ሁሌ መረጃ.com/hule merja

ከሐዋሳ ወደ አዲስ አበባ በመጓዝ ላይ የነበረዉ አዉሮፕላን ዉስጥ ታይቷል የተባለዉ ጭስ በዉስጡ ያለዉ ዘይት በመቃጠሉ የተነሳ መሆኑ ተገለፀ! የኢትዮጵያ አየር መንገድ ከሰሞኑ በአዉሮፕላኑ ላይ የተከሰተው ጉዳይን አስመለክቶ እንዳስታወቀው ከእሳት ወይም ከሌላ ነገር ጋር የተያያዘ ሳይሆን አዉሮፕላን ዉስጥ ያለዉ ዘይት ተቃጥሎ ነዉ በወቅቱ የተከሰተው ጭስ ሊፈጠር የቻለዉ ይህም አልፎ አልፎ የሚያጋጥም ችግር ነዉ ብሏል። የአየር መንገዱ ስራ አስፈፃሚ አቶ መስፍን ጣሰዉ በተለይ ለካፒታል እንደተናገሩት " በአዉሮፕላኑ ዉስጥ ያለዉ ዘይት መጋጠሉ እና ከእርሱ ጋር ተያይዞ የተፈጠረ ጭስ ነዉ ይህ ደግሞ የተለመደ ነዉ ብለዋል። የኢትዮጵያ አየር መንገድ በረራ ቁጥር ET154 ሚያዝያ 29፣ 2016 ከሀዋሳ ወደ አዲስ አበባ በመጓዝ ላይ እያለ በአውሮፕላን ውስጥ ጭስ መታየቱን አስታዉቆ እንደነበር ይታወቃል ። [Capital]

የ10 ዓመት ታዳጊን ዋና ካልዋኘህ በማለት ውሃ ውስጥ ገብቶ ህይወቱ እንዲያልፍ ምክንያት ሆኗል የተባለ ግለሰብ በእስራት ተቀጣ በምስራቅ ሀረርጌ ዞን  ጃርቱ ወረዳ ሙለታ  ተብሎ በሚጠራ አካባቢ የ10 ዓመት ታዳጊ ውሃ ውስጥ ዘሎ ለመዋኘት ሲገባ ህይወቱ ማለፉን  የምስራቅ ሀረርጌ ዞን ከፍተኛ ፍርድ ቤት  ገልጿል፡፡ ተከሳሽ አንሴ አህመድ የተባለው የ20 ዓመት ወጣት  10 ዓመት ከሆነው  ሙዓዝ  ጋር እየተጫወቱ  በነበረበት  ሰዓት ለምን አትዋኝም የሚል ጥያቄ ሲያቀርብለት መዋኘት አልችልም  የሚል ምላሽ ሲሰጠው  እንዴት ትፈራለህ ወንድ አደለህ ወይ  ግባ  በማለት ወደ ውሃ ዘሎ  እንዲገባ ገፋፍቶት ለሞት ምክንያት እንደሆነ የምስራቅ ሀረርጌ ዞን ከፍተኛ ፍርድ ቤት የኮሙኒኬሽን ክፍል ሃላፊ ካሚል ቱጅሃን በተለይም  ለብስራት ሬዲዮ እና ቴሌቪዥን ተናግረዋል፡፡ በሰዓቱም የ10 ዓመት ታዳጊው ለመዋኘት  ተንደርድሮ ሲገባ  ውሃው ውስጥ ያለው ድንጋይ ላያጭንቅለቱ ላይ ያርፋል በዚህም አደጋ ወዲያውኑ ህይወቱ አልፏል።  በሁኔታው የተደናገጠው  አንሴ  ልጁን ለማውጣት ይሞክራል። በአካባቢው የነበሩ ነዋሪዎች ደርሰው ተጋግዘው ያወጡታል ይሁን እና ልጁ ጭንቅላቱ ላይ ከባድ ግጭት አጋጥሞት ከውሃ ውስጥ ሳይወጣ  ህይወቱ ማለፉን ይረዳሉ ስለሆነም አደጋውን ለፖሊስ ያሳውቃሉ :: ፖሊስም  አስከሬኑን  ወደ ሆስፒታል ወድያውኑ በመላክ   ምርመራውን ማጣራት ይጀምራል  ተከሳሽም ልጁ ውሃ ውስጥ ሲገባ ልረዳው ነው የገባሁት እንጂ ምንም የማውቀው  ነገር የለም የሚል ምላሽ ቢሰጥም  በአካባቢው የነበሩ የሁለቱን ንግግር ያዳመጡ ምስክሮች ቃላቸውን ይሰጣሉ ፖሊስም በህክምና እና በሰው ማስረጃ መዝገቡን በማደራጀት  ለዓቃቢህግ ይልካል፡፡ የምስራቅ ሀረርጌ ዞን ከፍተኛ ፍርድ  ቤት  ዓቃቢ ህግ ባቀረበው መሰረት ተከሳሸ ሆን  ብሎ ለአደጋ በሚጥል መንገድ ሰውን  በመገፋፋት የግድያ ወንጀል በመፈጸም የተመሰረተበት ክስ  በመመልከት  በተከሳሽ አንሴ አህመድ  ላይ  በ7 ዓመት ከ8 ወር እስራት እንዲቀጣ ውሳኔ  የተላለፈበት መሆኑን የምስራቅ ሀረርጌ ዞን ከፍተኛ ፍርድ ቤት የኮሙኒኬሽን ክፍል ሃላፊ ካሚል ቱጅሃን ጨምረውም ለብስራት ሬዲዮ እና ቴሌቪዥን ተናግረዋል፡፡ በኤደን ሽመልስ #ዳጉ_ጆርናል

በደቡብ ኢትዮጵያ 148 ቀበሌዎች ከ75 ሺህ በላይ የቤተሰብ አስተዳዳሪዎች ለጎርፍ አደጋ ተጋላጭ መሆናቸው ተነገረ በደቡብ ኢትዮጵያ ክልል እየጣለ ያለውን የበልግ ዝናብ ተከትሎ 148 ቀበሌዎች ከ75 ሺህ በላይ የቤተሰብ አስተዳዳሪዎች ለጎርፍና ለአፈር ናዳ አደጋ ተጋላጭ መሆናቸው የክልሉ አደጋ ስጋት ሥራ አመራር ኮሚሽን ገለፀ። የኮሚሽኑ ኮሚሽነር ጋንታ ጋምአ ለኢዜአ እንደገለጹት መደበኛና ከመደበኛ በላይ የሆነ የበልግ ዝናብ ስርጭት በክልሉ የጎርፍና የአፈር ናዳ አደጋዎችን ሊያስከትል ይችላል። በተለይ ጎፋ፣ ወላይታ፣ ጋሞ፣ አሌ እና አሪ ዞኖች ለጎርፍና ለናዳ እንዲሁም ደቡብ ኦሞ፣ ኮንሶና ጌዴኦ ዞኖች ለጎርፍ አደጋ የመጋላጥ ስጋት ያለባቸው መሆናቸውን ጠቅሰዋል። በመሆኑም በክልሉ የአደጋ ተጋላጭ አካባቢዎችን በመለየት ህዝብን ባሳተፈ መልኩ የቅድመ መከላከል ሥራዎች በመከናወን ላይ መሆናቸውን ገልጸዋል።

በአዲስ አበባ ከተማ በትላንትናው እለት ባጋጠመ የእሳት አደጋ የአንድ ሰዉ ህይወት አለፈ በአዲስ አበባ ከተማ ግንቦት 1ቀን 2016 ዓ.ም ከምሽቱ 5:17 ሰዓት ላይ በቦሌ ክፍለ-ከተማ ወረዳ 2 ጃፓን ኤንባሲ አካባቢ ባጋጠመ የእሳት አደጋ የአንድ ሰዉ ህይወት ማለፉን የእሳትና አደጋ ስጋት ስራ አመራር ኮሚሽን አስታውቋል። የኮሚሽኑ የህዝብ ግንኙነት ባለሙያ አቶ ንጋቱ ማሞ እንደተናገሩት የእሳት አደጋዉ ያጋጠመዉ በአንድ መጋዘን ላይ ሲሆን ህይወታቸዉ ያለፈዉ ግለሰብ የመጋዘኑ የጥበቃ ሰራተኛ ናቸዉ። የአደጋ ጊዜ ሰራተኞች ቦታዉ ላይ ፈጥነዉ ቢደረሱም የጥበቃ ሰራተኛዉ ህይወት አስቀድሞ ያለፈ በመሆኑ የእሳት አደጋዉ ተዛምቶ ተጨማሪ ጉዳት ሳያደርስ መቆጣጠር ችለዋል። መጋዘኑ ለመጋዘን አገልግሎት ስራ መዋል የማይገባዉ የመኖሪያ ቤት ቢሆንም ባለንብረቶቹ ቤቱን ለመጋዘን አገልግሎት ይጠቀሙት እንደነበር ኮሚሽኑ አስታውቋል። ማናቸዉም ዕቃዎች የሚቀሙጡባቸዉ መጋዘኖች እሳትን ሊቋቋሙ ከሚችሉ ግብዓቶች የተገነቡና ለዚሁ ዓላማ ብቻ የተገነቡ መሆን ይኖርባቸዋል ሲል ኮሚሽኑ አሳስቧል።

50 አመታት በሕጻናት መንደሮች የመክፈቻ መርሐግብር ኤስ ኦ ኤስ የሕጻናት መንደሮች በኢትዮጵያ ላለፉት ሃምሳ ዓመታት የቤተሰባቸውን እንክብካቤ ያጡ እና የቤተሰባቸውን እንክብካቤ ለማጣት በአደጋ ላይ ያሉ ሕጻናት የቤተሰብ እንክብካቤና ጥበቃ አግኝተው እንዲያድጉ ለሁለንተናዊ እድገታቸው  የሚያስፈልገውን  በማሟላት እንክብካቤ ሲሰጥ እንደቆየ አስታውቀዋል። ኤስ ኦኤስ የህጻናት መንደሮች በኢትዮጵያ በአስቸጋሪ ሁኔታ ለሚገኙ ሕጻናት ያጡትን ቤትና ቤተሰብ በመተካት  ያላቸውን አቅም ችሎታ ለማውጣት እንዲረዳቸው አቅማቸውን ለማጎልበት የሚረዷቸውን የተለያዩ እድሎችን በመፍጠር አስፈላጊውን ትምህርትም እንዲያገኙ በማድረግ ላለፉት ሃምሳ አመታት ሕጻናቱን ሲያገለግል እንደቆየ ገልጸዋል ። የበጎ አድራጎት ድርጅቱ ስራውን የጀመረው በ1966 ዓ.ም በተከሰተው ድርቅ በትግራይ ከተማ በእርዳታ ሰጪነት (emergency program )እንደነበርና በጊዜ ሂደትም ዘጠኝ ክልሎች ላይ ተደራሽነታቸውን እንዲስፋፉና በአለም አቀፍ ደረጃ ሰባ አምስት አመታትን እንዳስቆጠሩ በመቶ ሰላሳ ሰባት ሀገራትም   እየሰሩ እንደሚገኙ አሳውቀዋል ።   ይህ የ50ኛ አመት በዓል የሃምሳ አመታት ጉዟችንን የምናስታውቅበት ብቻም ሳይሆን ልንሰራ ያቀድነውንም በይፋ የምንገልጽበት ነው የሚሆን እንደሆነ ገልጸዋል። የሴቶች ማህበራዊ ጉዳይ መሪ ስራ አስፈጻሚ ክብርት ዶክተር ትፍስህት ሰሎሞን"በዚህ አጋጣሚ ይንን እድል ለሕጻናቱ ሳላመቻቻቹ በድርጅቱ እና በእኔ ስም ምስጋናዬን እያቀረብኩ የሀገር ፍቅር አለኝ የሚል የአንድ ዜጋ መገለጫ እነዚህን የነገ ሀገር ተረካቢ ሕጻናትን የበኩላችንን ድጋፍ  ማድረግ ስንችል ነውና ሁላችንም ድርሻችንን እንወጣ እላለሁ"። እንዲሁም ድርጅታቸው ለኤስ ኦ ኤስ ተገቢውን ድጋፍ  እንደሚያደርግ በመስሪያ ቤታቸውን ለሰራተኞቻቸው የልጆች ማቆያ በመክፈትን ለሴቶች ልዩ ድጋፍ በማድረግ ከጎኑ እንደሚቆሙ ገልጸዋል። የሲቪል ማህበረሰቦች ባለስልጣን ምክትል ዳይሬክተር አቶ ፋሲካ ሞላው "የበጎ አድራጎት ድርጅቶች መብዛት እንደ ሀገር የሚያበረክተው አስተዋፅኦ ትልቅ ነው ተቋማችንም አስፈላጊውን ክትትል ቁጥጥርና ድጋፍ  እያደረገ ይቀጥላል "ብለዋል። በአጠቃላይም በአማራጭ የቤተሰብ እንክብካቤ፣ በቤተሰብ እና ማህበረሰብ አቅም ግንባታ፣ በአስቸኳይ ጊዜ ሰብዓዊ ድጋፍ ፣በትምህርት ፣በጤናና በወጣቶች ማብቂያ መርሐግብሮቻችን ከ8,100,000 በላይ የሚሆኑ ዜጎችን ለማድረስ እንደቻሉ ገልጸዋል።

የኢትዮጵያ ኢንቨስትመንት ኮሚሽን በኢንዱስትሪ ፓርኮች ዉስጥ የሚሰሩ ኩባንያዎች 50 በመቶ ምርታቸውን ለሀገር ዉስጥ ገበያ እንዲያቀርቡ መፍቀዱን ገልጿል። የኮሚሽኑ ምክትል ኮሚሽነር ዘለቀ ተመስገን (ዶ/ር) እንደተናገሩት በኢንዱስትሪ ፓርኮች ውስጥ የሚሰሩ ኩባንያዎች ምርታቸውን ሙሉ በሙሉ ለውጭ ገበያ እንጂ ለሀገር ውስጥ ማቅረብ ሳይፈቀድላቸው ቆይተዋል። ይሁን እንጂ በተለያዩ ምክንያቶች ተጽዕኖ ሥር የነበሩ ባለሃብቶችን ለማበረታታት በፓርኮች ውስጥ የሚሰሩ ኩባንያዎች 50 በመቶ ምርታቸውን ለሀገር ውስጥ ገበያ እንዲያቀርቡ በአዋጅ መፈቀዱን ኢዜአ ዘግቧል። ይህ እርምጃ ኩባንያዎች ምርታማነትን ለማሳደግ ብቻ ሳይሆን ለሸማቹ ማኅበረሰብም የገበያ ዋጋን በማረጋጋት ረገድ ትልቅ ሚና ይጫወታል ተብሏል።