إِيـمَان :)

من كام سنة كدا كان نفسي اشتري حاجة ولكنها غالية جدا فقعدت فترة طويلة اجمع الفلوس ويوم ما اتجمعت في شيء تاني باظ وكان قدامي يا اجيب اللي نفسي فيه يا أصلح اللي باظ، فقررت أعمل قرعة واللي يطلع راضية بيه في كل مرة يطلع إني أصلح الشيء اللي باظ، ولكن أصلا الشيء ده منفعش معاه يتصلح وباظ أكتر والفلوس ضاعت في ولا حاجة وساعتها كنت محتاجة أعرف ليه حصل كدا! بعدها بفترة بغير حول ولا قوة الشيء باظ جه مكانه جديد وأفضل وأحسن منه بمراحل وبدون ما ادفع جنيه، وفي نفس الفترة الشيء اللي كان نفسي فيه جالي الأحدث منها وأفضل منها وبرخص التراب والله. اليومين دول حصل معي نفس الأمر من فترة كنت محتاجة أقدم في دورة ما وقدمت فعلا ومتقبلتش وبعدها بسنة قدمت تاني واتقبلت للاختبار ولكن ظروفي وقتها مكنتش تسمح إني أروح.. فظهرلي لي من فترة مكان تاني بيقدم نفس الخدمات بالظبط والحمد لله اتقبلت ولاقيت إن المكان الأول لو كنت دخلت الاختبار مكنتش هعدي وإنه في صرامة شديدة جدا غير المكان التاني في بعض المرونة بل إنه الناس اللي كانت في المكان الأول انتقلوا للمكان التاني مع مميزات كتيرة.. في كل مرة تحصل حاجة عكس توقعاتك متقولش ليه وسلم أمرك لله ملكه يفعل ما يشاء ومش لازم نعرف الحكمة هو يعلم ما يفعل ولا يسأل عنه. ﴿كُتِبَ عَلَيكُمُ القِتالُ وَهُوَ كُرهٌ لَكُم وَعَسى أَن تَكرَهوا شَيئًا وَهُوَ خَيرٌ لَكُم وَعَسى أَن تُحِبّوا شَيئًا وَهُوَ شَرٌّ لَكُم وَاللَّهُ يَعلَمُ وَأَنتُم لا تَعلَمونَ﴾ #اللهم_اغفر_لأمي