مَوَاعِظُ و رَقَائقُ 🇵🇸

قررت تربي دقنك هيجيلك انترڤيو مهم في شركة كنت بتحلم بيها وهيقولولك احلق يابني عشان تبان مهندم في المقابلة ! قررت تبطل تقف مع بنات تهزر وبطلت تسلم ب ايدك عليهم هتلاقي بنات كتير بقالك فترة مشوفتهمش هيطلعولك من تحت الارض وهتتحط ف مواقف معاهم غصب عنك وهيمدوا ايدهم ليك! قررت تبر ابوك وامك رغم عصبيتهم عليك ع الفاضية والمليانة هيطلبوا منك مشاوير تبانلك تافهه وانت وراك هم مايتلم ! قررت تبطل ذنب معين ، في نفس الوقت كل الظروف حواليك هتتهيأ ليك انك تعمله! قررت تبطل سجاير ، مع اول وقفة ليك مع صحابك هيعزموا عليك بسجارة قررت تبطل اغاني ، هتركب ميكروباص هتلاقي السواق مشغل الاغنية اياها ! هتلاقي صحابك مشيرين ليك تراك الفيلم الاجنبي اللي لسا ف السينما  ! هتلاقي صاحبك عازمك على خطوبته ! قررت متسيبش فجر ، هيجيلك مشوار ترجع منه 2 بليل ميت والفجر 5 الا تلت ! قررت تصوم الاتنين والخميس ، هتصحى يومها الساعة 7 الصبح قلقان  وميت م العطش لسبب متعرفوش  مع ان الطبيعي بتاعك بتصحي 11 ومش عطشان قررت تغض بصرك ؟ هتقعد جنبك ف الميكروباص واحدة متبرجة ومتعطرة وهيعدوا من قدامك طول اليوم ! قررتوا تسيبوا بعض لله ؟ هيحصل الف موقف يجبر حد منكم يبعت للتاني كل قرار صح هتاخده ويبانلك سهل ف ذاته ..ليه اختبار بعده عشان يكشف هل كنت صادق ولا لسا موصلتش للمرحلة دي ؟ كل قرار بالتوبة هتاخده هيجيلك بعده موقف عشان قلبك يتشاف ساعتها مقبل ولا معرض ولا بيجاهد ولا ايه؟ مرة د. محمد الغليظ قال ..لو جالك الاختبار بعد التوبة افرح لانه علامة على قبولها ..بس اثبت بالله عليك أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ (2) وَلَقَدْ فَتَنَّا الَّذِينَ مِن قَبْلِهِمْ ۖ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ (3)