MT News _ Myanmar Transparency

အမြန်လမ်းပေါ် စုံမီးပြ၍ ရပ်ထားသော ခရီးသည်တင်ယာဥ်ကို ကိုယ်ပိုင်ယာဥ်တစ်စီး ဝင်တိုက်ရာက တစ်ဦးသေဆုံးကာ တစ်ဦးဒဏ်ရာရ ၂၇.၆.၂၀၂၄ Written by KL ရန်ကုန် - မန္တလေးလမ်းမကြီး၊ မိုင်တိုင် ၁၉ မိုင် ၄ ဖာလုံအနီးတွင် ဇွန်လ ၂၇ ရက် နံနက် ၁ နာရီ ၄၀ မိနစ်ခန့်က စုံမီးပြကာ ရပ်နားထားသော ခရီးသည်တင်ယာဥ်ကို လူသုံးဦး စီးနင်းလိုက်ပါလာသော ကိုယ်ပိုင်ယာဥ်က နောက်ကဝင်တိုက်သဖြင့် အမျိုးသားတစ်ဦးသေဆုံးပြီး တစ်ဦးဒဏ်ရာရရှိခဲ့ကြောင်း အမြန်လမ်း မီးသတ်တပ်ဖွဲ့ထံမှ သိရသည်။ ဖြစ်စဥ်မှာ ရန်ကုန် - မန္တလေးလမ်းမကြီး၊ မိုင်တိုင် ၁၉/၄အနီး ရန်ကုန်သို့အပြန်လမ်းဘက်ခြမ်းတွင် အသက် ၄၀ အရွယ် ယာဥ်မောင်းအမျိုးသားမောင်းနှင်သော ပန်းရဂုံ ယာဥ်လိုင်းအဖြူ​ရောင် ခရီးသည်တင်ယာဥ်မှာ ဆီပြတ်သွားသဖြင့် လမ်းညာဘက်အခြမ်းတွင် မီးစုံပြ၍ ရပ်နားထားစဥ် အသက် ၄၂ နှစ်အရွယ် ယာဥ်မောင်းအမျိုးသားမောင်းနှင်လာသော Hilux Revo အနက်ရောင်မော်တော်ယာဥ်က အရှိန်မထိန်းနိုင်ဘဲ နောက်မှ ဝင်တိုက်မိကာ ကားခေါင်းခန်းတွင် လူတစ်ဦးညပ်နေခဲ့ကြောင်း သိရသည်။ ယာဥ်တိုက်မှုကြောင့် Hilux Revo အနက်ရောင်မော်တော်ယာဥ်ပေါ်မှ အသက် ၃၈ နှစ်အရွယ်အမျိုးသားမှာ ဘယ်လည်ပင်း ပေါက်ထွက်ဒဏ်ရာ၊ ဘယ်ဘက်နဖူးတွင် ပေါက်ပြဲ ဒဏ်ရာရရှိကာ သေဆုံးခဲ့ပြီး၊ အမျိုးသားတစ်ဦးမှာ ဘယ်ဘက်ခြေသလုံးရိုးကျိုးဒဏ်ရာရရှိခဲ့သည်။ "ကိုယ်ပိုင်ယာဥ်ပေါ်မှာ ညပ်နေတဲ့သူကို အမြန်လမ်းနယ်မြေ မီးသတ်စခန်းက မီးငြှိမ်းသတ်ယာဥ်တစ်စီးနဲ့ ​တပ်ဖွဲ့ဝင်ငါးဦးက သွားရောက်ကယ်ဆယ်ခဲ့ကြတာပါ။ မိနစ်၂၀ ကျော်ကြာမှလူနာကို ကယ်ထုတ်နိုင်ခဲ့တယ်။ လူနာကတော့ အသက်မရှိတော့ဘူး"ဟု ကယ်ဆယ်ရေးဆောင်ရွက်သူတစ်ဦးက ပြောသည်။ သေဆုံးသူနှင့်ဒဏ်ရာရရှိသူတို့ကို ဉာတိသင်္ဂဟပရဟိတအသင်းပိုင် လူနာတင်ယာဥ်ဖြင့် လှည်းကူးမြို့နယ် ပြည်သူ့ဆေးရုံသို့ တင်ပို့ထားကြောင်း သိရသည်။ #အမြန်လမ်း #ယာဥ်တိုက်မှု #လှည်းကူး #mtnews

နေအိမ်များ၌ လိုက်လံခိုးယူနေသူ အမျိုးသားနှစ်ဦးကို တာချီလိတ်တွင် ဖမ်းမိ ၂၇.၆.၂၀၂၄ Written by KL ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်အတွင်းရှိ နေအိမ်များတွင် လိုက်လံ ခိုးယူနေသော အမျိုးသားနှစ်ဦးကို ဇွန်လ ၂၆ ရက် ညနေပိုင်းက ဖမ်းမိခဲ့ကြောင်း ရဲတပ်ဖွဲ့ထံမှ သိရသည်။ ဖမ်းမိသူနှစ်ဦးမှာ တာချီလိတ်မြို့နယ် မကာဟိုခမ်းရပ်ကွက်တွင် နေထိုင်ပြီး ကျပန်းလုပ်ကိုင်ကြသည့် အသက် ၂၈ နှစ်အရွယ် ရဲသွေး(ခ)ကိုသွေးနှင့် အသက် ၂၉ နှစ်အရွယ် ရာဇာနေဝင်း(ခ)ဇော်တာတီးတို့ဖြစ်ကြောင်း သိရသည်။ ၎င်းတို့နှစ်ဦးမှာ တာချီလိတ်မြို့၊ ဆန်ဆိုင်း(က) ရပ်ကွက်၊ ဆန်ဆိုင်းဈေးအနီး၊ လမ်းသွယ်-၁၀​ ပေါ်တွင် လမ်းလျှောက်လာစဥ် လှည့်ကင်းဆောင်ရွက်နေသော ရဲတပ်ဖွဲ့ဝင်များက မသင်္ကာသဖြင့် စစ်ဆေးရာမှ ဆောက်လုပ်ဆဲနေအိမ်တစ်လုံးထဲက ခိုးယူလာသော ပစ္စည်းများနှင့်အတူ ဖမ်းမိခဲ့ခြင်းဖြစ်သည်။ "သူတို့၂ယောက်က အိမ်တွေထဲကပစ္စည်းတွေကို ခိုးယူပြီး ရတဲ့ပစ္စည်းတချို့ကို ရောင်းစားရင်း လှည့်လည်သွားလာနေတာ။ အခုလည်း ဆောက်လက်စ အိမ်ထဲက ပစ္စည်းတွေကို ခိုးယူပြီး အပြန်မှာပဲ ရဲက ဖမ်းမိတာ "ဟု ရဲတပ်ဖွဲ့နှင့် နီးစပ်သူတစ်ဦးက ပြောသည်။ ဖမ်းမိသည့် အမျိုးသားနှစ်ဦးထံမှ ဖောက်စက်လေးလုံး၊ CUTTER အသေးနှစ်ခု၊ ကတ်ကြေးတစ်လက်နှင့် ဆိုင်ကယ်ပလပ်ဖြုတ်တံတစ်ခုတို့ကို သိမ်းဆည်းရမိသဖြင့် တာချီလိတ်မြို့မရဲစခန်းတွင် အမှုဖွင့်ကာ စစ်ဆေးနေကြောင်း သိရသည်။ #တာချီလိတ် #ဆိုင်ကယ် #သူခိုး #MT #mtnews

အသက် ၈၀ ကျော် အဘိုးအို လမ်းလျှောက်နေချိန် ဆိုင်ကယ်က တိုက်မိထွက်ပြေး၍ ဆေးရုံ၌ သွေးလွန်သေဆုံး ၂၇.၆.၂၀၂၄ Written by TZ ဧရာဝတီတိုင်းဒေသကြီး၊ မြန်အောင်ခရိုင်၊ ကြံခင်းမြို့၊ သဲဖြူကျေးရွာအနီး၊ သဲဖြူကွေ့ကတ္တရာလမ်းမပေါ်တွင် အသက် (၈၂) နှစ်ဝန်းကျင်ရှိသည့် ကဇင်းကြီးရွာနေ အဘိုးအိုတစ်ဦး လမ်းလျှောက်နေချိန် မော်တော်ဆိုင်ကယ်ဖြင့်ချိတ်တိုက်မိရာက ထိုလမ်းမပေါ် လဲကျဒဏ်ရာရကာ သွေးထွက်လွန်၍ ဆေးရုံပို့ကုသချိန် သေဆုံးသွားကြောင်း သိရသည်။ ထိုဖြစ်စဥ်မှာ ဇွန်လ ၂၇ ရက် နံနက် ၇ နာရီဝန်းကျင်မှ တာဝန်ကျရဲတပ်ဖွဲ့ဝင်များက မေတ္တာမွန်လူမှုကူညီရေးပရဟိတအဖွဲ့သို့ ကူညီပေးရန် ဖုန်းဆက်လာသောကြောင့် ကတ္တရာလမ်းမပေါ် သွေးထွက်လွန်ပြီး လဲလျောင်းနေသည့် အမျိုးသားကြီးကို ကြံခင်းမြို့ပြည်သူ့ဆေးရုံကြီးပို့ဆောင်ပေးခဲ့သော်လည်း ဆေးရုံ၌ဆေးကုသစဥ် မွန်းတည့် ၁၂ နာရီဝန်းကျင်တွင် သေဆုံးသွားကြောင်း သိရသည်။ "ရဲတွေပြောတာကတော့ ဆိုင်ကယ်နဲ့ချိတ်မိပြီး လူကလဲသွားတာဖြစ်မယ်ပြောတယ်။ အဲ့ဆိုင်ကယ်ကိုတော့ ဖမ်းမိတာမရှိဘူး။ လူနာကဆော့ နှောက်စေ့မှာ ဒဏ်ရာရပြီး သွေးတွေထွက်နေတာ။ ကျွန်တော်တို့သွားသယ်တော့ အသက်ပါသေးတယ်။ ဆေးရုံမှာ ဆေးကုသရင်း ဆုံးသွားတယ်" လို့ မေတ္တာမွန်လူမှုကူညီရေးပရဟိတအဖွဲ့မှ တာဝန်ရှိသူတစ်ဦးက MT News သို့ဖြေကြားသည်။ ဓာတ်ပုံ - မေတ္တာမွန်လူမှုကူညီရေးပရဟိတအဖွဲ့ #ကြံခင်း #အဘိုးအို #ယာဥ်တိုက်မှု #MT #mtnews

အမြန်လမ်းတွင် နောက်ဘီးပေါက်သည့် Fielder ယာဥ် လမ်းလယ်ကျွန်းနှင့် ထန်းပင် ဝင်တိုက်မိရာက နှစ်ဦးဒဏ်ရာရ ၂၇.၆.၂၀၂၄ Written by TZ ပဲခူးတိုင်းဒေသကြီး၊ တောင်ငူခရိုင်၊ အုတ်တွင်းမြို့(အနောက်ဘက်)၊ အမြန်လမ်းမကြီး မိုင်တိုင်အမှတ် ( ၁၂၈/၅) ( ၁၂၈/၆) အကြားတွင် နေပြည်တော်မှ ရန်ကုန်သို့ မောင်းနှင်လာသည့် Toyota Fielder ယာဥ်မှာ နောက်ဘီးပေါက်၍ လမ်းလယ်ကျွန်းရှိ ထန်းပင်အားတိုက်မိရာ နှစ်ဦးဒဏ်ရာရရှိခဲ့ကြောင်း သိရသည်။ ဇွန်လ ၂၇ ရက် နေ့လည် ၂ နာရီဝန်းကျင်တွင် Toyota Fielder ယာဥ်အမျိုးအစား ခဲရောင်ယာဥ်မှာ နောက်ဘီးပေါက်၍ လမ်းလယ်ကျွန်းရှိ ထန်းပင်အားတိုက်မိရာ ယာဥ်မောင်းနှင့်ယာဥ်ပေါ်တွင် လိုက်ပါလာသည့် အမျိုးသားတို့ ဒဏ်ရာရရှိသောကြောင့် တာဝန်ရှိသူများနှင့် ပရဟိတအသင်းတို့က သွားရောက်ကူညီခဲ့ကြသည်။ "နေပြည်တော်ကနေ ရန်ကုန်ပြန်လာတာ။ နောက်ဘီးကပေါက်ပြီး ထန်းပင်ကိုတိုက်မိတာ။ ယာဥ်ခေါင်းပိုင်းတော့ တော်တော်လေးပျက်စီးသွားတယ်။ ယာဥ်မောင်းကတော့ ပွန်းပဲ့ဒဏ်ရာရတယ်။ ဘေးမှာပါလာတဲ့သူကတော့ လက်ဖျံနဲ့ကျောရိုးထိခိုက်တယ်" ဟု ရင်ခုန်သံရှင်ရေးကူညီမှုအသင်းမှ ဆရာတော်မှ MT News သို့ မိန့်ကြားသည်။ ဓာတ်ပုံ - ရင်ခုန်သံရှင်ရေးကူညီမှုအသင်း (အုတ်တွင်းမြို့) #အုတ်တွင်း #အမြန်လမ်း #နေပြည်တော် #mtnews

ဂျပန်နိုင်ငံရဲ့အမြင့်ဆုံး ဖူဂျီမီးတောင်ရဲ့ မီးတောင်ဝအတွင်းပိုင်းမှာ လူသေအလောင်းသုံးခု တွေ့ရှိ ၂၇.၆.၂၀၂၄ Translated by Htwe Ko Tun ဂျပန်နိုင်ငံမှာ အမြင့်ဆုံးဖြစ်ပြီး ထင်ရှားလူသိများတဲ့ ဖူဂျီမီးတောင်ရဲ့ မီးတောင်ဝအတွင်းပိုင်းမှာ လူသုံးယောက်တို့ရဲ့ အလောင်းတွေကို ဝမ်းနည်းဖွယ်တွေ့ရှိခဲ့ရတယ်လို့ ဂျပန်ရဲတပ်ဖွဲ့က ဇွန်လ ၂၇ ရက်မှာ ပြောခဲ့ပါတယ်။ ဂျပန်ရဲတပ်ဖွဲ့က အဆိုပါလူသုံးဦးကို မီးတောင်ဝအတွင်းပိုင်းမှာ အနည်းငယ်စီခြားပြီး သေဆုံးလျက်တွေ့ခဲ့ရတာလို့ အတည်ပြုခဲ့ပါတယ်။ ဂျပန်ရဲတပ်ဖွဲ့က ပြီးခဲ့တဲ့တနင်္ဂနွေနေ့ဖြစ်တဲ့ ဇွန်လ ၂၃ ရက်မှာ တိုကျိုမြို့နေအမျိုးသမီးတစ်ဦးထံမှ သူ့ရဲ့ အသက် ၅၃ နှစ်ရှိ ခင်ပွန်းဖြစ်သူဟာ ဖူဂျီတောင်တက်မယ်လို့ အိမ်ကထွက်သွားအပြီး အဆက်အသွယ်မရဖြစ်နေတယ်လို့ အကြောင်းကြားချက်ကို လက်ခံရရှိခဲ့ပါတယ်။ အဆိုပါခင်ပွန်းဖြစ်သူက နောက်နေ့ပြန်လားဦးမယ်ဆိုပြီး ဇွန်လ ၂၁ ရက်မှာ အိမ်ကထွက်သွားခဲ့တာပါ။ ဇွန်လ ၂၂ ရက် နံနက်မှာတော့ မိသားစုထံ ပုံလေးတစ်ပုံကို တောင်ထိပ်နားအရောက်မှာ အွန်လိုင်းကပို့ခဲ့သေးပြီး ပြန်ရောက်မလာတော့တာပါ။ အဆိုပါလူကိုရှာဖွေရင်းနဲ့ ရဲတပ်ဖွဲ့က ဖူဂျီတောင်ထိပ်အရောက် မီးတောင်ဝအတွင်းပိုင်းမှာ အခုလို တခြားလူသုံးဦးရဲ့အလောင်းတွေကို တွေ့ခဲ့ရတာပါ။ ရဲတပ်ဖွဲ့က ထိုသုံးဦးက တောင်တက်သမားတွေဖြစ်ဖွယ်ရှိပြီး ဇွန်လ ၂၆ ရက်မှသေဆုံးခဲ့တာလို့ အတည်ပြုခဲ့ပါတယ်။ ဒါပေမယ့် သူတို့မည်သူမည်ဝါဖြစ်တယ်ဆိုတာနဲ့ တခြားအချက်အလက်အသေးစိတ်ကို ထုတ်ပြန်ပြောကြားခြင်းမရှိပါဘူး။ ရဲတပ်ဖွဲ့က အဆိုပါလူတွေဟာ ဆိုးဝါးတဲ့ ရာသီဥတုမှာ မီးတောင်ထိပ်ဝမှာချော်ကျ သေဆုံးရတယ်လို့ ယူဆရပြီး ဘယ်လိုသေဆုံးရတယ်ဆိုတာအတိအကျကို ရဲတပ်ဖွဲ့ကဆက်လက်စစ်ဆေးနေပါတယ်။ အခုအချိန်က တောင်တက်ရာသီလည်းမဟုတ်တာကြောင့် ဖူဂျီတောင်ထိပ်ကိုတက်တဲ့လမ်းကြောင်းသုံးခုကိုလည်း ပိတ်ထားပြီး ဇူလိုင်လမှဖွင့်မှာပါ။ ဒါပေမယ့် တချို့ကတော့ ကိုယ့်ဟာကိုယ်တက်နေကြသူတွေ ရှိပါတယ်။ အခုအချိန်မှာ ရာသီဥတုကလည်း တောင်ထိပ်နားနီးလေ အေးလာလေဖြစ်ကာ တောင်တက်လမ်းရှိအရေးပေါ်ဆေးဘက်ဆိုင်ရာစခန်းတွေကိုလည်း ပိတ်ထားတာလို့ သိရပါတယ်။ ရဲတပ်ဖွဲ့ကတော့မီးတောင်ဝမှာသေဆုံးနေသူတွေနဲ့ပတ်သက်လို့ တိတိကျကျ သိရအောင် ဆက်လက် စုံစမ်းလျက်ရှိတယ်လို့ ဆိုပါတယ်။ Ref- NHK #ဖူဂျီ #Fuji #မီးငြိမ်းတောင် #ရေခဲတောင် #mtnews .

ဇူလိုင်လမှစတင်ပြီး နေပြည်‌တော်တွင် ရေဖိုးနှုန်းထားအချို့ကို တိုးမြှင့်ကောက်ခံမည် ၂၇. ၆. ၂၀၂၄ Written by Nyein Kyaw လာမည့် ဇူလိုင်လမှစတင်ပြီး နေပြည်တော်တွင် ဌာနဆိုင်ရာရုံးနှင့်ဝန်ထမ်းအိမ်ရာ၊ ပုဂ္ဂလိကလူနေအိမ်များအား ရေဖိုးနှုန်းထား တိုးမြှင့်ကောက်ခံမည်ဖြစ်ပြီး လူနေအိမ်များ တစ်ယူနစ် ၂၂၀ ကျပ်အထိ တိုးမြှင့်ကောက်ခံသွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ (SAC) သတင်းထုတ်ပြန်ရေးအဖွဲ့မှ ထုတ်ပြန်ထားသည်။ နေပြည်တော်တွင် ရေတစ်ယူနစ် (ရေ ၂၂၀ ဂါလံ)အတွက် ဌာနဆိုင်ရာရုံးများနှင့် ဝန်ထမ်းအိမ်ရာများအား ယခင်နှုန်းထား ကျပ် ၇၀ မှ ယခု ကျပ် ၁၅၀၊ ပုဂ္ဂလိကလူနေအိမ်များအား ယခင်နှုန်းထား ကျပ် ၁၄၀ မှ ယခု ၂၂၀၊ ပုဂ္ဂလိကစိမ်းလန်းရေအား ယခင်နှုန်းထား ကျပ် ၇၀ မှ ယခု ကျပ် ၁၄၀ အထိ တိုးမြှင့် ကောက်ခံသွားမည်ဖြစ်ကြောင်း နေပြည်‌တော်စည်ပင်သာရေးကော်မတီက ထုတ်ပြန်ချက်အရ သိရသည်။ သို့သော် ပျဉ်းမနားမြို့လူနေရပ်ကွက်များအား ယခင်နှုန်းထား ကျပ် ၂၂၀၊ စီးပွားရေးလုပ်ငန်းရှင်များအား ယခင်နှုန်းထား ကျပ် ၂၆၀၊ ဟိုတယ်များ၊စက်မှု၊လက်မှုလုပ်ငန်းများအား ယခင်နှုန်းထား ကျပ် ၄၄၀ ၊ နိုင်ငံခြားသားနှင့်ဆက်စပ်သော (အဆောက်အဦ+လုပ်ငန်းများ)အား ယခင်နှုန်းထား ကျပ် ၈၈၀ နှင့် စိုက်ပျိုးရေးသုံးရေအား ယခင်နှုန်းထား ကျပ် ၂၂၀ အတိုင်းပြောင်းလဲမှု ဆက်လက် ကောက်ခံသွားမည်ဖြစ်ကြောင်း သိရသည်။ #နေပြည်တော် #ရေ #တိုးမြှင့် #MT #mtnews

MT News သတင်းဌာနရဲ့ တစ်နေ့တာအတွင်း ထူးခြားသတင်း ၂၇. ၆. ၂၀၂၄ တင်ဆက်/တည်းဖြတ် MT Newsင ဒီနေ့အတွက် MT News သတင်းဌာနရဲ့  ၂၄ နာရီ သတင်းအစီအစဉ်မှာ တင်ဆက်ပေးမယ့် သတင်းတွေကတော့ ◾️ TNLA ရဲ့ တစ်ကျော့ပြန် တိုက်ခိုက်မှုကြောင့် ကျောက်မဲမှာ သုံးရက်အတွင်း ပြည်သူ ၂၁ ဦးသေဆုံးတဲ့သတင်း ◾️ AA က ရခိုင်ပြည်နယ်မှာ စိတ်ကြွရူးသွပ်ဆေးပြားတွေ ပြောင်းလဲထုတ်လုပ်နေတဲ့အပြင် ပြည်ပတင်ပို့တဲ့အထိ ဆောင်ရွက်နေတာက ဒေသတွင်း မူးယစ်ဆေးဝါးဖြန့်ဖြူးရေးနဲ့ အကြမ်းဖက်မှုတွေ ပေါ်ပေါက်စေရေး ဦးတည်လုပ်ဆောင်နေတာလို့ ဗိုလ်ချုပ်ဇော်မင်းထွန်း ပြောကြားတဲ့သတင်း ◾️ တောင်ငူ ကွန်ပျူတာတက္ကသိုလ်ကျောင်းသား စစ်တောင်းတံတားပေါ်ကနေ မြစ်ထဲခုန်ချ အဆုံးစီရင်တဲ့သတင်း ◾️ အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနဲ့ တရားမဝင်ရောင်းဝယ်မှု တိုက်ဖျက်ရေးနေ့ အထိမ်းအမှတ်အဖြစ် ရန်ကုန်၊ မန္တလေးနဲ့ တောင်ကြီးမြို့တွေမှာ ဖမ်းဆီးရမိ မူးယစ်ဆေးဝါး ကျပ် ၁,၁၆၃ ဘီလျံဖိုး မီးရှို့ဖျက်ဆီးတဲ့သတင်း ◾️ သန်လျင်မြို့၊ ဘုရားကုန်းလမ်းဆုံ ကျောက်ရေတွင်း ကျောင်းရှေ့အနီး လမ်းဘေးမှာ အမျိုးသားတစ်ဦး ဦးခေါင်းဒဏ်ရာတွေနဲ့ သေဆုံးနေတာတွေ့ရှိတဲ့သတင်း ◾️ ဘင်္ဂါလီကို ထောက်ပံ့မယ့် မောင်တောမြို့ရှိ WFP ဂိုဒေါင်က ပစ္စည်းတွေကို AA က လုယူဖို့ကြိုးပမ်းခဲ့ပြီး မအောင်မြင်မှ Drop Boom ချ မီးရှို့ ဖျက်ဆီးခဲ့တဲ့သတင်း ◾️ ပို့ကုန်ရငွေ ‌ဒေါ်လာ ၅ သိန်းနဲ့အထက် ပြန်လည်ဝင်ရောက်ဖို့ ကျန်ရှိတဲ့ ကုမ္ပဏီ ၂၈ ခုကို DICA က အမည်ပျက်စာရင်းသွင်းတဲ့သတင်း ◾️ တရုတ်နိုင်ငံမှာ ကျင်းပမယ့် ငြိမ်းချမ်းစွာ အတူယှဉ်တွဲနေထိုင်ရေးမူကြီး (၅) ချက် ထုတ်ပြန်ခြင်း နှစ် ၇၀ ပြည့် အထိမ်းအမှတ် အခမ်းအနားကို သမ္မတ(ငြိမ်း) ဦးသိန်းစိန် တက်ရောက်မယ့်သတင်း ◾️ အသက်၄၀ ဝန်းကျင် အမျိုးသားတစ်ဦး ကမာကြည်တံတားပေါ်မှာ ကားရပ်ထားခဲ့ပြီး ခုန်ချသွားဖွယ်ရှိလို့ လှုမှုကူညီရေးအသင်းတွေ ငမိုးရိပ် ချောင်းရိုးအတိုင်းလိုက်လံကူညီ ရှာဖွေနေတဲ့သတင်းနဲ့ ◾️ ဝင်းနိမ္မိတာရုံဆရာတော်ဘုရားကြီးရဲ့ အန္တိမအဂ္ဂိစျာပန သာဓုကီဠနအခမ်းအနား ဒီနေ့ကျင်းပတဲ့ သတင်းတို့ကို တင်ဆက်ပေးသွားမှာဖြစ်ပြီး MT News သတင်းဌာနရဲ့ ဒီရုပ်သံမှာ နားဆင်နိုင်မှာဖြစ်ပါတယ်။ #ပွင့်လင်းမြန်မာ #mtnews_entertainment #mtnews #myanmar_transparency_news #myanmar_transparency_news_ရုပ်သံ

ညောင်ဦးမြို့နယ်တွင် ရာအိမ်မှူးမိသားစုဝင်လေးဦးကို PDF သုံးဖွဲ့ပေါင်းပြီး ပစ်ခတ်သတ်ဖြတ်၍ သုံးဦးသေဆုံး ◾ လာရောက်သတ်ဖြတ်သည့် PDF ရှစ်ဦးက နေအိမ်မှ ဆိုင်ကယ်နှစ်စီးကိုပါ ခိုးဝှက်လုယက် ၂၇. ၆ ၂၀၂၄ Written by Nay Moe ညောင်ဦးမြို့နယ်တွင် ဇွန်လ ၂၅ ရက်နေ့က ရာအိမ်မှူးမိသားစုဝင်လေးဦးကို PDF များ လာရောက် ပစ်ခတ်သတ်ဖြတ်ကြ၍ မိသားစုဝင်သုံးဦးသေဆုံးခဲ့ရသည်ဟု မြန်မာနိုင်ငံရဲတပ်ဖွဲ့မှ သိရသည်။ ဖြစ်စဉ်မှာ ဇွန်လ ၂၅ ရက် နံနက် ၆ နာရီ ၁၀ မိနစ်တွင် ညောင်ဦးမြို့နယ်၊ ချောင်းရှည်ကျေးရွာနေ ရာအိမ်မှူးဖြစ်သူ ဦးအောင်ဆန်းဦး(၅၂)နှစ်သည် ဇနီးဖြစ်သူ ဒေါ်ခိုင်ခိုင်ဝင်း(၄၉)နှစ်၊ သားဖြစ်သူ ညောင်ဦးမြို့နယ်မြေစာရင်းရုံးမှ မြေတိုင်းအဆင့်-၄ ကိုညီညီလင်း(၂၈)နှစ်၊ သမီးဖြစ်သူ မခင်မြတ်မြတ်ဦး (၂၅)နှစ်တို့နှင့်အတူ နေအိမ်၌ ရှိနေစဉ် PDF ရှစ်ဦးက ဆိုင်ကယ် သုံးစီးဖြင့် ရောက်ရှိလာပြီး သေနတ်ဖြင့်ပစ်ခတ်ကာ ဆိုင်ကယ်နှစ်စီးအား လုယက်ယူဆောင်သွားခဲ့သည်။ အဆိုပါ လုယက်သတ်ဖြတ်မှုကြောင့် ဦးအောင်ဆန်းဦး၊ ကိုညီညီလင်းနှင့် မခင်မြတ်မြတ်ဦးတို့တွင် ကျည်ထိမှန်ဒဏ်ရာများ ရရှိကာ သေဆုံးသွားခဲ့ပြီး ဒေါ်ခိုင်ခိုင်ဝင်းမှာ ထွက်ပြေးလွတ်မြောက်ခဲ့ကြောင်း သိရသည်။ ဦးအောင်ဆန်းဦးသည် ယခင်က ညောင်ဦးမြို့နယ် ကြံ့ခိုင်ရေးပါတီ၏ အတွင်းရေးမှုးတစ်ဦးလည်းဖြစ်ပြီး PDF များက ပျုစောထီးဟုဆိုကာ ကြိုးတုပ်ဖမ်းဆီးပြီးမှ သတ်ဖြတ်ခဲ့ခြင်းဖြစ်သလို ဇွန်လ ၁၆ ရက်ကလည်း လာရောက်သတ်ဖြတ်မည်ဖြစ်ကြောင်း PDF များက ခြိမ်းခြောက်စာပို့ခဲ့ကာ တစ်ပတ်အကြာတွင် အမှန်တကယ်လာရောက် သတ်ဖြတ်ခဲ့ကြခြင်းလည်း ဖြစ်သည်။ အဆိုပါ သတ်ဖြတ်မှုကို ကျုးလွန်သည့် PDF ရှစ်ဦးမှာ Chauk Guerilla Force – CGF ၊ ချောက်မြို့နယ်ပကဖ နှင့်အရိန္ဒမာ PDF တပ်ဖွဲ့များမှ PDF များဖြစ်ကြောင်း သိရသည်။ #ညောင်ဦး #PDF #ပြည်ခိုင်ဖြိုး #NUG #mtnews

ဝင်းနိမ္မိတာရုံဆရာတော်ဘုရားကြီး၏ အန္တိမအဂ္ဂိစျာပန သာဓုကီဠနအခမ်းအနား ယနေ့ကျင်းပ MT News ၂၇. ၈. ၂၀၂၄ ပြီးခဲ့တဲ့ ဇွန်လ ၁၉ ရက်က ယာဥ်တားဆီးစစ်ဆေးချိန် ယာဥ်မောင်းက မရပ်တန့်ဘဲ ကျော်တက်မောင်းနှင်သွားတာကြောင့် PDF လို့ ယူဆပြီး မှားယွင်းပစ်ခတ်မိရာက ဘဝနတ်ထံ ပျံလွန်သွားတဲ့ဝင်းနိမ္မိတာရုံဆရာတော်ဘုရားကြီးဘဒ္ဒန္တမုနိန္ဒာဘိဝံသရဲ့ အန္တိမအဂ္ဂိစျာပန သာဓုကီဠနအခမ်းအနားကို ဒီနေ့လယ် ၁၂ နာရီက စတင်ကျင်းပခဲ့ပါတယ်။ ဒီ နေ့လယ် ၁၂ နာရီတိတိအချိန်မှာ ဆရာတော်ဘုရားကြီးရဲ့ကြွင်းရစ်တဲ့ရုပ်ကလာပ်တော်ကို ကရဝိတ်ဖောင်တော်နဲ့ပင့်ဆောင်ပြီး ဆင်ဖြူကွင်းသုသာန်က လောင်တိုက်တော်မှာ မီးပူဇော်ခဲ့တာဖြစ်ပြီး မြို့လုံးကျွတ်နီးပါး လိုက်ပါပို့ဆောင်ခဲ့တယ်လို့ သိရပါတယ်။ ဆရာတော်ဘုရားကြီးကို ဒီနေ့ မီးပူဇော်အပြီး ကြွင်းရစ်တဲ့အရိုးပြာတော်ကို မနက်ဖြန် ဇွန်လ ၂၈ ရက် နေ့လယ် ၁၂ နာရီမှာ ကရဝိတ််ဖောင်တော်နဲ့ပင့်ဆောင်ပြီး သိမ်ဇရပ် စစ်တောင်းမြစ်မှာ ရေမျှောပူဇော်မှာဖြစ်ပါတယ်။ ပျံလွန်တော်မူချိန်မှာ သက်တော် ၇၈ နှစ် ဝါတော် ၅၈ နှစ်ရှိနေပြီတဲ့ ပဲခူးမြို့ ဝင်းနိမ္မိတာရုံကျောင်းတိုက်ကြီး ဦးစီးပဓာန နာယက ဆရာတော် ဘဒ္ဒန္တမုနိန္ဒာဘိဝံသ ပျံလွန်တော်မူခဲ့ခြင်းနဲ့ပတ်သက်ပြီး နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က တောင်းပန်လျှောက်ထားလွှာ ဇွန်လ ၂၂ ရက် ရက်စွဲနဲ့ ပေးပို့ပန်ကြားခဲ့တယ်လို့ သိရပါတယ်။ Photo - Ko Myo Mzmptph #ပဲခူး #ဝင်းနိမ္မိတာရုံ #စျာပန #လုံခြုံရေးတပ်ဖွဲ့ #mtnews

ဟစ်ဇ်ဘိုလာနဲ့ စစ်ဖြစ်ရင် အခြေစိုက်ရာ လက်ဘနွန်နိုင်ငံကို ကျောက်ခေတ်ပြန်ရောက်သွားရစေမယ်လို့ အစ္စရေးဝန်ကြီး ကြိမ်းဝါး ၂၇.၆.၂၀၂၄ Translated by Htwe Ko Tun အစ္စရေးတပ်ဖွဲ့တွေနဲ့ လက်ဘနွန်အခြေစိုက် ဟစ်ဇ်ဘိုလာစစ်သွေးကြွအုပ်စုတို့အကြား တင်းမာမှုတွေ ဖြစ်ပေါ်လာနေတဲ့အတွက် အရှေ့အလယ်ပိုင်းဒေသအတွင်း နောက်ထပ်စစ်ပွဲတစ်ရပ် ဖြစ်လာလေဦးမလားလို့ စိုးရိမ်ပူပန်နေကြချိန်မှာပဲ အမေရိကန်ကိုရောက်ရှိနေတဲ့ အစ္စရေးကာကွယ်ရေးဝန်ကြီး ယို့ဗ် ဂယ်လန့်(Yoav Gallant) က အစ္စရေးစစ်တပ်အနေနဲ့ ဟစ်ဇ်ဘိုလာတို့နဲ့ ဘယ်လိုစစ်ပွဲမျိုးမှာမဆို လက်ဘနွန်နိုင်ငံကို ကျောက်ခေတ်ပြန်ရောက်သွားအောင်လုပ်နိုင်စွမ်းရှိတယ်လို့ ဇွန်လ ၂၇ ရက်မှာ သတိပေးပြောကြားခဲ့ပါတယ်။ ဒါပေမယ့် ဂယ်လန့်က အစ္စရေးအစိုးရအနေနဲ့ အစ္စရေး- လက်ဘနွန် နယ်စပ်ပြဿနာတွေနဲ့ပတ်သက်လို့ သံတမန်နည်းလမ်းအရ ဖြေရှင်းသွားဖို့ ပိုလို့နှစ်သက်ပါတယ်လို့ ပြောခဲ့ပါတယ်။ အမေရိကန်ပြည်ထောင်စုကို လေးရက်ကြာခရီးရောက်ရှိနေတဲ့ ဂယ်လန့်က " အစ္စရေးအနေနဲ့ စစ်ကိုမလိုလားပါဘူး။ ဒါပေမယ့် ဘယ်လိုအခြေအနေမျိုးအတွက်မဆို အစ္စရေးအနေနဲ့ ကြိုတင်ပြင်ဆင်ထားပါတယ်။ တကယ်လို့ စစ်ပွဲဖြစ်လာခဲ့ရင် အစ္စရေးက လက်ဘနွန်နိုင်ငံကို အကြီး အကျယ်ထိခိုက်ပျက်စီးပြီး ဆုံးရှုံးမှုကြီးတွေဖြစ်စေနိုင်တာ ဟစ်ဇ်ဘိုလာက ကောင်းကောင်းသိပါတယ်"လို့ သတင်းထောက်တွေကို ပြောကြားခဲ့တာပါ။ ဒါ့ပြင် သူက ခရီးစဉ်အတွင်းမှာ အမေရိကန်အဆင့်မြင့်အရာရှိကြီးတွေနဲ့ ဂါဇာစစ်ပွဲအပြီးကာလမှာ ဂါဇာ ကမ်းမြောင်ဒေသအုပ်ချုပ်မှုအတွက် အဆိုပြုချက်တွေ ကိုဆွေးနွေးခဲ့တယ်လို့လည်းဆိုပါတယ်။ အဲဒီအဆိုပြုချက်အရ ဂါဇာဒေသအုပ်ချုပ်မှုအဖွဲ့မှာ ဒေသခံပါလက်စတိုင်းတွေ၊ ဒေသတွင်းမိတ်ဖက်အဖွဲ့အစည်းနိုင်ငံတွေနဲ့အမေရိကန်တို့ပါဝင်မယ်လို့ သိရပါတယ်။ ဒါပေမယ့် ဒါက ကြာရှည်ညှိနှိုင်းရပြီး ရှုပ်ထွေးတဲ့လုပ်ငန်းစဉ်တစ်ရပ်လို့လည်း ဂယ်လန့်က ပြောခဲ့ပါတယ်။ Ref .Times of Israel #Israel #Hizbullah #အစ္စလာမ္မစ်အစွန်းရောက် #lebanon #စစ်ပွဲ #ငြိမ်းချမ်းရေး #mtnews