🌏 Nu'mon Nasrullayev | Blog

Karvonsaroyga keldingizmi yoki kursga! Har bir daraja guruhlarimda tartib oddiy: imtihonga kelmagan yoki imtihondan o‘ta olmagan o‘quvchilar guruhdan chiqariladi. Bu jazolash emas, kurs tartibi. Odatda ularga qaysi darajada to‘xtagan bo‘lsa, o‘sha darajani qayta o‘qish tavsiya qilinadi. Lekin hech kim majburlanmaydi — qayta o‘qish ham, boshqa yo‘l tanlash ham o‘quvchining o‘z qarori. Yaqinda shunday holat bo‘ldi: imtihonga kelmagan o‘quvchilardan biri xafa bo‘libdi. Admin uning profilini menga pin qilib qo‘ygan ekan. Men javob yozishga ulgurmasimdan profil ham, yozishmalar ham “bug‘ bo‘lib" uchib ketibdi. Balki hammasini o‘chirib chiqib ketgandir, balki internet olamining sirli yo‘llariga kirib ketgandir. Yaxshi niyatda, "Balki telegramda muammo chiqqandir" - deb o‘yladim. Lekin bir narsa aniq: o‘quvchi mendan xafa bo‘lgan. Endi masalaning boshqa tomoniga qaraylik. Har bir yangi guruh darsini boshlashdan oldin kursning barcha shartlarini batafsil tushuntiraman. Muddatlar, imtihon, davomat, talablar — hammasi oldindan aytiladi. Hatto har bir o‘quvchidan alohida so‘rayman: “Shartlar sizga ma’qulmi, davom etasizmi?” - deb. Doim aytadigan gapim ham shu: “Agar kurs talablari va mening uslubim sizga mos bo‘lsa, qoling va davom eting. Mos bo‘lmasa, hozirdanoq qaror qiling.” Bu qo‘pollik emas, aniqlik. Chunki bir guruhda 10–15 ta o‘quvchi bo‘lsa va har kimning o‘z talablari bo‘lsa, bu kurs bo‘lmay qoladi. Dars jadvali emas, pivaxona menyusiga aylanib ketadi. O‘qituvchi ham robot emas: u ham reja, tartib va natija bilan ishlaydi. Masalan, biri: “Ustoz, imtihonga bormadim, lekin meni kutib turing” - deydi. Boshqasi: “Men topshiriq qilolmadim, keyingi oy topshiraman” - deydi. Yana biri: “Men darsni ko‘rmaganman, lekin keyingi darajaga o‘tsam bo‘ladimi?” - deydi. Shunday davom etsa, A1 guruhi bir kun kelib A1 emas, “A1 qachon tayyor bo‘lsa, o‘shanda imtihon topshiraman” guruhiga aylanadi. 😄 Unday o'ylab yurganlar ana 4 yildan beri shunday deb sudralib yuribdi. Xulosa shuki: agar kursning shartlari boshidan aniq aytilgan, siz ularni eshitib, tushunib, davom etishga rozi bo‘lgan bo‘lsangiz, o‘sha tartiblarga amal qilish kerak. Agar shartlar sizga to‘g‘ri kelmasa, ketish ham mumkin — bunda hech kimni majburlash yo‘q. Ammo onlayn jonli kurs “belgilangan muddat o‘tib ketsa ham, xohlagan paytimda xohlagan tartibda davom etaman” degani emas. Jonli kursda muddat ham bor, mas’uliyat ham bor, imtihon ham bor. Boshqa kurslarda qanday tartib bo‘lishi mumkin — bilmayman va rostini aytsam, menga qiziq ham emas. Har kim o‘z kursi, o‘z qoidasi va o‘z natijasi uchun javobgar. Men esa o‘z darsim, o‘z guruhim va o‘z tizimim uchun javobgarman. Aytgancha, hali ikkinchi toifa o‘quvchilar ham bor: “Ustoz, men aslida juda xohlayman, faqat boshlashga vaqt topolmayapman” deganlar. Yoki boshlab, keyin daftar bir chetda, kitob bir chetda, topshiriqlar esa “ammasini uyi mehmonga ketgan” bo‘ladi. Ular haqida ham shunday zo‘r gaplarim bor, alohida yozaymi? 😄 Xo'sh siz qaysi bir toifaga kirasiz? 😂 @NumonNasrullayev