Najmiddin Turon

Шоираларимиз эртароқ, тезроқ, базан кескин, базан нафис улғайиб боришяпти!👇👇👇 Biz ulg‘aydik jimlikni quchib, Tilimiz kesdilar (kerakmas axir!) Yo‘limiz kesdilar (yurmasmiz baribir) Boshimiz kesdilar (nihoyat!) Endi yig‘lamaymiz so‘qir ko‘z ham yo‘q...

Халққа ва Холиққа терс бурсам йўлим, Шайтон нағмасига тебранса қўлим, Заррача бедорлик сезмаса кўнглим, Демакки, мудроқман, мудроқлик-ўлим, Уйғотинг мени. https://t.me/Najmiddin_Ermatov

012

Келағай, ой тувған шомларнинг ёдин Сочқилаб ўйнаймиз кузги боғларда. Қарчиғай ташланган каптардай жонни Бир фурсат асраймиз эзғин чоғлардан. Келағай, бу ғайир йўллардан қўрқмай, Узилган қадаминг гуллар ҳидласин. Айириб берарман мен сенга ойни, Ийириб берарсан унинг жилвасин. Келағай, қошингдай қорайганда қош, Юлдузлар кўзингдай ўчиб ёнганда. Висол билан тўлган, сен билан тўлган, Зорманда тунларга тағин зорманда. Келағай, тўла май қадаҳим синмай, Оғир бу оғриқдан оғринмай бағрим. Сен кетган ўша жой—турибман жилмай, Сен келсанг йўлларни айлармиз яғир. Келағай ва буни ғайб ишига йўй, Кўнглинг ишқ аршини қумсаган пайти. Келағай, келмасанг менинг сен томон Боришга ҳеч қачон сиғмайди ҳаддим. Келағай, ой тувған овлоқ шомларда... Н.Э. Март, 2025 https://t.me/Najmiddin_Ermatov

Баҳром Ирзаевга Арғумоқ кетган сўқмоқ, Заминга чўкиб борар. Уюрдан айри қулун, Жавдираб ўтиб борар. Киприклари қилқалам, Сиёҳин тўкиб борар, Тушовин узган исён, Етовчи юрак бунда. Аср ошган арчанинг Шохларида кўк томчи, Сояси турғун эмас, Бу беш кунлик алдамчи— Тўнглаган ёши дарак, Эй, қулуним, чопсанг-чи, На қўноқ мадор бўлар, На замон тиргак бунда. Кўк бўрин ёлин ўпган Шамолларга қулоқ сол. Эртакка кўчган чиннинг Шу йўлларда изи бор. Мутега кўп суянма, Атагани ҳўл рўмол. Ҳақ на даркор бундайга, На жони ҳалак бунда. Байловга кўникканнинг, Жони-да ширин келар. Бир жойга тўплаётган, Моли-да ширин келар. Бошини қумга суққан, Ҳоли-да ширин келар. Эли ялқов келар ва На подшо сергак бунда. Ҳайқириб кет тоғларни, Зир титратсин кишновинг. Ҳайқиравер қашқирлар, Бузгунича қуршовин, Ҳайқиравер айғирлар, Узгунича тушовин— Ўзинг ҳақ деб кетмасанг, Келмагай дарак бунда. Итларга талаш тушган Карвонни топмагунча, Алпларинг ютиб ётган Зиндонни топмагунча, Эгасиз бадар кетган, Туронни топмагунча, Ўзингни йўлларга сол, Қолмоқ не керак бунда?... март, 2021 https://t.me/Najmiddin_Ermatov

O‘zbekning og‘ir sharoitda qolgan katta shoiri Yo‘ldosh Eshbek bilan suhbat Bir necha kun avval ijtimoiy tarmoqlarda taniqli shoir va tarjimon Yo‘ldosh Eshbekning ijtimoiy og‘ir ahvolga tushib qolgani haqida xabar va xayriya postlari e’lon qilindi. Bu haqda birinchi bo‘lib yozgan jurnalist Farrux Jabborovga ko‘ra, shoir ayni vaqtda Chilonzor tumanidagi sobiq yotoqxonaning bir xonali tor oshxonasida, ayoli, ikki nafar nogiron farzandi va nabiralari bilan yashamoqda. O‘zining esa ko‘zlari ko‘rmay qolgan. “Bugun turkiy dunyoning katta shoirlaridan biri, Oʻzbekistonda xizmat koʻrsatgan madaniyat xodimi Yoʻldosh Eshbekni yoʻqladik. Koʻzlari koʻrmay qolibdi. Yostiqday kitobni koʻrsatib, yarmigacha tarjima qilishga ulgurdim, ishim chala qoldi, deb oʻkindi. Yangi sheʼrlarini ham qogʻozga tushirishga qiynalyapti ekan. Turnakoʻz buloq qaynab yigʻlashi haqida sheʼr oʻqib berdi. Oʻzi yarmini olib chin dunyoga ketishi, yarmini esa yolgʻon dunyoga qoldirishi haqidagi sheʼri... Nima deyishga ham hayronman. Boringlar, xabar olinglar, desammi. Davolataylik, chogʻroq uy olib beraylik, desammi. Oʻzbek katta el...mikan?” – deb yozdi u o‘zining facebook sahifasida. Vatandosh TV muxbiri shu kabi xabarlardan keyin holidan xabar olish maqsadida taniqli shoir yashayotgan uyda bo‘ldi va u bilan she’riyat, shoir ijodi va uning bugungi kunlari haqida qisqa suhbat qurdi. Eslatib o‘tamiz, shoir Yo‘ldosh Eshbek uchun boshlangan xayriya davom etmoqda va unga yordam berishni xohlaganlar ushbu karta raqamlariga mablag‘ o‘tkazishlari mumkin: UZCARD 5614681908452158 (Djabbarov Farrukh) 👉 HUMO 9860060102409871 (Farrukh Djabbarov) 👉 VISA 4195250040623413 (Farrukh Djabbarov) 📹👉 https://www.youtube.com/watch?v=3xbzpI6ppUg @haqiqatdaIlyos

Ёмғирлар ошиқиб сой томон кетди, Йўқсиллар ишониб бой томон кетди, Мен унинг меҳридан мосуво десам Лек умид ҳайитлаб Ёр томон кетди... Барчага Рамазон ҳайити муборак бўлсин! https://t.me/Najmiddin_Ermatov

Bu dunyo aslida aldoqchilardir! Bu dunyo aslida yig‘layotgan qiz! Yo‘ldosh Eshbek

Oxirgi postimga juda ko‘p munosabat bildirildi, qarab turmaymiz, yordam berishga shaymiz, degan izohlar yozildi. Elning daldasi umid bag‘ishlab, ulug‘ ayyom kunlari yana bir post qo‘yishga qaror qildim. Yo‘ldosh Eshbek xalqimizni milliy ozodlikka boshlagan shoirlardan biri. Shunday shaxsning xor-u zorlikda yashashiga tomoshabinlik qilish bizga yarashmaydi. Eng yomoni, bu ahvol surunkali ravishda davom etmoqda. Shoir sovet davridayoq ta’qibga uchragan bo‘lsa, mustaqillik yillarida ham ro‘shnolik ko‘rmagan, 10-15 yilcha uy qamog‘ida saqlangan. Bu, tabiiyki, oilani uch-quyruqsiz muammolar zanjiriga giriftor qilgan. Ko‘pchilik ziyolilar vaziyatni oldindan yaxshi biladi (sabablarini ham), imkon qadar ko‘mak berib keladi. Yo‘ldosh Eshbek “Yig‘layotgan qiz” timsolida butun dunyodagi barcha ezilgan mazlumlarga, hayotda ko‘p aldangan soddadillarga hamdard, hasratdosh bo‘ldi. Ne tongki, o‘zining ham qismati “yig‘layotgan qiz”ga aylanib ketdi. Bu dunyo aslida aldoqchilardir! Bu dunyo aslida yig‘layotgan qiz! Biror yillar ilgari borganimda Yo‘ldosh Eshbek sobiq yotoqxonaning bir bo‘lmasida yashardi, har holda. Keyin oshxonaga ko‘chib chiqibdi. Oilaviy sharoit shuni taqozo qilgan. Kamida besh jon tiqilib kun kechirmoqda: ota, ona, o‘g‘il, qiz, nabira… Ustiga ustak, shoirni xastaliklar qiynayapti: qand kasali bor, ko‘z ko‘rmay qolgan, o‘t azob beradi… Shu holida ham ijoddan to‘xtagani yo‘q. Og‘riqlar orasida she’rlar bitadi, ulug‘ ulamolarimizdan tarjimalar qiladi (aytib turib yozdirsa kerak). Avvalgi postim ijtimoy tarmoqda keng tarqalib, yaxshi odamlar amaliy yordam taklifi bilan chiqdi, manzilini surishtirgan ham ko‘p bo‘ldi. Menimcha, hamma uyiga borib, bezovta qilmagani durust. Xijolatli... Do‘stlar bilan kengashib, eng to‘g‘ri yo‘l plastik kartaga ko‘mak yig‘ish deb o‘yladik. Shoirning o‘zi bu haqda eshitishni ham istamadi. Shuning uchun shaxsiy karta ma’lumotlarimni e’lon qilyapman. 👉 UZCARD 5614681908452158 (Djabbarov Farrukh) 👉 HUMO 9860060102409871 (Farrukh Djabbarov) 👉 VISA 4195250040623413 (Farrukh Djabbarov) Olganing – birovniki, berganing – o‘zingniki, deganlar. Katta elmiz, bir g‘ishtdan qo‘yib, osmono‘par minorlar tiklaganmiz. Millatim deb yashagan shoirini millatimiz yolg‘iz qo‘ymasligiga ishonaman. Imkoningiz boricha yordam qilsangiz quvonaman, imkoningiz bo‘lmasa tushunaman. Postning ko‘proq odamga yetib borishiga hissa qo‘shing 🙏 🗄Farrux Jabborbek

Келма! Мана шу дард билан, гулим, тирикман, Даводан ўлишдан қўрқаман, келма. https://t.me/Najmiddin_Ermatov

"Negadir ularga aloqam yoʻqdek, Yomgʻir boʻlsam kerak aslida... " Mahliyo Asqaraliyeva ijrosida https://t.me/Najmiddin_Ermatov

Бу кунлар ёмғирнинг жилваси, Соғинчнинг аксидир, ўйласам. Бу кунлар—эртанинг эркаси, Юпатар ўзгадир йиғласа... Бу кунлар баҳорнинг ёдини Боғлардан ўмарган қароқчи. Бу кунлар кўп кўрган тотиниб, Жонимни қайтадан олмоқчи. Бу кунлар кун эмас, Кунсулув мен ила қолдирган хотири. Бу кунлар тутса ҳам ўзни ёв, Отса ҳам чиқарман отилиб. Кунсулув пеш қилиб кадарни, Умрини эртага атади. Тўхтатдим мен бундай сафарни, Бу кунлар қиёмат қадардир... https://t.me/Najmiddin_Ermatov

Taklifnoma Sizni 2025-yil 24-mart kuni soat 15:00 da O‘zbekiston Yozuvchilar uyushmasida o‘tadigan O‘zbekiston xalq yozuvchisi Shukur Xolmirzayev tavalludining 85 yilligiga bag‘ishlangan adabiy-maʼrifiy tadbirga taklif etamiz.

🎙 Najmiddin Ermatov, “Bir yoqda” (she’r) 🎬 "Izlam-2" taqdimotidan 📘 @akademnashr 0️⃣ #izlam

—Бизнинг юртга баҳор                                        тоғлар оша келади, —Бизнинг юртга мозорлар оралаб. —Бизнинг боғни гуллар                                       турфа рангга белади, —Бизларда қон белар қоралаб. https://t.me/Najmiddin_Ermatov

Ўзга юртлик ва фаластинлик бола суҳбати —Бизнинг юртга баҳор                                        тоғлар оша келади, —Бизнинг юртга мозорлар оралаб. —Бизнинг боғни гуллар                                       турфа рангга белади, —Бизларда қон белар қоралаб. —Капалак қувармиз қирларда, —Бизларни ўқ қувар тинимсиз. —Кўксимиз тутамиз елларга, —Сезамиз андуҳнинг тамин биз. —Отам айтар бизга,                                      қушдай парвоз эт, —Отамни отганлар, айтолмас. —Онам айтар, болам,                                     умринг гулзор эт, —Онам у дунёдан қайтолмас. —Дунёга боқ, қандай чароғон, —Дунё қаро тундан иборат. —Одамлар шод, тинч ахир замон, —Шайтонга қилурлар ибодат. —Менинг орзуйим бор                                         дунёни кезмоқ, —Қарзим бордир—Ватанни асраш. —Фазода учгим бор,                                        уммонда сузмоқ, —Бурчим бордир—ёв билан саваш. —Ёшимиз тенг, гапинг ғалати, —Боламан-у болалигим йўқ. —Бу сўзларни кимлар ўргатди? —Қўшиқ айтиб учаётган ўқ. —Менинг вақтим битди,                                        ухлашим керак, —Ухласам, эҳтимол турмасман. —Улғайгач кўп гаплар                                        айтарман бешак, —У вақтлар мен балки бўлмасман. —Бизнинг юртга баҳор                                        тоғлар оша келади, —Бизнинг юртга мозорлар оралаб. https://t.me/Najmiddin_Ermatov

21 март-Ўзбекнинг буюк шоири Абдулла Орипов туғилган кун! ВАТАНИМ Ҳар бир уйда айғоқчи, Ҳар қадамда искович, Одамни кўрса қочар, Бедовларинг ҳуркович. Ошингга заҳар солди, Ғанимларинг бир ҳовуч, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Нон бермайди ва лекин Нон еганни ўлдирар, Ўсиб турган ниҳолни Аёз каби сўлдирар. Бозор бормай қўйнингни Пуч ёнғоққа тўлдирар, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Ҳар кўчада минг миршаб, Ҳар гўшада авахта, Ҳақ деганнинг оғзи берк, Қон ютар лахта-лахта. Ўзи-ку пахта эккан, Ёстиғи бўлди тахта, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Илму ирфон жаҳолат Ғорига кириб кетди, Ўлик тирикдан ўтди, Тирик ўликдан ўтди. Адолат истаб борсанг Ёлғон тиршайиб кутди, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Қайларгадир йўқолди Меҳр билан муҳаббат, Қўлида ханжар ушлаб, Адоват қолди фақат. Ёмон гап арзон-гаров, Яхши гап бўлди қаҳат, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Тўғригўйлар бир четда, Эъзоздадир иғвогар, Қайтдик ўрта асрга, Одам пуллар савдогар. Минг йиллик хазинангни Талаб ётар ўғри, ғар, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Ўлиб ҳам бўлмай қолди, Ювғич урар кафандан, Кимлардандир юққан кир Кетмас сира бадандан. Қуруқ ҳашаклар қолди Гуллаб турган чамандан, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Қувган ҳам халқим дейди, Халқим дейди қочган ҳам, Лекин халқнинг аҳволин Ўйламас бирор одам. Жаллод ҳам халқ номидан Ўқир фармонни у дам, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Турфа хил замонларни Кўрган битта инсонман, Гоҳ фахр этсам, гоҳо Баридан пушаймонман. Нетайки мен на Хорун, На ёки Сулаймонман, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Барчасига сабабдир Асли нафснинг балоси, Меҳнаткаш халқнинг эса Ечилмас муддаоси, Иншооллоҳ, бандага Боққай бир кун Худоси, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. https://t.me/Najmiddin_Ermatov

Наврўз—инсониятнинг энг қадимий байрами. Кишилик жамияти тун ва куннинг, қиш ва ёзнинг алмашинувини идрок этиб, оқ ва қоранинг, ёвузлик ва яхшиликнинг мангу курашувини англай бошлаган замонлардан буён бу байрам нишонланади. Инсонларнинг Йилбоши сабаб ўтказадиган урф-одатларида, айтиладиган куй-қўшиқларида, турфа ўйинлари, курашу кўпкарисида Оқнинг, Эзгуликнинг тарафида туриши мужассам. Йўлдоши мангулик бўлган Йилбоши қутлуғ келсин барчамизга!!! https://t.me/Najmiddin_Ermatov

Ҳали кечилмаган кечувдай мубҳам, Ҳали шўнғилмаган уммондай сирли, Ҳали ёзилмаган шеърдайин бекам, Бир йўлга тушардим яралар битса. Ҳамда кўрилётган тушдайин эркин, Ҳамда сурилётган хаёлдай озод, Ҳамда айтилмаган сирдайин ичкин, Шамолга дўнардим қўйворса ҳаёт. Бироқ артилмаган мужгондай интиқ, Бироқ учолмаган қушдайин дилгир, Бироқ ўлолмаган дардчилдай тирик, Бандиман, Тушовим маҳкамлар кимдир... https://t.me/Najmiddin_Ermatov