Tech Xtream

المرشد الأعلى للثورة الإسلامية في إيران "علي خامنئي" نشر على موقعه الشخصي فيديو جرافيك لعملية اغتيال إيرانية عن طريق درون لدونالد ترامب ومايك بومبيو وزير الخارجية الأمريكي السابق. الفيديو كان في إطار مسابقة تصويرية لعملية انتقام ضد ترامب وبومبيو في ذكرى اغتيال المجرم قاسم سليماني. تقريبا ترامب مش هيلعب جولف تاني بعد ما شاف الفيديو ده 😂😂

بمناسبة الإقبال الحالي على التورنت لتحميل لعبة God of War.. ده شرح مبسط لفكرة التورنت. التورنت أو بروتوكول بت تورنت BitTorrent Protocol عبارة عن تقنية عظيمة لمشاركة الملفات بين المستخدمين حول العالم. عملية مشاركة الملف بتبدأ بشخص واحد بيشارك ملف ما مع شخص تاني بعد كدة يبدأ الشخص ده يشاركه مع شخص تالت وهكذا لحد ما ينتشر الملف بين آلاف وملايين المستخدمين اللي اعتمدوا على بعض في مشاركة الملف بدون حاجة إلى وسيط (موقع تحميل). ➖➖➖➖➖➖➖➖➖➖➖➖➖➖➖➖ التورنت بيشتغل ازاي 🤔 زي ما قولنا التورنت بيعتمد على شخص بيشارك ملف ما والشخص ده بيُسمى Super، لما يتم عمل ملف تورنت لفيديو مثلا.. الفيديو ده بيتم تقسيمه لمئات أو آلاف الأجزاء الصغيرة جدا، بعد كدة يبدأ مجموعة من المستخدمين يحملوا الملف ده ودول اسمهم Peers يعني النظراء أو الأقران، وكل شخص منهم لما يحمل جزء من الفيديو للكمبيوتر بتاعه بيرفع الجزء ده لشخص تاني، يبقى انت بتحمل جزء ناقصك من جهاز شخص ما في أي دولة حول العالم.. والشخص ده بياخد الجزء اللي ناقصه من الملف اللي انت حملته خلاص.. كل ده بيتم بدون حاجة إلى وسيط أو سيرفر تحميل. ➖➖➖➖➖➖➖➖➖➖➖➖➖➖➖➖ عشان تبدأ تجمع الملف ده محتاج حاجة اسمها المُتقفي Tracker وده عبارة عن الأداة اللي عارفة مين حمل إيه.. والملف الفلاني ده أجزاءه مع مين بالتحديد، ولما مستخدم يبدأ ينزل ملف يبدأ المُتقفي يجمعه له أجزاء الملف من الأجهزة الموجود عليها حتى لو الأجهزة دي في قارات مختلفة. طبعا كل ما كان عدد الناس اللي بتحمل ملف معين أو الـPeers أكتر كل ما كان التحميل أسرع. ولما شخص ما بيحمل الملف بالكامل بيتحول من Peer إلى Seed يعني باختصار من شخص بيشارك في العملية بالرفع والتحميل لشخص بيشارك بالرفع فقط لأنه بالفعل انتهى من التحميل. ➖➖➖➖➖➖➖➖➖➖➖➖➖➖➖➖ إيه مميزات التورنت 🤔 التورنت مميزاته كتير جدا.. مش هتلاقي حاجة اسمها الرابط انتهى أو الملف اتحذف، تقدر حرفيا تلاقي أي ملف انت بتدور عليه، تقدر تحمل ملفات بأحجام كبيرة جدا من غير قلق إن الرابط ينتهي أو التحميل يفشل بعد ما قرب يكتمل، تقدر تعمل معاينة للملف قبل ما تحمله بالكامل، كمان تقدر تحمل أجزاء من الملف مش لازم تحمل الملف بالكامل عشان يشتغل معاك، التورنت مجاني تماما سواء في مواقع الملفات أو البرامج بتاعته.. وغيرها من المميزات. يبقى عيب التورنت الأبرز إن أحيانا لو بتدور على تحميل ملف قديم ممكن يكون موجود مع عدد أشخاص قليل وبالتالي سرعة التحميل بتكون منخفضة. ➖➖➖➖➖➖➖➖➖➖➖➖➖➖➖➖ ازاي أحمل تورنت 🤔 ناس كتير بتعاني من التحميل باستخدام التورنت.. أولا عشان تحمل تورنت محتاج حاجتين.. 1️⃣ ملف تورنت وده ملف خاص بالمادة اللي عايز تحملها زي لعبة أو فيديو أو غيره وده تقدر تجيبه من مواقع التورنت كتيرة زي موقع ThePirateBay على سبيل المثال.. بعد ما تحمل الملف اللي بيبقى حجمه لا يتعدى 1 ميجابايت محتاج الحاجة التانية. 2️⃣ برنامج تورنت وده برنامج مسئول عن الاتصال بالمُتقفي وتنظيم عملية التحميل والتحكم فيها، وأشهر برنامج هو uTorrent وده متوفر للكمبيوتر والأندرويد.. بمجرد ما تنزل البرنامج بفتح ملف التورنت على البرنامج وهتبدأ عملية التحميل. بالنسبة للآيفون فالموضوع بيكون صعب شوية ومحتاج لفة لأن التورنت شبه غير متاح لأصحاب فخامة التفاحة وفي الغالب بيحتاج جيلبريك. ➖➖➖➖➖➖➖➖➖➖➖➖➖➖➖➖ ⭕️ ده كان شرح مختصر لتقنية التورنت.. لو حد عنده استفسار يسيبه في كومنت وهجاوبه بإذن الله. ده مقال فيه أفضل 10 مواقع تورنت موثوقة للتحميل المجاني 👇 http://bit.ly/3bWfBe1

مجموعات الهاكرز في كوريا الشمالية قدرت تسرق ما قيمته 400 مليون دولار من العملات الرقمية خلال عام 2021. استخدام القرصنة في سرقة الأموال واحدة من الطرق اللي بتعتمد عليها كوريا الشمالية في التمويل الذاتي، وبيستهدف الهاكرز المؤسسات المالية سواء النقدية زي البنوك أو منصات تداول العملات الرقمية ومؤسسات التمويل اللا مركزي. سنة 2021 مش الأفضل بالنسبة لكوريا الشمالية لأنها جمعت 400 مليون دولار فقط 58% منهم كانت أصول من عملة الإيثريوم، في حين إنها قدرت في سنة 2018 قدرت تحقق 600 مليون دولار من الأرصدة المسروقة من العملات الرقمية فقط.

مواطن صيني اتحكم عليه بـ7 سنين سجن بعد ما ولع في كابينة اتصالات بسبب غضبه من سرعة الإنترنت المنخفضة واتسبب في قطع الخدمة عن أكتر من 4000 منزل لمدة 50 ساعة 😭😂

في خبر غريب بالنسبالي النهاردة مكتب الأمن الفيدرالي الروسي أعلن اعتقال أعضاء جروب الهاكرز المعروف باسم REvil. فريق REvil واحد من أسوء فرق الهاكرز في آخر 10 سنوات سواءً من حيث الفيروسات اللي طوروها -تحديدا فيروسات الفدية- بالإضافة لنوعية هجماتهم واستهدافهم للبنوك والمؤسسات الحيوية في دول على رأسها الولايات المتحدة. عملية الاعتقال شهدت 25 عملية مداهمة لمقرات يشتبه إنها لأعضاء الجروب، وتم اعتقال 14 شخص ومصادرة أكتر من 426 مليون روبل روسي وحوالي نصف مليون دولار من العملات المشفرة و20 سيارة حديثة الطراز. الحكومة الأمريكية كانت عرضت قبل كدة جايزة 10 مليون دولار لأي شخص يدلي بمعلومات عن الجروب أو أحد أعضائه.. وطلبت أكتر من مرة من الحكومة الروسية إيقاف الهجمات الإلكترونية على مؤسساتها.. ويبدو إن روسيا وافقت أخيرا كجزء من اتفاق بينهم -في رأيي- خصوصا بسبب الوضع الحالي في أوكرانيا.

اللي عنده قطط يخلي باله يا شباب 😂😂😭

الأسبوع ده شركة سامسونج انضمت للشركات الكبرى اللي دخلت الميتافيرس وفتحت ستور افتراضي خاص بيها. حسب تقدير لمؤسسىة توكينز دوت كوم؛ تجاوزت قيمة سوق العقارات الافتراضية في الميتافيرس أكتر من مليار دولار 😯 في الوقت الحالي سوق العقارات عالميا عبارة عن فقاعة كبيرة قريبة من الانفجار. يا ريت متضيعش فلوسك وتشتري عقار حقيقي في حين إنك تقدر تشتري عقار افتراضي وتضيعها بردو..

موقع UniCC يقرر إيقاف خدماته بشكل نهائي بنهاية الأسبوع بعد 9 سنين من وجوده على الإنترنت. موقع UniCC حاليا هو أكبر منصة لبيع وشراء معلومات البطاقات الائتمانية المسروقة ونجح في تحقيق مبيعات وصلت قيمتها إلى 358 مليون دولار. في العام الماضي خرج من السوق بردو موقع Joker’s Stash الموقع الأضخم في المجال في وقته بعد تحقيق أصحابه ما يكفي من الأرباح لعدم الحاجة للعمل مرة تانية. الجميل في الموضوع إن أصحاب المواقع دي عندهم أخلاقيات، وقبل ما يقفلوا بينزلوا إعلان مسبق عشان اللي عنده رصيد على الموقع يقدر يسحبه. الأمانة ↗️↗️

تأثير البنج وانت بتلعب أون لاين 😂ر

لجنة الاتصالات الوطنية في تايوان نشرت تقرير عن اكتشافها برمجيات حجب وتجسس في موبايل شاومي Mi 10T 5G. حسب تقرير اللجنة إن شاومي بتمتلك برنامج اسمه MiAdBlacklisConfigur تقدر تنزله على أي موبايل في العالم من خلال سيرفراتها العالمية باستخدام 7 تطبيقات بتكون مثبتة مسبقا على الموبايل. وظيفة الأداة دي بتكون منع المستخدم من الوصول لمحتوى مناهض للحكومة الصينية. بعض الأمثلة اللي تم اكتشافها كانت وجود كلمات في القائمة المحظورة زي "استقلال تايوان Taiwan independence"، أحداث ميدان تيانانمن Tiananmen Square events" وغيرها. التقرير أضاف بردو إن الموبايل بيجمع سجلات التصفح الخاصة بالمستخدم وبيرسلها إلى خوادم في بكين. في شهر سبتمبر الماضي وزارة الدفاع الليتوانية كانت نشرت تقرير مشابه عن نفس الموبايل ونصحت المواطنين بعدم شرائه والتخلص منه في حالة امتلاكه.. وبعدها شاومي قالت إنها هتلجأ لشركة تدقيق من طرف تالت للتحقق من الادعاءات اللي وردت في التقرير.. وطبعا من يومها ولا حس ولا خبر.

مؤسس تطبيق سيجنال "موكسى مارلينسبايك" قرر التخلي عن منصبه كمدير تنفيذي وهيخلفه بريان أكتون اللي على يمين الصورة. بريان أكتون ده بقى كان أحد مؤسسي واتساب اللي سبق وباع التطبيق بالمستخدمين ببياناتهم لفيسبوك مقابل حفنة من مليارات الدولارات..

كل يوم والتاني نشوف ناس اتنصب عليها من مواقع على النت.. أحدث عملية نصب موقع اسمه White Sands أوهم الناس بحلم الثراء السريع مقابل مهمات بيعملوها وكل ما يعملوا إيداع فلوس يزيد الربح بتاعهم.. وطبعا جمع من الناس فلوسهم وقفل.. يا ريت الناس تاخد بالها.. كل المواقع دي نصب... بلاش تتأثر بشوية النصابين على اليوتيوب وجروبات الفيسبوك اللي كل شغلهم خداع الناس وتضليلهم.

في جروب هاكرز تابع للاستخبارات الهندية معروف باسم PatchWork طوروا تروجان اسمها "Ragnatela" بيقدروا من خلالها يخترقوا الأجهزة عن بعد ويعملوا شوية حاجات زي (سكرين شوت للشاشة، جمع النقرات من لوحة المفاتيح، تنفيذ أوامر عن بعد، سحب ورفع ملفات من البرامج) وغيرها من البلاوي. التروجان ده استخدمته الحكومة الهندية لاختراق والتجسس على أهداف في باكستان أهما وزارة الدفاع، معهد أبحاث كراتشي، بعض الجامعات المتخصصة في العلوم البيولوجية. ازاي احنا عرفنا الكلام ده؟ الجماعة بتوع جروب الهاكرز الهندي وهما بيجربوا التروجان أصابوا أجهزتهم بدون ما يعرفوا.. واللي قدر يكتشف الموضوع ده باحثين في معامل Malwarebytes وفضلوا يتفرجوا على الهنود وياخدوا معلومات وصور من اللابات الافتراضية بتاعتهم اللي بيجربوا عليها المالويرز، وكمان عرفوا الأهداف اللي بيتجسسوا عليها. وأنا بقرأ تقرير الإفصاح بتاع Malwarebytes مجاش في دماغي غير مشهد دبشة في فيلم لخمة راس..

كشفت شركة آبل أن أرباح مطوري تطبيقات iOS بلغت أكثر من 260 مليار دولار منذ إطلاق الآب ستور عام 2008م. أرباح المطورين في عام 2021 فقط بلغت 60 مليار دولار. ➖➖➖➖➖➖➖➖➖➖➖➖➖ مجال برمجة التطبيقات من المجالات البرمجة المهمة اللي ليها مستقبل عظيم بإذن الله، كمان تقدر تتعلمها بشكل ذاتي من خلال الكورسات المتاحة مجانا على الويب. حاليا Flutter تعتبر من أفضل وسائل تطوير تطبيقات الموبايل للأندرويد وiOS وكمان الويب. ده مقال عن فلاتر وأهم مميزاته واستخدامه مع مصادر لأفضل كورسات عربية متاحة مجانا لتعلمه 👇 https://bit.ly/366hX9N

في تصريح حديث لوليام بيرنز مدير وكالة المخابرات المركزية CIA الحالي قال إنهم بيمتلكوا مجموعة مشاريع في العملات الرقمية (بدون تسمية أي مشروع). في تسريبات إدوارد سنودن سنة 2013 كان في وثائق بتتكلم عن مدى اهتمام الوكالة في تعقب تعاملات مستخدمي البتكوين بسبب إنها عملة مشفرة وبتستخدم في المعاملات الغير قانونية. (بالمناسبة البتكوين مش أفضل عملة من ناحية التشفير وحماية الهوية). الموضوع ده بتأكده مجموعة اعتقالات لمجموعة من أشهر الشخصيات على الدارك ويب زي روس أولبريخت أحدد مؤسسي موقع "طريق الحرير" أكبر سوق لتجارة الممنوعات، بالإضافة لرومان ستيرلنجوف مؤسس موقع Bitcoin Fog اللي كان بيستخدم لخلط البتكوين المشبوه لزيادة صعوبة تعقبه. يبدو إن الوكالة شافت إن موضوع تتبع المعاملات ده مش كفاية فقررت تدخل المجال بمشروعات بتدعمها خلف الأضواء بغرض جمع معلومات استخباراتية ممكن تفيدها فيما بعد.

ستيف جوبز فضل يتدرب 5 أيام كاملة على استخدام المسار الذهبي بنفس الترتيب لحد يوم الإعلان واللي نجح فيه بثبات يحسد عليه إنه ينفذ نفس الخطوات بنفس الترتيب ويستعرض كل مميزات الموبايل ويخدع العالم كله إن الجهاز ده اللي مليان بالمشاكل والعيوب هو اختراع هيغير من مفهوم الهواتف الذكية.. الجهاز اتباع منه ملايين النسخ واتعملت منه واحدة من أشهر سلاسل الهواتف على الإطلاق وساهم في وصول القيمة السوقية لشركة آبل إلى 3 ترليون دولار كأول شركة في التاريخ تصل للرقم ده.

امبارح كانت الذكرى السنوية لإطلاق أول آيفون 📱 في يوم 9 يناير عام 2007 تم الإعلان عن واحد من أهم الابتكارات اللي غيرت كتير من سوق الهواتف الذكية وفي مجال التكنولوجيا بشكل عام. في قصة غريبة بخصوص مؤتمر الكشف عن الآيفون وهي إن الجهاز وقت الإعلان كان مليان بالمشاكل والعيوب واللي بسببها كان لازم يتم تأجيل الإعلان عن الجهاز.. ستيف جوبز رفض تماما التأجيل وقرر إنه هيعلن عن الآيفون في الميعاد المحدد ومش بس كدة.. ده هيستعرض فيه كل خواص الجهاز! القرار ده بالنسبة للعاملين على الجهاز كان كارثة حقيقية لأن مع أول تجربة لمميزات في الجهاز كان هيهنج ويعطل وده معناه إن الآيفون هينتهي قبل ما يبدأ وإن جوبز هيعلقهم واحد واحد.. الحل كان تطوير حاجة اسمها The Golden Path أو المسار الذهبي.. وهو ببساطة ترتيب معين للخطوات اللي ممكن يتم عملها على الجهاز بدون ما يحصل مشكلة وأي حركة بسيطة بترتيب خاطئ هتخلي الجهاز يعطل.

بمناسبة الكلام على الابتزاز بالصور وتقنيات التزييف العميق.. في سنة 2020 في شركة اسمها Sensity متخصصة في أمن الهوية الرقمية اكتشفت بوت على تيليجرام بيقدر أي حد يستخدمه لتحويل صورة بنت عادية إلى صورة عارية. البوت كان بيعتمد على تقنية DeepFake مفتوحة المصدر، لكن تم تطويرها بحيث تصبح الصور واقعية لدرجة إن أي شخص غير مختص بالمجال مش هيصدق إنها صورة مزيفة. الأسوء من ده إن البوت كان بيقدم خدماته بشكل مجاني وبيضع علامة مائية على الصور.. ولو المستخدم دفع 1.3 دولار فقط كان بيحصل على 100 صورة إباحية للبنت اللي رفع صورتها للبوت بدون علامة مائية وبأعلى جودة. الشركة قدرت إنها تتبع الصور اللي صنعها البوت ده وتم نشرها بشكل علني.. ووصل عددهم 100 ألف صورة.. ده طبعا غير الصور اللي لم يتم نشرها. يا ريت الناس تخلي بالها.. موضوع تزييف الصور ده بقى أسهل مما تتخيل.. والصور اللي بتترفع للإنترنت عمرها ما بتتحذف.

من حوالي 12 سنة شركة سامسونج أصدرت موبايل جلاكسي S2 بنسخة أندرويد 2.3. الموبايل خد دورته الطبيعية في السوق وبعدها اتوقف الدعم والتحديثات بتاعته. في نهاية الأسبوع الماضي في مطور على منصة XDA نشر روم للموبايل ده بحيث يقدر يشغل نظام أندرويد 12 ! الموبايل اللي بيشتغل بمعالج تردد 1.2 جيجاهرتز و1 جيجابايت رام هيقدر يشغل أحدث نسخة حالية من نظام الأندرويد بعد 12 سنة من إصداره.. ودي أطول فترة دعم لموبايل من يوم ما تم اختراعه. الإصدار الحديث على الموبايل بيشغل كل مميزاته باستثناء بعض المشاكل أثناء استخدام خصائص زي تصوير فيديو.. وأعتقد هتتحل مع تطويرات الروم. دي من مميزات إنك تكون بتستخدم نظام مفتوح تقدر تعدل عليه براحتك.. ومش مضطر تعتمد على شركة تتحكم فيك وتمنع عنك الصلاحيات الكاملة للموبايل اللي انت شاريه بفلوسك. أي حد معاه الموبايل القديم ده يقدر يعمل روت للجهاز وينزل الروم ويبقى معاه موبايل شغال بأحدث نظام أندرويد.

سامسونج بقت بتتعامل مع الشاشات معاملة ملايات السراير..