ወራቤ[ ደርሶች እና ፈዋኢዶች ]

⚠️ ዲን በግምት አይመዘንም! የዘመናችን አደገኛ የዲን ጥፋት፤ እውቀት ሳይኖር በዲን ስም መናገር ነው! ዛሬ ሰው ሁሉ የሚናገርበት ዘመን ሆኗል፤ የሚያውቀውም ሆነ የማያውቀው፣ የተማረውም ሆነ ያልተማረው፤ በዲን ጉዳይ ላይ ያለ ምንም የዕውቀት መሠረት አስተያየቱን ያስተላልፋል። አንዳንዱ የሰማውን እንደ እውቀት፣ የገመተውን እንደ ማስረጃ፣ የወደደውንም እንደ ሸሪዓ ፍርድ ያቀርባል። ነገር ግን፣ ዲን በግምት የሚታሰስ፣ ሸሪዓም በግል ፍላጎት የሚወሰን አይደለም! አላህ ሱብሓነሁ ወተዓላ እንዲህ ይላል፦ ﴿وَلَا تَقْفُ مَا لَيْسَ لَكَ بِهِ عِلْمٌ﴾ «ስለ እርሱ ዕውቀት የሌለህን ነገር አትከተል።» 📖 ሱረቱል ኢስራእ፦ 36 እንዲሁም አላህ ስለ እርሱ ያለ ዕውቀት መናገርን ከከለከላቸው ነገሮች መካከል አካትቶታል፦ ﴿وَأَنْ تَقُولُوا عَلَى اللَّهِ مَا لَا تَعْلَمُونَ﴾ «በአላህ ላይ የማታውቁትን ነገር እንድትናገሩም ከልክሏል።» 📖 ሱረቱል አዕራፍ፦ 33 ወንድሜ ሆይ! በዓለማዊ ጉዳይ ያለ ሙያህ ለመናገር ከተጠነቀቅህ፣ በአላህ ዲን ላይ ለመናገር ምን ያህል መጠንቀቅ ይገባሃል? ስለ ሐላልና ሐራም መናገር፣ ሰውን በቢድዓ መፈረጅ፣ በኩፍር መወንጀል፣ የዑለማዎችን ንግግር ያለ ማስረጃ መቃወም፤ የሚያስፈልገው የምላስ ብቃት ብቻ ሳይሆን እውቀት፣ ማስረጃና የአላህን ድንበር መፍራት ነው። የማታውቀውን «አላውቅም» ማለት ድክመት አይደለም፤ የዕውቀት ክብር ነው። ዝምታህ ከስህተት ሊያድንህ ይችላል፤ ያለ ዕውቀት የተናገርከው ቃል ግን አንተንም ሌሎችንም ወደ ጥፋት ሊመራ ይችላል። የዲን ጉዳይ የሚፈልገው ብዙ ተናጋሪ ሳይሆን፣ በዕውቀት የሚናገር ሰው ነው። የማታውቀውን አትናገር፤ የሰማኸውን ሳታረጋግጥ አታስተላልፍ፤ የገመትከውንም የአላህ ዲን አታድርገው! የምላስ ጥበብ ሁሉን መናገር ሳይሆን፣ መቼ መናገርና መቼ ዝም ማለት እንዳለብህ ማወቅ ነው። أبو سليمان https://t.me/ibnmuha