ARLO*አርሎ - ከእራስ ጋር ጨዋታ

ደራሲና ገጣሚ ከፈለኝ ዘለለው የ "ጥበብ ከተማ" ተብላ በምትታወቀው "ቀጨኔ" ውስጥ በ 1969 ዓ.ም ተወለደ። የመጀመሪያ ደረጃ ትምህርቱን በ "ቀጨኔ ደብረ ሰላም" ፤ የሁለተኛ ደረጃ ትምህርቱን ደግሞ "እቴጌ መነን" ት/ቤት አጠናቋል። ከጥበብ ጋር የተገናኘ ትምህርቱን ብዙ ስመ - ጥር ጥበበኞችን ባፈለቀው "ሆሊ ላንድ አርት አካዳሚ" ውስጥ ተምሮ "በአፃፃፍ ፣ በትወና እና በመድረክ ዝግጅት" ተመርቋል። ደራሲና ገጣሚ ከፈለኝ ዘለለው የበርካቶችን አዕምሮ በገንቢ ሀሳቦች በማነፅ የሚታወቀው የ "ሐዋዝ በጎ ሀሳብ ማጋሪያ ማዕድ" ዋና አዘጋጅ መሆኑም ይታወቃል። በ 1995 ዓ.ም "የሻማ ብርሃን ፩" ፤ በ 2004 ዓ.ም "አገልፋኖ" ፤ በ 2007 ዓ.ም "አሞዛ" ፤ በ 2014 ዓ.ም መጀመሪያ "ሐዋዝ" እና በ 2014 ዓ.ም መጨረሻ "የሻማ ብርሃን ፪" የተሰኙ አምስት አትጊ መፅሐፍትን አሳትሞ ለአንባብያን አበርክቷል። መፅሐፍቶቹም አፍሮ ሪድ (AfroRead) በተሰኘ የሞባይል መተግበሪያ አማካኝነት በዓለም አቀፍ ገበያ በ E- book እና Audio Book ለሽያጭ በቅተውለታል፡፡ "ሐዋዝ" የግዕዝ ቃል ሲሆን ፤ ትርጓሜውም "የሚያምር" ፣ "ደስ የሚል" ፣ "መልካም" እና "ቆንጆ" የሚል ነው፡፡ ይህንን ውብ ኢትዮጵያዊ ቃል የ "ዩቲዩብ ቻናላችን" መጠሪያ ስም አድርገን የተጠቀምንበት ዋና ምክንያት ፤ በዩቲዩብ ቻናላችን ላይ የሚለቀቁ ሀሳቦች ሁሉ ፤ ከመዝናኛነት በዘለለ … ደስ የሚሉ ፣ የሚያምሩ ፣ እንዲሁም የሰው ልጆችን አዕምሮ ፤ በበጎ ሊያንፁ የሚችሉ ፤ ቅንና ጠቃሚ ጭብጦች የሚተላለፉበት ዩቲዩብ ቻናል እንደሚሆን ፍፁም በመተማመን ነው፡፡

ዛፍ … ከገዛ ራሱ ላይ እየተገነጠሉ … የመጥረቢያ እጀታ በመሆን እየቆረጡና እየፈለጡ ሕልውናውን አደጋ ላይ በጣሉበት የራሱ ቅርንጫፎች አምርሮ አዝኗል። ነገሩ ራስ አይወቀስ ራስ አይከሰስ እንዲሉት ዓይነት ነው! በዛፍ ውድቀተ ዘመን … አዛኝ ቅቤ አንጓቾች ተሰብስበው ዛፍ ሆዬ ተቆርጦ ከወደቀበት ሥፍራ ይከሰቱና ... "እንደው ምን በድለህ... ምንስ አስቀይመህ ይሆን ይህን ሁሉ ጉዳት ያደረሱብህ!... ድንቅ እኮ ነው! አንተ ጥላ ሰጪ እንጂ ጠላት አይደለህ... ምን አድርግ ብሎ ነው ..."ብረት" ተብዬ … ክፋትን ስንቅ አድርጎ በጭካኔው የዘመትብህ!? የትኛውንስ ነውር ነውረህ ነው የበደል ክንዱን ያሳረፈብህ!? ... አዬዬ እንዲህ የፍርድ አልባ ሀገር ነዋሪዎች ሆነን እንቅር! አይ ጊዜ! ይገርማል! ለማንኛውም … ሕመምህን ፈዋሽ በማጣት በደረሰብህን ሀዘን ከልብ አዝነናል፡፡ ተቆጭተናልም!! … አንተስ ግን እስከመቼ ነው የጠላቶችሁ ሎሌ ሆነህ የምትኖረው?! ማንስ ነው ችግርህን ችግሬ ብሎ ከተጨቋኝነት ነፃ የሚያወጣህ ነፃ አውጪ!? ተንቀሀል! እጅግ ተደፍረሀል እኮ! ምን እስክትሆን ነው ፍዘቱ! በል የወዳጅነት ምክራችንን ስማ! ከዛሬዋ ዕለት ጀምረህ… ጠላትህን እሹሩሩ ማለት አቁምና እንዴትም ብለህ አንድ የማያዳግም እርምጃ መውሰድ ጀምር!" ብለው የአጥፍተህ ጥፋ ወኔን በተረጋጋ መንፈሱ ውስጥ ዘሩበት። በዛፍ እሳትነት ላይ ነዳጃቸውን ረጩ፡፡ አጉል መካሪ ከእሳት ጨማሪ እንዲሉት አይደል። ዛፍ ... በመካሪዎቹ የአስተሳሰብ ድንዛት ተናደደ! ... በእይታ ጥበታቸው ተነካ!... በገረጀፈ ዕውቀታቸው አፈረ!..."ኑ ብሉ ሳልላችሁ ወጥ አውጣልን ማለታችሁ አሳፍሮኛል! እባካችሁ ካላስቀየምኳችሁ … ያለ ዕውቀት ... ጥልቀት በሌለው ሀቅ ማንንም አትምከሩ! ያለ ጥበብ ... በባዶ ሕሊና ማንም ላይ አትፍረዱ! ያለ እውነት ... በጃጀ ብልሀት አትስበኩ! አጥፊነት የድንቁርና ውጤት ነው። ከድንቁርና ሳትርቁ ለማስተላለቅ አትራቀቁ! የእኔ ... የ "ዛፍ" ጠላት "ብረት" አይደለም። የእኔ ጠላት ...የእኔው የገዛ የራሴ ጠማማነት ነው። የሩቅ ጠላት የለኝም። ደግሞስ የውስጥ ጠላት ከሌለ የውጭ ጠላት እንደማይጎዳ አታውቁምን!? አዎን የእኔ ቆራጭና ፈላጭ የራሴው አካል ነውና ለእኔ መውደቅ ሌላውን ያለሀጢያቱ አትኮንኑ" ሲል ቁጣን በተሸከመ ሀይለ ቃል መልስ ሰጣቸው። … እውነቱን እኮ ነው ዛፍ ... ወንፊት የራሷን በርካታ ቀዳዶች ሳትደፍን መርፌ ባለባት አንዲት ቀዳዳ ብትናደድ ምን ይሉታል!? ራስን ሳይገሩ ሌላን መምከሩስ ነገሩን ማምረር አይሆንምን!? ቀጠለ ዛፍ... "እናም የእኔን እከክ እኔው እንዳከው ተዉኝ! ሕመሜን ፈዋሽ እንጂ ቁስሌን አባባሽ አልፈልግም። ለራሴ ችግር የራሴን መፍትሔ እሻለታለሁ።" ብሎ በእፎይታ ተነፈሰ። ይኸው ነው እንግዲህ ... ልክ እንደዛፉ የራሱን ችግር ከመረዳት የተነሳ ሰው ቢቸገርም ለችግሩ መፍትሔ አያጣም። ችግራችን መቸገራችን ሳይሆን የችግራችንን ምንጭ በውል አለማወቃችን ነው። ብናውቅም አውቆ አላዋቂነታችን አጠፋፍቶናል! ሰዎች በጫሩን ቁጥር ተቃጥለን የምናቃጥል ከሆነ ታሪካችንን ሁሉ በዜሮ እያባዛን የዜሮነት ዘመን ላይ በዜሮነት መኖር የሁላችንም ዕጣ ፈንታ ይሆናል። ለዛፉ መቆረጥና መውደቅ የዛፉ ጠማማ ቅርንጫፎች የመጥረቢያው እጀታ በመሆን ግዙፍ ትብብር ለግሰዋል። የመጥረቢያ ብረት... ያለዛፉ እንጨት ... ቆርጦ የመጣል አቅም ኖሮት አያውቅም። ያስቸገረን የእኛው ጠማማ ነውና የመፍትሔ ውሳኔአችንን ጠማማችንን ከማቅናት ስንጀምር በሁካታ ሳይሆን በእፎይታ መኖር ከባድ አይሆንብንም። በእኛው የክብሪት እሳት እየነደደች ያለች ቤታችን የእኛኑ ማጥፊያ ውሃ ትሻለች። ክብሪቱን የጫረ እጅ … ውሃን መቅዳት እንደማይሰንፍ አምናለሁ። "ሐዋዝ" የግዕዝ ቃል ሲሆን ፤ ትርጓሜውም "የሚያምር" ፣ "ደስ የሚል" ፣ "መልካም" እና "ቆንጆ" የሚል ነው፡፡ ይህንን ውብ ኢትዮጵያዊ ቃል የ "ዩቲዩብ ቻናላችን" መጠሪያ ስም አድርገን የተጠቀምንበት ዋና ምክንያት ፤ በዩቲዩብ ቻናላችን ላይ የሚለቀቁ ሀሳቦች ሁሉ ፤ ከመዝናኛነት በዘለለ … ደስ የሚሉ ፣ የሚያምሩ ፣ እንዲሁም የሰው ልጆችን አዕምሮ ፤ በበጎ ሊያንፁ የሚችሉ ፤ ቅንና ጠቃሚ ጭብጦች የሚተላለፉበት ዩቲዩብ ቻናል እንደሚሆን ፍፁም በመተማመን ነው፡፡