Bureau of Labor and Skills-Dire Dawa

#ዜና | በድሬዳዋ ከ15 ሺህ ለሚበልጡ ዜጎች የሥራ ዕድል ለመፍጠር የተቀናጀ ጥረት እየተደረገ ነው #DireTvአማርኛ | ታህሳስ 2016 ዓ.ም በድሬዳዋ ከ15 ሺህ በላይ ለሚሆኑ ዜጎች የተለያየ የሥራ ዕድል ለመፍጠር ከሚመለከታቸው አካላት ጋር በቅንጅት እየተሰራ መሆኑን የአስተዳደሩ ከንቲባ ከድር ጁሃር ተናገሩ። በሀገር አቀፍ ደረጃ በተጀመረው "ብቃት ፕሮጀክት" 972 የድሬዳዋ ወጣቶች የሥራ ዕድል ተጠቃሚ መሆናቸውም ተመልክቷል። የድሬዳዋ አስተዳደር ከንቲባ ከድር ጁሃር ለኢዜአ እንደተናገሩት፤ በገጠርና በከተማ የሚስተዋለውን የሥራ አጥነት ችግር ለመፍታት ዘንድሮ የተቀናጀ ጥረት እየተደረገ ነው። አስተዳደሩ የወጣቶችንና የነዋሪዎችን የሥራ ጥያቄ ለማቃለል ከፌደራል መንግስትና ከባለሀብቶች ጋር በቅንጅት እየሰራ መሆኑን ገልጸዋል። በዚህም በተለይ የተማሩ ወጣቶችን ቋሚ የሥራ ዕድል ተጠቃሚ ለማድረግ ፍሬያማ ሥራ እየተከናወነ ይገኛል ብለዋል። የድሬዳዋ አስተዳደር የሥራ ክህሎት ቴክኖሎጂ ልማት ቢሮ የሥራ ዕድል ፈጠራ ዳይሬክተር አቶ ሰኢድ አሊ በበኩላቸው በዘንድሮው በጀት ዓመት ከሁሉም ወረዳዎች ከ15 ሺህ በላይ ሥራ ፈላጊዎች መመዘግባቸውን ገልጸዋል። ለነዚህ ሥራ ፈላጊዎች የሥራ ዕድል ለመፍጠር ከሁሉም ተቋማትና ባለሃብቶች ጋር የተቀናጀ ስራ እየተሰራ መሆኑንም አመልክተዋል። በኮንስትራክሽን፣ በብረታብረትና በእንጨት ሥራ፣ በከተማ ግብርና፣ በጨርቃጨርቅና በአልባሳት፣ በምግብ ዝግጅት እና ሌሎች መስኮች የሥራ ዕድል ለመፍጠር የተሰሩ ሥራዎች ውጤት እያስገኙ መሆኑን ገልጸዋል። በተለይ የተማሩ ወጣቶች በድሬደዋ ነፃ የንግድ ቀጠናና በደረቅ ወደብና ተርሚናል የሚፈጠሩ የሥራ ዕድሎች ተጠቃሚ እየተደረጉ መሆናቸውን ነው ያስረዱት። አቶ ሰኢድ እንዳሉት ወጣቶች ያለባቸውን የአመለካከት፣ የሙያና የክህሎት ክፍተቶች ለመድፈን ከቴክኒክና ሙያ ኮሌጆች ጋር የተናበበ ሥራ እየተሰራ ነው። እስካሁን ድረስ ለ2 ሺህ የተማሩና ሌሎች የህብረተሰብ ክፍሎች ቋሚ የሥራ ዕድል መፈጠሩን ተናግረው በቀጣይ ወራት የተሻለ ውጤት ለማስመዝገብ የቅደመ ዝግጅት ሥራ መጠናቀቁን ገልጸዋል። ከቋሚ የሥራ ዕድል ተጠቃሚዎች በተጨማሪ በሺህ ለሚገመቱ ወጣቶች ጊዜያዊ የሥራ ዕድል መፈጠሩንም ዳይሬክተሩ ተናግረዋል። በተለይ በአገር አቀፍ ደረጃ በመንግሥትና በዓለም ባንክ ድጋፍ በመተግበር ላይ በሚገኘው " በብቃት ፕሮጀክት" አማካኝነት 972 ወጣቶች ተገቢውን የህይወት ክህሎት ስልጠና ወስደው ከግል ተቋማትና ድርጅቶች ጋር የማስተሳሰር ስራ ተከናውኗል ብለዋል። ለፕሮጀክቱ ማስፈፀሚያ 40 ሚሊዮን ብር መመደቡንና ወጣቶቹ ከተመደቡበት ድርጅትና ተቋማት ውስጥ ለስድስት ወራት ነፃ አገልግሎት በመስጠት ወደ ቋሚ ሠራተኝነት እየተሸጋገሩ መሆናቸውን አቶ ሰኢድ አውስተዋል። እንደ አቶ ሰኢድ ገለፃ በማህበር ተደራጅተው ህይወታቸውን ለመለወጥ እየተጉ የሚገኙት ወጣቶች ለሚያነሷቸው የመስሪያ፣ የመሸጫ ቦታ እና የብድር ጥያቄዎች ምላሽ ለመስጠት ከሚመለከታቸው ተቋማት ጋር በቅንጅት እየተሰራ ነው። በተለያየ ጊዜያት ተገንብተው የተጠናቀቁ ውስን ሼዶች ተጠቃሚ ለማድረግም እየተሰራ መሆኑን አመልክተዋል። በዘንድሮው በጀት ዓመት ሥራ በጀመረ ፋብሪካ የሥራ ዕድል ተጠቃሚ የሆኑት ወይዘሮ ቆንጂት ለገሰ በበኩላቸው እንዳሉት፤ ለነዋሪው የሥራ ጥያቄ ምላሽ ለመስጠት አስተዳደሩ ከተለያዩ ተቋማት ጋር ተቀናጅቶ በመስራቱ የተሻለ ሥራ ማግኘታቸውን ገልጸዋል። "መሠረታዊ የህይወትና የሙያ ስልጠና አግኝቼ በሥራ ላይ ልምምድ ባሳየሁት ብቃት አሁን ቋሚ የፀጉር ሠራተኛ ሆኛለሁ" ያለችው ደግሞ የብቃት ፕሮጀክት ተጠቃሚ ወጣት ፌቨን አርአያ ናት። "በቀጣይ ብድር ከተመቻቸልኝ የራሴን ፀጉር ቤት በመክፈት ለሌሎች ወጣቶች የሥራ ዕድል የመፍጠር ዓላማ አለኝ፤ አስተዳደሩም ዜጎችን ለመደገፍ የጀመረውን ስራ ማጠናከር አለበት" ብላለች ። ዘንድሮ የድሬዳዋ አስተዳደር በተቀናጀ መንገድ በትኩረት እያከናወናቸው ከሚገኙት ሥራዎች አንዱ ለወጣቶች የሥራ ዕድል ለመፍጠር እያከናወናቸው ያሉ ተግባራት የሚጠቀሱ ናቸው ሲል ኢዜአ ዘግቧል።

በድሬዳዋ አስተዳደር የሥራ ክህሎትና ቴክኖሎጂ ልማት ቢሮ የቴክኒክና ሙያ ትምህርትና ስልጠና ኤጀንሲ የሰልጣኝ ልማትና ተቋማት አቅም ግንባታ ዳይሬክቶሬት በአዲስ  መልክ የተዘጋጁ እና የተሰራጩ ከደረጃ አንድ እስከ ደረጃ አራት ያሉ የሙያ ደረጃዎችን፤ ስርዓተ ስልጠናዎች(ስርኣተ ትምህርቶች) ፤ማስልጠኛ መርጃ መሳሪያዎች እና የአሰልጣኙ መምሪያዎች ላይ ለቴክኒክና ሙያ ትምህርትና ስልጠና ዘርፍ የግልና የመንግስት ኮሌጆች እንዲሁም በቢሮው ለሚገኙ አመራሮች እና ከፍተኛ ባሙያዎች  የተዘጋጀ  የግንዛቤ ማስጨበጫ ስልጠና ተሰጠ፤ የስልጠናው ዋና አላማ በቢሮው በተለይም የቴክኒክና ሙያ ትምህርትና ስልጠና ዘርፍን የሚመሩና የሚሰሩ አሰልጣኝ መምህራን፣ አመራሮችና ከፍተኛ ባለሙያዎች ጊዜው የሚጠይቀውን እና የሚፈልገውን ክህሎት ተላብሰው ተልዕኮ መፈጸም እንዲችሉ ታስቦ ስለ ሙያ ደረጃ ምንነት ፤እንዴት ይከለሳል እንዲሁም ማንስ ይከልሰዋል የሚሉና ተያያዥ ጉዳዮች ላይ የተሰጠ መሆኑን የሰልጣኝ ልማትና ተቋማት አቅም ግንባታ ዳይሬክቶሬት የሆኑት አቶ ጀማል አደም ገልጸዋል፡፡ የዳይሬክቶሬቱ ዳይሬክተር አክለውም የትኞቹ ሙያዎች ተዘጋጅተው ተሰራጭተዋል የሚለውን በማስተዋወቅና የአተገባበር ሂደቱን በመገምገም እና በተዘጋጁት ሰነዶች አተገባበር ሂደት ላይ ያጋጠሙ ችግሮች ላይ መፍትሄዎች እና ወደፊት የምዘና መሳሪያውን እንዴት እናዘጋጅ በሚሉ ጉዳዮች ላይ አሰልጣኝ መምህሩ  አመራሩ እና ከፍተኛ ባለሙያው በወሰዱት ስልጠና እራስን የማብቃት ስራ በዚህ ስልጠና የሚጠናቀቅ እንዳልሆነና አቅምና ክህሎታቸውን ለማዳበር ቢሮው መሰል ስልጠናዎችን በየጊዜው እንደሚያዘጋጅም ተናግረዋል፡፡ የሥራ ክህሎትና ቴክኖሎጂ ልማት ቢሮ ህዝብ ግንኙነት ታህሳስ 18/2016 ዓ.ም ድሬዳዋ

በድሬዳዋ አስተዳደር የሥራ ክህሎትና ቴክኖሎጂ ልማት ቢሮ ስር የሚገኘው ቴክኒክና ሙያ ትምህርትና ስልጠና ኤጀንሲ የአሰልጣኝ ልማትና ተቋማት ጥራት ቁጥጥር ዳይሬክቶሬት የኮሌጆችን አቅም ለማሳደግና የአሰልጣኝ መምህራንን የክህሎት ክፍተት መሙላት የሚያስችል ስልጠና ለኢትዮ-ጣልያን ፖሊቴክኒክ ኮሌጅ ኤሌክትሪካል ኤሌክትሮኒክስ ዲፓርትመንት አስልጣኝ መምህራን ከታህሳስ 4 ጀምሮ መሠረታዊ የArduino programming and python with machine learning ላይ ስልጠና በመሰጠት ላይ ይገኛል፤ በዚህም ስልጠናው በትምህርት ክፍሉ ትምህርትና ስልጠናን በተሻለ መልኩ ለመስጠት እንዲያስችል አሰልጣኝ መምህራኑን በፌደራል ቴክኒክና ሙያ ስጠልና ኤጀንሲ ውስጥ  ለ15 ተከታታይ ቀናት ስልጠና በወሰዱ መሪ አሰልጣኞች አማካይነት ሲሆን በዳይሬክቶሬቱ በተያዘው ዕቅድ መሰረት አሰልጣኞች የእውቀት እና ክህሎት ሽግግር እንዲያደርጉ የሚያስችላቸው  ይሆናል፤ በቢሮው የአሰልጣኝ ልማትና ተቋማት ጥራት ቁጥጥር ዳይሬክቶሬት ዳይሬክተር አቶ ታሪኩ ለገሰ እንደተናገሩት ይህ ስልጠና በመዘጋጀቱ በኮሌጁ አሰልጣኝ መምህራን ዘንድ ያለውን የክህሎት ክፍተት መሙላት ከመቻሉ ባሻገር በቀጣይ በ2016 ዓ.ም ትምህርትና ስልጠና ዘመን ዝግጁ ማድረግ የሚያስችል መሆኑንና በተመሳሳይ ከድሬዳዋ ፖሊቴክኒክ ኮሌጅ ኤሌክትሪካል ኤሌክትሮኒክስ ዲፓርትመንት በቀረበው የስልጠና ፍላጎት መሰረት የውጭ አሰልጣኝ በመጋበዝ የሚቀጥል ፕሮግራም መኖሩን ገልጸዋል፡፡ የሥራ ክህሎትና ቴክኖሎጂ ልማት ቢሮ ህዝብ ግንኙነት ታህሳስ 17/2016 ዓ.ም ድሬዳዋ

የድሬዳዋ አስተዳደር የሥራ ክህሎትና ቴክኖሎጂ ልማት ቢሮ የኢንተርፕራይዞች ልማት ዳይሬክቶሬት የብድር ዋስትና ፈንድ ደንብ ዙሪያ ለኢንተርፕራይዞች የግንዛቤ ማስጨበጫና የውይይት መድረክ አዘጋጀ፡፡ በመድረኩም በድሬዳዋ አስተዳደር ከዚህ ቀደም የነበረውን የብድር ዋስትና ፈንድ ደንብ አሰጣጥና አመላለስ ጋር በተያያዘ የሚስተዋሉ ክፍተቶችን መድፈን እንዲያስችል ተሻሽሎ በቀረበው ደንብ ላይ ለመወያየት ከድሬዳዋ ማይክሮ ፋይናንስ የሚመለከታቸው ባለድርሻ አካላት ተገኝተዋል፡፡ ከተሳታፊዎችም ከብድር ተጠቃሚዎች ምልመላ አንስቶ እስከ አመላለስ ድረስ የታዩ እና እየታዩ ያሉ ችግሮችና ተግዳሮቶችን በተለይም ለብድር ተጠቃሚዎች ፈጣንና ቀልጣፋ አገልግሎት ከማግኘት አንጻር ያለው የድጋፍና ክትትል እንዲሁም የሚመለከታቸው አካላት የቅንጅት ክፍተት በሰፊው ተነስቷል፡፡ በማጠቃለያው በቢሮው የዳይሬክቶሬቱ ዳይሬክተር አቶ ሙሉጌታ ኃ/ማሪያም በበኩላቸው የሚመለከታቸው አካላት ትኩረት በመስጠት በድሬዳዋ አስተዳደር ብቻ እየተሰጠ የሚገኘውን ይህን የብድር ዋስትና ፈንድ አገልግሎትን ደንቡንና አሰራሩን የማሻሻልና ተግባር ከሚመለከታቸው ጋር በቅንጅት እንደሚከናወን ተናግረዋል፡፡ የሥራ ክህሎትና ቴክኖሎጂ ልማት ቢሮ ህዝብ ግንኙነት ታህሳስ 17/2016 ዓ.ም ድሬዳዋ

በድሬዳዋ አስተዳደር የሥራ ክህሎትና ቴክኖሎጂ ልማት ቢሮ የቴክኒክና ሙያ ትምህርትና ስልጠና ኤጀንሲ የኢንዱሰትሪ ኤክስቴንሽንና የቴክኖሎጂ ሽግግር ዳይሬክቶሬት ለሁለቱ የመንግስት ኮሌጆች አሰልጣኝ መምህራን እና ለቀበሌ አንድ ማዕከል አስተባባሪዎችና ባለሙያዎች በ2016 ዓ.ም የመጀመሪያ ግማሽ ዓመት የተከናወኑ የኢንዱስትሪ ኤክስቴንሽን አገልግሎት ዙሪያ ግምገማዊ የስልጠና መድረክ አዘጋጀ:: ዳይሬክቶሬቱ ባዘጋጀው በዚህ መድረክ ላይ የ2016 ዓ.ም የመጀመሪያ ግማሽ ዓመት የኢንዱስትሪ ኤክስቴንሽን አገልግሎት ዕቅድ አፈጻጸም በሁለቱ የመንግስት ኮሌጆች የቀረበ ሲሆን ኮሌጆቹ በተለይም በ4ቱ የድጋፍ ማእቀፎች የጥቃቅንና አነስተኛ ኢንተርፕራይዞችንና አነስተኛና መካከለኛ ማኑፋክቸሪግ ኢንደስትሪዎችን  የምርትና ምራታማነት በማሻሻልና ብቁ የሆነ የሰዉ ሐይል በማፍራትና የሥራ እድል እንዲፈጥሩ በማስቻል የተሰሩ ስራዎች ቀርበዋል፤ በአጠቃላይ አፈጻጸሙ ላይ ከሚመለከታችው ለሁለቱ የመንግስት ኮሌጆች አሰልጣኝ መምህራን እና ለቀበሌ አንድ ማዕከል አስተባባሪዎችና ባለሙያዎች ጋር በመሆን የስራ አፈጻጸም ሪፖርት ላይ ሰፊ ውይይት ማድረግ ተችሏል፤ በኤጀንሲው የአሰልጣኝ ልማትና የተቋማት ጥራት ቁጥጥር ዳይሬክቶሬት ዳይሬክተር አቶ ታሪኩ ለገሰ ለተመዘገበው መልካም አፈጻጸም ምስጋና አቅርበው ወደ ኋላ የቀሩ ተግባራትን ትኩረት በመስጠት ማጠናቀቅ እንደሚገባ ገልጸዋል፡፡ የሥራ ክህሎትና ቴክኖሎጂ ልማት ቢሮ ህዝብ ግንኙነት ታህሳስ 16/2016 ዓ.ም ድሬዳዋ

የድሬዳዋ ወጣት ምሩቅ ሥራ ፈላጊዎች በድሬዳዋ ሰርቶ መለወጥ እንደሚቻል ለማሳየት ፍላጎትና ተነሳሽነታቸውን ከፍ የሚያደርግ በተከታታይ ለዩኒቨርስቲ እና ኮሌጅ ምሩቃን ሥራ ፈላጊዎች በመሰጠት ላይ የሚገኘው  የማይንድ ሴት ስልጠና ቀጥሎ ዛሬም ተሠጠ። ይህም ስልጠና የድሬዳዋ አስተዳደር የሥራ ክህሎትና ቴክኖሎጂ ልማት ቢሮ የሥራ ዕድል ፈጠራና አንድ ማዕከል ዳይሬክቶሬት በአስተዳደሩ ስር ከሚገኙ ቀበሌዎች የተወጣጡ ስራ ፈላጊዎች ተቀጥሮ መስራት ላይ ብቻ ሳይሆን በግልም ሆነ ተደራጅተው ስራ ፈጣሪ ለማድረግ አቅማቸውን ለመገንባት ታስቦ በተከታታይ በመሰጠት ላይ ይገኛል። ቢሮው በአስተዳደሩ የሚገኙ ወጣቶችን ለሽራ የተዘጋጁ ለማድረግና የተጀመሩ የተለያዩ ፕሮጀክቶችን እና ከኢንዱስትሪዎች ጋር ግንኙነት በመፍጠር  ተመራቂዎች ስራን ሳይንቁ ተደራጅተው ወደ ሥራ እንዲሰማሩ በማገዝ ከሚመለከታቸው አካላት ጋር በጋራ በመስራት ተጠቃሚ እንደሚደረጉ የዳይሬክቶሬቱ ዳይሬክተር አቶ ሰኢድ አሊ ገልጸዋል ። የሥራ ክህሎትና ቴክኖሎጂ ልማት ቢሮ ህዝብ ግንኙነት ታህሳስ 16/2016 ዓ.ም ድሬዳዋ

የድሬዳዋ አስተዳደር የሥራ ክህሎትና ቴክኖሎጂ ልማት ቢሮ የቴክኒክና ሙያ ትምህርትና ስልጠና ኤጀንሲ የአሰልጣኝ ልማትና የተቋማት ጥራት ቁጥጥር ዳይሬክቶሬት በሁለቱ የመንግስት ኮሌጆች እና የግል ኮሌጆች ላይ ኢንስፔክሽን ማካሄዱን ቀጥሎ በሪፍት ቫሊ ዩንቨርሲቲ ኮሌጅ ላይ ምልከታ አካሄደ፤ በዚህም ኢንስፔክሽን ኮሌጁ የሚሰጠውን ትምህርትና ስልጠና ደረጃውን በጠበቀ መልኩ እየተሰጠ ስለመሆኑ በአካል በመመልከትና በማረጋገጥ የሚታዩ ክፍተቶችና ችግሮች ቢኖሩ በአጭር ጊዜ ለማስተካከል እዲያስችል ግብረመልስ የሚሰጠው ይሆናል። የዳይሬክቶሬቱ ዳይሬክተር አቶ ታሪኩ ለገሰ ስለ ኢንስፔክሽኑ የቴክኒክና ሙያ ትምህርትና ስልጠናን ጥራትን ማረጋገጥ ዋና አላው አድርጎ ጉዳዩ ከሚመለከታቸው አካላትና ባለድርሻ አከላት ጋር በቅንጅት  ሴክተሮችን ባሳተፈ መልኩ እየተካሄደ መሆኑንና በሁሉም ኮሌጆች የሚቀጥል መሆኑንም ገልጸዋል፡፡ የሥራ ክህሎትና ቴክኖሎጂ ልማት ቢሮ ህዝብ ግንኙነት ታህሳስ 16/2016 ዓ.ም ድሬዳዋ

"ጊዜው የሚጠይቀው አርበኝነት ድህነትን ድል መንሳትና የዜጎቻችንን ተጠቃሚነት ማረጋገጥ ነው፡፡" ክብርት ወ/ሮ ሙፈሪሃት ካሚል የሥራና ክህሎት ሚኒስትር በዘርፉ የሪፎርም ሥራዎች ላይ ያተኮረ የሥልጠናና የምክክር መድረክ ከክልል እና ከተማ አስተዳደር ቢሮ ኃላፊዎች እና ከፖሊቴክኒክ ኮሌጅ ዲኖች ጋር እየተካሄደ ይገኛል፡፡ በመድረኩ የዘርፉን አዲስ እሳቤና በሚኒስቴር መ/ቤቱ እየተከናወኑ የሚገኙ የሪፎርም ሥራዎችን አስመልክተው ክብርት ሚኒስትር ወ/ሮ ሙፈሪሃት ካሚል ገለፃ አድርገዋል፡፡ ክብርት ሚኒስትር በሰጡት ማብራሪያ ዘርፉ ዜጎችን ከድህነት የሚያወጡ ሰው ተኮር ስራዎችን እየሰራ መሆኑን ገልጸው ጊዜው የሚጠይቀው አርበኝነትም ድህነትን ድል መንሳትና የዜጎቻችንን ተጠቃሚነት ማረጋገጥ ነው ብለዋል፡፡ ክህሎትን የማሰቢ መንገድ አድርጎ መውሰድ፣ በቴክኒክና ሙያ ዘርፉ የሚሰጡ ሥልጠናዎች ገበያ መር ማድረግ ፣ ሰልጣኞች የራሳቸውን ኢንተርፕራይዝ ፈጥረው እንዲወጡ ማስቻል ፣ በቴክኒክና ሙያ ተቋማት የሚሰጡ ሥልጠናዎች በአንተርፕረነርሺ እሳቤ መቃኘት እና ተቋማቱ እራሳቸውን የሚችሉበትን ምቹ ሁኔታ መፍጠር የክህሎት ዘርፍ ዋነኛ የሪፎርም አጀንዳዎች መሆናቸውን አብራርተዋል፡፡ የሥራ ዕድል የሚፈጠርላቸው ዜጎች መሰረታዊ የሚባሉ ክህሎቶች የታጠቁ እንዲሆኑ መሥራት፣ ከፍተኛ የማደግ አለኝታ ያላቸው ኢንተርፕራይዞች በልዩ ሁኔታ መደገፍ እና የቤተሰብ እና የማህበረሰብ ንግድ ማስፋፋት ከሥራ ዕድል ፈጠራ አኳያ ያሉ አንኳር እሳቤዎች ናቸው ብለዋል፡፡ የአሠሪና ሠራተኛ ጉዳይ ከዚህ በፊት የነበረውን ትርክት ምርታማነትን ማዕከል ባደረገ የግንኙነት አግባብ መቀየር እና አዲስ የኢንዱስትሪ ባህል መገንባት ላይ ትኩረት ያደረገ አዲስ እሳቤን እንደሚከተልም ገልፀዋል፡፡ የዘርፉ ተልዕኮ የትናንትን ዕዳ፣ የዛሬን ዕድልና የነገን ተስፋ መሰረት ያደረገ ነው ያሉት ክብርት ሚኒስትር ወ/ሮ ሙፈሪሃት አገርና ዓለም አቀፋዊ ነባራዊ ሁኔታዎችን ታሳቢ ባደረገ መልኩ ተልዕኮን በፍጥነትን ፣ በብዛትንና በጥራት መፈፀም ከእያንዳንዱ የዘርፉ አስፈፃሚ አካል የሚጠበቅ ወሳኝ ኃላፊነት መሆኑን በአፅንኦት ተናግረዋል። ምንጭ:- የሥራና ክህሎት ሚኒስቴር

የድሬዳዋ ፖሊ ቴክኒክ ኮሌጅ ከፌደራል ማረሚያ ቤት ኮምሽን ድሬዳዋ ማረሚያ ቤት ጋር በተለያዩ ጉዳዮች ላይ በጋራ መስራት በሚችሉባቸው ጉዳዮች ላይ የመግባቢያ ስምምነት በዛሬው እለት ተፈራረሙ፡፡ በስምምነቱ ላይ በመገኘት ንግግር ያደረጉትና የመግባቢያ ስምምነቱን የፈረሙት የድሬዳዋ ፖሊ ቴክኒክ ኮሌጅ ዲን አቶ ሳሊም ኡስማን ሲሆኑ በንግግራቸውም የቴክኒክና ሙያ ኮሌጆች በዋነኝንት ትምርተና ስልጠናዎችን ከመስጠት በዘለለ ማህበረሰባዊ ግዴታቸውንም መወጣት ይጠበቅባቸዋል፡፡ ስለሆነም በዛሬው እለት ከፌደራል ማረሚያ ቤቶች ኮምሽን ድሬዳዋ ማረሚያ ቤት ጋር የምንፈራረመው ይህ የመግባባያ ስምምነት ታራሚዎች በማረሚያ ቤት ቆይታቸው የግል ፍላጎታቸው ላይ መሰረት ባደረጉ የትምህርትና ስልጠና አገልግሎቶችን በማመቻቸት አገልግሎቱ ስልጣን ባለዉ አካል በወጣ ስርአተ-ትምህርት መሰረት በማድረግ ጥራቱንና ደረጃውን የጠበቀ የቴክኒክና ሙያ ትምህርትና ስልጠና አገልግሎት ታራሚዎች እንዲያገኙ በማድረግ ምርታማ ታራሚ እንዲሆኑና ከታረሙ በኋላም ሙያ ያላቸው የህብረተሰብ ክፍሎች እንዲሆኑ የሚያስችል የመግባቢያ ስምምነት ነው ብለዋል፡፡ አያይዘውም ኮሌጃችን ትምህርትና ስልጠናዎችን ለታራሚዎች ከመስጠት በዘለለ የተለያዩ ቴክኖሎጂዎችን በመስራት ለማረሚያ ቤቱ የሚያቀርብ ይሆናል ይህ ደግሞ ማረሚያ ቤቱ በሃገር በቀል ቴክኖሎጂዎች እንዲደራጅ እድል ይፈጥርለታል ብለዋል፡፡ በመቀጠልም ማረሚያ ቤቱን በመወከል የጋራ ስምምነቱን የፈረሙትና ንግግር ያደረጉት የድሬዳዋ ማረሚያ ቤት ኮምሽን ኃላፊ የሆኑት ም/ኮምሽነር ወንድሙ በዛሬው እለት የምንፈራረመው ይህ የጋራ የመግባቢያ ስምምነት በማረሚያ ቤቱ ውስጥ የሚገኙ ታራሚዎቻችን የእውቀት ሽግግር እንዲኖርና የአመለካከት ለውጥ እንዲሁም የስብእና ግንባታ የሚረዳን የመግባቢያ ስምምነት ነው ብለዋል፡፡ አያይዘውም ይህ ስምነት ከማረሚያ ቤቶቻችን ታርመው የሚወጡ ታራሚዎች ወደ ህብረተሰቡ ሲቀላቀሉ እውቀት፣ክህሎት ያለውና ስራ ፈጣሪ የሆነ ማህበረሰብን መፍጠር እንድንችል ያደርገናል ብለዋል፡፡ በመጨረሻም የማረሚያ ቤቱ ኃላፊ ይህ ስምምነት ከግብ እንዲደርስ ትልቅ ትኩረት በመስጠት ሲከታተሉ ለነበሩት የኮሌጁ ም/ዲን አቶ ሰልሃዲን አብዱላሚድ እንዲሁም ለሌሎች የኮሌጁ ኃላፊዎች ምስጋና አቅርበዋል፡፡ ከስምምነት ፊርማው በኋል ማረሚያ ቤቱ የሚሰጣቸውን የተለያዩ አገልግሎቶችን እንዲሁም የድሬዳዋ ፖሊ ቴክኒክ ኮሌጅ ለማረሚያ ቤቱ እየሰራው ያለው የተለያዩ ቴክኖሎጂዎች ግብኝ ተደርጓል፡፡ የኮሌጁ ኮምኒኬሽን ታህሳስ 15/2016 ዓ.ም ድሬዳዋ

የድሬዳዋ ፖሊ ቴክኒክ ኮሌጅ EASTRIP ፕሮጀክት በጾታዊ እኩልነት፣አካታች እቅድ እንዲሁም ሴቶችን በማብቃት ወደ አመራርነት እንዲመጡ ለማድረግ የታሰበ Gender Mainstream, Inclusive Planning And Women Empowerment and Leadership በሚሉ ርእሶች ሲሰጥ ነበረው የግንዛቤ ማስጨበጫ ስልጠና በዛሬው እለት ተጠናቀቀ፡፡ በስልጠናው መዝጊያ ላይ በመገኘት የመዝጊያ ንግግር ያደረጉትየኮሌጁ የኢንዱስትሪ ኤክስቴንሽንና ቴክኖሎጂ ሽግግር ም/ዲን የሆኑት ወ/ሮ ትግስት በዙ ሲሆኑ በንግግራቸውም ላለፉት 3 ቀናት ሲሰጥ የነበረው ይህ ስልጠና በዋናነት የጾታ እኩልነትና ሴቶችን በማብቃት ወደ አመራርነት እንዲመጡ እንዲሁም አካታች እቅዶችን በማዘጋጀት የሴቶችን ተሳትፎ ከፍ ማድረግ ሲሆን ከዚህ ስልጠናም ሁላችሁም በዚህ ስልጠና የተካፈላችሁ በቂ ግንዛቤ እንዳገኛችሁ እተማመናለሁ፡፡ በቀጣይም በስራ ክፍሎቻችሁ ይህን የስልጠና አላማ እንድታሳኩ ለማሳሰብ እወዳሉያሉ ሲሆን አያይዘውም ኮሌጃችን ለጾታዊ እኩልነት ተግቶ የሚሰራ ኮሌጅ እንደመሆኑ መጠን በቀጣይ በምንሰራቸው ስራዎች እንዲሁም እቅዶች ሁሉ ሴቶችን ያሳተፈ ስራዎችን የሚሰራ ይሆናል ብለዋል፡፡ በስልጠናው ላይ የኮሌጁ አመራሮች፣የማኔጅመንት አባላት፣የትምህርት ክፍል ተጠሪዎች ፣ኬዝ ቲም አስተባባሪዎች እንዲሁም ከስራና ክህሎት ቢሮና በስሩ ከሚገኙ ተቋማት የተውጣጡ ከፍተኛ ባለሞያዎች የተሳትፈዋል፡፡ የኮሌጁ ኮምኒኬሽን ታህሳስ 13/2016 ዓ. ም ድሬዳዋ