فێرگەی بەیان{لقی سەردەشت}

#مامۆستا_حەسەن_زیرەک #نەورۆز @FergeyZkurdi

مزگێنی دا بە سروە بای بەهاری وا هاتەوە نەورۆزی کوردەواری #مامۆستا_هەژار هاوڕێیان و ئەندامانی هێژا ساڵی نوێ و نەورۆزی نوێ‌بوونەوەتان پیرۆز بێت🌹 @FergeyZkurdi

‌‌✅ پەیامی بەرپرسی گشتیی ناوەندی فەرهەنگی و فێرکاریی بەیان، بە بۆنەی ڕۆژی جیهانیی زمانی زگماکی 📃 زمان بەرزترین ئاڵایە کە لەسەر لووتکەی فەرهەنگی هەر نەتەوەیەک دەشەکێتەوە و هێمای ناسایەتیی(هویت) هەر گەلێکە کە بە گەوهەری ڕەسەنایەتی و پێناسەی خۆی دەنازێ. زمان دیاردەیەکی ناوازەیە کە ڕەوتی گەشەی مرۆڤ لە کۆمەڵگا، بە هۆی ئەوەوە لە نەوەیەک بۆ نەوەی داهاتوو ڕادەگوێزرێ. زمان کلیلی تۆڕە پێوەندییەکان و سەرمایەی فەرهەنگیی هەر نەتەوەیەکە، کە تاکەکان بە هۆی ئەوەوە دەتوانن جگە لە پێوەندیی کۆمەڵایەتی، جۆرێک ناسایەتی و پێناسەی تایبەتی بە دەست بێنن. کە وایە بوون و ناسنامەی هەر تاکێک لە ئاستی ئەتنیکی و نەتەوەیی، بەستراوەتەوە بەو زمانەی کە فێری دەبێ. کاتێک لە پاراستن، گەشە و بەهێزی فەرهەنگی کۆمەڵگایەک قسە دەکرێ؛ زمانیش وەکوو فاکتەرێکی بنەڕەتی دێتە ئاراوە. چونکێ زمان وەکوو پردێک وایە کە فەرهەنگی ڕابردوو، ئێستا و داهاتوو پێکەوە گرێ دەدا. هەروەها زمان زایەڵەی فەرهەنگی نەتەوەیەکە کە بەو زمانە دەدوێن و قسە دەکەن. دیاردەیەکە کە وەکوو بوونەوەرێک لەگەڵ خەڵکی کۆمەڵگای خۆی دەژی، دەگۆڕێ، گەشە دەستێنێ، بە خۆ دەنازێ و تەنانەت هەندێجار دەشمرێ. مردنی هەر زمانێک بە واتای مردنی بەشێک لە فەرهەنگ و کولتووری مرۆڤایەتییە. مردنی هەر زمانێک خەسارێکە بۆ ژیار و شارستانییەت و دەسکەوتەکانی مرۆڤ. بۆ ئێمەی کورد، وەکوو بەشێک لە کۆمەڵگای مرۆڤایەتی و خاوەن ژیار و شارستانییەت، زمان فاکتەرێکی گرینگ و چارەنووسسازە لە فەرهەنگ و ناسنامەی نەتەوەییمان. لە ڕاستیدا زمان تەنیا چەکی مانەوە و پارێزگاری لە کەرامەت و ناسایەتیمانە. زمانی کوردی تەنیا هۆی بوون و درێژەبەژیان و بەردەوامیمانە. هەرچەند لە درێژاییی مێژووەوە تا ئێستا ئەوە زمانەکەمانە کە ئێمەی پاراستووە و پێشی قەڵاچۆبوونمانی گرتووە. بەڵام بەداخەوە ئێمەی کورد(بە هەر هۆیەک…) کەمتر لە بەشەکانی دیکە بایەخمان پێ داوە و کەمتر خۆمان لێی بە خاوەن زانیوە. کەمتر هەستمان بە بەرپرسایەتی کردووە و کەمتریش پاراستوومانە. بە جۆرێک کە ئەمڕۆ زمانی کوردی لەگەڵ قەیرانێکی گەورە دەستبەیەخەیە و شەڕی مان و نەمان. پێویستە لەمڕۆوە هەموومان، هەر تاکێکێ کورد، خۆمان بە بەرپرس بزانین و وەکوو ئەرکێکی نەتەوایەتی بۆ مانەوە و پاراستن و گەشەی زیاتری تێ بکۆشین. بۆ بەجێگەیاندنی ئەم ئەرکە گرینگە، گرینگترین و پێویستترین کار ئەوەیە، بە زووترن کات، هەموومان دەست بکەین بە خوێندن و نووسین بە زمانی کوردی و شۆڕشێکی زمانی هەڵگیرسێنین. هەروەها پسپۆڕان و زمانەوانانی کوردیش هەڵمەتی شوتنەوە و خاوێنکردنەوەی زمانەکەمان لە وشە و دەستەواژە بیانییەکان، دەست پێ بکەن و ئەرکی ڕێبەرایەتیی شۆڕشەکە بە ئەستۆ بگرن. لە بیرمان نەچێ ئەم زمان پیرۆزە میراتی پڕبایەخی مێژوو و باب و باپیرانمانە. ئەوان بە خوێن و گیان(بەبێ خوێندەواری) پاراستیان و بێ کەموکووڕی بە ئێمەیان گەیاند. پێویستە ئێمەی(خوێندەواریش؟؟) شان بدەینە بەر ئەم ئەرکە و ئەو ئەمانەتە پیرۆزە بێ کەموکووڕی بە نەوەی داهاتوو بگەیەنین. “پیرۆز بێ ۲ی ڕەشەمە، ڕۆژی جیهانیی زمانی زگماکی” وێڕای ڕێز و سپاس بەرپرسی گشتیی ناوەندی فەرهەنگی و فێرکاریی بەیان ئەمیر پیادە ڕێکەوتی: ۲ی ڕەشەمەی ۲۷۲۰ 📎 https://www.fzkbeyan.com/?p=991 🆔 @fzkbeyan

telegra.ph/کورتەیەک-لە-ژیاننامەی-مامۆستا-هەژار-02-20 ــــــــــــــــــــــــــــــــــــــــــــــــــــــــــــــــــــ ✅ کورتەیەک لە ژیاننامەی مامۆستا هەژار 📚 سەرچاوە: بەشێک لە کتێبی هەژار لە لووتکەدا، فەرەیدوون حەکیم‌زادە، نەشری ڕاژە، ۱۳۹۹ ❇️ #ژیاننامە #مامۆستا_هەژار #هەژار #هەژار_موکریانی 🆔 @fzkbeyan

ئەمڕۆ، ۲ی ڕەشەمە، ڕێکەوتە لەگەڵ ساڵیادی کۆچی دواییی شاعیر و نووسەر و وەرگێڕی گەورەی نەتەوەکەمان، هەرگیز نەمر مامۆستا عەبدوڕڕەحمان شەڕەفکەندی ناسراو بە "هەژار موکریانی" ڕۆحی بەرزی شاد و یاد و ناوی بۆ هەمیشە لە دڵی نەتەوەکەیدا بە بەرزی دەمێنێتەوە. 🆔 @fzkbeyan

کوردینووسانی کوردی شێوێن ! لە ڕۆژهەڵاتی کوردستان، خوێندەواران بۆ فێربوونی خوێندنەوە و نووسین بە زمانی گەلەکەیان یا هەر تێناکۆشن و هۆگر نین و پێیان دواکەوتووییە، یا بەشێک لە هۆگرانی فێربوونی زمانی کوردی لەو فێرگانەی لە لایەن هێندێک خەمخۆرانی زمانی کوردی دانراون، فێر بوون یا زۆر کەسیش هەن بە خوێندنەوەی بابەتەکانی وەک شێعر و چیرۆک، ڕەمەکی و بە بێ ئەوەی زانیاریان لە ڕێنووس و ڕێزمان هەبێ فێری کوردی بوون. چونکە لە باشووری کوردستان زیاتر لە نیو سەدەیە و لەو ماوەشدا سی ساڵە دەستەڵاتی کورد هەیە بە زمانی کوردی دەخوێنن و دەنووسن، کوردی پارچەکانی دیکە وا دەزانن لە باشوور ئەوەندە بە زمانەکەیان ڕاگەیشتوون، هەرچی باشوورییەکان بیڵێن و بینووسن کوردییەکی پەتی و بێ هەڵە و پەڵەیە. بەڵام بەداخەوە لە باشوور نە تەنیا زمانی کوردی نەگەشاوەتەوە، بەڵکوو زۆر کەمن ئەوانەی تەنانەت مامۆستای زانکۆی بەشی وانەی کوردی لە سەرەتایی هەتا دواناوەندین، ڕێنووس و ڕێزمانی کوردی دە قسە و نووسینەکانیاندا بە کاربەرن و موبایلی هەمووانیان چاو لێکەی، دوو کەس لە تختەکلیلی کوردی کەڵک وەرناگرن. ئەگەرچی شاعیران و نووسەرانی دڵسۆزیان زۆرن، بەڵام لە فەزای مەجازیدا کەمیان لە نووسراوەکاندا وەک کوردیزان و کوردینووسێک ڕەچاوی یاساکانی زمانی کوردی دەکەن. لە ڕۆژهەڵات ڕابوونێکی گەورەی زمان و ئەدەبیاتی کوردی وەڕێ کەوتووە، ئەوانەی خەریکن و تەمای خزمەتیان هەیە بوونە سێ قۆڵ. یەکەم، به وردی و بە ڕەنجێکی زۆر تێدەکۆشن و دەخوێننەوە و توێژینەوە و لێکۆڵینەوە دەکەن و لەگەڵ کەسانی زاناتر لە خۆیان هەڵسوکەوت دەکەن و لە کۆڕ و کۆمەڵی ئەدەبیدا ئەندام و بەشدارن و بە پێی هەلومەرج چالاکی و تێکۆشانیان هەیە، زۆرن ئەو کەسانەی وەک نووسەر و شاعیر و توێژەری ئەدەبی و کۆمەڵایەتی و مێژوویی، هەر حەوتووی لە شارێک پەردە لەسەر کتێبەکانیان لادەدرێ و بوونە ئەستوونی میچی ئەدەبیاتی کوردی. بەڵام کەسانێک هەن، بە خوێندنەوەی چەند کتێب و بابەتێکی کوردی و هێندێک خوێندنی زمانی فارسی، لەنێوان فارسی نووسی و کوردی نووسیدا گیریان کردووە و نە فارسی چاک دەزانن و نە کوردی نووسیش فێر بوون و ئەگەر منداڵانیان و هاوڕێ و خزمان باسی فارسی بکەن، ئەوان لێیان دەبنە سەعدی شیرازی و هاڕەش لەبڕەی ناکەنەوە و ئەگەر باسی کوردیش بکرێ، وتەیەکی باڵوڵ یا مەلای مەزبوورە بە نێوی مامۆستا هەژار و مامۆستا هێمن وەک تۆپەڵە قوڕ بەنێوچاوانی بەردەنگەکانیان دادەن. هێندێک کەسیش یا زۆر جوان کوردی نووسی دەزانن و یا هەن بە ڕادەیەک دەزانن کە نانی پێ پەیدا کەن و بۆ بەرژەوەندی تاکەکەسی و گروهی وەک بانگەوازی ئابووری و پیشەیی بەکار دێنن و تەنیا مەبەستیان ئەوەیە بە کەڵکوەرگرتن لە وشە و ڕستە و شێعر و بابەتێکی کوردی سه‌رنجی بەرامبەرەکەیان ڕاکێشن و لە ڕێنووس و ڕێزماندا چەندە هەڵەیان هەیە، وەبەر چاوی ناگرن و وشە و ڕستەکان بە هەڵەش دەیان جار کاوێژ بکرێنەوە کێشەی نییە و مەبەستیان پێکاوە و با زمان هەر بشێوێندرێ...! بەڵام سەرەکیترین شێوێنەرانی زمانی کوردی، سێ تاقمن: یەکەم، ئەو کەسانەی خۆ بە زانا و زمانزانی کوردی دەزانن و بە نێوی سەیر و سەمەرە دەیان گرووه‍ و کاناڵی بە نێو ئەدەبی و زمانەوانی و کولتووری و مۆسیقی ساز دەکەن و لە سەت بابەت، بابەتێکیان مەرجەکانی هەبوونی ڕەسەنایەتی زمانی تێدا نییە و زۆرتریش لاسایی و فۆروارد (ڕاگواستن)ە و لە پەنا ئەو هەڵە و نەزانینەشدا، زاراوە یا نەریت و کولتووری شوێنێکی کوردەواریش دەدەنە بەر گاڵتە و گەپجاڕی. تاقمی دووهەم، ئەو کەسانەن کە خۆ بە پسپۆڕ‌ و زمانزانی کوردی دەزانن و بۆ خۆنواندن یا بۆ بەرژەوەندی گیرفان و نێوبانگ بۆ فیلم و پیشەکان، بابەتگەلی زمانەکانی دیکە وەردەگێڕنەوە سەر زمانی کوردی و نموونەش زۆرتر دۆبلاژی زنجیرە دراماکانی تورکی و فارسی و هیندین کە تەلەفزوێنە کوردییەکان بڵاوی دەکەنەوە. تاقمی سێهەم، ئەو کەسانەن لە کاناڵە هەواڵدەرییەکانی مەجازی بە دەیان نێوی سەیر وەک، فڵان شار ڕووداو، فڵان جێ هەواڵ و فڵان جێ نیوز، ئەو تاقمە زمانشێوێنترینن بەو هۆیە کە زۆربەی خەڵکی خوێندەوار کە موبایلێکی سەفحە ڕەنگی و ئینتڕنێتی هەبێ، لانیکەم یەک یا چەند کاناڵی مەجازی هەواڵنێری لە موبایلەکەی دایە و ڕۆژانە دەیان جار سه‌رنجی دەداتێ و زۆر لە وشەکان چەند پات دەبنەوە و دەبنە وشەیەکی ڕەسەن لە مێشک و هزری خوێنەردا، ئەو کاناڵە هەواڵنێرییە مەجازیانەش هەواڵی یەکتر ڕادەگوێزن، هەڵەکان ناسڕێنەوە و وادەزانن زمانی کوردی باشوور، ڕەسەن و بێ عەیبە، هەروەک ئەوان بەجێی فەرماندار دەنووسن "قایمقایم" و بە جێی ئوستاندار، پارێزگار کە تەرجەمەی "محافظه"ی عەڕەبیە کاوێژ دەکەنەوە و کاناڵە مەجازیەکان خەریکن زمانی کوردی پێ لە گرێژەنە دەبەن و کەسیش دەنگی لەبەر نایەت. ✍ حاجی عەبدوڵڵا حەمزە سەردەشت، گەلاوێژی 99 T.me/FergeyZkurdi

کوردم بە شەقامی ڕێزدا دەڕۆم ئەویندارانی زمان و وێژە و ئەدەبی کوردی، ئەی هەموو ئەو کەسانەی دۆستی فەرهەنگی ڕاستەقینە و گراوی ئەلفوبێی ڕێز و خۆشەویستین، زۆر لەمێژە خوتخوتەی نووسینی مژارێک لەسەر فەرهەنگی بانگکردن و وەڵامدانەوەم لە دڵدا دێت و دەچێ. ئەو بەشە لە ئاخاوتن بەشی هەرە زۆری گفتوگۆی ڕۆژانەی ئێمەیە و نکوڵی لێ ناکرێ. بەڵێ، هەموو نەتەوەیەک بنەمایەکی تایبەتی فەرمی و نافەرمی بۆ ئەو بەشە هەیە و لەلای خۆیان و نەتەوەکانی دیکەش دەبێ ڕێزی لێ بگیرێ. ئێمەی کوردیش بنەمایەکی تایبەتیمان هەیە و نابێ وەپشتگوێ بخرێ، چونکە ڕیشەی زانستی، فکری و ئەخلاقی لەو جۆرە ئاخاوتنانەدا بەدی دەکرێ. کاتێک دەڵێین فەرهەنگ، واتا لایەنی باش و قەبووڵکراوی هەموو کردەوەیەکی مرۆڤانەی جوان. چاکوچۆنی، بانگکردن و وەڵامدانەوەش بەشێکن لەو شتە جوان و قەبووڵکراوانە. بێگومان ڕووی جوانی ئەدەب، لە ئاخاوتندا چاکتر دەردەکەوێ، چونکە کەسێک قسە نەکا، ناسینی ئاستەمە؛ بەڵام کاتێک وەقسە دێت، ئەوە ڕووی ئەدەبی، زانستی و مرۆڤانەی زۆر جوان ئاشکرا دەبێ. ئەوەی زمانشڕە و قسەی نەشیاو و ناحەز دەکا، دیارە زنەی ئەدەبی لاوازە و ڕەنگە وردە وردە خەڵک لێی بتەکێنەوە و لە دوایشدا دەبێزرێ. هەموومان ئەو وشانە دەزانین و دەناسین: کاک، دێد، خوشک، برا، ڕۆڵە، گیانە، بەڵێ، نەخێر، مام، پوور، بەڕێز، خاتوون، باجی، مامە، خاڵە، هێژا و... . یان هێندێک وشەی پەیوەندیدار لەگەڵ کاری هێندێک کەس وەک وەستا، دکتۆر، ئەندازیار، مامۆستا، مەلا و... . هەروەها هێندێک دەستەواژە وەک: سڵاوت لێ بێت، بەیانیت باش، دەم باش، کات باش، ئێوارە باش، ماڵاوا، خوات لەگەڵ، ژیانت باش، شەوت ئارام، شەوت باش و... . ئەو وشە و دەستەواژانە هێندێکیان دەلکێندرێن و هێندێکیش بە تەنیا کاریان پێ دەکرێ و هەر هەموویان ڕێز، حورمەت، پەیوەندی، خۆشەویستی و میهرەبانی زۆر دەکەن، بەڵام کەمتر دەبیسرێن و دیارە لەگەڵ کەملوتفی خەڵک ڕووبەڕوو دەبنەوە، ئەگەر کەڵکیان لێ وەرنەگیرێ بێ ئەوەی هەست پێ بکەین، جێگەیان بە دەستەواژەی ساز کراو و بێگانە دەگۆڕنەوە. لێرەدا دەمهەوێ بڵێم ئەو وشانە لەخۆڕا نەهاتوون، ئەگەر هەن بۆ لە جێگای خۆیان کاریان پێ ناکرێ؟ یان بۆ دەبێ هێندێک وشەی نەشیاو و نابەراو کە نیشانەی ئەدەبییان پێوە دیار نییە، ببنە جێنشینی ئەوان؟ لەگەڵ ڕێزم بۆ زاراوە جیاوازەکانی هێندێک ناوچەی کوردستان، زۆر جار دەبیسین کەسێک بانگ دێڵێ: کا ساڵە؟ کا ڕەسوو؟ بەڕێزان، بیرتان لێ نەکردۆتەوە (کا)، وردکرا و ئەنجنەراوی کڵۆشی گەنم و جۆیە؟ یان ساڵە دەبێتە پاشگری تەمەن وەک دوو ساڵە، سێ ساڵە و...!؟ دروستی ئەو بانگکردنە (کاک ساڵح)ە. کاک واتا برا و لە جێگای برا، (ساڵح)یش، ناوی کەسەکەیە و واتا کەسێکی خوایی. لێرەدا دەردەکەوێ چەندە جیاوازی هەیە لە ناو ئەو دوو جۆرە بانگکردنە. بانگکردن و وڵامدانەوە ڕاستە بۆ ئاگادارکردنەوەیە، بەڵام دروستگوتنەکەی، ڕیشەی پەروەردەیی و ئەخلاقی و هێژایی پێوە دیارە، کاتێک دایک بانگی منداڵەکەی دەکا دەڵێ: ڕۆڵە گیان! منداڵەکەش وڵامی دەداتەوە: بەڵێ دایە گیان! لێرەدا پەیوەندییەکی قووڵی خۆشەویستی و ڕێز ساز دەبێ و ئەو منداڵەش هەست بە ئۆقرەیی دەکات و بۆشایی خۆشەویستی لە ناخیدا ساز نابێ. با سەرنج بدەینە وشەی (مامۆستا): مامۆستا واتا ئەو کەسەی زانا و لێزانە لە بوارێکی پەروەردەیی و فێرکاری، قوتابی و خوێندکاری هەیە و وانەیان فێر دەکا، بەڵام بەهەڵە پێی دەگوترێ (مامەستا) یان (مام وەستا)! وشەی مامەستا و مام وەستا واتای (مامۆستا) ناگەیێنن و وا باشترە دروستەکەی بڵێین. ڕەنگە لەناو هێندێک نەتەوە، فەرهەنگی جیاوازی بانگکردن و وڵامدانەوە بە جۆرێکی دیکە هەبێ، زۆربەمان دیومانە لەناو دراما و فیلمە سینەماییەکاندا ناوی وەک (جەک، بێل، ڕاکی) و... بێ پێشگر و پاشگری ڕێز دەگوترێن، دیومانە مندالێکی بچووک بانگی بەساڵاچوویەک دەکا، هەر بە ناوی بچووک بانگی دەکا، ئەو جۆرە دوانە بۆ ئەوان ئاساییە و ئێمە نابێ لاسایی ئەو فەرهەنگە بکەینەوە ئەگینا دۆڕاندوومانە. سەرنج بدەنە دەوڵەمەندی زمانی کوردی: خاتوو شەهێن، کاکە ڕێبوار، دایە گیان، خاڵە مەحموود، دێدە ڕابی، پوورە شەیدا، باجی سنوور و... . ئێمە بە درێژایی تەمەنی مرۆڤ و جێگە و پێگەی کەسەکان وشەی ڕێزمان هەیە. خۆ ناکرێ فەرهەنگی نابەرا و دوور لە ڕێز و خۆشەویستی بێگانە بکەینە باو و لە گفتوگۆی ڕۆژانە کاری پێ بکەین چونکە خەسارێکی گەورەیە لە زمان، بەڵام ئەرکی ئێمەی فەرهەنگی چییە؟ هاوەردە کردنی ئاکاری جوان و بەکەڵک، هەناردەکردن و ناساندنی فەرهەنگی ڕەسەنی خۆمان، وەلانانی ئاکاری خراب و ڕاگرتن بۆ پەڕینەوە و بە مێژوو ئەسپاردنیان. لە کۆتاییدا ڕاستە ئەو بابەتە زیاتر هەڵدەگرێ، بەڵام بە کورتی دەڵێم: دەبا چیتر لە شەقامی کاڵفامی و نەزانی و بێ ڕێزیدا هەنگاو نەنێینەوە. ✍نووسینی: حەسەن ڕەوش ( پارێزەر‌) 🆔 T.me/FergeyZkurdi

✅ کلیپی تایبەتی کۆتاییی تاقیکاریی خولی چوارەمی ڕێنووسی کوردی لە شاری "جوانڕۆ" لەلایەن ناوەندی فەرهەنگی و فێرکاریی بەیـان ڕێکەوتی 30ی پووشپەڕی 2720ی کوردی. 🆔 @fboza

__سه‌رده‌شت له‌و کاته‌وه‌ تاکوو هه‌نووکه‌ له‌و په‌ڕى بێکه‌سیدا هه‌ناسه‌ى سواره‌ و برینه‌کانى ساڕێژ نه‌کراونه‌ته‌وه‌، به‌رکه‌وتوان له‌و کاته‌وه‌ تا هه‌نووکه‌ له‌ دۆخێکى زۆر ناله‌باردا ژیان به‌سه‌ر ده‌به‌ن، خه‌ڵکى ئه‌و شاره‌ هه‌موو ساڵیک هه‌وڵ ده‌ده‌ن که‌ یادى ئه‌و کاره‌ساته‌ به‌ شێوه‌یه‌ک بکه‌نه‌وه و ئه‌و رۆژه ڕەشه‌ی مێژوو بۆ هه‌میشه له یاده‌کان بهێڵنه‌وه. # جیهان بە کاتی سەردەشت # کیمیابارانی سەردەشت # سەردەشت 7#ی پووشپەڕ

کاتژمێرى (۴:۳۰)سه‌ر له‌ئێواره‌ى (۲۸)ى حوزه‌یرانى ساڵى (۱۹۸۷)ى زایینى، به‌رانبه‌ر به‌ (۷)ى پووشپه‌ڕى (۱۳۶۶)ى هه‌تاوى، هێزه‌ ئاسمانییه‌کانى ڕژیمى به‌عسی عێراق و فڕۆکه‌وانه‌کانى ئه‌و سوپایه‌، به‌ گازى کیمیاوى شارە جوانه‌که‌ی کوردستان (#سه‌رده‌شت)یان، له چوار لای قه‌ره‌باڵغی شار و گوندى ڕه‌شه‌ هه‌رمێیان به سێ گازی مێشک و ڕه‌وانی (تابون، سارین، سومان) و سیانوژه‌ن بۆردوومان کرد. به‌پێى ئاماره‌ سه‌ره‌تاییه‌کان له‌وکاته‌دا زیاتر له‌ (١١٠) که‌س به‌ گازى کیمیاوى گیانیان له ‌ده‌ست دا و زیاتر له‌ (٨) هه‌زار که‌سیش له پیر و لاو، ژن و منداڵ بریندار و ژه‌هراوى کران. شارى سه‌رده‌شت یه‌که‌مین شار بووه‌ له‌ جیهاندا که‌ تا ئه‌و کات بۆردوومانى کیمیایى کرابوو و زیاتری هۆکاره‌که‌ی ده‌گه‌ڕێته‌وه بۆ جه‌نگی ئێران و عێراق له‌و ناوچه‌یه و به‌شێک له‌ هۆکاره‌کانیشى بۆ کورد بوون و لە سنوور بوونی ئەوشارە.