Multaqa-😍 الملتقى 💖

أقول ايه قبل ما أدعي عشان دعائي يُستجاب ؟ = روى الإمام أحمد عَنْ أَنَسِ بْنِ مَالِكٍ رضي الله عنه قَالَ : جَاءَتْ أُمُّ سُلَيْمٍ إِلَى النَّبِيِّ ﷺ فَقَالَتْ يَا رَسُولَ اللَّهِ عَلِّمْنِي كَلِمَاتٍ أَدْعُو بِهِنَّ ، قَالَ : ( تُسَبِّحِينَ اللَّهَ عَزَّ وَجَلَّ عَشْرًا، وَتَحْمَدِينَهُ عَشْرًا، وَتُكَبِّرِينَهُ عَشْرًا، ثُمَّ سَلِي حَاجَتَكِ فَإِنَّهُ يَقُولُ : قَدْ فَعَلْتُ قَدْ فَعَلْتُ )

" فيه عبادة اسمها ترك المُحرمَّات؛ - طُول ما أنت سايب الأغانى وبتسمع قرآن أنت فى عبادة. - طول ما أنتِ سايبة الزينة وساترة نفسك بالحجاب الشرعى أنتِ فى عبادة. - طول ما أنت سايب الكلام على الناس وأعراضهم أنت فى عبادة. «هجر المعصية عبادة وفعل الطاعة عبادة». - د. مُحمَّد الغَليظ.

اللهم استر عورات نساء ڠـزة وآمن روعاتهم، واحرسهم بعينك التي لا تنام، واكنفهم بكنفك الذي لا يُرام، واحفظهم بعزك الذي لا يُضام !!💔

﴿فَاذهَب أَنتَ وَرَبُّكَ فَقاتِلا﴾ اوعى تكون دي نفسيتك تجاه اللي بيحصل في إخواتنا في غزة! اوعى تكون فاكر إنك مش جزء من المشهد وانك مجرّد بس بتتفرّج عليه من بعيد! ماينفعش عشان اعتادنا اللي بيحصل ترجع حياتك طبيعية تاني، من غير ما تكون واخد قرارات في دينك عشان أُمّتك، انت بطاعتك ومعصيتك للأسف مش بتنفع وتضر نفسك وبس! انت جزء من أُمّة.. ماينفعش تنسى المعنى دا! في أول الأحداث كنّا بندعي لأهلنا بحُرقة وتضرع لله عزّ وجلّ إن ربّنا ينصرهم ولكن هل لسا المشاعر دي موجودة ومتّقدة جوانا؟ ولا اتحوّلنا بالتدريج لنفسية "فاذهب أنت وربك فقاتلا" واتعودنا على الظلم وبقيت نفوسنا نفوس باردة تجاه اخواتنا؟ هل بقى دعائنا عبارة عن اللهمّ انصر اخواننا في غزة بدون حتى حضور القلب عشان اعتادنا اللي بيحصل؟ انت محتاج تحضّر حُجّة لك أمام الله لو ماكنتش بتدعي لهم، محتاج تحضّر إجابة لو مش بتطوّل في سجودك عشان تدعيلهم، لو مش بتقعد في الثُلث الأخير من الليل تستغيث الله عزّ وجلّ إن ربنا ينصرهم ويحقن دمائهم. دعائنا لإخواتنا المسلمين في غزة وسوريا والسودان وكل بقاع الأرض دا واجب شرعي، مش حاجة بنعملها تفضّلاً مننا.

من أهم الصفات التي يجب الالتفات إليها عند الزواج مدى بساطة الشخص الذي سيتم الارتباط به (ومواقف فترة الخطوبة تكشف ذلك بوضوح) … كنت داخل وسيط في حل مشكلة زوجية كدا تجعلني أقول كان الله في عون إنسان محاط بأشخاص صعبة معقدة؛ بيكبروا الصغيرة، ويمسكوا في الهفوات، ويفهموا الكلام بمزاجهم، وبتحتاج لمجهود ذهني عشان تحكي معاهم، ولازم تقعد ترتب الكلام في الأول لتجنب سوء التفاهم … الناس دي بتستهلك الإنسان نفسيًا وروحيًا وبدنيًا، فمن ابتلي بشخص كهذا كان الله في عونه وربنا يكتب له أجر صبره وتحمله. من أعظم النعم في هذه الحياة أن يرزقك الله شخصًا سهلًا في حياتك … سهل في كل شيء، سهل تحكي معاه، سهل تناقشه، سهل ترضيه، سهل يفهمك، سهل يرجع لو اختلفتم، سهل تتكلم معاه بدون تفكير في رد فعله. والكلام دا مش بس في الزواج بل بشكل عام في العلاقات البشرية؛ النبي صلى الله عليه وسلم كان يتصف بأنه هينٌ لين، وأخبرنا أن الله تعالى حرَّم على النار كل هين لين سهل قريب من الناس. اللهم اجعلنا هينين لينين وارزقنا في كل أمورنا بأشخاص هينين لينين.

من رحمة ربنا عز وجل بينا وبالعباد أجمعين إن في يوم قيامة. يوم حقّ .. كله هيقف أمام الله عز وجل .. وكله هيتحاسب. ساعتها، الحاجة الوحيدة الّي هتنفعنا هي أعمالنا. مفيش أي حاجة من فلوسنا في الدنيا ولا مناصبنا ولا معارفنا ولا أي حاجة هتنفعنا.. إلا أعمالنا. لذلك قال ربنا عز وجل في وصف يوم القيامة: [خافضة رافعة] خافِضة لناس هتجعلهم في أسفل سافلين، ورافعة لناس هتجعلهم في أعلى عليين. تخفض الكُفّار في النار، وترفع المؤمنين في الجنة. و هي دي الرِفعة الّي لازم نجتهد ونُسارع ونتعب عشانها، وهي دي المعاني الّي بتصبّر على المؤمن أي بلاء هو شايفه في الدنيا.

‏من أدعية النبي ﷺ: " واخلف عليَّ كُل غائبة لي بخير".

اللهم اغفر لنا كل ذنب يعقب الحسرة ، ويورث الندامة، ويحبس الرزق ، ويرد الدعاء. اللهم اغفر لنا جدنا وهزلنا ، وخطأنا وعمدنا، وكُلّ ذلك عِندنا. اللهُمَّ اغفر لنا ما قَدَّمنا وماأخَّرنا وما أسرَرنا وما أعلَنا وما أنت أعلَم بِه مِنّا،انت المُقَدِّم وأنت المُؤَخر وأنت على كُلّ شَيءٍ قَدير.

عندما أصبح أمًّا أرجو من الله أن يوفّقني أن أكونَ أنا السّكن؛ لا الجدران ولا الأثاث! أن أكون الدفء في ليلٍ بارد، والراحةَ بعد يومٍ شاق أتعرفون معنى أن تُبنَى البيوتُ من طيبِ الأنفاس والضَحِكات؟ وأن يكون القلبُ دولابًا يتّسعُ للأخطاء والزلّات؟ أن نتوسَّد الأمان، ونتّكئ على الرحمة؟ أرجو أن تكون روحي ملجأً وعيني نورًا، أن أُجيد الإحتواء والإنصات والمُؤازرة، وأن أتقن صنعَ ما يُحبّون من طعام. أن أصْبِرَ وأُصبِّرَ في الضائقات إن حلّت، وأن أنشر السعادةَ بالبشارات إذا هلّت.

شوفت فيديو تمثيلي امبارح عن راجل بيتريق على الاسئلة اللي بتسألهاله مراته زي "انت بتاكل؟" "انت نازل؟" وعامل فيديو كوميدي وبيرد على الاسئلة دي اللي هو "ايه الاسئلة دي؟!" فسبحان الله افتكرت آية في غاية الجمال والابداع والحكمة ، ربنا بيقول في كتابه المجيد : وَمَا تِلْكَ بِيَمِينِكَ يَا مُوسَىٰ (17) هل ربنا (خالق السماوات والارض) مش عارف اللي في ايد موسى؟! فيه خواطر سمعتها في الآية دي انه ربنا قال له كدا على سبيل الإيناس له. شوفوا بقى رد سيدنا موسى.. قَالَ هِيَ عَصَايَ أَتَوَكَّأُ عَلَيْهَا وَأَهُشُّ بِهَا عَلَىٰ غَنَمِي وَلِيَ فِيهَا مَآرِبُ أُخْرَىٰ (18) يعني مكتفاش بانه يقوله "هى عصاي" ، ففضل يوصف.. ######## المشكلة عندنا في الوقت دا انه مبقاش عندنا "ثقافة الإيناس" .. يعني لما الست تطلب من زوجها وتقوله " تحب تاكل ايه النهاردة؟" .. يرد يقول "اي حاجة".. الوقت دا هى بتبقى نفسها تتكلم معاها وتإنسها لانها بتحبك.. نفسها تشكر في الاكل بتاعها.. وعلشان كدا كمان تلاقيها بتسألك "ايه رأيك في اكل النهاردة؟" بيبقى نفسها ترد عليها وتمدح في اي حاجة بتنتمي اليها.. ولو عايز تعدل وتقول "انه الملح ناقص".. دي حاجة علمهالي سواق تاكسي ، قالي انه بيقول لمراته "الله ، الاكل حلو اوي ولذيذ ، بس لو يزيد عليه شوية ملح بسيطة ، هيبقى ملهوش حل".. اتعلموا "ثقافة الايناس" وكفوا بيوتكم منه ..

السعي حلو لأن الفراغ مُهلك، بس ما خلف الكواليس مؤلم! مؤلم لأنه بياخد مننا فِكر ووقت وعُمر وتجارب وفي الآخر لا صابت لا خابت. بناخد كل خطوة وإحنا مش عارفين إذا كانت صح ولا غلط، بنبقا نفسنا حد يقولنا أي حاجه تنور لينا خُطانا. و في نهاية المطاف عسانا إنها خُطى نؤجر عليها، ما أصاب منها سَنسعد به، و ما لم يصب سنضعه في خانة التجارب التي ينبغي أن نتعلم منها و نتشاركها مع الغير فربما يُعينهم ذلك ع خطوة يُقدمون عليها. أسأل الله أن يُسدد خُطانا ولا يُذهب منها شيئا سُدى ويرزقنا الصبر والرضا أينما حللنا. - غادة رجب.

النهاردة على الفطار لقيت العيلة كلها مجتمعة عاملين أكل وربنا مهدي سرهم ومفيش خناقات وعاملين مكرونة بشاميل جواها فراخ.. وكلنا قاعدين في سعادة غامرة وإذ فجأة أمي زعقت لمرات أخويا عشان لقت في الأكل مشروم وهي مش بتحبه.. أمي قالت لمرات عماد أخويا إيه البتاع ده وطعمه وحش اوي.. وشدت معاها في الكلام و انتي بتجربي فينا وقصة وموال.. ومرات عماد أخويا.. بتقولها ده أحسن حاجة في الأكل ده ايش فهمك انتي يا طنط ده أنا باكل المكرونة كدا عشانه.. وأنا قاعد أكل ومستني اللي هيحصل.. وإذا فجأة لقيت عماد أخويا أخد طبق أمي نقي كل المشروم اللي فيه وحطه في طبق مراته.. وقال لأمي ولا يهمك بقي شلته كله أهو.. وبص لمراته وقالها تاكليه بالهنا أنا عارف انة بتحبيه وقام مكمل أكل.. أمي بعد ما خلصنا أكل بتقولي.. إلا ياخويا ما قلتش أشيلك البتاع من الأكل زي أخوك.. يا خسارة تربيتي فيك.. قولتلها يا ماما..أنا مش محتاج فعل عشان أبينلك إني بحبك.. أنا بحبك زي ما قالت أم يهوذا الاسخريوطي : لو كانت المحبة في اللحم لحرقته بالحديد الحامي وأحظي بسلامتي ولكنه في النفس فلا يبلغه أحد.. قالتلي يادي النيلة هترجع تعوجلي لسانك.. قلتلها يا ماما ليست النائحة الثكلى كالنائحة المستأجرة.. أنا مش زي أخويا عماد.. قالتلي وده إيه ده كمان.. فهمتها معني الجملة إن الست اللي بتصوت علي عيالها لما يموتوا مش زي الست اللي بنأجرها عشان تصوت في أي ميتم.. قالتلي صوتوا عليك يوم ونرتاح منك.. نفس تبقي زي أخوك الكبير.. تقولي كلام أفهمه.. فأنا رحت بقول لعماد أخويا شوف أمك يا عم.. من ساعة ما شلت المشروم من الطبق وهي قاعدة تذلني.. لقيته بيقولي.. ياض يأحمد قلب الست في ودنها.. حاول تريحها بكلمتين حلوين.. قلتله يا سلام حلو ده.. اشجيني.. طيب وقلب الراجل؟ فضحك وسكت.. قلتله وقلب الراجل يا عماد.. قالي الروقان بحر كل الغرقانين فيه مبسوطين.. سيب نفسك وما تحاولش تعوم.. قلتله يابني فهمني.. طب وقلب الراجل فين.. بصلي تاني وقالي اللي يعمل نفسه طرزان.. يشوف كل اللي حواليه قرود.. عيش حياتك من غير ما تحاول تبقي حد تاني.. فرجعت اسأله قلب الست في ودانها طب وقلب الراجل فين.. فضحك..

‏لا أجيد الكتابة عن أمي ... فلا أحد يستطيع وصف الجنة ♥

العين مابتكرهش إلا الأحسن منها.. "الغيرة" هي المحرك الأساسي لكل أصحاب النفوس الضعيفة اللي شافوا مميزات غيرهم كتيرة عليهم وبدل ما يطلبوا زيها من ربنا أو يسعوا تكون عندهم بيتمنوا زوالها منهم!.. الغيران الغير سوي هيكره تصالحك مع نفسك لإنه هيشوف فيك عدم إتزانه، وكلاكيعه.. الغيران الحقير هيكره نقاءك، ونضافتك لإنك هتفكره بحقارته.. الغيران سيء النية مش هيفهم صدقك عشان اتعود على الخبث.. الغيران بتاع اللف والدوران عمره ما هيشوف الدوغري بتاعك إستقامة.. الغيران البخيل هيفسر كرمك حتى لو كان في إطار الطبيعي إنه بذخ مالوش لزمة.. كُتل من النقص ماشية على رجلين والله!.. الغيران بتفرسه وبتغيظه مميزات غيره مش عيوبهم، وأذاه ليك شيء مايزعلش بالعكس ده سبب كافي يأكدلك إنك ماشي صح.. نقاء الثوب يستفز ظلمات الآخرين.. الأديب "جان بول سارتر" قال: (النَّاس يؤذون بعضهم البعض بقدر النَّقص الموجود لديهم).

مش معنى انك مش بتذاكر يبقى انت كدة فاشل بالعكس انت كدة ناضج ومدرك أن رمضان للعبادة جزاك الله خيرا

والله يا صاحبي أنت مش أحسن من فرد الأمن اللي في الجامعة عندك ولا في شغلك ولا أحسن من الصبي اللي بينزلك مشاريبك علي القهوة اللقطة كلها أن ظروفه خلته محتاج يشتغل الشغلانة دي وظروفك اللي خلتك مش محتاج الشغلانة دي والناقص اللي بيحسبها غير كده هتلاقي ناس كبيرة ٤٠ و٤٥ سنة ويمكن اكتر بتقولك يا استاذ أو حضرتك وانت لسه عندك ٢٥ سنة فمتعيش الدور عليهم وتعمل نفسك بيه ابن بيه وكلمهم بنفس الذوق والاسلوب المحترم وافتكر أن ده أكل عيشهم لازم يبقي عندك احترام متعمد للناس دي علي عكس الناس الباقية اللي ساعات بتبص ان احترامهم ده علي حسب المزاج مش واجب عليهم بطل انعره فارغة واحترم الناس الدنيا دوارة (وَلَا تَمْشِ فِي الْأَرْضِ مَرَحًا ۖ إِنَّكَ لَن تَخْرِقَ الْأَرْضَ وَلَن تَبْلُغَ الْجِبَالَ طُولًا)

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " مَنْ قَالَ : لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، يُحْيِي وَيُمِيتُ وَهُوَ عَلَى كُلِّ شَيْءٍ قَدِيرٌ، عَشْرَ مَرَّاتٍ عَلَى إِثْرِ الفَجْرِ وَالْمَغْرِبِ بَعَثَ اللَّهُ مَسْلَحَةً يَحْفَظُونَهُ مِنَ الشَّيْطَانِ حَتَّى يُصْبِحَ، وَكَتَبَ اللَّهُ لَهُ بِهَا عَشْرَ حَسَنَاتٍ مُوجِبَاتٍ، وَمَحَا عَنْهُ عَشْرَ سَيِّئَاتٍ مُوبِقَاتٍ، وَكَانَتْ لَهُ بِعَدْلِ عَشْرِ رِقَابٍ مُؤْمِنَاتٍ ".

يارب ما تخلينا نشوف الحرام عادي ولا العيب عادي ولا أي مدخل من مداخل الشيطان عادي، اللهم أرنا الحق حقا وارزقنا اتباعه، وأرنا الباطل باطلا وارزقنا اجتنابه ..

🔸 ‏قال الإمام ابن القيم رحمه الله : " مُدْمِنَ الذِّكْر يدخل الجنة وهو يضحك. "ْ [ الوابل الصيب (١٧٨)]📚

"المرء يحتاج إلى عبادة قبل العبادة وعبادة بعد العبادة، فهو يحتاج لعبادة الاستعانة قبل العبادة، ويحتاج لعبادة الشكر بعد العبادة. -إبراهيم السكران.