الخَريــــطــة || Daamii's map ✨

المعنى من هاذ الهدرة أنو مش لازم الإنسان يحبو يديرولو هواه ولا خلاص يولي الغاشي كامل مش مليح وأنا لي قريت ودرت وبسببهم مطلعتش أولا حتى ولو قريت القراية سبب والله هو المسبب في أنك تطلع ثانيا بلاك صح مراكش مؤهل أنك تطلع الراشا فرصة وراهي مزية باش تديروها في بالكم هنا مذابينا نطلعو بالراشا بصح لامكتبش ربي متقعدش تريكلامي وفيهم وفيهم لأنو معندكش حق تريكلامي أصلا راح نهدرو مع الإدارة بإذن الله ونحاولو قد ماعندنا نهبطوها بصح كاين حد منقدروش نفتوه إذا داروها اللهم بارك بارك الله فيهم وجزاهم خيرا وإلا فقدر الله ماشاء فعل بصح باه تروح ليهم لأنك راح تريكلامي من الأساس فهنا غير ماتروح ماتهدر لأنو راح تفلطها علينا

الإدارة منقدروش نلوموها ومنقدرو نلومو حتى واحد من الأساس مهيش منطقية تاع ديت تحت عشرة تريكلامي ! مديتش تحت عشرة مطلعش بسكو معدل تاع العام باه طلع لازم عشرة ولا اكثر الدنيا راهي ماشي بهوانا ا وكيما حابها تكون سيرتو فالكوتي هاذا الاكاديمي مشي نتا ديت تحت عشرة تولي تقول لازم يعاونونا ويطلعو لي جابو تسعة اي متصلحش ا خاوتي كونو شوي منطقيين اقرا عالصح ولا مكالاه سيرتو كي راكم في مجال الطب أنا من الفئة لي عاودت ونشوف انو إعادتي احسن من اني نطلع بالتطباع! قدر الله وماشاء فعل واكيد فيها خير ونعاودها ثاني الدنيا مهيش غير ميدسين ينحيلك ربي حاجة لحكمة منو يمدهالك في جهة اخرى

ما تنساوش تديرو Journaling لي مزال ما جربوش حاسة هذي فرصة ليكم باه تجربوه 😔✨. هزو ورقة وستيلو وعبرو على وش راكم تحسو ضك تشوفو الفرق.

المهم شوفو خوتي وين ما تمرو بمشكلة فكرو رواحكم برك بلي فترة وتعڤب مهما كانت صعوبتها رايحين تكتشفو فيما بعد بلي صح الفرص مزالو كاينين والأمل ديما كاين ورايح يبقى موجود طالما مزالنا على قيد الحياة. عيشو مشاعركم السلبية عادي لأنكم بشر مكومش آلات عيشو الحزن واليأس تاعكم وواجهوه ومدو لرواحكم فرصة باه تعبرو عليه بكل سهولة بصح أهم حاجة متخليوش هذ المشاعر تقنعكم بلي صاي طفرت وراح عام كامل من حياتكم وصاي مكانش أمل باه ننجحو وطفرت. الحياة راهي أكبر من أنها تضيع في عام دراسي واحد برك 🩵.

حاسة روحي أنا ذات نفسي محتاجة نڤول هذ الهدرة نفسي دونك خصني نكتبلكم كثر باه نفكر روحي بلي صح الحياة راهي أكبر من أنني نضيعها فالحزن على أهدافي لي مزالني ما حققتهومش 😭.

مزالني حابة نهدر فهذ الموضوع كثر أصبرو 😭.

البروفيسور محدادي تاع الأناطو راه عاود الدوزياماني btw.

هذي عبارة عن زوبعة رملية عندها ملايين السنين وهي تدور فالكوكب هذا بلا حبسة. تخيلو منذ ملايين السنيييين يعني من قبل الخلقة تاعنا ممكن حتى السلالة تاعي وتاعكم مزال ما تخلقتش.. كاين كوكب بعيد علينا بملايين السنوات الضوئية فيه زوبعة ڤاعدة تدور فالفراغ وحدها هكذا.. ومزالها تدور إلى يومنا هذا وإلى نفس اللحظة لي راني نكتب فيها ضكا هذ المقالات لي معلاباليش إذا راكم تقراو فيهم ولا نو. معلاباليش إذا جاكم نفس الشعور لي جاني أنا كي عرفت هذ المعلومة من قبل كلي حسيت صح بلي هاني أنا في نقطة صغيرة من هذ الكون راني نبكي على المشاكل لي عندي.. بصح هذا الكون كبييير بزاااف لدرجة كاين زوبعة ڤاعدة تدور في كوكب آخر بعيد عليا من قبل ما نتخلق ومزالها تدور ورايحة تكمل تدور لملايين السنوات الأخرى وهي مهيش سامعة بيا ولا بيكم. كلي صح الحياة هذي راهي كبيرة بزاف كبيرة لدرجة ما تتصوروهاش والفرص لي فيها لا تعد ولا تحصى وجميع واحد فينا يقدر يستغلهم لصالحه وينجح بيهم. كلي معاودة العام كامل مهيش خسارة ومهيش نهاية العالم ومهيش (راح عام كامل من حياتي) بسك راكم تشوفو بلي الحياة راهي تكمل تمشي ومهيش رايحة تحبس لمجرد الحزن واليأس تاعنا ورايحة تكمل تمدلنا الفرص لي رانا غارقين في النعم لي عاطهوملنا ربي فيها بلا ما نحسو.. لدرجة أنو كاينة زوبعة غامضة راهي تدور من ملايين السنين في كوكب آخر. بلا ما نهدرلكم عالمعجزات لي كاينين فالكون تاعنا بدءً من الفضاء الخارجي ووش كاين فيه من أجرام وكواكب وظواهر لي تخلينا نتأكدو بلي كل شيء في حياتنا راهو بقدر حتان أصغر خلية في أجسادنا حتان الميكروبات لي راهم عايشين كامل برحمة الله وعنايتِهِ.. حتان الذَّرة والمكونات لي فيها وكيفاه خلقها ربي بكل ما فيها باه تبقى مستقرة وتبني جميع حاجة فالكون هذا بلا استثناء.. معناها من هذ الشي كامل بلي الفرص مزالهم كاينين ونجاحنا راهو أكبر من أنو يبقى محصور فقط في تطلاع العام والمعدلات.

هذا كوكب المشتري لي كامل تعرفوه. شتو هذيك الدائرة لي راني مدايرة عليها سهم؟ ولي ديما نشوفوها فأي صورة ولا رسمة فيه؟

أستناو نعتلكم حاجة 😭😭.

مام ثاني لي احتمال تڤيسهم الراشا ويطلعو نمدلكم وحد الفكرة.. ضكا الراشا احتمال تكون كاينة كيما احتمال تكون مكانش. مع احتمال أنها كابابل تڤيسك نتا كيما تقدر متڤيسكش طول. نتوم أتوقعو الاحتمالين للزوج مع بعض، باه إذا ڤاستكم الراشا رايحين تفرحو بسك صرا وش توقعتو وإذا ما ڤاستكمش رايحين تحزنو بلا ما تديو صدمة ومن بعد في غضون أيام يروحلكم هذاك الشعور وتبداو تخدمو على حياتكم من جديد. يعني باختصار سييو توزنو توقعاتكم، كيما تتوقعو الحاجة لي راكم حابينها توقعو ثانيتك الحاجة لي مكمش حابينها باه متنصدموش مباعد إذا كتب ربي وما ڤاستكمش الراشا.. هكذا باه الواحد يكون مستعد لأي حادثة من حوادث الدهر وميمدش لنفسو أمل زائف لي يقدر يسببلو اكتآب فيما بعد.

يعني يا خوتي ماللخر معاودة العام راهي حاجة جد عادية ومهيش خسارة ولا نقصان تاع سنوات كيما راكم تڤولو. عيشو الحزن تاعكم فهذي اللحظات بصح ما تخليوهش يسيطر عليكم ويخليكم تحسو بلي صاي مكانش أمل والبيبان كامل تسكرو لدرجة تصدقو بلي الحياة كامل راهي محصورة في عام دراسي برك وكي تعاودوه معناها صاي ضاعت حياتكم. كاين بزاف ناس راهم ناجحين فحياتهم كانو ديجا عاودو كيما البروفيسور حمودي ربي يرحمو عاود البروميار وضكا راهو من بين أهم العلماء فالعالم وأكثرهم نجاحا والعلم لي جابو مزلنا للضك نقراو بيه حتى بعد الوفاة تاعو. وتفكرو بلي الحياة راهي أكبر من مجرد علامة ولا معدل ولا عام دراسي هذي تفكروووها مليح تفكرو برك بلي كامل صراولنا مشاكل من قبل فحياتنا حتان ڤلنا صاي طفرت ومكانش حل من بعد ربي فرج علينا بلا ما نحسو وهذ المشاكل كامل ولاولنا ذكريات من الماضي وين ما نتفكروهم نضحكو ونڤولو بلي كنا عاطيين للموضوع كثر من حجمو وهي كاينة بعون الله ورحمته أسهل من شربة ماء. كاينة آية عزيزة عليا في سورة الأحقاف يڤول فيها ربي: ﴿كأَنَّهُمۡ يوۡمَ يَرَوۡن مَا يُوعَدُونَ لَمۡ يَلۡبَثُوٓاْ إِلَّا سَاعَةٗ مِّن نَّهَار⁠⁠⁠﴾ هنا ربي يوصف فالكفار بلي كي يشوفو وش يستناهم فالآخرة يحسو بلي عاشو فالدنيا [ساعة من نهار] برك. تخيلو كاين لي يعيش 60 ولا حتى 100 سنة، وكاين لي من قبلنا عاشو قرون من أعمارهم.. هذو كامل عاشو في حياتهم وعاناو فيها ووصلو حتان اليأس، كي يلحڤو للآخرة يڤولو هذاك العمر كامل كان ساعة من نهار.. ديجا بلا ما تروحو للآخرة رانا ضك فالدنيا تشفاو على أول يوم ليك هنا فلافاك فالبروميار؟ عندها تقريبا عامين يخي؟ بصح تبان بلي البارح برك الباك مثلا نفس الحاجة.. تحبو تسترجعو ذكريات من الماضي عندها بزاااف ملي صرات تحسوها بلي صرات البارح برك.. الدنيا راهي قصيرة بزاف، وراهي محطة صغيرة جداااا من حياتنا ما تستاهلش نخليو اليأس تاعها يأثر علينا.. معليش كتبلي ربي نعاود العام؟ رانا راضيين بواش عطانا ربي نحزنو عليها ونعبرو على وش نحسو بصح منخليوش هذ المشاعر تأثر علينا، من بعد راهي تولي حاجة عادية ونڤولو كنا مهولينها بزاف وهي كانت حاجة صغيرة متستاهلش.. عبرو على المشاعر السلبية لي راكم تحسو بيها عادي وحسو بالحزن لي راكظ فيه بصح كونو على يقين بلي مهيش النهاية وبلي الحياة راهي أكبر من أنكم تيأسو فيها على حاجة خسرتوها فالدنيا الفانية هذي 🩵.

نهدرو على أكثر وحدة مشهورة ولي هي ✨راح عام من حياتي✨: أول حاجة يا عزيزي الطالب خصك تعرف أنو حياتك مهيش محصورة على مسارك الدراسي ولا على سبع سنين تاع الميد وأنو معاودة العام فعلا مهيش خسارة ولا نقصان من سنوات حياتك. الحياة راهي أكبر ألف مرة من مجرد كور وكونطرول وبروف وأفيشاج وو.. إذا عاودت العام مهيش نهاية العالم ومهيش عيب ولا حاجة لي تخليك تكره وتيأس وتفقد الأمل وتحس بلي سنوات من حياتك راهي ضاعت. حياتك تقدر دير فيها ألف من حاجة وتنجح في ڤداه من مجال فيها ميش غير القراية برك. مي حاليا راني علابالي بلي الجرح مزالو جديد وهذوين لي اكتشفتو بلي المعاودة فيها فيها شئنا أم أبينا. تسما راكم داخل المشكلة والحاجة الوحيدة لي تقدرو تشوفوها حاليا فهذ الحالة هي فكرة أنو (عام كامل من حياتي راح). وهذ الشي عادي، عيشو شعوركم بالحزن وعبرو عليه وبكيو وتمرمدو معاه وواجهوه بلا ما تتهربو منو وبلا ما تقاوموه. حتان من بعد كي يعڤبو الأيام وتلڤاو رواحكم عايشين في مرحلة تاع تقبل الصدمة ثماتك نقدرو نڤولو راكم خرجتو من المشكلة ورايحين تكتشفو فعلا بلي ما راح حتى عام من حياتكم وأنو الحياة أكبر من أنها تضيع كامل في عام دراسي (عندي صحاباتي بزاف لي عاودو العام لي فات كانو في أسوأ حالة كي عرفو بلي ما طلعوش مباعد مع الوقت ولى الأمر عادي بالنسبة ليهم وراني نتلاڤا بيهم وهوما معاودين وعادي حرفيا راهم يقراو بروميار والعام الجاي طالعين للدوزيام ولا كأنو -كيما نڤولو حنا راح عام من حياتهم- ميش لأنهم رضاو بلي راح عام من حياتهم وإنما لأنهم عرفو بلي ما راح والو من حياتهم صح.. معلاباليش إذا فهمتوني ولالا بصح قصدي أنو معاودة العام حاجة عادية جدا ما تحتاجش هذاك التهويل من عندنا حتان تولي بالنسبة لينا عبارة عن خسارة عن عام كومبلي من الحياة كااامل).

ضكا تبقى الفئة لي استسلمت للأمر الواقع وتأكدت من أنو مكانش أمل باه تطلع (مستحيل تڤيسها الراشا).. لازم نتفاهمو على حاجة أنو لازم عليكم تتقبلو حقيقة أنكم رايحين تعاودو وترضاو بالشي لي عطاهولكم ربي. شوفو ضك نتوم حاليا راكم داخل المشكلة، وهذا بطبيعة الحال يخليكم متقدروش تشوفو حوايج لي واحد خارج المشكلة يقدر يشوفهم. يعني مثلا شخص راهو داخل الحقل وتايه فيه مهوش رايح يشوف وش يقدر شخص آخر من خارج الحقل يشوفو. حاليا ونتوم هذوين برك لي عرفتو بلي مكانش كيفاه تطلعو دونك راكم تخمو في ألف حاجة وحاجة. كاين لي راح يڤول (راح عام كامل من حياتي) وكاين لي راح يخمم في هدرة الناس (ضك يضحكو عليا صحابو ويستشفاو فيا العدية) وكاين لي رايح يبدا يشكك في قدراتو ويڤول أنت نبدل التخصص مالڤري خيرو عن قناعة وشغف (الميدسين مهيش بلاصتي) وكاين لي رايح يخمم فيهم كامل وممكن كاين حوايج وحدوخرين أنا مذكرتهومش.

يعني ضكا أي واحد عندو معدل 9.80 وطلع راهو كاين احتمال ولو ضئيل أنو يطلع بالراشا.

ضكا بخصوص الراشا احتمال كبير بزاف تكون كاينة هذ السنة ويهبط المعدل تاعها حتان 9.80 هكذاك. تسما حاليا أي واحد عندو معدل 9.80 على الأقل راهو احتمال كبييير يطلع. وحكاية تاع أنو لازم تكون داخل رطرا فيهم كامل باه تڤيسك هي صح كاينة منها بصح العام لي فات على حسب علمي ما داروهاش. (الشي لي راني نهدر فيه كامل راهو احتمالات برك حاليا مكانش حاجة مؤكدة، يعني إذا كشما صرا من بعد عندكو لا تڤولو أي هبة لي كانت تتمسخر بينا).

كاين لي طلع مبروك عليه والعاقبة لمزيد من النجاحات بإذن الله. وكاين لي مطلعش ضك نسيي نهدر هكذا على بعض النقاط لعل وعسى نوصللكم وحد الفكرة راهي فراسي وبإذن الله رايحة تفيدكم.

شوفو تع lumed وش قال👇🏻

ما تفقدوا الأمل لمهم سعيتوا، كثروا الدعاء اهم حاجة وحاولوا تنظموا رواحكم مع بعض واتحدوا 🔮 الراشا صح مكاش قانونيا كيما سمعوها البعض منكم لكن في الاخير راها حاجة راجعة للـ Profs ، يعني لازم تتواصلوا معاهم و تحاولوا تقنعوهم وتستعطفوهم باه يصوتوا انها تندار وحاولوا تقنعوهم بلي يحدروها كثر. 🔮 ديروا احصاء بيناتكم يا لوكان في Telegram للجماعة لي دخلت Rattrapage ، لي طلعوا ولي ما طلعوا، وحتى لي ما طلعوا شوفوا شحال مديين هل +9.9 ولا +9.5 ولا قل من 9 ، وحاولوا تقنعوهم يحدروها Le max ، ما تطلبوا المستحيل مثلا تحدر لـ 9 لكن حاولوا تحدروها لـ 9.5 ❗️ بالنسبة للامور هذي افضل واحد يقدر يعاونكم فيها هو Delegue لانه عنده Contact تاع Les profs ، سما احكوا معاهم لعلهم يعاونوكم، لا ما ردوا عليكم وكانوا مختفيين من قبل Rattrapage حتى حاولوا تنظموا رواحكم وواحد يقدم باه يديرلكم حل وباه تكونوا كامل في طريق وحدة ❗️ اذا ندارت Racha بعد تصويت Les profs طبعا، راها تتحدد بعد CP لي يندار حسب النسبة والعدد لي يسحقوه باه يطلعوهم بالنسبة لواش نشوف، مستحيل نسبيا تحدر ل9 مثلا لكن حاولوا تحدروها ل 9.6 9.5 ، الاداري ديما يحب يشوف روحه فارض السلطة تاعه على الطالب، يعني كونوا اذكياء في المفاوضات معاهم، حابينها 9.5 مثلا قولوله 9، ومبعد طلعوها بشوي واحصلوا في 9.5 ، كأنك خضعت ليه معرف لا فهمتي المقصود من هذ الحاجة ولا لا، لكن في الاخير قضاء الله وقدره، سما كثروا الدعاء في الايام الحرم هذي وادعوا تحدر Le max ، كيما قلتها الحد تاعها تكون حسب النسبة لي يحتاجوها