الدفعة 40 المجموعة "1"||🇵🇸||دفعة يوسف الميهي - أحمد جاد اللّه

هيجيلك شاب زي الفل مبيتعالجش من اي حاجه وبيشتغل وفجأة عينه اصفرت وسخن ...هتفتح كتب ال diagnosis ايه سبب الصفرا اللي عنده ..وتدخله القسم (Jaundice for investigations) يا تري صفرا انسدادية ؟ولا صفرا تكسيريه ولا صفرا بسبب حاجه في الكبد ؟ ..وأنت لسه بتدور ..هتلاقي المريض حالته بتسوء وهيموت قبل ما توصل لحاجه ..... بقول لحد من حبايبي أستاذنا طلب مننا نوعي الناس عن ضربة الشمس ..قال لي هنقولهم ايه مثلا ؟ ده حاجه بسيطة ومعروفه...فقلت له المثال اللي فوق ده (اللي هو حالة حقيقية بالمناسبة ) ...والشاب ده كل اللي عمله انه بيسافر مسافات كبيرة في الحر ..بس علي ما اتشخص كان فات اوان انه يتلحق هتقولي بس أنا فتحت الكتب ويمكن حتي ال AI ملقتش ضربة الشمس في الالجوريزم بتاع الjaundice هقولك لأن الصفراء عشان تحصل بتحتاج ٢٤ ل ٧٢ ساعه ..ووقت ما تحصل يبقي معناها دخلنا في organ failure ..فالمفروض ده بيتشخص من أول دقيقة (كلينكال ) .. شاب زي الفل ..اشتغل في الحر ..سخن وتعب ..لازم تشخصه ....فتخيل لما يبقي المريض لما اصفر ..ده معناه أنه جاي متأخر ويا تلحقه لمتلحقهوش...وفي نفس الوقت الدكتور بيستقبله بعقلية أنه حالة لسه في بدايتها و(صفرا تحت البحث ) .. طيب ما كده الطب صعب ؟ ومين قالك انه سهل ؟! ..... لما حكيت لصديقي الحالة دي قالي تصدق ان حد قريبي معاه طفل مش فاكر ٨ او ٩ سنين ...مشيوا في الحر شوية...علي ما وصلوا الولد وقع منهم ...طلعوا بيه ع المستشفي واتلحق ...قلت له الحمد لله ..بس ده مش ضربة شمس ..ده اتلحق في درجة قبلها زي ما استاذنا قال في الفيديو ... اول درجه ..كل الموضوع شوية اعراض جلدية تاني حاجه...انه يجيله تقلصات لما بيشتغل في الحر لانه بيعرق ويفقد املاح ...ولما بيشرب بيشرب مية بس من غير ملح ...فيحصله شد عضل وكل ده بسيط التالته ..انه يحصله اغماء ...heat syncope ...ويفوق بسرعه وده لو كان حد شغال في مكان عالي او علي مكنه او بيسوق وو...ده هيكون خطر جدا ..ده مينفعش يفقد الوعي ...حتي الناس دي لما تيجي تكتب دوا سكر او ضغط او حتي بروستاتا ..خد بالك ممكن الادوية دي لو عملت شوية دوخه في الشخص العادي لكن معاهم خطر جدا ..... الدرجه الرابعه...الاجهاد الحراري ...وده ممكن تكون درجة الولد اللي وقع واتلحق ..بس ده بداية الخطر لو متلحقش هيدخل في ضربة شمس ..او heat stroke .... الدرجة الخامسة ..ضربة الشمس ..ودي أخطرهم ..واللي بيحصل فيها ان مركز تنظيم الحرارة في المخ نفسه بينضرب ...فتلاقي حرارته معديه ٤٠ وممكن حتي ميكونش بيعرق ...وده السبب اللي علشانه (انتشرت اسطورة ان البارسيتامول مبيشتغلش في درجات الحرارة العالية ولازم كمادات ) ...هو البارستامول بيشتغل عموما عادي لكن في الحالة دي فعلا مبيشتغلش ..ولازم يتعمل كمادات ...... كلمة stroke ...ممكن تبان غريبه ..بس أنا فاكر الحالة اللي كان شاب قوي البنية  وفجأة وقع في الحر وقلبه اتوقف ..واتحجز في العناية ..وبردو فاكر ان الصفرا عنده كانت عاليه او تقول multi organ failure وده نجا برحمة ربنا ...وكان أفضل تحسن وصله هو أنه بقي يدوب بيعرف يمشي علي رجله ..وبدأ يخدم نفسه من بعد ما كان هو اللي شايل أسرته ...بقي كل أملنا أنه ميكونش عبء علي حد ...فهي فعلا stroke واسوأ كمان ...... وطبعا الخطر بيزيد علي الأطفال وكبار السن أكتر أنك تسيب طفل او حد كبير في العربية في الحر ولو دقايق بسيطة ...ده ممكن يبقي فيه خطورة علي حياته ..وفيه ناس بالفعل ماتت بحاجه زي دي .... عشان كده سمينا الحملة دي #احمي_حبايبك_من_ضربة_الشمس