Юрий Слепцов. Главные новости Намского улуса

Бүгүн - Россияҕа урбаанньыт күнэ. Бэйэ дьыалатын тэринэн, тыа хаһаайыстыбатын, атыы-эргиэн, туризм эйгэтигэр дьоҥҥо-сэргэҕэ араас өҥөнү оҥорон үлэ үөһүгэр сылдьар үтүө-үлэһит дьоммутун, улууспут урбаанньыттарын бүгүҥҥү идэлээх бырааһынньыккытынан итиитик-истиҥник эҕэрдэлиибин! Эһиги Россия экономикатын арҕаа дойдулар санкцияларынан тууйа сатыыр кэмнэригэр олорон биэрбэккэ, олохпутун уйгутун оҥорор туһугар үлэлиигит. Хаачыстыбалаах табаары, өҥөнү тыабыт сиригэр оҥорорго дьулуһаҕыт. Олоххо ураты сыһыаҥҥытынан, көрүүгүтүнэн, санаабыккытын ситиһэр быһаарыныыгытынан тыа сиригэр улахан хамсааһыны иилиигит-саҕалыыгыт, улууспут социальнай-экономическай сайдыытыгар сүҥкэн кылааккытын киллэрэҕит. Хайа да дьыалаҕа куттаммакка ылсар, дьоҥҥо туһаны оҥорор кыахтаах, хорсун, үгүс ыал уйгутун хааччыйар сатабыллаах аныгы кэм лидердэрэ буолаҕыт. Анал байыаннай дьайыы саҕаланыаҕыттан ким туох кыахтааҕынан: сахалыы быһах, харысхал оҥорон, техника биэрэн, ас-үөл бэлэмнээн, үп-харчы хомуйан туора турбакка куруутун күүс-көмө буолаҕыт. Быйылгы халаан уутуттан дьоммут-сэргэбит улаханнык эмсэҕэлээбит кэмигэр биһиги урбаанньыттарбыт аан бастакынан ас астаан, таҥас-сап, наадалаах тэрил ыытан улахан көмөнү оҥоро сылдьаргытыгар барҕа махтал тылларын тиэрдэбин. Убаастабыллаах урбаанньыттар! Биһиэхэ олохтоох производствоны сайыннарар улахан кыах кэлбитин мүччү туппакка, сайдыы суолун тутуһуохха! Дьоҥҥо биллибэт саҥа табаары, өҥөнү атыыга таһаарарга, аныгы производствоны саҕалыырга, чөл олоҕу сайыннарар урбааны күүскэ сайыннарарга дьулуһуохха! Бука барыгытыгар кытаанах доруобуйаны, дьиэ кэргэҥҥитигэр дьоллоох олоҕу, барыстаах үлэни, бизнескит сайдарыгар, саҥа бырайыактаргыт үтүө түмүктэрдээх буолалларыгар баҕарабын. Сыалгыт-соруккут ситэн, үлэҕит-хамнаскыт таһаарыылаах буоллун! https://t.me/uriysleptsov

Убаастабыллаах Нам улууһун оскуолаларын үөрэнээччилэрэ, учууталлара уонна төрөппүттэрэ! Эһигини үөрэх сылын түмүктүүр Тиһэх чуораан үөрүүлээх күнүнэн ис сүрэхтэн итиитик-истиҥник эҕэрдэлиибин! Быйыл Нам улууһугар 11-с кылааһы - 228, оттон 9-с кылааһы - 417 үөрэнээччи бүтэрэр. Бу оҕолор истэригэр үөрэх бастыҥнара, улуустааҕы, республикатааҕы, Бүтүн Россиятааҕы, аан дойдутааҕы олимпиадалар, спортивнай күрэхтэһиилэр, ырыа, үҥкүү күрэхтэрин, «Инникигэ хардыы», о.д.а. научнай-практическай конференция призердара, оҕо тэрилтэлэрин көхтөөх чилиэттэрэ бааллар. Бүгүҥҥү күн эһиэхэ ураты бэлиэ күн. Үөрэх-билии киэҥ эйгэтигэр ылбыт билиигит үйэ-саас тухары олоххутугар күүс-көмө буолуоҕа. Төрөөбүт оскуолаҕытыгар үөрэммит кэмнэргитин куруук ахта-саныы сылдьыаххыт, үтүө өйдөбүлү хаалларар кэрэ кэм буолар. Эһиги хас биирдиигит иннигэр эппиэтинэстээх хардыы – инники олоххутугар идэни сөптөөхтүк талыы уонна билиигитин, талааҥҥытын арыйыы буолар. Убаастабыллаах учууталлар, оскуоланы бүтэрэр оҕолорбут кылаастарын салайааччылара! Эһиги түбүктээх гынан баран, олус бочуоттаах үлэҕитинэн хас биирдии оҕону олох суолугар сирдиигит. Бүөбэйдээн ииппит-үөрэппит үөрэнээччилэргит олох киэҥ суолун тобулан улууспут, республикабыт, бүтүн дойдубут киэн туттар туруу дьоно буола үүнүөхтэрэ диэн эрэнэбит. Үөрэнээччилэргит үтүө ааккытын ааттаттыннар, улууспут, республикабыт чэчирии сайдарын туһугар үөрэнниннэр, үлэлээтиннэр- хамнаатыннар! Күндү үөрэнээччилэр! Хас биирдии күҥҥүтүн туһалаахтык атааран, оскуолаҕа ылбыт билиигитин, төрөппүттэргит алгыстарын, учууталларгыт, аҕам саастаахтарбыт сүбэлэрин-амаларын тирэх оҥостон, олох киэҥ аартыгар үктэннигит. Биир кэлим экзаменнаргытын бары ситиһиилээхтик туттарыаххыт диэн эрэнэбин, сөбүлүүр үөрэххитигэр киирэҥҥит, талбыт идэҕитин толору баһылаан, төрөөбүт дойдугут, дьоҥҥут-сэргэҕит туһугар үлэлээн-хамсаан, айан-тутан дьоһун дьон буола үүнэн-сайдан тахсыҥ! Саха буолан сандаарыҥ, киһи буолан килбэйиҥ! https://t.me/uriysleptsov

Нам улууһун дьаһалтатын уонна тус бэйэм ааппыттан Сайылык күнүнэн эҕэрдэлиибин! Саха дьонугар сайылыкка көһүү самаан сайын кэлиитин, күөх от дыргыл сытын, түптэ унаар буруотун, бастакы куйаас күннэри кытта ситимнээх. Сотору кэминэн хаһаайыстыбаларбыт, ону тэҥэ биирдиилээн дьоммут сайылыктарга сүөһүлэрин таһааран үрүҥ илгэни үрүлүтүөхтэрэ, ыччат сүөһүнү төлөһүтүөхтэрэ. Төрөппүттэрин кытта сайылыкка оҕо-аймах эмиэ тахсыhыа. Кинилэр дьонноругар илии-атах, көмө буолан сайыҥҥы сынньалаҥнарын туһалаахтык атаарыахтара, үлэҕэ-хамнаска кыра эрдэхтэриттэн сыстан, утуму салгыахтара. Үрүҥ илгэни үрүлүтэр, эмис эти дэлэтэр туруу үлэһит дьоммут ыарахантан чаҕыйбат санааҕытынан, үлэҕитигэр бэриниилээх сыһыаҥҥытынан тыабыт хаһаайыстыбата сайдарыгар кылааккыт иһин махталбын тиэрдэбин. Күндү Наммыт улууһун олохтоохторун өссө төгүл Сайылык күнүнэн эҕэрдэлиибин! Чэгиэн туругу, этэҥҥэ буолууну баҕарабын! Күүтүүлээх самаан сайыммыт уйгу быйаҥы аҕаллын! https://t.me/uriysleptsov

Ытыктабыллаах Аҕа дойду Улуу сэриитин кыттыылаахтарын огдооболоро, тыыл бэтэрээннэрэ, сэрии кэмин оҕолоро! Күндү Нам улууһун олохтоохторо! Нам улууһун салалтатын уонна тус бэйэм ааппыттан Аҕа дойду Улуу сэриитигэр Кыайыы 79 сылынан ис сүрэхпиттэн итиитик-истиҥник эҕэрдэлиибин! Ыам ыйын 9 күнэ улууспут хас биирдии олохтооҕор ураты суолталаах, дириҥ өйдөбүллээх. Аҕаларбыт, эһэлэрбит, дурда-хахха дьоммут алаастартан, нэhилиэктэртэн уонна куораттартан уоттаах сэриигэ барар ыллыктара Улуу Кыайыыга суолу тэлбиттэрэ. Кинилэр хабыр хапсыһыы уоттаах холоругун ааспыттара, төрөөбүт сирдэригэр чиҥник үктэнэн Кыайыы өрөгөйүн Европа, Азия дойдуларыгар эмиэ аҕалбыттара. Тыылга хаалбыт кырдьаҕастар, оҕолор, ийэлэр бэриниилээх, сыралаах үлэлэринэн Улуу Кыайыыны уһансыбыттара. Төрөөбүт дойдуларыгар төннөн кэлбит саллааттар оччотооҕу кэм уустуктарын аахсыбакка, эйэлээх олоҕу тутуспуттара. Биһиги норуоппут халбаҥнаабат модун санаалаах, хоһуун уонна хорсун эрэ буолан, ол хабараан сыллары тулуйбута. Онон биһиги Аҕа дойдуну көмүскээбит ытык дьоммут сырдык кэриэстэрин харыстаан, эдэр көлүөнэлэргэ иэдээннээх сэрии туһунан кырдьыгы тиэрдэр ытык иэспит. Ыччаты иитиигэ Кыайыы саллаатын Ийэ дойдуга таптала мэлдьи холобур буолуохтаах. Билигин анал байыаннай дьайыы барар кэмигэр Нам улууһун дьоно-сэргэтэ Аҕа дойдубут туһугар геройдуу сулууспалыы сылдьар биир дойдулаахтарбытыгар биир санаанан сомоҕолоһон күүс-көмө буолабыт. Улуу Кыайыы күнэ өссө төгүл сомоҕолоһуу, түмсүүлээх буолуу күүһүн билэрбитигэр, норуоппутунан киэн туттарбытыгар, санаабытын бөҕөргөтөрбүтүгэр кыаҕы биэрэр, тапталлаах Ийэ дойдубут чэчирии сайдарын туһугар айымньылаах үлэҕэ кынаттыыр! Ытыктабыллаах аҕам саастаах дьоммут! Хорсун-хоодуот быһыыгыт, килбиэннээх үлэҕит иһин эһиэхэ сүгүрүйэбит! Үрдүбүтүгэр эйэлээх халлаан баарыгар эһиэхэ махтанабыт Эһиэхэ барыгытыгар чөл туругу уонна уһун олоҕу, этэҥҥэ буолууну, дьолу уонна үтүөнү, эйэлээх халлааны баҕарабын! Кыайыыны уһансыбыттарга уруй-айхал буоллун! https://t.me/uriysleptsov

Күндү биир дойдулаахтарым, Нам улууһун үлэһит дьоно-сэргэтэ! Эһигини аан дойду үлэлээн иитиллээччилэрин сомоҕолуур, өрүү чаҕылхай күннээх, ураты сырдык, кэрэ, Күөх Маайынан, Ил-Эйэ, Үлэ бырааһынньыктарынан ис сүрэхпиттэн итиитик-истиҥник эҕэрдэлиибин! Бу күн үлэһит дьон сомоҕолоһуутун уруйдуур күн. Биһиги тэрилтэлэринэн үлэһит дьону, ветераннары чиэстиибит, субуотунньуктары, Үлэ бырааһынньыгын тэрээһиннэрин ыытабыт. Убаастабыллаах биир дойдулаахтарым! Үлэ араас эйгэтигэр күргүөмнээх, таһаарыылаах үлэҕитинэн, айар талааҥҥытынан, сатабылгытынан төрөөбүт дойдубут сайдарын туһугар үлэлии-хамсыы сылдьаргытынан киэн туттабын, махтанабын. Инникитин даҕаны түмсүүлээх үлэбитинэн-хамнаспытынан, бэйэбит дьулуурбутунан хайа да түгэҥҥэ эрэллээхтик хардыылаан үгүһү ситиһиэхпит, элбэҕи кыайыахпыт. Тапталлаах дойдубут барҕарарын туһугар айымньылаах үлэни, чэгиэн, этэҥҥэ буолууну, уҕараабат эрчими, эйэлээх халлааны, ситиһиини, сааскы үтүө санааны баҕарабын! https://t.me/uriysleptsov

Убаастабыллаах Нам улууһун олохтоохторо! Эһигини «Нам улууһа» муниципальнай тэриллии уонна тус бэйэм ааппыттан Саха Республикатын Күнүнэн итиитик-истиҥник эҕэрдэлиибин! Саха сирин судаарыстыбаннаһа Нам улууһуттан саҕаламмытынан биһиги киэн туттабыт. Муус устар 27 күнэ – Саха сирин судаарыстыбаннаһа атаҕар туруутугар ураты, икки төгүллээн бэлиэ түгэн. Бу күн 1922 сыллаахха Саха АССР төрүттэммитэ. Оттон 1992 сыл муус устар 27 күнүгэр Саха Республикатын Төрүт сокуона күүһүгэр киирбитэ. Бүгүн биһиги Республикабытын төрүттээччилэри – киэн туттар биир дойдулаахпыт, уһулуччулаах государственнай уонна политическай деятель Максим Аммосовы, Платон Ойуунускайы, Исидор Бараховы уонна кинилэри кытта республика кэскилин туһугар үлэлээбит дьону, Республика сайдыытыгар сүҥкэн кылаатын киллэрбит, норуот өйүгэр-санаатыгар үтүө салайааччынан хаалбыт убаастанар биир дойдулаахпыт Илья Винокуровы дириҥ ытыктабылынан ахтабыт. Саха сирэ Уһук Илин уокурукка социальнай-экономическай сайдыы өттүнэн инники күөҥҥэ сылдьар. Кини иннин диэки хардыытыгар Наммыт улууһа бэйэтин дьоһун кылаатын киллэрэр. Быйыл Саха сиригэр Оҕо саас, Нам улууһугар Оҕо спордун сылларынан араас хабааннах үлэлэр ыытыллаллар. Бу үлэлэр элбэх сыраны эрэйэллэр. Онон соруктарбыт туолалларын туһугар улууспут дьоно-сэргэтэ, биир дойдулаахтарбыт биир санаанан түмсэн, сомоҕолоһон, дириҥ хорутуулаах үлэни ыыттахпытына, үүнэр көлүөнэбит сайдарыгар бигэ төрүтү ууруохпут диэн эрэллээхпин! Күндү Намым дьоно! Эһиэхэ барыгытыгар чэгиэн туругу, эйэлээх халлааны, сарсыҥҥы күҥҥэ энчирээбэт эрэли, дьолу-соргуну, ситиһиилэри баҕарабын! Республика күнүнэн! https://t.me/uriysleptsov

Уважаемый Валерий Ильич! От имени Администрации муниципального образования «Намский улус», улусного Совета депутатов, общественности и от себя лично сердечно поздравляю с 80-летним юбилеем! Ваша жизнь наполнена интересными событиями и значимыми свершениями. Вы добрый и мудрый человек, достойный сын великого отца, который является для нас настоящим примером для подражания. Жители Намского улуса высоко ценят ваш вклад в деле увековечения светлой памяти вашего отца, выдающегося государственного и политического деятеля Ильи Егоровича Винокурова, который ставил Родину выше своей жизни и желавший лучшей доли для своего народа. Илья Егорович Винокуров – эпохальная личность, посвятивший всю свою жизнь народу, своим честным, неустанным трудом снискавший славу не только в Намском улусе, но и в других улусах республики. Ваш жизненный путь – уникальный пример служения Отечеству для каждого якутянина. Ваши высокие человеческие и лидерские качества будут цениться всегда и как никогда на сегодняшний день актуальны для страны. Спасибо Вам за советы, которые Вы нам часто даете, за совместную работу. Мы желаем Вам исполнения всех желаний. Счастья, благополучия и любви Вам и Вашим близким. Пусть радость и здоровье не покидают Вас. А оптимизм и желание жить не иссякают ещё много много лет. С юбилеем! https://t.me/uriysleptsov

УБААСТАБЫЛЛААХ НАМ УЛУУҺУН ОЛОХТООХТОРО, КҮНДҮ УОЛАТТАРБЫТ! Нам улууһун салалтатын уонна тус бэйэм ааппыттан Уол оҕо күнүнэн итиитик-истиҥник эҕэрдэлиибин! Бу бэлиэ күн уол оҕону иитии улахан суолталааҕын көрдөрөр, дьиэ кэргэн төрүт үгэһин сайыннарар, тарҕатар аналлаах. Саха киһитэ уол оҕону эр киһилии иитиитигэр сүрүн болҕомтотун уурар. Эр киһи аал уоту оттооччу, алаһа дьиэни тэрийээччи, булааччы-талааччы, ыал халыҥ хаххата, суон дурдата буолар. Онтон саха оҕото аҕатын кыра эрдэҕиттэн батыһа сылдьан булка-алка, үлэҕэ-хамнаска уһуйуллар. Уол оҕо — аҕатын туйаҕын хатарааччы. Уолаттарбыт күүстээх санаалаах, сахалыы мындыр толкуйдаах, билиилээх, киэҥ көҕүстээх, күүстээх-уохтаах, үтүө санаалаах удьуору утумнааччы, дьиэ кэргэн дьыалатын салҕааччы инники эрэллэрбит буоллуннар! https://t.me/uriysleptsov

«Якутлесресурс» генеральнай директорын Виктор Омуковтыын көрсөн кэпсэттибит. Кыстык бүтэн, билигин бары күүс сааскы халаан уутугар уонна ойуур баһаарыгар ууруллар. Виктор Викторовичтыын госсорудаҕынан хонтуруоллаан уматык төһө иэннээх сиргэ хаһан ыытылларын чопчуластыбыт, үлэ былаанын торумнаатыбыт. Ойуур баһаара турар кутталлаах сезонугар бэлэмнэнии үлэ саҕаланна. Быйылгы прогноз уустук соҕус. Онон, улууһум дьоно-сэргэтэ, чуолаан булчуттар, айылҕаҕа сынньанааччылар, тыаҕа, ойуурга бары быраабылалары, ирдэбиллэри тутуһан сылдьыҥ. Ийэ айылҕабытын харыстааҥ диэн ыҥырабын. https://t.me/uriysleptsov

Убаастабыллаах биир дойдулаахтарым! Кэлиҥҥи кэмҥэ тутуу балысханнык ыытыллан улууспут киинэ биллэрдик тубуста. «Куорат тупсаҕай эйгэтин тэрийии» федеральнай бырайыакка эһиги быһаччы кыттыыгытынан, куоластааһыҥҥа көхтөөхтүк кыттаҥҥыт М.К. Аммосов Набережнайа, ону сэргэ Аппааныга Мавра күөлэ оҥоһуллан дьон-сэргэ сынньанар усулуобуйата тэриллибитэ. Билигин бу бырайыакка Доҕордоһуу болуоссата кыттар. Маныаха эмиэ эһиги куоласкытын биэрэн, куонкуруска кыайыылаах таҕыстахпытына улууспут киинин хаба ортотугар оҕо-аймах сибиэһэй салгыҥҥа оонньуур, сынньанар, бары өттүнэн аныгылыы инфраструктуралаах сир оҥоһуллуоҕа. Онон, https://14.gorodsreda.ru/ киирэн, «Госуслуги» портал нөҥүө логин уонна пароль суруйаҥҥыт «Ленский наслег» талаҕыт уонна «Площадь Дружбы в с. Намцы» диэҥҥэ куоласкытын биэрэҕит. Улууспут киинэ тупсарыгар бары бииргэ кылааппытын киллэриэххэ. https://t.me/uriysleptsov

Убаастабыллаах Нам улууһун культура эйгэтин бары үлэһиттэрэ, ветераннара! Эһигини идэлээх бырааһынньыккытынан - Культура үлэһиттэрин күнүнэн итиитик-истиҥник эҕэрдэлиибин! Эһигини барыгытын айар-тутар баҕа санаа, тулалыыр дьоммутун-сэргэбитин кытта кэрэ эйгэлиин үллэстэр үтүө санаа түмэр. Эһиги өбүгэлэрбит духуобунай сыаннастарын харыстыыр уонна салгыы тиэрдэр ураты аналлааххыт. Талан ылбыт идэҕитигэр бэриниигит, сырдыкка-үтүөҕэ уҕараабат тапталгыт уонна ону киэҥ араҥаҕа тарҕатаргыт иһин, бириэмэни, өрөбүлү аахсыбакка дьону-сэргэни кэрэҕэ угуйар, иитэр-сырдатар, нэһилиэнньэ сынньалаҥын сатабыллаахтык тэрийэр үлэни киэҥ далааһыннаахтык ыыта сылдьаргытыгар махталбын тиэрдэбин. Тус бэйэҕитигэр уонна дьиэ кэргэҥҥитигэр дьолу, чэгиэн-чэбдик туругу, этэҥҥэ буолууну! Инникитин даҕаны айымньылаах үлэҕит аартыга кэҥии, кэрэҕэ угуйа-ыҥыра туруохтун, дойдубут инники сайдыытын туһугар бары саҕалааһыннаргытыгар үрдүк ситиһиилэри баҕарабын! https://t.me/uriysleptsov

Убаастабыллаах сылгыһыттар! Сыспай сиэллээҕи иитиигэ кылааттарын киллэрбит ветераннар уонна билигин даҕаны бу эйгэҕэ үлэлии-хамныы сылдьар дьоммутугар Сылгыһыт күнүнэн итиитик-истиҥник эҕэрдэлиибин! Сылгыны үөрдээн иитии былыр-былыргыттан Саха сирин хаһаайыстыбаннай үлэтин-хамнаһын үгэс буолбут төрүт салаатынан, национальнай баайынан уонна ураты киэн туттуунан буолар. Саха норуотун материальнай уонна духуобунай культурата бүүс-бүтүннүүтэ сылгыны – Дьөһөгөй оҕотун өрө тутууну кытта ыкса сибээстээх. Сылгыга, Дьөһөгөй оҕотугар сүгүрүйэбит, ыһыах ыһабыт, алгыс тылынан көрдөһөбүт. Сылгыһыттар өҥүрүк куйааһы, бытарҕан тымныыны аахсыбакка сылгыны бүөбэйдиигит, этиттэн-үүтүттэн ас арааһын оҥорон, сиэлиттэн-кутуругуттан уран тарбахтаахтар дьэрэкээн оҥоһук таһааран, улууспутун, республикабытын аар-саарга аатырдаҕыт. Бу барыта эһиги үтүмэн үлэҕит түмүгэр ситиһиллэрин өйдүүбүт, махтанабыт уонна киэн туттабыт. Саха норуота баарын тухары сылгыга сүгүрүйүү тохтуо суоҕа. Үлэҕит-хамнаскыт таһаарыылаах буоллун, тус олоххутугар кытаанах доруобуйаны, дьолу-соргуну баҕарабын! https://t.me/uriysleptsov

Убаастабыллаах Нам улууһун ытык мааны дьоно-сэргэтэ, биир дойдулаахтарым! Кулун тутар 15-17 күннэригэр ураты эппиэтинэстээх, инники сайдыыбытын, кэскилбитин түстүүр - Россия Федерациятын бэрэсидьиэнин быыбара түмүктэннэ. Нам улууһун дьоно-сэргэтэ Владимир Путин туһугар 89,36% бырыһыаны ылары ситистибит. Быыбар түмүгэ Дойдубут Президенэ норуотун туһугар ыытар үлэтэ сайдыы суолунан бигэтик баран иһэрин, ону бар дьон өйдүүрэ, өйүүрэ билиннэ. Улууһум дьонугар-сэргэтигэр Нам улууһун дьаһалтатын уонна тус бэйэм ааппыттан быыбарга кыттан, быыбардыыр быраапкытын толору туһанан, ытык иэскитин толорбуккутугар, дойдубут сайдыытын туһугар куоластаан бэйэҕит баҕа санааҕытын биллэрбиккитигэр махталбын тиэрдэбин. Инникитин даҕаны модун Россия чэчирии сайдарын, үүнэр көлүөнэбит туһугар бары сомоҕолоһон, түмсүүлээхтик үлэлиэҕиҥ диэн ыҥырабын! Бука барыгытыгар этэҥҥэ буолууну, эйэлээх халлааны баҕарабын.

Убаастабыллаах Николай Васильевич уонна «Намкоммунтеплоэнерго» үлэһиттэрэ уонна бэтэрээннэрэ! Эһигини олох-дьаhах коммунальнай хаhаайыстыба үлэhиттэрин күннэринэн итиитик-истиҥник эҕэрдэлиибин! Олох-дьаһах, коммунальнай хаһаайыстыба туруктаах буолуутугар эппиэтинэһи сүгэр тэрилтэ улуус олохтоохторугар сырдыгы уонна сылааһы тиэрдэн, уустук хаһаайыстыбаны ситиһиилээхтик үлэлэтэн инники күөҥҥэ иһэр. Намнааҕы Намкоммунтеплоэнерго тэрилтэтэ республикаҕа коммунальнай өҥөлөрү хаачыстыбалаахтык оҥорууга биир тарбахха баттанар бастыҥ тэрилтэ буола үүннэ. Улуус олохтоохторун туһугар, кинилэри кыһын итиинэн, сайын уунан хааччыйыыга бары күүскүтүн-кыаххытын, өйгүтүн-санааҕытын, дьоҕургутун ууран туран үлэлииргитигэр махтанабын. Сылын аайы оттук сезонугар бэлэмнэнэн, саахалы таһаарбат курдук былааннаах үлэ ыытыллар, улуус ититии ситимнэрин уонна хочуолунайдары тутуу, саҥардыы, хочуолунайдары гаас оттукка көһөрүү, чааһынай дьиэлэри ититии ситимигэр холбооһун үлэлэрэ былааннаахтык ыытыллаллар. Ытыктабыллаах Намнааҕы олох-дьаһах, коммунальнай хаһаайыстыба салалтата, үлэһиттэрэ, бэтэрээннэрэ! Үтүө суобастаах үлэҕит, идэҕитин эҥкилэ суох баһылааһыҥҥыт уонна туруоруллубут соруктары толорууга дьулуургут иһин махталбын тиэрдэбин. Саха сирин тыйыс усулуобуйатыгар дьон олоҕо тупсарын туһугар туруулаһар үтүө үгэстэргит тэнийэ турдуннар. Салааны сайыннаран уонна тупсаран нэһилиэнньэ махталын ыла туруҥ! Ситиһиилэри, эһиэхэ уонна эһиги чугас дьоҥҥутугар кытаанах доруобуйаны, дьолу, этэҥҥэ буолууну баҕарабын! https://t.me/uriysleptsov

Бүгүн быыбардыыр учаастакпар тиийэн, бэйэм гражданскай иэспин толордум. Модун дойдубут, республикабыт, улууспут чэчирии сайдарын уонна дьон олоҕун уйгута тупсарын туһугар куоласпын биэрдим. Биир дойдулаахтарым, эһиги эмиэ гражданскай иэскитин толорон, быыбарга көхтөөх кыттыыны ылыаххыт диэн эрэнэбин. https://t.me/uriysleptsov

Убаастабыллаах улууһум олохтоохторо! Кулун тутар 15-17 күннэригэр Россия Федерациятын президенин быыбара ыытыллаары турар. Бу күн бары гражданскай иэспитин толорорбутуттан дойдубут инникитэ тутулуктаах. Нам улууһун хас биирдии олохтооҕо быраабын толору туһанан, быыбарга көхтөөх кыттыыны ылыа диэн эрэнэбин. https://t.me/uriysleptsov

Күндү ытыктыыр, убаастыыр киэн туттар биир дойдулаахпытын, Российскай Федерация маастар-асчытын, Российскай Федерация эргиэнин үтүөлээх үлэһитин, Российскай Федерация потребкооперациятын туйгунун, Саха Республикатын норуотун хаһаайыстыбатын үтүөлээх үлэһитин, Нам улууһун Ытык киһитин, Таатта улууһун Ытык киһитин, А.Е. Кулаковскай аатынан Саха Республикатын Государственнай бириэмийэтин лауреатын Тарбахов Иннокентий Иннокентьевиһы 80 сааскын туолар өрөгөйдөөх үбүлүөйгүнэн тус бэйэм уонна Нам улууһун дьаһалтатын аатыттан итиитик-истиҥник эҕэрдэлиибин! Иннокентий Иннокентьевич, эн талан ылбыт идэҕэр бэриниилээхтик үлэлээн, ас-үөл индустрията сайдыытыгар сүҥкэн кылааккын киллэрэн, күн бүгүнүгэр диэри Саха сирин аһын-үөлүн аар-саарга аатырдаргыттан ис сүрэхпититтэн астынан туран, эйигинэн киэн туттабыт! Чэгиэн доруобуйаны, баҕа санаа бастыҥын, үтүө санаа үтүмэнин аныыбыт, дьоллоох-соргулаах олоҕу баҕарабыт! https://t.me/uriysleptsov