ائلیمیز - دیلیمیز elimiz_dilimiz

✍ «یوللار قیچیما دولاشیر!» ایللردیر سورگون دوشموشم یوللار الیمدن یورولوب آرانا یایلاغا کؤچن دورنام گؤزوندن وورولوب گؤزلریمدن پاییز یاغیر نیسگیل‌لریم آشیب داشیر گئدیرم گئده بیلمیرم یوللار قیچیما دولاشیر ایچیمه یاپراق اله‌نیر باشیم توپراغا بله‌نیر ایستی قانیم قاپی قاپی بیر چؤمچه اؤلوم دیله‌نیر بیر گون کیم وار، بیر گون کیم یوخ! ناغیل ایچینده قالمیشیق بیلمیرم هئچ، نه آلمیشدیق اونو دا یولدا سالمیشیق! گؤیدن اوچ بومبا دوشه‌جک! اوچو ده ناغیل دئیه‌نین بیز هر گون ناغیل یئییریک بومبالار بئیین یئیه‌نین!... #میرحسین_دلداربناب ۱۴۰۳/۰۹/۲۶ @eldilimiz

✍ «بیتمه‌ین یوللار» بو یوللار بیتن دئییل چوخ دا اؤزونو یورما گلن اولمایاجاقدیر بوشونا یولدا دورما ایزلر گئدیر اوزاغا گئدنلر چوخ، گلن یوخ سونو هایانا چاتیر اونو آنجاق بیلن یوخ! چوخ اوزاقدا قالمیشیق هاوادان سازاق‌ یاغیر قارا قیش آغ گئیینیب گؤزلردن دوزاق یاغیر! یوللار بیزی داریخیر بیز یوللاری اؤزلوروک ایتمیشیک گیروه‌لرده اؤزوموزو گؤزلوروک! کؤهنه یارالاریما بیر آز دومان باغلایین بولودلاری چاغیرین بیر آغی‌لیق آغلایین! اوزاق یولدان گلیرم یول وئرین یورولموشام گؤزه‌لردن آخمیشام دوم دورو دورولموشام! #میرحسین_دلداربناب ۱۴۰۳/۰۹/۱۵ @eldilimiz

✍«دلی‌لر» یئرسیز آغلاییرسیز، یئرسیز گولورسوز دونیانین داشینی، آتان دلی‌لر آجی‌لاری اودوب، اودوزماییرسیز آجلیغی دینجلیغا ساتان دلی‌لر گولوشدن یونولوب، دوروشوق‌لاریز آجی‌یا شیرینه، گولن دلی‌لر سیزی قیسقانیرام اورک ائویندن پایینی پایلاشیب، بؤلن دلی‌لر هر کیمی سئومیرسیز یامان دئییرسیز یامان یاشاییرسیز، یامان دلی‌لر موتلوسوز واللاهی، دلی دئییل‌سیز بیز قانمایانلاری، قانان دلی‌لر دونیانی بوراخیب، دونیا اولانلار دونیا سئورلری، یوران دلی‌لر بوش بوش قوراللارا، آلدانمایانلار قوراللاری یئره، ووران دلی‌لر گؤرکمیز کیرلی‌دیر، ایچیز دوم دورو اوزونوزدن یاغیر، دومان دلی‌لر نه ایمیش سیزلرین، آلین یازیسی؟! اؤزوندن اؤزونه، جومان دلی‌لر نه سویوق بیلیرسیز، نه قار نه یاغیش! آلوو ایچره گزن، یالین دلی‌لر ساتیرام عاغلیمی، سویو پولونا دایانمایین گلین، آلین دلی‌لر سونوندا سؤزوم یوخ، سوسماق ایستیرم هر گون سؤیوش سؤیوش، سوسان دلی‌لر یامسیلادیق هر گون، یالان حیاتی حیاتین اوزونه، قوسان دلی‌لر... #میرحسین_دلداربناب ۱۴۰۳/۰۹/۶ @eldilimiz

✍ «بو شهر» سیخیر بو شهر منی یورور بو شهر منی بوغور بو شهر منی قارانلیقدی بو شهر پنجره‌سیزدی بو شهر داریسقالدی بو شهر توستو دوغور بو شهر توستو ایچیرم ایچیرم خاراب آرابالارین ساغلیغینا ایچیرم اوغرو قارقالارین ساغلیغینا ایچیرم چاشیت ساغساغانلارین ساغلیغینا ایچیرم بوتون آغاجلارین ساغلیغینا سئرچه‌لر منی آغلاییر کپنک‌لر منی آغلاییر قاریشقالار منی آغلاییر دیلنچی‌لر اوغرولارا ال آچیر ساعات‌لار ثانیه‌لری گؤتوروب قاچیر آداملار گلیرلر، گئدیرلر سو باشینا آیاق یولو اولوب بو شهر، راحات خانا اولوب قوخویور بو شهر اینتیحار اییی وئریر تؤکولور یاپراق یاپراق مزارلیغا گئدیر مزارلیغا دؤنور هر یئره باخیرسان جانلی جنازه‌دیر بوردا جنازه‌لر یاللی گئدیر... #میرحسین_دلداربناب ۱۴۰۳/۰۸/۳۰ @eldilimiz

✍ «سون دوراق» بئش گون چوخ بئش گون آز بئش گون گئج بئش گون تئز سونوندا هر شئی سونا چاتیر هر شئی اونودولور هامی سنی اونودور سن هامینی اونودورسان گئتدیگین یوللار ایزینی سیلیر نه سن بیرینه داریخیرسان نه بیری سنه سن یوخلوغا بورونورسن یوخلوق سنه آرزولار سونا چاتیر حسرت‌لر سونا چاتیر سون دوراق توپراق گئییرسن اینینه دولدوروسان گؤزلرینه دولدورورسان آغزینا دولدورورسان قولاقلارینا سونوندا هر شئی سونا چاتیر هر زاد توپراق دادی وئریر توپراق هر زاد دادی وئریر... #میرحسین_دلداربناب ۱۴۰۳/۰۸/۱۶ @eldilimiz

✍ «سنه چوخ داریخمیشام» سنه چوخ داریخمیشام سنسن قایغیمین آدی هئچ زادین دادی یوخدور سنسن هر زادین دادی اوشودوم ها اوشودوم اوره‌ییمین گونئیی گل بوراخیم ایچیمدن قاشقاباقلی قوزئیی قالدیم دومانلی داغدا گلسن داغدان آشارام سون نفس‌ده بلکه ده بیر نئچه گون یاشارام آی دولانیر گون کئچیر باهار قیشاجالانیر بیلمیرم بایات دونیا سن‌سیز نئجه دولانیر سنه چوخ داریخمیشام گؤزلریمین ببه‌یی کؤچری قیرلانغیجیم اوره‌ییمین دیله‌یی گؤزلریم بولودلانیب یئتیم یئتیم یاش تؤکور ناغیلیمین سونودور قایغین بئلیمی بوکور... #میرحسین_دلداربناب ۱۴۰۳/۰۸/۰۸ @eldilimiz