йиқилиб, Турмоғимга имкон йўқ эди...

* * * Бир қиз келди хаёлдан чиқиб, Тўрт томоним мисли кўк эди. Осмонларга кетдим йиқилиб, Турмоғимга имкон йўқ эди. Бир ҳис келди дилга тўкилиб, Кема янглиғ чайқалди таним, Гўё шу дам кетдим тирилиб, Рўё экан яшаётганим. Бир сўз келди келмагандайин, У қиз кутди, мен ичга ютдим. Фақат ишқни ўйладим, ё Раб, Ул сулувни буткул унутдим. Бир куз келди баридан кейин, Кетмоғи душвордир, кетмоғи қийин. Шу қиз дея яшаб умрбод, Шу куз ила ўтмоғим тайин. ©Нажмиддин Эрматов

Келма! Бир олам бахт билан келарсан, келсанг, Мен бахтли бўлишдан қўрқаман, келма. Келма! Мана шу дард билан, гулим, тирикман, Даводан ўлишдан қўрқаман, келма. © Нажмиддин Эрматов

*** Келма! Соғинчни ўлдирар сенинг ташрифинг, Дийдорга тўйишдан қўрқаман, келма. Келма! Ҳижроннинг овчиси бўлган висолга, Ўлжасин беришдан қўрқаман, келма. Келма! Туғилмаган шеърлар туғилсин ҳали, Уволга қолишдан қўрқаман, келма. Келма! Бир олам бахт билан келарсан, келсанг, Мен бахтли бўлишдан қўрқаман, келма. Келма! Мана шу дард билан, гулим, тирикман, Даводан ўлишдан қўрқаман, келма. © Нажмиддин Эрматов

* * * Деразадан термилар титраб, Ёмғирлардан шалаббо кеча. Жавдираб қарайди хонага, аммо Киролмайди чироқдан чўчиб. Мен-чи етолмайман уйқуга томон, Ҳар кеча минг азоб кечиб бораман. Соғинч бу тугундир, мутолаа — ечим, Ҳар кеча минг тугун ечиб бораман. На китоб ёпилар, на ёмғир тинар, Кеча тентирайди, уст-боши ивиб. Сахар яқин, сўнги варқада киприкларим борар илиниб. Ва ниҳоят чироғим ўчди, Соғинч кўчар тушга ўксиниб. Кеча кирар хонамга аста, Тонг келгунча олар исиниб. ©Нажмиддин Эрматов

дерлар: баҳорни соғинган уруғ, кута-кута гуллаб кетади, ўзи айланади баҳорга. дерлар: ёмғирни соғинган дарё, кута-кута парланиб кетар, ўзи эврилади ёмғирга. билмам: сени соғинётган мен, кута-кута яшасам, не бўлади охири?.. ©Нажмиддин Эрматов ноябрь, 2018

Kelgin, qismatimiz kelishdir asli, Ikkimiz bir hisga bo‘laylik asir. Hadikni qo‘y endi, ey, Havvo nasli, Men ta'qiq mevasi emasman axir.... @Najmiddin_Ermatov

*** Тилкалаб, тилкалаб тонглар дон сочди, Пешонангга қўнди қисмат қушлари. Яна бегонадай томоша қилдинг, Ёстиғингга оққан шаффоф тушларни. Эшилиб, эшилиб ингранди арқон, Дордаги ёстиғинг оқ нурлар қучди. Яна бегонадай томоша қилдинг, Парланиб, парланиб тушларинг учди. Қоралаб, қоралаб чўкди-я оқшом, Бошинг-а яна шу болишга етди. Суйилиб, суйилиб оққан тушлардан, Ёстиқдаги гуллар очилиб кетди. Куйиниб, куйиниб яна кўз очдинг, Ёстиқда гул унган, уза олмайсан. Туш ўша, гул ўша - танийсан менман, Менга бегонадай термилолмайсан. ©Нажмиддин Эрматов ноябрь, 2018

Muqovadek ochib sochimni peshonamni o‘qiydi shamol. Kel, Nurim-ey, ruhima singgin...

*** Жонтемирга Балки яна келгайдир баҳор, Балки яна гуллар дарахтлар. Балки яна булбуллар тўккан, Кўзёшидан унгайдир бахтлар. Балки яна масъум келинчак, Сойга бориб айтар тушини. Бу сафар ҳам сувлар айтмайди, Тушда юрган ул ёт кишини. Балки рашкдан увлайди бўри, Ой қилмишин ошкор этса доғ. Балки яна кофур хаёллар, Ҳаётимга тўқийди сиртмоқ. Балки ўлган оҳу кўзидан, Сачраб кетар борлиққа чирой. Балки яна қиздай бокира-Оғринмасдан оқа бошлар сой. Балки яна кутган, кутмаган Ҳар жон учун келгайдир баҳор. Аммо бунинг булардан ҳоли, Симёғочга нима даҳли бор?.. ©Нажмиддин Эрматов май, 2018.

Yarim tunda yarimlanyapman yulduz sanayotgan ko‘lning yonida. Kel, Nurim-ey, ruhima singgin...

Ярим тунда яримланяпман юлдуз санаётган кўлнинг ёнида. Кел, Нурим-ей, руҳима синггин. Кўлдан чиқиб бақалар аста кўзларима сакрай бошлайди. Кел, Нурим-ей, руҳима синггин. Муқовадек очиб сочимни пешонамни ўқийди шамол. Кел, Нурим-ей, руҳима синггин. Тошлар отиб бу кўлга кимдир чалғитмасдан юлдуз санашдан, қолмасимдан яримлаб буткул, кўзларима тўлмасдан бақа, тугатмасдан ўқишни шамол, кел, Нурим-ей, руҳима синггин. ©Нажмиддин Эрматов ноябрь, 2018