Malika Tavfiq Sheʼriyati

Ijroga marhamat🤍

Ketayapman. Eng so‘ngi qaror, Hayotim karvoni shaydir jilarga. Shoyad yakun topsa siz berar ozor, Shoyad yakun bo‘lsa jonni tilarga! Ketmaslik vajini izlar besamar, Yo yurak, yo ko‘ngil, shulardan biri. Meni kuzatadi ko‘chaga qadar, Eski eshiklarning g‘amgin g‘ichiri. Bilaman, men ketsam boshqa hech kimsa, Tonglar yuzingizdan o‘pmaydi suyub. Siz ishga jo‘naysiz mehrimni qo‘msab, Beti artilmagan tuflini kiyib. Yukimni ko‘tarsam, bukildi tizzam, Bitta qanor qopga to‘la armonim. Sizga nima g‘amu, kimga nima g‘am, Cho‘llarda adashib ketsa karvonim! Endi ketayapman. Bu gal butunlay, Eng so‘ngi umid ham bugun o‘ladi! Qayerga ekanin o‘zim ham bilmay, Qolganini endi Xudo biladi! ✍🏻Malika Tavfiq

Qani kettu ijroga🤍

Seni unutishni istayman juda. Yodingni yomg‘irlar yuvib ketsaydi. Lek sog‘inch hammasi deya behuda, Qo‘llarin beliga tirab,to‘msaydi. Azobing jonimga shunchalar tegdi, Charh ursam topilmas dastingdan panoh. Sarvdek qomatimni ta’nalar egdi. Ko‘ksimdan chiqolmay to‘lg‘onar bir oh. Qaylarga berkinay,ayt,qayga qochay, Loqayd tirjayishlar me’damga urdi. Mehringa tilanib toldim gadoday. Sabr ham,toqat ham yuzini burdi. Suymasang,yoqmasam rostin aytgin,qo‘y, Cho‘loq kuchuk misol sudralar umid. Yetti mahallaga berasanmi to‘y. Meni yo‘qligimdan topolsang mavrid. Mayli rostini ayt,bo‘lgancha bo‘lar, Bir kunimni ko‘rib ketarman men ham. Aldanib yashashlik bundan besh battar. Har kun bir jonimni oladi alam. Achinib o‘tirma,tirikman toki, Amallab bir qoshiq oshim yutarman. Yana bahorlarga yetarman balki, Balki shu alfozda o‘tib ketarman... Qo‘y,meni ayama, Rostin aytgin, qo‘y! ✍🏻Malika Tavfiq

Tugadi shu bugun eng oxirgi jang, Eng oxirgi kuchlar tushdi asrga. Yarador umidning so‘ngi nafasi, Taslim bo‘layapdi ishq bilan birga. Urush yalab o‘tgan shaxardek ko‘ksim, Tutun va qon isi yotadi burqsib. Kimdir g‘olibligin qilganda e’lon, Kimdir mag‘lublikka bo‘ldi munosib. Oppoq bayrog‘ini ko‘tardi yurak, Nihoyat foydasiz kurashdan to‘ydi. Hali zaxirada askari ko‘pu, Shunchaki u seni so‘ramay qo‘ydi. Sochlari to‘zg‘igan yalmog‘iz xijron, Ko‘ksimga botirar tirnoqlarini. Hislarim ummoni o‘par tutoqib, Bo‘ronlar o‘pirgan qirg‘oqlarini. Meni shu qiynoqqa ravo ko‘rdinga, Shunday azoblarga ilinding meni. Uzib-uzib ketgan umidlarimni, Ulab yashayapman endi har kuni... ✍🏻Malika Tavfiq

Mani Obunachilarim aktivlikni yo'qotti😢

Qadrimning qoyadek qulashlarin ko‘r, Yurakning bir chetdan nurashlarin ko‘r Tegramni alamlar o‘rashlarin ko‘r, Kelib ko‘r zolimim, bir bor kelib ko‘r. Ismingni mathiya etganlarimni, Qanchalar sog‘inib ketganlarimni, Sabrning so‘ngiga yetganlarimni, Kelib ko‘r zolimim, bir bor kelib ko‘r. O‘zim xon, vaslinga gadoligimni, Shu shirin joninga fidoligimni, Sog‘ina-sog‘ina adoligimni, Kelib ko‘r zolimim, bir bor kelib ko‘r. Yurakning gusirlab urishlarini, Soatlar joyida turishlarini, Ag‘yorlar holimga kulishlarini, Kelib ko‘r zolimim, bir bor kelib ko‘r. Ayriliq qotilga qoziligimni, Xijron kuylarining soziligimni, Hatto o‘limga ham roziligimni, Kelib ko‘r zolimim, bir bor kelib ko‘r... ✍🏻Malika Tavfiq