مؤسسة بيت الضل الثقافية

أبيات مسلمي الهام ، باعث للحركة وعزاء 1               الدنيا بين قوسين بتوسع و مرة بالقوسين تضيق الحكمة في الحركة الدؤوبة ولكل مجتهدٍ كروب 2           وتشحد في الفوانيس من قلة الحيلة يا جهلك... وانت فيك النور 3           انت الوحيد والعالم الممتد نبع منك انفق ما تشاء في أي قبلة واحذر قبضة اللا إتجاه 4              ابحر سكينتك في سفينتك ما في شاطئ ولا  في بر ليس للنور حجة #مسلمي

في تفاصيـل زي دي اعرف مين صديقَـك... انت ابسَط مِن تقـوم الفَرحة تمشي عليك ويستثناك ضيقك... #أحمد_عوض

حر حر أنا من قيود الآخر حر من وحل التذكر و وهم التوقع وجمر الانتظار لذا تراني شامخا خاليا من الاحزان والخذلان لا يعتريني انهيار حر من تقاليد القبيلة حر من العادة والرتابة حر من التماثل والتوالي حر من المنوال وجداول التكرار لذا تراني على السطح بادي للعيان عنصر لا يذوب وضد الانصهار حر من دنس السواد ومن طهر البياض حر الأحادية واليقين حر من الإقامة والقرار لذا تراني لا اتبع كل ناعق لا اصلي خلف كل امام اسافر حيث أريد لا حيث يريد القطار حر من التفاسير القديمة ومن القوانين المثبتة والأمثلة المحلولة حر من الطرق المعبدة مرسومة المسار لذا تراني لا أخاف الجديد لا أعدم الحيل ولا أحار حر من نهم الاستهلاك والموضة حر من بريق الماركة حر من التكلف والتصنع من ربطة العنق ومن بدل الاجار لذا تراني كاسي لست عاري أرتدي الفكر سروالا ثقيلا وأرتدي الحس عراقي خفيفا لا تستهلكني السفاسف والصغار حر من بحور الخليل ومن عمود القصيدة من المدخل الطللي والخمري ومن كل المداخل ومن لغة القفار حر من عصور الانحطات والموشحات من قصيدة المهجر وهي مثقلة بالمحسنات والبهار لذا تراني أقول شعرا ساخنا فريدا يصنع الدهشة كشمس في الليالي وقمر في النهار ابتكر المعاني واخلق الصور ألونها كيفما اشاء ولا أبالي بشكل الإطار حر من الخوف لا يكبلني الحذر حر من هيبة السلطان وأصحاب البهارج والصور مرفوع الرأس منزوع التهيب والانبهار حر من التعقل والتحلم اذا اكتملت اسباب التقاتل وأوقدت للحرب نار لذا تراني أركب الخطر لا القى المواعظ والخطب والحرب راهنة لا يروح لي دم هدر ولا يضيع مني ثأر حر من الأنا عندما يهجم الآخرين الخطر حر من التعلل والتعذر لا أقبض ذراعي على غنى ولا يلوي ذراعي افتقار حر من خبث الطوية وصبغ النية حر من انتظار الجزاء والثناء والباسي اكليل غار لذا تراني أصلي مع العطشى صلاة استسقاء وأخلص في التضرع والدعاء وإن كان بيتي راكوبة أصون أحلام الأصدقاء أحرسها وأحلامي هناك مصلوبة أرى النوم وسط الساهرين موت ضمير وأرى الشبع وسط الجياع عار حر أنا عندما ألجم نفسي حر أنا عندما أرى الآخر حر أنا عندما أكون أنا أنا سواء في الصحاري وفي البحار حر أنا عندما لا أخاف عندما أفكر عندما أعلم متى أثقب السفينة ومتى ابني الجدار #مصطفى_أحمد

ضاقت كل سمانا الواسعة و سكتت فجأة كل نجومها ... خلاصة الدنيا لو تديك منافذ للعيون و الشوف ... بتعرف إنو ماف حلين مسار واااحد نجاحك في فراق الخوف ... بتعرف انت فوق موجة وتلعب بيك يصادفك فيها كل مجروف ... و كل الناس تبين و تفوت و تغدر بيك و ياما تمر بيك ظروف ... و تعرف إنو كي المر مسار حتمي مصيرك تنكويه مخلوف ... فكون حاصف و كون لعاب و أعرف كيف تجاري المد ... و تحفظ جوة في روحك مواريثك و قت عصف الحياة يشتد ... و أدرس ليلك الشاتي بتتعلم متين تقوى و تواجه البرد ... و متين ترتاح من الأحزان و ترقد في سرير داافي تولع ليك بخور أو ند ... كتير تهموني بالدخان عياذ الله و فضلت السكوت في الرد ... فيا رحماك براك عارف بلوغ النشوى في دمي و بيها الدمي بتجدد ... فما بذهب علي وعيي خلاف حاجتين علي يوماتي تتردد ... و أركن ل أقاصي الروح أفتش سكة و أتودد ... ألاقي المبتغى و مناي عيون واسعة و جوة سمارا تتمدد ... أرهف ما يلاطف الروح يوديها السما السابعة نعومة خــد ... و راحة علي كفوف القلب تنعسني تذكرني الفراش و الورد ... حبيبتي الجيدها زي شفتو في سابع الشهور ديلك قبل أشهق و أتعربد ..... ..... #السماني_محمود

قبل كم يوم " زرت شاطيك " كنت عطشان " للمحبة " فت غرقان " من تلاقيك " جيتو مشتاق " ليك ضُمَة " وأسي مشتاق " لي مرافيك " إنت أنفس " من أقولك " قولي أصغر " من يوافيك " يا فرح " طل الغلابة " طلي بالباب " ما الشبابيك " ما هو باب القلب " مشرع " لا ليهو أسوار " لا مداميك " وأعذري الحرف " الكتبتو " حيلتو أضعف " من يدانيك " السماحات. . . . " جاية منك " منبع الفن " والمزازيك " إنت سيمفونية " حية " مين بيقدر " يوم يغنيك " والأغاني - الخالطت روح - حاشا ما بتوصل " مراميك " إلا ساي بتعد " محاولة " قربة علها أن تراضيك -----وين أراضيك ووينا نحن والزيي معدوم " دون يلاقيك " ات لقاك ! " ببقينا نحن " وحالنا دونك " حال أعاديك " يا تِبِر عز المعادن ويا ابتهاج أطفال بغنوا ويا شعر جّد _ ماهو لتيك _ كل نفيس! هو نفيس. - براهو - دون مقارنة بي" معاليك " إلا لو قال دار يقارن؟ بيبقى جنبك - كيس بلاستيك - إنت لو بيفويك شعري !؟ - أحسسسد الشعر البيوفيك - وأعيد أمانيّ القديمة " يا ريتني لو نَص شان أغنيك " #حضيري

أقع مسكوب على الطرقات .. و متناثر أقيف مصلوب على الكلمات .. حزن سافر أجيك مكتوب على الأبواب صريح في ناصية الشاعر تسميني المظنة جواب و تندب حظها العاثر زي العذر البلا أسباب أجيك صاغر و أجيك وسط الجماعة خطاب و كلمة حق .. و متظاهر مناديب للوعي المطلق مناديل للوعي القاصر طريقنا وراك .. على مهلك بعد نادى الأبد : سافر تركت "الآن" ورا سفرك "زمن غابر" لحقناك نقتبس أترك كأنك وحدك الحاضر #معاذ_عوض

الى محمد الشيخ بروي في غاره والذي ذاق لدغ الحنين يخاف من الذكريات يحمل الأطلال في جيبه وترعبه الأمسيات يحركه النسيم ويبكيه لحن ناي حزين الحنين يشل خطاك عن السفر يحرمك من "الآن" و "الآتي" يعمي البصيرة والبصر يجعلك للماضي رهين الحنين يفتح فيك ألف صيوان للعزاء وألف ديوان للرثاء وألف كربلاء للحسين الحنين يجعل الحوت في البحر يعرق ويقطع أنفاس الحصين يجعل بستان روحك صعيدا زلقا و يوقد فيك نيران الكمين فدع عنك الحنين ضمد جراحك بالتعلل و أرهن شفاؤك للسنين يوما تلو يوم  عام تلو عام يصبح كل ما تخشاه دفين الخيل تكبو لكن لا تقف النيل ينحني لكن يعود ويستقيم البحر باقي إنما تروح وتأتي المراكب والسفين تخفف من ثقل ما تحمل فظهرك أعز من حمل التذكر والأنين ظهرك يحمل آمال البلاد يحمل هم الغلابة وأحزان المساكين يحمل الرفاق اذا اصيبوا في المواكب ويحملهم في عُرس بالعديل والزين ظهرك درع للرفاق و وجهك للامام يستشرف الآتي لنا هل الأشجار ثابتة أم تسير هل السبع العجاف انقضت أم الآتي عسير ونحن نصدق ما تقول اذ كنت انت "محمد" وكل الناس حولك كانوا في كفر مبين #مصطفى_أحمد 3/9/2022 #لمن_لدغني_حنين

إلى : محمد الشيخ بروي مدخل : حنك القادر يبكيك      منية للفاقد حنينك       وحزنك القايلو بيخليك           عمرو أطول من سنينك نص : لامن لُدِغتَ حنين     ما كنتَ تاني إتنين        كل زول أكان في غار رغم الجبل واحد         كانت دبايبو كتار    باب المغارة وسِيع       أنسج عليهو يقين            ينجيك من كفار        لامن لُدِغَتَ حنين     كان الحنين جواك          - لغز الخشب والنار -     كان الجبل بهتز      إنت العليهو شهيد        نزلت عليهو أشعار   جاتو النبوة شعر       _ نال بالمحبة وقار _     يا صاحبي هاك صِدق   تاج المحبة صديق      تاج الصداقة أخيار            والخير معنون بيك            إت كنت ليهو شعار       لامن لُدِغَتَ حنين         شالت عينيك غمام             صب المطر جواي               وأنا كنت متوجس           من خشية الأنظار                     أو خشية الألحان                           لامن تبكّي الناي                              كان الجبل بيهتز                      وإت كت                      عليهو شهيد                 آمنت ما ضراك             آمنا نحن معاك         كان الفرح كضاب           صدق الحزن جواي              هاك يا صديقي كتاب           ما أصدق الأحزان               في وجعة الغناي          لامن لُدِغَتَ حنين      كل زول أكان في غار             ما كنت تاني اتنين                 لا بات معاك يقين            كان الحنين جواك       ( سر الخشب والنار  ) #لمن_لدغني_حنين #حضيري

٠كل الخطوط الفي الخيال       تتلاقى حتمية مسار           سايقني ليك على عجل أطول خطاوي على الطريق       شدت ع الساق اللجام            كانت قصادك دون ملل ريحانة في طرف الطريق    صادقتها.. تديني منديل للدموع               بتذكرها و بملاو قُبل كل جرحة تهديك النزيف       تعفيك من الخوف و الخنوع          و تهندمك أروع حُلل أعظم سنين هادي البلاد       أم في وضوع متعسرة               صرخاتا كان آخر أمل (حرية) بُذرت في ورود        فاح العبير شمينا جت            عبى الجيوب منو النحل لقَّح عقول كل الشباب    و الليلة تتمخض خلاص           تنسف متاريس الدجل و انا كنت شاهد حين نزيف        رصاصة بتصيح في شهيد             تنزف جروحو عسل عسل اهو دي مشاهد ما ألتبس      زي الظروف الفي الزمن              بتعاني من بعض التلف شايكة  بتقاطع في بعض       بتمد و تجذر في الرمال            معظم كلامنا قد أتحذف و الباقي لو بقى ما كتير        لحظات تلخص وثبتك               حكمة بتزينك النجف قد تقتبس في عجز بيت       (رصاصة تهمس ليك كضب)              بتدور حوالينك تلِف و فراشة ما بين الورد       ترقص تكضب في الرصاص            و الدنيا أوسع من تجِف و الحكمة إعمال للعقل        الدنيا أوسع من فتيل                في يدِ قناص محترف اتسقى كاسات الجهل      اتمطى دفار الشغب          ربط المصير في راس خرِف بركب على ذات السياق       فاتت عليو في خطتو             ولدونا جيلا مختلف   و انا برضو كنت عليك شهيد        ظليت على حبك أهيم            في كل شارع و أعتكف في يوم تكون قاعد براك         زهجان و تتقفل معاك               و الدنيا تهديك العبوس كل السواد قدام عنيك      عصفورة بتقاطع الشرود      بتصيح عليك..              الراحة جوات النفوس ملمح بيتكرر كتير       وسط الزحام بين الدخان             خلف المصدات و التروس بتلاقي نفحات الحياة        منظر حبيبة و عين طفل            زغرودة في جرتق عروس و الحكمة في( المقطع) تكون        ( نحن بنقاتل للحياة)           ل عيش حياة نحن بنكوس من فرط سخرية القدر       الإنسحاب مرات هو فوز           و (الصيجة) عنوان لدروس تعرف متين تبقى اللهب        تعرف متين تحضن رفيق             تعرف متين تركب تدوس الروح ملاذ المتعبين الغاضبين          نحن بنداوي جروح بعض                 نحن الغلابة المتعبين بكل فخر (نحن الرجال)         و صدورنا كم حملت أمل                   نحن البقية الحادبين وانا برضو مشهاد في الأخير         كانت حبيبتي معاي كتف               و انا بنتصر لمن تبين ❤️ .... السماني محمود 30/10/2022

مدخل أول: في بلادي دون ذنب تقتلون إن سكتتم فبجوع تهلكون إن تكلمتم ستذكركم جريدة تحت إسم المعتقل بعد وقت سوف تنعاكم قصيدة مدخل تاني: كن يا وطني برداً وسلام ما بالي أظنك تسمعها هجر وظلام فترد الحب بصاعين أحدهما تكسوه القسوة والثاني قد هدم الأحلام النص: أيا حميد أبوي حميد تعال راجع تعالي قريب أكيد سامع قبل شوقنا اليهزنا ليك تعال مشتاقلك الشارع تعال فجر حروفك سيل بدل بحر الدم الطامح بدور أحكيلك القصة والوجع الموكر في البلد من قلت يا نورا العساكر لسة مأجورة المكايد لسه محفورة ولسة أبوي فرسانا بتموت مغدورة إلا سجم رمادهم ديل قايلين النفوس كورة شلنا قبيلك الكيزان وفاكرين البلد نضفت خلاص اتفكا ساجورا وجا السجمان حراق الحشا الوهمان قبيل سموهو بالبرهان إياهو خليفة الكيزان وبرهن جد بإنو الذئب في الدولة يصول ويجول وفوق الكتف دبورة وإنو عدونا ماهو بعيد عدونا العسكري المشري عدونا الكاتل الأرواح بيزهق فيها شان مكري بعد باع الضمير والذات في إيدو الطلقة والبمبان ولا دسو الرصاصة هديل بيكتلو فينا بالدغري ولا بيشفق علي الأخوان ولا ست الحشا المهري إلا كمان عارف الشعب لا بيمل ولا كان بالجبن مطري مرقنا حشود نواجه في اللي قالو جنود جنود الظلم الطغيان وماسكين الطريق بالحيل كم آلاف من أمدرمان تلاقي أسودنا من بحري وفي الخرطوم مرق موكب معبأ هموم إلا ربط يقينو درع بإنو العسكري الخسران ونحن صمود يعبي هتافو بالغنوات علي المدفع يهب يجري تجيهو الطلقة فوق الرأس يسلم رايتو للجنبو وعليها دماهو منحدري يقول ويوصي أبقى على الوطن عشرة وأكيد قلم الظلم مكسور مهما اتسن كان مبري باقين الف يا صاحب ولا بنقبل تراجع تب ولا بيحكمنا يوم طامع نفس العسكر ياها العسكر صفو دمومنا وكتلو الشافع نفس المطلب وذات المبغى ونفس الشارع ياهو الشارع ولا حِدنا ولا فينا اللي قال راجع ولا صوت الرصاص بقرع قلوب شايلة الوطن دافع للنص بقية #شهد_التاج #بت_حميد