ادبیات سئونلر

تبریزین گول اوغلونا....‌‌ خواننده: خسرو مسروری پیانو: چنگیز صادق اف شعر: علیرضا نابدل موسیقی: بهروز دولت آبادی

اوشاق ادبیاتی https://t.me/Adabiyyatsevanlar

اوشاق ادبیاتی اوشاقلاریمیزی موناسیب سن ده موسیقی ایله تانیش ائده ک. https://t.me/Adabiyyatsevanlar

اوشاق ادبیاتی منیم یووام هاردا؟ حاضیرلاییب سویله یین:« فاطمه محمودی» https://t.me/Adabiyyatsevanlar

اوشاق ادبیاتی «محمد عابدین پور» پینوکیو(سون بؤلوم) پینوکیو پول‎لار الینده گئنه ماهنی اوخویا-اوخویا گئتمه‌یه باشلادی. خلوت بیر یئردن گئچرکن بیرینین اوجا سسله گولدویونو ائشیتدی. بیردن قاباغیندا اونو قاباقجا توتوقلایان سیرک اییه‌سی گؤیردی. - گل بورا سنی یاراماز. گئچن سفر الیمدن نه جور قاچدین بیلمیرم، آنجاق ایندی ایسه سنین جزاوی وئره‌رم- دئیه‌رک پینوکیونون قول‎لاریندان توتوب دنیزه تونلادی. پینوکیو دنیزه دوشرکن سویون اوزه‌رینده قالیب دیبه باتمادی، چونکو پینوکیو تاختادان اولدوغو اوچون سو اونو قالدیریب اوزه‎رینده ساخلاییردی. سویون اوزه‌رینده بئله باتمادان قالماق، پینوکیونون خوشونا گلدی. قول‎لاری ایله قیچ‎لارینی اویناداراق اوزمه‎یه باشلادی. ساحیله دوغرو اوزه‌رکن بیردن بیره اؤزونو قارانلیق بیر یئرده گؤردو. پینوکیونو بیر بؤیوک بالیق اودموشدو. ایندی پینوکیو بالیغین قارنیندا ایدی. پینوکیو بالیغین قارنیندا اولسون گله‌ک ژئپئتو بابانین یانینا. ژئپئتو بابا ائوه گلیب چاتمایان پینوکیو-یا نیگران قالمیشدی. پالتوسونو پینوکیونو اوخولا گؤندرمک اوچون ساتدیغیندان مریضلمیشدی. اوغلو پینوکیونو آختارماق اوچون مریض-مریض یولا دوشدو. ان سونوندا پینوکیونون دنیزه آتیلدیغی یئره گلدی. اوردا کی بالیقچی‌لاردان اوغلونون گؤروب گؤرمه‎دیکلرینی سوروشدو. بالیقچی‌لاردا سیرک اییه‌سینین پینوکیونو دنیزه آتدیغینی گؤردوکلرینی سؤیله دیلر. ژئپئتو بابا بالیقچی‌لارین بیریسینه، قاییغی ایله دنیزه گئدیب اوغلونو آختارماغا یاردیم ائتمه‌سینی یالواردی. ژئپئتو بابانی تانییان و اونو نه قدر یاخشی بیر اینسان اولدوغونو بیله‌ن بالیقچی، بو ایسته‎یه یوخ دئینمه‎دی. بیرلیک ده قاییغا مینیب دنیزه آچیلدیلار. قاییق بیر سوره یول گئتدیک دن سونرا شدتله بیر یئل اسدی. بؤیویه‌ن دالغالارا قاییق داها دایانانمادی، بیردن بیره دؤندو. بالیقچیلا ژئپئتو بابا اؤزلرینی بیر آندا  دالغالارین آراسیندا گؤردولر. ژئپئتو بابا هم یاشلی اولدوغوندان هم ده اوزمه‌یی بیلمه دیگیندن دنیزین دیبینه دوغرو باتماغا باشلادی. پینوکیونو اودان بالیق، ژئپئتو بابانی دا اوتدو. ژئپئتو بابا  بالیغین بوغازیندان زویوب قارنینا دوشدو. بالیغین قارنیندا بیر آغلایان اوشاغین سسینی ائشیتدی. بو سسی تئز تانیدی. بو، اوغلو پینوکیونون سس ایدی. ژئپئتو بابا اوغلونو تاپدیغی اوچون چوخ سئویندی. پینوکیو-یا: پینوکیو، اوغلوم من بابان، ژئپئتو بابان. دیری اولدوغوندان چوخ سئویندیم. سنه او قدر نیگران قالمیشدیم کی. باباسینین سسینی ائشیدن پینوکیو گؤز یاشلاری ایچینده باباسینا ساریلدی. - سنین سؤزونو قولاق آسمادیغیمدان چوخ عذور ایسته‎ییرم باباجیغیم، منی باغیشلا، بیر داها سؤزوندن هئچ چیخمایاجاغام، دئیه‎رک گؤز یاشی توکدو. پینوکیونون گئرچکدن پئشمان اولدوغونو گؤرن پری قیزی اونلاری قورتارماغا قرار وئردی. ژئپئتو بابا ایله پینوکیونو بالیغین قارنیندان چیخاریب ساحیله قویدو. قورتولدوقلارینا چوخ سئوینن پینوکیو، باباسینین الیندن توتوب ائولرینه دوغرو گئتدیلر. پینوکیو او گوندون سونرا او قدر عاغیللی بیر اوشاق اولموشدو کی، باباسینین سؤزوندن هئچ چیخمیردی. هر گون اوخولونا(مدرسه سینه)گئدیردی. اوخولدان چیخدیقدا باباسینین یانینا قاچاراق اونا ایشلرینده یاردیم ائدیردی. پری قیزی پینوکیونون چوخ یاخشی بیر اوشاق اولدوغونو گؤروب اونو اؤدولندیرمه یه قرار وئردی. او بویو(جادو) ایله تاختادان دوزلمیش پینوکیونو نورمال بیر اینسانا چئویردی. پینوکیو گئجه یاتاغیندا، یوخلایار کن بیردن بیره نورمال بیر اوشاغا دؤندویونو آنلادی. او آرتیق تاختادان دئییل ایدی، ات دن، سوموک دن ایدی. سئوینج ایله یاتاغیندان چیخیب باباسینین یانینا قاچدی. ژئپئتو بابا،قارشیندا پینوکیونو بو شکیل ده گؤرونجه دونیالار اونون اولدو. “ان سونوندا منیم ده بیر گئرچک اوغلوم اولدو“ دئیه‌رک سئوینج گؤز یاشلاری ایچینده اوغلونا ساریلدی. بابا اوغول عؤمورلرینین سونونا دک موتلو یاشادیلار.                                                                                  سون https://t.me/Adabiyyatsevanlar

اوشاق ادبیاتی «محمد عابدین پور» کارلو کلودی نویسنده پینوکیو کارلو کلودی ۱۸۲۶ میلادی ایلینده ایتالیانین فلورانس شهرینده دونیایا گلدی.  آتاسی آشچی، آناسی خدمتکار ایدی. کارلو کلودی غزئته‎چی، تنقدچی،و یازیچی ایدی. او ان بؤیوک اوشاق یازارلاریندان ساییلیر. ان بؤیوک اثری هامیمیز چوخ سئودییمیز " پینوکیو" دور. پینوکیو کوکلالاری ایندیلیک ده ایتالیا اؤلکه‎سینین سوغات‎لاریندان دیر. کارلو کلودی۱۸۹۰ –دا ۶۴ یاشیندا دونیاسینی دییشدی. بو یازینین آردینی ادبیات سئونلر کانالیندا اوخویون. https://t.me/Adabiyyatsevanlar

اوشاق ادبیاتی اومای خانیم https://t.me/Adabiyyatsevanlar

اوشاق ادبیاتی اومای خانیم هاوالار ایستیدی و اوشاقلاری هرگون اوشاق باغچاسیندان سونرا اویون پارکینا گتیریرم. چوخلو اوشاقلار آتا یا آنالاریلا بوردا اولورلار، اوشاقلار اویناماغا و من ایسه دیگر اوشاقلاری و والدین لری رصدله‌مه‌یه مشغول اولوروق. بوگون اوشاق اویون پارکیندا، سو و تورپاق لا اویون یئرینده، ۹_۸ یاشیندا بیر اوغلان اوشاغی چوخ زامان صرف ائدیب، پالچیقلا، سویون قاباغینا بیر سد جورلادی، آنجاق ۳_۲ یاشیندا اولان کیچیک قارداشی سورکلی اونون جورلادیغی سدی خاراب ائله ییردی، بؤیوک قارداشی جورلاییردی و کیچیک قارداش خاراب ائلییردی، تا کی بؤیوک قارداش حیرصله نیب کیچیک قارداشا باغیردی، کیچیک قارداش پالچیقلی الینی اونا ووردو و بؤیوک قارداش آرتیق اؤزونو دوتا بیلمه ییب کیچیک قارداشی ووردو، کیچیک قارداش باغیرا باغیرا آغلامایا باشلار باشلاماز تیلفونو ایله مشغول اولان و اولانلاردان خبرسیز آتا گلدی و بؤیوک قارداشا حیرصله نیب، کیچیک قارداشی قوجاغینا آلیب بؤیوکو دانلاماغا باشلادی، و اونو هئچ دینله مدن ائوه گئتمک لرینی دئدی، بئله جه بؤیوک قارداش داهادا حیرصلندی و حاقسیزلیغا اوغرادیغینی آنلاییب و بونون مسببینین کیچیک قارداشی اولدوغونو بیلیب، اونونلا ناسالم بیر قارداشلیق و انتقام لی بیر رابطه یه آیاق باسدی. کیچیک قارداش ایسه، هر ایسته دیغینی ائدیب، آغلایاراق حاقی حاقسیز ائدیب، کنترلی و قدرتی اله آلا بیلجه یینی و گوجلولرین ترحمینی قازاناراق موفق اولاجاغینی آنلادی. بو صحنه لر نقدر سیزه تانیش گلیر؟ سیز بو جریان حاققیندا نه دوشونورسوز؟ کیم حاقلی، کیم حاقسیز؟ بو اولای باشقا نئجه اولا بیلردی سیزجه؟ من بو یازینی بیر یئردن سونراسینی اؤزومدن اویدوردوم، بیزه تانیش اولان بیر صحنه اویدوردوم. گلین قاییداق اولایین باشینا، من گئرچک دن بوگون پارکدا نه گؤردوغومو سیزه آنلادیم: بوگون اوشاق اویون پارکیندا، سو و تورپاق لا اویون یئرینده، ۹_۸ یاشیندا بیر اوغلان اوشاغی چوخ زامان صرف ائدیب، پالچیقلا، سویون قاباغینا بیر سد جورلادی، آنجاق ۳_۲ یاشیندا اولان کیچیک قارداشی سورکلی اونون جورلادیغی سدی خاراب ائله ییردی، بؤیوک قارداشی جورلاییردی و کیچیک قارداش خاراب ائلییردی، تا کی: تا کی کیچیک قارداش پالچیقلاری الیله اوتای بوتایا سپمه‌یه باشلادی، بؤیوک قارداش «بوجور ائلمه», «دور»، «دایان»، «ائلمه» کیمی قیسا کلمه لرله قارداشینی دوردورماغا چالیشسادا فایداسیزایدی، بؤیوک قارداش یاواش سسله دانیشدیقجا، کیچیک قارداش باغیراراق سدی خاراب ائلمه یه چالیشیردی، و بؤیوک قارداش هر دفه‌سینده خاراب یئرلری گینه جورلاییردی صبیرله، کیچیک قارداش پالچیغی قارداشینین اوزونه آتدیغی آن، بؤیوک قارداش اوزونو او طرفه چئویریب، اللری ایله سدی توتدو. کیتاب اوخوماغا مشغول اولان آتا، گلدی و بؤیوک اوغلونون ساچینی اوخشادیقدان سونرا، کیچیک اوغلو ایله دانیشمایا باشلادی، کیچیک اوغلان باغیرمایا باشلادی، آما آتا یاواش و صبیرلی سسله دانیشمایا دوام ائتدی، باغیراراق ایسته دیغینی الده ائده بیلمه ین اوشاق آغلامایا باشلادی، آما آتا اونو قوجاغینا آلیب، اورادان اوزاقلاشدیریب و باشقا شئیلرله باشینی قاتمایا باشلادی، بؤیوک اوغلان ایسه سدینی جورلامایا دوام ائتدی. ایندی نه دوشونورسوز؟ منیم او آن نه دوشوندوغومو بیلیرسینیزمی؟ بؤیوک قارداشین داورانیشی، ائوده آتا آناسینین داورانیشینین انعکاسی و یانسیماسی ایدی. بیز نقدر صبیرلی داورانیریق اوشاقلاریمیزین چکیلمز ایشلری، باغیریشلاری، ساواشمالاری، شلوغلوقلارینا؟ https://t.me/Adabiyyatsevanlar

اوشاق ادبیاتی گوزل اوغلان شعیر:« محمدرضا شوکتی الوار» دیکلمه:« رادوین اخلاقی» اورمیه دن https://t.me/Adabiyyatsevanlar

بالاجا قارا بالیق۳ یازار:«صمد بهرنگی» چئویرن:«منیژه جم‌نژاد» 🐠 بیردن بیره قورباغانین زیل سسی اونو دیکسیندیردی. قورباغا آخمازین قیراغیندا، داش او٘سته اوتورموشدو. سویا آتیلدی، بالیغین یانینا گلیب، دئدی: " من بوردایام، بویورون؟" بالیق دئدی: "سلام بؤیوک خانیم!" قورباغا دئدی: " ایندی نه اؤزونو گؤسترمک واقتی دیر، اصل کوکسوز وارلیق! الینه اوشاق کئچیریبسن یئکه دانیشیرسان، من اوقدر یاشاییب آنلامیشام، دونیا ائله بو آخماز دان عبارتدی. یاخجی دی ایشینین دالیسی جا گئده سن، منیم ده اوشاقلاریمی یولدان چیخارمیاسان." بالاجا بالیق دئدی: " یوز بئله عومورلردن ائلسن ده، بیر بیلمز قورباغادان آرتیق دئییلسن. قورباغا آجیقلانیب بالاجا قارا بالیغا ساری آتیلدی. بالیق یئیین ترپشیب گئتدی، آخمازین تکینده کی لیل لری، پالچیقلاری قاریشدیردی. بالاجا بالیغین گؤزو بیردن یئنگجه دو٘شوب قورخدو. اوزاقدان سلام وئردی. یئنگج اگری اگری باخیب دئدی: نه ادبلی بالیق! قاباغا گل بالاجا، گل!" بالاجا بالیق دئدی: " من دونیانی گزمه یه گئدیرم، سیزه آولانماق دا ایستمیرم." یئنگج دئدی: " سن نیه بئله قورخاق، کو٘سکون سن، بالاجا بالیق؟ " بالیق دئدی: " من نه کو٘سکونم، نه قورخاق. گؤزومون گؤردویونو، عاقلیمین دئدیینی، دیله گتیریرم." یئنگج دئدی: یاخجی، بویورون گؤروم سیزین گؤزونوز نه گؤردو، عاقلینیز نه دئدی، سیزی آولاماق ایسته دییمی دو٘شوندوز؟" بالیق دئدی: " دا اؤزونو او یولا وورما!" یئنگج دئدی: قورباغانی دئییرسن؟ سن ده کی لاپ اوشاق اولموسان بابا! من قورباغالاردان آجیقلیام، اونا گؤره اولاری آولارام. بیلیرسن، بونلار اؤزلرینی دونیانین تکجه خوشبخت وارلیقلاری سانیر، منده ایستیرم اونلارا دوغرودان دونیا کیمین الینده اولدوغونو آنلادام! سن داها  قورخما جانیم، گل قاباغا، گل! یئنگج بو سوزلری دئییب، یانقیلیجی گلدی بالاجا بالیغا ساری. ائله گو٘لملی یئرییردی کی بالیق اختیارسیز گو٘لوب دئدی: یازیق! سن کی هله یئریمک باشارمیسان، دونیانین کیمین الینده اولدوغونو هاردان بیله‌جکسن؟" قارا بالیق یئنگجدن اوزاقلاشدی. سویا بیر کؤلگه دو٘شدو، بیردن بیره برک بیر وورونتو یئنگجی قوملارین ایچینه باتیردی. یئنگجین دورومونا کرتنکله نین ائله گو٘لمه یی توتدو کی، آز قالا اؤزو ده زویویوب سویا دو٘شجکدی.  یئنگج دا چیخا بیلمه دی. بالاجا بالیق کیچیک بیر چوبان اوغلانی گؤردو، سو قیراغیندا دوروب اونونلا یئنگجه باخیردی. بیر سورو قویون قوزو سویا یاخینلاشیب بورونلارین سویا سوخدولار. مع مع، بع بع  سسی دره نی بو٘روموشدو. کئچی لر، قویونلار، سو ایچیب گئدینجه دؤزدو. سونرا کرتنکله نی سسله ییب دئدی: "کرتنکله جان! من بالاجا قارا بیر بالیغام، گئدیرم بولاغین سونونو تاپام. سانیرام سن عاغیللی بیلگیلی بیر جاناوار اولاسان، بو او٘زدن ایستیرم سندن بیر شئی سوروشام. " کرتنکله دئدی: " نه ایستیرسن سوروش." بالیق دئدی: " یولدا منی بالیقچیل دان، اره بالیغیندان، بالیق اودان قوشوندان چوخ قورخودوردولار، سن بولاردان بیر شئی بیلیرسن منه دئ." کرتنکله دئدی:" اره بالیغی له بالیق  اودان قوش، بو یانلاردا تاپیلمازلار، اؤزللیکله اره بالیغی کی دنیزده یاشار. آما بالیقچیل بو آشاغی لاردا اولا بیلر. ساقین اونا توولانیب تورباسینا گیرمه." بالیق دئدی: " نه تورباسی؟" کرتنکله دئدی: " بالیقچیلین  بوغازینین آلتیندا بیر تورباسی وار، چوخلو سو توتار. او سودا او٘زر، هردن ده بالیقلار بیلمز یانا اونون تورباسینا گیریب، دوغرو قارنینا گئدر. البتده بالیقجیل آج اولمازسا، بالیقلاری ائله او توربادا سونرا یئمک اوچون ساخلار." بالیق دئدی:" بالیق تورباسینا گیررسه، دا چیخماق یولو یوخدو؟" کرتنکله دئدی: " توربانی ییرتماقدان سونرا باشقا یولو یوخدو." سنه بیر خنجر وئررم، بالیقچیلا توتولسان، بو ایشی گوررسن." سونرا کرتنکله داشین یاریغینا سو٘روشوب نارین بیر خنجر له قاییتدی. بالاجا بالیق خنجری آلیب دئدی: "کرتنکله جان! سن چوخ مهربانسان. بیلمیرم سندن نئجه تشککور ائدیم." کرتنکله دئدی:" تشککور ایستمز جانیم! بو خنجر لردن منده چوخ وار. بوش واقتیم اولاندا، اوتورور بیتگی لرین تیکانیندان خنجر دو٘زلدیب، سنین کیمی عاغیللی بالیقلارا وئررم." بالیق دئدی: " مگر مندن اؤنجه ده بوردان بالیق کئچیب؟" کرتنکله دئدی: " چوخلاری کئچیب! دا اولار اؤزلرینه بیر دسته اولوبلار بالیقچی کیشینی تنگه گتیریبلر." قارا بالیق دئدی: " باغیشلا سؤز سؤزو گتیریر. فضوللوغومون آیاغینا یازماسان، دئ گؤروم بالیقچی نی نئجه تنگه گتیریبلر؟ کرتنکله دئدی: " بیرلیکده اولدوقلارینا گوره، بالیقچی تورونو سالماق هامان، تورا گیریر، تورو اؤزلریله چکیب دنیزین دیبینه آپاریرلار." کرتنکله قولاغینی داشین چاتینا قویوب دئدی: " من داها گئدیرم، اوشاقلاریم اویانیب." آردی وار... https://t.me/Adabiyyatsevanlar

اوشاق ادبیاتی اوشاق ادبیاتی هرهفته پنجشنبه گونو ادبیات سئونلر کانالیندا  . اوشاق ادبیاتینا دایر یازیلارینیزی بیزه گوندرین . https://t.me/Adabiyyatsevanlar

حکیم سه دئدیییندن دؤنمه‌دی. " "بیرآزدان آغری کسیجی‌نین تاثیری کئچه‌جک، یازیق حئیوان یئنه آغری ایچینده قیوریلاجاق، بیر قرارا گلین". ائیوانا چیخیب سیگارئتی، سیگارئته جالادیم، فیکیرلی- فیکیرلی سیگارت، توستولویه- توستولویه آنلاییردیم کی، ائله من اؤزوم ده قان ایچینده اولان یارالی آنا پیشیگین راحات اؤلمه‌یینی ایسته‌ییردیم. آیاقسیز پیشیگه نئجه قوللوق ائده‌جکدیم؟! بئش- اون دقیقه سونرا، ساری ساچ پرستار یانیما گلدی." پیشیگین اؤلوسونو آپارماق ایسته‌ییرسیز؟- سوروشدو. " یوخ"،- دئدیم. پیشیگین بالالاری ایکی هفته بیزیم ائوده قالدی، سونرا کیمسه قصدن، یوخسا تصادوفن چؤل قاپیمیزی آچیق قویوب، پیشیک‌لر ده حیه‌طه قاچیشمیشدی. بئله‌جه اؤلن پیشیگین بالالاری دا یوخا چیخدی، ها آختاردیم او طیفیل‌لری تاپا بیلمه‌دیم. یا تلف اولموشدولار، یا دا کیمسه ساخلاماغا آپارمیشدی.‌‌.. او واختدان ائله بیل اوره‌ییمدن داش ساللانیب، ایشه ده جان- دردی گئدیرم. آنا پیشیگین اؤلومونده، بالالارینین ایتمه‌یینده اؤزومو گوناهکار بیلیرم. موللا عمی، بونون آخیری نه اولاجاق؟ آچیق دئه گوناهیم بؤیوکدور؟ - حئیوانلارا قارشی رحم‌لی اولماق ایماندان دیر...پیشیک سئچیلمیش حئیوان دیر. سئچیلمیش اولدوغونا گؤره آرخاسی یئره دَیمیر. اونون روان خورولتوسو آدامین عصبینی ساکیتلشدیریر، روحونو دینجلدیر‌. بئله روایت اولوب کی: حضرت پیغمبریمیز بیر دفعه عباسی‌نین اوستونده یاتان پیشیک بالاسینی اویاتماماق اوچون، گئییمی‌نین پیشیک‌بالا یاتان حیصه‌سینی کسه‌رک، اهمالجا آیاغا قالخیب. قدیم میصرده پیشیک باشلی اینسان شکیل‌لرینه راست گلیریک کی، بو دا اونلارین یئر اوزونون قدیم ساکینلریندن بیری اولدوغونو ثبوت ائله‌ییر. سنین دانیشدیقلارینا گلینجه، بو، قَدَر دیر.- او حئیوانلارین یازیسی بئله ایمیش... بیزیم قانا بیلمه‌دییمیز چوخ مطلب‌لر وار. یئرین- گؤیون صاحیبی مصلحت بیلسه‌یدی، او پیشیک‌لری خلاص ائدردی. - موللا عمی منه تسللی وئرمک اوچون بئله دئییرسن؟ من باخیشلاریمی یاییندیریب: - یوخ دئدیم،- ایچین راحات اولسون... بد فیکیرلشیب قلبینده شیطانا یئر وئرمه... استغفرواللاه، بوتون حاللاردا، آللاه شیطاندان گوجلودور، چون کی یارادیلان یاراداندان اوستون اولا بیلمز... - ایشه باخ ائی...- افلاطون معللیمین باجیسی اوغلو دوداق آلتی میزیلداندی.- من همیشه یییه‌سیز حئیوانلارا، خصوصن پیشیک‌لره جان یاندیرمیشام، آنجاق بیری غفلتن ماشینی‌مین آلتیندا قالیب تلف اولدو. بیر پیشیک بالاسی نئچه ایل قاباق منیم باشی‌سویوقلوغومدان اؤلدو، بونلار دا کی، یوخا چیخدی، بیلینمه‌دی اؤلوبلر یوخسا سالاماتدیلار.... - عادتن ائله اولور...- دئدیم. هر گون اهمال- اهمال سیلیب، اوره‌یین اَسه- اَسه یئرینه قویدوغون گولدان بیر دفعه ده حتمن الیندن دوشوب چیلیک- چیلیک اولمالی دیر. ائله بو سبب‌دن، عادتن ائوین، عائیله‌نین عزیز- خلف بؤیوین تک اولادی باشی بلالی اولور... ووصال اللرینی یئره دایاق وئریب،  آیاغا قالخدی، ساکیتجه بیرآز دا سویوق- سویوق خداحافیظ‌‌لشیب گئتدی. بیلمه‌دیم دئدیک‌لریمدن آغلی بیر شئی کسدی یا یوخ... بوندان بیر هفته کئچمیشدی کی، مسجیده گئدنده افلاطون معللیم‌له راستلاشدیم، خوش- بئشدن سونرا، حال- احوالدن سونرا، سؤز آراسی خبر آلدیم: -ووصال نه تهردی آی افلاطون؟ - ووصال کیمدی؟- سوروشدو. اونون قیریمیندان چاشدیم، دیلیم دولاشدی: - ووصال دا... باجی اوغلون... افلاطون معللیمین حئیرتدن گؤزلری کلّه‌سینه چیخدی: - باجی اوغلو نه دیر آی موللا؟ سن بیزیم نسیل- کؤکوموزو یاخشی تانیییرسان آخی. منیم باجیم وار کی باجیم اوغلو دا اولسون؟! بوراسی آغلیما گلمه‌میشدی، ناچار زارافاتا سالدیم:  - گرک باغیشلایاسان، قوجالیق منی هوشسوز ائدیب... فیکریم احسانین، نذیر- نیازین یانیندا قالیب... - ائله شئیلر اولور...- افلاطون معللیم گولوب داها درینه گئتمه‌دی‌.- اؤزونه بؤهتان آتما، سن دونیا مالینا تاماه سالان دئییلسن. فیکیر- خیاللارا دا، باش- بئینی‌نی چوخ یوک‌لَمه، آی موللا.. اوستونو وورماسام دا، پرت اولموشدوم. اؤز- اؤزومدن خوفلانا- خوفلانا آدینین ووصال اولدوغونو دییه‌ن جاوانی گوزومون قاباغینا گتیرمه‌یه چالیشسام دا، بیر شئی چیخمادی، سان کی آنی‌دن شکیل یادداشیم کورلانمیشدی. دای مسجیده گلندن سونرا دا سیّد غیب‌الله دان هئچ نه سوروشمادیم!!... "سون" https://t.me/Adabiyyatsevanlar

قوناق ✍:«موباریز جفرلی» کؤچورن:«سحرخیاوی» حاضیرلایان:«ادبیات سئونلر« "پیشیک‌لره" بیر گون مسجیدده اوتوروب تسبئح چئویریردیم، بئکارچیلیقدان دوداق آلتی ذکر ائله‌ییردیم. سیّد غیب‌الله گلیب دئدی: بو جاوان سنی گؤرمک ایسته‌ییر. من آلتدان یوخاری اونون یانیندا کی آریق، اوجا بوی، نازیک ساققالی جاوانی سوزوب دؤشکچه‌ده یئر گؤستره‌رک: - اَیلَش،- دئدیم جاوانا. جاوان بارداش قورا بیلمه‌سه ده، سوچلو- سوچلو ساغ آیاغینی ایره‌لی اوزاداراق بیر تهر اوتوردو، اؤزونه دایاق وئرمکدن اؤتورو کوره‌یینی ده دیوارا دایادی. سید غیب‌الله چیخیب گئتدی. - آبالا، یئرلی آداما اوخشامیرسان، کیمسن، کیملردنسن؟- سوروشدوم. - ائله دیر، شهردن بورایا داییم‌‌گیله قوناق گلمیشم... - دایین کیمدی؟ - افلاطون معللیم. تاریخچی... - هه... مئیلین چکیرسه، دئییم سنه بیر چای گتیرسین‌لر. - یوخ...ساغ اول، موللا عمی...دونَن داییم‌لا صؤحبت ائدیردیک، سؤز- سؤزو چکدی، داییم دا سیزی تعریفله‌دی... - ساغ اولسون...- گولومسوندوم.- نه دئدی؟... - دئدی کی: بیزیم کندین موللاسی حددن آرتیق بیلیک‌لی، آغیللی آدام دیر... - افلاطون معللیمین آغیل اؤلچن تره‌زیسی وار دییه‌سن...- جاوانین توتولدوغونو گؤروب قیمیشدیم.- زارافات ائله‌ییرم، آدین نه‌دیر؟ - ووصال... - ووصال، دایی‌نین دئدیک‌لری شئیلری، دلیل کیمی گؤرمک اوچون گلمیسن؟- یئنه زارافاتا سالدیم.- من اؤز آغلیمی سنه نه تهر گوستریم؟ - یوخ، موللا عمی، من داییما چوخ اینانیرام، گؤرونن داغا نه بلدچی؟ داییم هر یئتن حاققیندا ائله شووقله، اوره‌کله دانیشماز...- بیلمه‌دیم جاوان " داغ" دییه‌نده کیمی، نه‌یی نظرده توتوردو، منیم اوزومه باخاندا نه گؤرموشدو، آنجاق بوینوما آلیرام کی، اونون دئدیک‌لری منه لذت ائله‌دی، تعریف ده اوره‌یین، روحون قیداسی‌دیر آخی... بیر شرطله کی، شیت اولماسین، اندازه‌دن چیخماسین. - یاخشی، آی بالا، منیم یانیما گلمک‌دن مقصدین نه دیر؟ - خبر آلدیم. - ایسته‌ییرم کی، منیم بیر گوناهیمی صیفیرلایاسیز... - او نه دئمکدی؟!- تعجوبلندیم. - یعنی ائله‌دیگیم بیر گوناهی یئرلی- یاتاقلی سیزه دانیشیم، سیز ده او گوناهی باغیشلایاسیز کی، من راحات نفس آلیم... - بیزیم دینیمیزده ائله شئی یوخدور. من نه کاره‌یم...گوناهلاری باغیشلایان آللاه دیر... جاوان قیزاریب چاره‌سیز باشینی آشاغی سالدی. - آمما گوناهینی دانیشسان، من یالنیز مصلحت وئره بیله‌رم. فقط ائله‌دییین گوناهدان پئشمان اولماغین، اؤزو اونون باغیشلانماسینا آپاران اَن قیسا یولدور... یاخشی... جاوان علاجسیز- علاجسیز کؤکس اؤتوردو.- من شهرده یاشاییرام...- دییه‌سن اوزاقدان باشلاماق ایسته‌ییردی.- داییم کیمی معللیمم... داییم تاریخچی دیر، من ایسه ریاضیات معللیمی... بو یئرده شیطان منی آزدیردی، جاوانین سؤزونو کسدیم:- الغرض...- سهو ائله‌دییمی آنلاییب سوزومو دَببه‌لمه‌یه چالیشدیم.- اوزدن اوشاق گؤرونورسن، من ائله بیلدیم سن اورتا مکتبی تزه‌جه قورتاریبسان... - یوخ، موللا عمی، ایرمی‌یئددی یاشیم وار...- دئییب مطلبه کئچدی، گؤرونور " الغرض"‌یمی قولاق آردینا وورمامیشدی، بزک- دوزکسیز دانیشیردی. - ایل یاریم قاباق بازار گونو ائوده تک ایدیم. چؤل قاپیسی آستاجا دؤیولدو. گؤزلوکدن باخاندا هئچ کسی گؤرمه‌سم ده، قاپینی آچدیم. باخدیم کی حیطیمیزین پیشیگی قان ایچینده‌یدی. طاقتسیز قانلی باشینی قاپییا ووردوغوندان منزیلیمیزین قاپیسی‌نین آشاغیسی قانا بویانمیشدی‌. بئله بیلدیم پیشیگی ماشین ووروب. آمما قونشولار دئدی کی گئجه ایت‌لر پیشیگین بالالارینا هجوم چکیب، پیشیک ده بالالارینی قورتارماق اوچون ایت‌لرین قاباغیندان قاچماییب. ایت‌لر پیشیگی آل قانینا بویاسا دا، آخیر کی بالالارینی خلاص ائده بیلیب. اوره‌ییم قان آغلادی، پیشیگی اهمالجا نازیک اَدیالا بوکوب حئیوان حکیمینه آپاردیم. حکیم تئز حئیوانا آغری کسیجی ایینه ووردو. پیشیک راحاتلاشیب یالواریجی میولتوسونو کسدی، ساکیتجه گؤزلرینی یومدو. - آغری کسیجی اوز یئرینده دکتر، تئز بیز چاره تاپین کی، بو یازیغین یارالاری دا ساغالسین، ایکی بالاسی وار- دئدیم. حکیم تاسوفله باشینی بوللادی. - هئچ نه ائتمک اولماز، بونون قارنی جیریلیب، ایچی میکروبلا دولوب، آیاقلاری دا اوزولوب، ان یاخشیسی بونا بیر ایینه وورماق دیر کی، چوخ عذاب، اذیت، آغری چکمه‌سین، راحات اؤلسون. حکیم بئله دییه‌نده غفیلدن گؤزومون یاشی سئل کیمی آخدی. حکیمین یانیندا کی ساری‌ساچ طب باجیسی دا منی برک- برک قوجاقلاییب آغلادی. پرستار ایری دؤشلرینی سینه‌مه سیخیب منی قوجاقلایاندا، لاپدان ایچیمه بیر شیرین‌لیک دولدو‌. بدنیمدن خوش بیر گیزیلتی کئچدی، اونو اؤپمکدن گوجله اؤزومو ساخلادیم، پیشیک ساغالاناجان اونونلا بئله قوجاقلاشماق ایسته‌ییردیم...