رسائل دينيه

الشيطان مش هيجيلك يقولك اكفر! هو أذكى من كده بكتير.. ​هو هيدخلّك من باب السرحان في الصلاة، تأجيل التوبة، وتقليل حجم الذنوب الصغيرة. ​لو حسيت إنك مخنوق والذنوب زادت عليك، اعرف إن دي خطته عشان تستسلم وتقول "خلاص باظت". ​اقطع الحبل ده فوراً، واقترب من ربنا، وماتسمحش لعدوك إنه ينتصر عليك في أهم معركة في حياتك. ​قال تعالى يصف خطة إبليس: {ثُمَّ لَآتِيَنَّهُم مِّن بَيْنِ أَيْدِيهِمْ وَمِنْ خَلْفِهِمْ وَعَنْ أَيْمَانِهِمْ وَعَن شَمَائِلِهِمْ}. ​الحصار شديد .. لكن لازم تفتكر إن "فوقك" رب رحيم بيقبلك في أي وقت! ارفع إيدك وقوله "يا رب ماليش غيرك"، واكسر حصار عدوك بركعتين في جوف الليل. ​#احذر_عدوك #د_حازم_شومان #قواعد_المعركة_الأخيرة

(قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ) "يأمر الله رسوله أن يخبر عباده الذين أسرفوا وتجاوزوا الحد في المعاصي والكبائر أن لا يقنطوا من رحمة الله، مهما عظمت ذنوبهم وكثرت معاصيهم، فإن باب التوبة مفتوح، ورحمة الله أوسع وأعظم. يغفر الذنوب جميعًا لمن تاب منها، مهما بلغ جرمها." [تفسير السعدي]

ابنك عنده 13 سنة وزعلان أو بيعيط عشان شحن اللعبة خلص؟.. الموقف ده مش مجرد نكد طفولي، ده مؤشر لجيل كامل محتاجين نعيد توجيه اهتماماته. تعالوا نشوف القرآن بيعلّمنا إيه في المرحلة العمرية دي تقريبًا من خلال قصة سيدنا إسماعيل عليه السلام.. القرآن وهو بيحكي عن سيدنا إسماعيل ما ركّزش على فكرة اللهو، بل قال: 🕋 "فَلَمَّا بَلَغَ مَعَهُ السَّعْيَ..." يعني لما وصل لسنّ يقدر فيه يساعد أباه، بقى بيشاركه السعي والعمل، وبقى عون وسند له وهو لسه صغير. وعشان كده وُصف في القرآن بأنه "غلام حليم". سيدنا إبراهيم ما ربّاش ابن اتكالي، بل ربّى شاب صاحب مسؤولية وعلو همة من صغره. ولما جاء الابتلاء العظيم، وجد ابنه ثابت، يقول بيقين: "سَتَجِدُنِي إِنْ شَاءَ اللَّهُ مِنَ الصَّابِرِينَ". 👥 رسالة لكل أب وأم: أولادنا محتاجين أكتر من الأكل والشرب واللبس والموبايلات والشحن.. محتاجين تربية على المسؤولية، والأخلاق، ومعاني الدين من بدري. مش غلط إن ابنك يلعب، الغلط إن اللعبة تكون هي كل حياته وهمّه الوحيد. شاركوهم المسؤولية، وعلّموهم قيمة السعي، وازرعوا فيهم علو الهمة؛ عشان نطلع جيل واعي، يكون سند لنفسه، ولأهله، ولدينه. 👌 #تربية_الأبناء #علو_همة #د_حازم_شومان

السلام عليكم ورحمة الله وبركاته صباح الخير يا شباب طول ما أنت عايش في الدنيا طبيعي جدًا إنك تغلط.. لكن اللي مش طبيعي إنك ما تتعلمش من خطأك، أو إنك تكابر وتستمر عليه! أخطأت في حق الله عز وجل = اعترف بخطأك، واستغفر وتب وكمل طريقك له سبحانه. أخطأت في حق إنسان = اعترف بخطأك، وصالحه. أخطأت في حق نفسك = اعترف بخطأك، وداوي قلبك، وأصلح نفسك. ونصيحة! إوعى تكابر لما حد ينصحك وينبهك لخطأك.. دي نعمة من ربنا بعتهالك عشان تفوق وماتكملش في الغلط؛ فاحمد الله عليها وعالج خطأك. يقول النبي ﷺ: "المؤمِنَ خُلِقَ مُفَتَّنًا، توَّابًا، نَسِيًّا، إذا ذُكِّرَ ذكَرَ".

ويكتب اللهُ خيرًا أنت تجهلـهُ وظاهرُ الأمرِ حرمانٌ من النعـمِ ولو علمت مـراد الله من عِـوضٍ لقلتَ حمدًا إلـٰهي واسع الكرمِ فسلّم الأمرَ للرحمـٰن وارضَ بـهِ هو البصيرُ بحالِ العبد من ألمِ

اللهم اكتب اليسر لمن يعاني من العسر، والراحة لمن به هم، والسعادة للمحزون، والشفاء للمريض، والإجابة لكل من دعاك. >

عارف إيه اللي يسهّل عليك الدنيا كلها بتفاصيلها الكتير؟ إنك تفضل مركز على هدف واحد بس: الجنة. كل تعب، كل بلاء، كل صبر يهون لما تفتكر إن وراه جنّة عرضها السماوات والأرض. اللي مركز على هدفه وعارف هو عايز يوصل فين، وعارف انه طريقه بالرغم من صعوبته أخره الجنة مش هيتشتت أوي بتفاصيل الدنيا وهيصبر على الطريق ده. اسمع عن الجنة وعلق قلبك بيها وبنعيمها.

جاهزين يا شباب؟ 💪 ما تنسوش تتسحروا علشان تصوموا إن شاء الله.. صيام يوم عرفة ✨ تخيلوا.. صيام يوم واحد بيكفّر ذنوب سنتين (سنة فاتت وسنة جاية)! فرصة من كرم ربنا ما تتفوّتش. ✅ 💡 «تسحّروا فإن في السحور بركة».. جهّزوا دعواتكم، ولا تنسونا من صالح دعائكم 🤲🤍 #صيام_عرفة

"وصلنا ليوم عرفة" ساعات قليلة ويبدأ يوم عرفة بإذن الله.. يوم من أعظم أيام السنة.. ▪︎ لو مافيش عذر يمنعك من الصيام = اتسحري عشان تصومي وتاخدي الأجر العظيم اللي النبي ﷺ قالنا عليه: «صيامُ يومِ عَرفةَ إنّي أحْتسبُ على اللهِ أن يُكفّرَ السنَةَ التي بعدهُ، والسنةَ التي قبلهُ». ▪︎ لو مش هتقدري تصومي = ماتقلقيش أبواب طاعات كتير مفتوحة ليكي بفضل الله. ▪︎ نوّعي في الطاعات خلال اليوم بما يتناسب مع ظروفك = قراءة قرآن - ذِكر - دعاء. ▪︎ احرصي إنك تتصدقي خلال اليوم ولو بحاجة بسيطة جدًا. ▪︎ لو اليوم حسيتي إنه ابتدي يجري منك بسبب المسئوليات الكتير اللي عليكي = فعلّي فورًا خطة الطوارئ بإنك تركزي على الذِّكر، وعلى رأسه "لا إلهَ إلَّا اللهُ وَحْدَه لا شَريكَ له، له المُلكُ، وله الحَمدُ، وهو على كلِّ شيءٍ قَديرٌ". ▪︎ حاولي على الأقل تفصلي وتختلي بنفسك من العصر للمغرب، ولو ماقدرتيش يبقى حتى ساعة واحدة قبل المغرب ماتفرطيش فيها مهما كان = فرّغي قلبك في الساعة دي للدعاء والتضرع لله عز وجل. ▪︎ خلي البيت كله مُشبَع بروحانية اليوم على قد ما تقدري = اقفلي أي وسيلة بتضيع الوقت، وفكّري اللي حواليكي بالدعاء والذِّكر. 📌 يوم عرفة محتاج قلب صادق يغتنم كل ثانية يقدر عليها مهما كانت زحمة اليوم. #الرسالة_الثامنة #إزاي_تكسبي_العشر

السلام عليكم ورحمة الله وبركاته صباح الخير يا شباب النهارده يوم التروية، اليوم الثامن من ذي الحجة.. يوم كان الحجاج زمان يرتوون فيه من الماء وياخدوه معاهم استعدادًا للوقوف بعرفة.. لكن إحنا كمان، حتى لو مش في الحج، محتاجين "تروية" من نوع تاني! قلوبنا محتاجة ترتوي بالطاعة، بالذِّكر، وبالقرب من ربنا.. فالنهارده يوم تروية القلوب بالدعاء، فلا تبخل على نفسك وابدأ دلوقتي: • اروِ لسانك: بالتهليل والتكبير والتحميد (الله أكبر، الله أكبر، لا إله إلا الله). • اروِ قلبك: بالصلاة والتوبة والاستغفار. • اروِ صحيفتك: بنية صادقة للذِّكر والصيام والدعاء. 💡 العبرة بالخواتيم.. ويوم عرفة على الأبواب، فجهّز قلبك من النهارده عشان تستقبل نفحاته. اللهم اروِ قلوبنا بهدايتك، وأعنّا على ذكرك وشكرك وحُسن عبادتك 🤲

يوم عرفة... مش يوم عادي! ده اليوم اللي صيامه بيكفّر ذنوب سنتين؛ سنة فاتت وسنة جاية! اليوم اللي الدعاء فيه مستجاب بإذن الله، واللي ربنا قادر فيه يغيّر كل حاجة في حياتك للأفضل! من الظهر للمغرب... 7 ساعات تحديد مصير! 🎯 هتضيعهم؟ ولا هتستغلهم؟ السبع ساعات دول ممكن يحلّوا أعقد مشاكلك، ويفتحوا لك الأبواب المقفولة، ويخلّوا دمعتك وتضرعك النهارده سبب سعادتك وجبرك بكرة! ولكل أخت بتسمعني: اوعي تضيّعي اليوم ده في التنظيف وتجهيز البيت.. خلّصي كل اللي وراكِ قبل عرفة، اليوم ده مش هيتعوّض! 🧺❌ يلا.. اجهزوا من دلوقتي: 🔹 اجتهدوا في الدعاء والذكر في يوم عرفة، وركّزوا جدًا على قول: (لا إله إلا الله وحده لا شريك له، له الملك وله الحمد، وهو على كل شيء قدير). 🔹 اوعوا تضيّعوا الفرصة، وما تنسوش تتسحّروا عشان تقدروا تصوموا . 👌 ها.. ناويين ولا لسه؟! أعاننا الله وإياكم على ذكره وشكره وحُسن عبادته. 🤲 #يوم_عرفة #د_حازم_شومان

أكبر سارق للحسنات في العشر الأوائل! 🛑 بتصوم وتصلي وتكبر، وبعدين تفتح السوشيال ميديا تشوف حاجة حرام، أو تغتاب حد، أو تخوض في سيرة الناس؟ يا خسارة التعب! احفظ لسانك وعينك في الأيام دي بالذات. صوم جوارحك عن الحرام علشان قلبك يدوق حلاوة الطاعة. اللهم احفظ جوارحنا عن كل ما يغضبك. 🤫 #وليال_عشر #أحمد_العزب

والله مهما بلغ الإنسان، لَبقيَّ على حالِه ظلومٌ لنفسه فقيرٌ إلى ربه تتخبطه الدنيا بين طاعةٍ ومعصية ولذةُ قربٍ وشقاءُ بُعد ولازال يستمسك -وهو على ضعفه- بقولِ عزيزٍ رحيم: "رَبُّكُمْ أَعْلَمُ بِمَا فِي نُفُوسِكُمْ ۚ إِنْ تَكُونُوا صَالِحِينَ فَإِنَّهُ كَانَ لِلْأَوَّابِينَ غَفُورًا"

*لا تنسوا هذه الأدعية* : 🤲اللهم إني أسألك حسن الخاتمة. اللهم ارزقني توبةً نصوحًا قبل الموت. اللهم يا مقلب القلوب، ثبت قلبي على دينك.

الله أكبر، الله أكبر، الله أكبر، لا إله إلا الله، الله أكبر، الله أكبر، ولله الحمد، الله أكبر كبيرًا، والحمد لله كثيرًا، وسبحان الله بكرة وأصيلا، لا إله إلا الله وحده، صدق وعده، ونصر عبده، وأعز جنده، وهزم الأحزاب وحده، لا إله إلا الله، ولا نعبد إلا إيَّاهُ، مُخْلِصِين له الدين ولو كره الكافرون، اللهم صل على سيدنا محمد، وعلى آل سيدنا محمد، وعلى أصحاب سيدنا محمد، وعلى أنصار سيدنا محمد، وعلى أزواج سيدنا محمد، وعلى ذرية سيدنا محمد وسلم تسليمًا كثيرًا.

*كان ابن عمر وأبو هريرة يخرجان إلى السوق في أيام العشر يكبران، ويكبر الناس بتكبيرهم*.🕋🤍

قَالَ رَسُولُ اللهِ ﷺ: «خَيْرُ الدُّعَاءِ دُعَاءُ يَوْمِ عَرَفَةَ»، وقال الأوزاعي رحمه الله: «أدركت أقواماً كانوا يخبئون الحاجات ليوم عرفة؛ ليسألوا الله بها». اجمع حوائج قلبك كلها في هذا اليوم العظيم؛ همك وكربك، دينك وداءك، خوفك ورجاءك، وما ضاق به صدرك، وما عجزت عنه حيلتك. لا تدع شيئاً في قلبك إلا رفعته، ولا أملاً إلا أودعته عند ربك؛ فعرفة يوم الأبواب المفتوحة، والقلوب المنكسرة، والدعوات التي ترجى لها الإجابة.🤲🏻

ينفع تبني عمارة من غير أعمدة! أو تدخل سباق سيارات من غير ما تتأكد إن "الموتور" شغال! أهو ده حالنا مع العشر من ذي الحجة.. الصلاة هي "العامود" الأساسي اللي هتبني عليه باقي عباداتك، و"المحرك" اللي هيخليك تنطلق بقوة في العشر بإذن الله؛ فلازم نبدأ بيها قبل بداية العشر ✌️ وعشان كده ”الصلاة“ أول تحدي لينا في 10❌10 النبي ﷺ لما اتسأل: أيُّ العَمَلِ أحَبُّ إلى اللَّهِ؟ قال: «الصَّلاةُ علَى وقْتِها». فتخيل إنك بتعمل أحب حاجة لربنا في أحب أيام إليه! طيب إزاي نركز في صلاتنا ونحقق الخشوع؟ ⬅️ قاعدة الـ 5 دقائق: أول ما الأذان يأذن، سيب اللي في إيدك فورًا.. "المعافرة" اللي هتحصل بينك وبين نفسك في أول 5 دقايق لو فزت فيها؛ هتديك قوة نفسية وتخليك تدخل الصلاة بتركيز. ⬅️ فرّغ شحنة الدنيا: قبل ما تكبّر، استحضر عظمة ربنا وإنك هتقف بين يديه، وإنك وقتها في مقابلة مع ”ملك الملوك“. ⬅️ غيّر النظام: بلاش كل مرة تقرأ بنفس السور، لكن نوّع في السور اللي بتقرأها عشان عقلك مايسرحش؛ فتركز في معاني الآيات. ⬅️ صلاة المُوَدِّع: صلي كل صلاة كأنها آخر صلاة ليك في الدنيا، تخيل لو دي آخر سجدة؟ هتكون عاملة إزاي؟ هدفنا النهارده 🎯 🔴 الـ 5 صلوات في أول وقتهم (أول ما الأذان يخلص تكون في المسجد أو تكوني على سجادة الصلاة). 🔴 نركز في كل آية بنقولها في الفاتحة والسور. ⚠️ وافتكر إن لو الصلاة اتظبطت، كل اللي جاي بعدها هيكون سهل بإذن الله وهتفوز بوعد الله ⬇️ 💭 ﴿قَدْ أَفْلَحَ الْمُؤْمِنُونَ * الَّذِينَ هُمْ فِي صَلَاتِهِمْ خَاشِعُونَ﴾ #الصلاة #عشرة_في_عشرة @mklpzaq

*ما من أيام العمل الصالح فيها أحبّ إلى الله من هذه الأيام - أيام العشر - قالوا: يا رسول الله ولا الجهاد في سبيل الله ؟ قال: ولا الجهاد في سبيل الله، إلا رجل خرج بنفسه وماله فلم يرجع من ذلك بشيء" [رواه البخاري].*

أكبر غلطة بنقع فيها… إننا بنجري نبني مظاهر، قبل ما نبني إنسان بجد من جوه. لو القلب مش مليان بحب ربنا والخوف منه… أي بناء خارجي هينهار مع أول ريح شديدة. قال النبي ﷺ: "ألا وإن في الجسد مضغة إذا صلحت صلح الجسد كله…" الأنبياء قضوا سنين يزرعوا التوحيد في النفوس… قبل ما يُمكِّن الله لهم في الأرض. وربنا سبحانه وتعالى بيقول: {إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ} إحنا محتاجين نرجع دعاة بجد… في بيوتنا، وفي شوارعنا، ونصلّح علاقتنا بربنا قبل أي شيء. ولما ننجح في اختبار بناء النفس، ونكون صادقين… ربنا هو اللي هيفتح لنا الأبواب، ويمنّ علينا بالاستقرار من عنده. #بناء_النفس #أصلح_ما_بينك_وبين_الله #ليسأل_الصادقين_عن_صدقهم #حازم_شومان