سماء

ودي صورة حنينة بعد قرار الطلاق بساعتين معلش أصل أنا ست مجنونة في دماغي شوية لا شوية أيه؟ نقول شويتين تلاتة، خمسة ستة مليون كده. كنت مقررة أنها اللحظة الأخيرة خلاص وأنه لو آخر راجل في الكون أنا مش راجعة. خدت بعضي وقررت أروح للمحامي الخاص بتاعنا "حماتي". وصلت عندها، وكان معايا أبني. واللي دار بينا كالتالي: -أزيك يا طنط. --مالك بوزك قدامك شبرين في أيه؟ "خدت مني أبني" -أنا عاوزة أتطلق. --من أبني؟ -أومال من جوزي التاني مثلًا. ضحكت على عصبيتي. سألتني بهزار: --أجيبلك لمون.! --لا مأذون علشان أتطلق. --تمام هعملك مانجا، أهدي. دخلت المطبخ وسابتني أهري وأرغي وأكلم نفسي. خرجت ومعاها مانجا فريش. --أتفضلي المانجا. -شكرًا اسمعيني بس أنا لازم أتطلق. --هو إنتِ مستعجلة ليه هو الطلاق تذكرة لتركيا مثلًا.! أهدي حصل أيه؟ -رافض الشغل ياستي وأنا عاوزة أكون مستقلة. --نحاول نقنعه بالشغل ياستي براحة. -بقولك رافض، رافض، وحياتنا بقيت كلها مشاكل. --دلعيه وروقي عليه هيوافق، وهتتحل المشاكل. -هو أشتكالك؟ --مش بالظبط، بس جوزك من ساعة ما خلفتي وهو مش مظبوط، تحسي أنه ناقصه حاجة، أنا مرة أتكلمت معاه عرفت إنه محتاج حبة أهتمام شوية، إنتِ البيبي واخد وقتك كله. -وأيه كمان قالك أيه تاني؟ --جوزك كتوم ومش بيتكلم بس ده أبني وأنا فاهماه، أنا مش مطلعاكي وحشة لا، أنا عاوزة أفهمك تعملي في حياتك أيه، أنا اكبر منك، وأعرف عنك كتير. سكتت شوية وقولتلها: -أممممممممممم، طيب أنصحيني! بس بردو قوليلي أخليه يوافق على الشغل أزاي؟ --أشربي المانجا كلها وهقولك. شربت المانجا وكملت كلام قالتلي: --بصي أنا ربنا ما أرادش ليا بخلفة البنات بس لو معايا بنت واللهِ كنت هقولها اللي بقولهولك بالحرف الدنيا يا بنتي مش بتدي كل حاجة بس أدتك حاجة كل الستات تتمناها جوزك مش وحش وبيحبك إنتِ بس اللي من ساعة ما خلفتي والبيبي واخد وقتك فـ حاسة بمسافة بينكم إنما هو لسه بيحبك والمشاعر موجودة، فقربي منه هتلاقي المشاعر رجعت أحسن من الأول خصوصًا أنه دلوقتي بينكم حتة منكم.. وكمان يا هبلة الشغل مش كل حاجة في حاجات أهم، بس لو عاوزة تشتغلي فكري أنك تشتغلي أونلاين مثلًا! ما تبقيش مش عارفة تحتوي جوزك وتطلعي تدوري برة على شغل علشان تحلي مشاكلك والمشاكل المفروض تتحل من جوة البيت، عارفة مشكلتك أيه؟ -أيه! --طيبة! ولسه مابقتيش واعية ولا فاهمة المفروض تعملي أيه! الحياة محتاجة منك أنك توقفي صلب في كل الأتجاهات علشان تعرفي تحاربي، وأنتِ مش في حرب أنتِ في حب ودفا بس بتسوءي الأستخدام، محتاجة تفكري قبل ما تتكلمي، تسمعي الأكبر منك والأكثر تجربة عنك، تشوفي فيديوهات تفيدك في حياتك الفترة دي، تحولي بيتك لـ جنة، وهو كمان محتاج يفهم ويرسى ويعقل، أنا هرن عليه وأفهمه ونتكلم سوا، بس دي أخر مرة أتدخل بينكم، أنا لو ست وحشة كنت بهدلتك بس أنا هبقى ضهرك وهوعيكي.. وآخر وأهم نصيحة خلي سرك بينك وبين جوزك مكتوم ومافيش جوازة خالية من النكش والخلافات ومش كل شوية عاوزة أتطلق! الطلاق وحش وأنتِ مش قده، الطلاق مُر وربنا ما يوريكي ناره، أنا عاوزاكي رزينة وان كان عليه أنا هظبطهولك ما تقلقيش ويالا روحي بيتك أنا عاوزة أتفرج على المسلسل الهندي بتاعي. -ممكن أبوسك! --لا روحي بوسي جوزك يا ختي، أنا عاوزة أتفرج على المسلسل. -عارفة لو كل الحموات زيك كده ماكنش في بيت واحد اتخرب. --صوابعك مش زي بعض، وهاتي الولد الصغنن ده خليه بايت معايا النهارده وروحي ياختي روقي على جوزك وعلى نفسك، هعمل فيكي جميل وأبيتلك الولد عندي. وصلت البيت. وشه أتغير بقا بيضحك! ده أنا من زمان ما شوفتش الضحكة دي. ميل عليا وطبع بوسة على خدي مع كلمة أنا آسف. ضحكت، حضني أكتر ولبست ونزلنا أتفسحنا وكان يوم من أجمل ليالي العمر، اتأكدت أنها كلمته وأتفاهمت معاه، والحقيقة أنه مافيش أعظم من الدنيا تهاديكي راجل أمه بتحبك.. لإن في فعلًا في الجواز الأهم من الراجل أمه. وفاء الشقيري.