القارئ أحمد خضر - ahmed khedr

الاستسلام شعور صعب.. لما تفضل تحاول أكتر من مرة، وتبذل كل اللي تقدر عليه، وفي الآخر تحس إن مفيش نتيجة، وإن كل الأبواب مقفولة! وفي اللحظات دي الإنسان ممكن يحس إنه خلاص مش قادر يكمل، وإن مفيش فايدة من المحاولة من الأساس؛ وساعتها تلقائي هيتوقف عن السعي ومحاولات الإصلاح! ولكن من رحمة ربنا بينا إنه حكى لنا على نماذج عاشت ظروف صعبة جدًا، وتعرضت لضغوط من كل ناحية، ولكنها صبرت واحتسبت ولم تستسلم أبدًا.. نبي الله نوح عليه السلام.. استمر 950 سنة يدعو قومه إلى الله، ليلًا ونهارًا، سرًا وجهرًا! ورغم إن اللي آمن به عدد قليل، وكان نصيبه من غالب قومه السخرية والإعراض، إلا إنه لم يستسلم عليه السلام وفضل مكمل دعوة معاهم السنين دي كلها! لحد ما وصل للحظة شعر فيها إنه مبقاش في إيده حاجة تاني يعملها مع قومه؛ {فَدَعَا رَبَّهُ أَنِّي مَغْلُوبٌ فَانتَصِرْ}.. وده مش استسلام لليأس! ده تسليم لله عز وجل بعد ما بذل كل ما يستطيع.. فجاءه الفرج من حيث لا يحتسب، ونجّاه الله ومن آمن معه، وجعل قصته آية للعالمين. فلما تحس إنك عملت كل اللي عليك، ومش قادر تكمل لوحدك؛ دي مش نهاية الطريق! دي أحيانًا بتكون بداية الفرج.. فإياك أن تستسلم لليأس، وسلّم أمرك لله، واستمر فيما تقدر عليه؛ فإن الله لا يضيع سعيًا بُذِل بإخلاص، ولا يترك عبدًا لجأ إليه صادقًا.. {فَدَعَا رَبَّهُ أَنِّي مَغْلُوبٌ فَانتَصِرْ * فَفَتَحْنَا أَبْوَابَ السَّمَاءِ بِمَاءٍ مُّنْهَمِرٍ * وَفَجَّرْنَا الْأَرْضَ عُيُونًا فَالْتَقَى الْمَاءُ عَلَىٰ أَمْرٍ قَدْ قُدِرَ}