ادبیات سئونلر

اوشاق ادبیاتی «نهنگ ایله قوش»بیرینجی بؤلوم: سسلندیرن: آیسان حقیقت دوست چئویرمه: ماهنی معرفت «تۆلکو آکادمی» آذربایجان اوشاقلاری ایله داها چوْخ زامان کئچیرتمک اۆچون یئنی بؤلومو ایله بو گۆندن سیزه قوْناق گلیر. تۆرکجه قؽسا انیمیشن، «تۆلکو آکادمی»‌نین یئنی بؤلومودور. بو انیمیشنلرین اؤزللیگی؛ اؤزل حساسیت‌له سئچیلمک، قؽسا، ساده و اخلاقی نۆکته‌لر داشیماق‌دیر. بو انیمیشنلر ۱۱ بؤلومده گۆل بالالاریمیزا سونولور. https://t.me/Adabiyyatsevanlar

اوشاق ادبیاتی دوز کرپیجلر يازان: کامیل آراز كؤچورن: احد فرهمندی قلیب آرخادا بوراخدیغی کرپیجلری گؤروب سئویندی، نئجه شومال، دوزگون دؤردبوجاقلی ایدیلر. - هه، گؤزللر، باخ بئله. سیزین و منیم سایه‌م‌ده یاراشیقلی ائولر تیکیله‌جک، اینسانلار راحت یاشایاجاقلار. کرپیجلردن بیری اونون سؤزونو کسدی: - بورا باخ، قلیب، ایندییه قدر تورپاغی سامانلا قاریشدیریب، آیاقلاییب پالچیق حالینا سالان کیشی ایدی. بو گون بیر اوشاق دا اونا قوشولوب، بالاجادیر، او، بیزی نئجه یئتیشدیره‌جک؟ قلیب جاواب وئردی: - سیزی کیم حاضیرلاییر حاضرلاسین، تکی جان یاندیرسین. پالچیقلا قلیب‌ین صحبتینی باشا دوشن کرپیجکه‌سن اونلارین صحبتینی بئله یئکونلاشدیردی: - من اوغلوملا الیمیزدن گلنی ائتدیک. نه قدر کی، قلیب کورلانماییب، دوزدور، سیز ده گؤزل و دوز اولاجاقسینیز، - دئدی https://t.me/Adabiyyatsevanlar

اوشاق ادبیاتی بو دا اوشاقلار اوچون چیلله توخونمالاری https://t.me/Adabiyyatsevanlar

اوشاق ادبیاتی ✨ پارلاق قلم نشریاتیندان یاییملاندی✨ «اوشاقلار و یئنی یئتمه لره گؤزل حکایه» #شاینا (حکایه)  #شهرام_گلکار طراح: سیامک دریواس نشر: پارلاق قلم ۱۴۰۳ 📖...ایشین پیسی بو ایدی کی، بولت اوندان اوز چئویرمیشدی. سان‌کی بولت، بولت دئییل ده، باشقا بیری ایدی؛ شاینانی ان چوخ دا بو اوزوردو. شاینا، بولتلا کئچیردییی کئچمیش یاخشی یامان گون‌لرینی آنیمساییر، ان چوخ دا اونلارا یاخیلیردی. او، شاینا ایله یول‌بیر یورومه‌یی حاق ائتمیردی؛ او ایسه کی، شاینا توم قلبی ایله اونو سئویردی. بو فیکیرلره دالمیشدی کی، شر دوشدو. داها سونرا او، بالالارینی یاتیرسین دئیه، قانادلاری‌نین آلتینا آلدی. یاتمادان اؤنجه، بیر جوجه‌لره بیر ده گؤی‌اوزونه باخیب،؟سونرا دوداق‌آلتی پیچیلدادی؛ - آللاهیم، چوجوقلاریمی سنین الینه بیراخیرام، سن اؤزون بو کیمسه‌سیزلرین آرخاسیندا دور. سحر تئزدن ایدی؛ هاوا تامام آچیلمامیش، قارالتی ایزلری هله گؤروکوردو. آذان سسی هر زامان‌کیندان داها اورک‌یاخیجی کندین قولاغینی اوخشاییردی... آدرس انتشارات: بناب، خ آب، بین گلبرگ ۵ و ۷ ، نرسیده به مدرسه تیزهوشان، جنب املاک مهرآوران تلفن: 4137745585

اوشاق ادبیاتی قیش گلیب، تاخ تاخ تاتاخ شاختـادان  دوندی   بـوتـون  تاختـا  تابـاخ قارکولک دی، چن دی ، بوز، هر یئر قیرو، هر یئر سازاخ چیلله چیلله  بیـز گره ک  قیش دان  داداخ ائتمه سین چوخ قاش قاباخ * داغلار آغ کؤینک گئییر باغ  و  بستــانــه کولک  لای لای  دئییر شاختادان گؤیده  بولودلار تیتره ییر  هئی  قار یاغییر یئـــر آغیـز آچمیش او  قارلاردان  یئییر آسمـانـه  بـاش  اَیـیــــر  * اولدو  قار هر کوچه دام من  باباملا  جورلـه دیم  قاردان  آدام قیش دادا  وار  چوخ گؤزللیکلرله  لذّتدن  خبـر قیش سیز ائتمز یاز  بو یئر اوسته  قیام قیش، سنه اولسون سلام ! * یئر اوشور قار یاغماسا، داغ  تپه ، چایلار ، باتار  هر گون  یاسا آمما  من  قیشدا  گرکدیر  ایستی  پالتارلار  گییه م قویمایام  تـا  شاختا دان  جانیم  سوسا یا مریضلیکدن  میسا https://t.me/Adabiyyatsevanlar

اوشاق ادبیاتی چیلله_گئجه_سی نین ناغیل‌پایی بوستانچی_و_شاه_عابباس https://t.me/Adabiyyatsevanlar

قونشولار" ائوینی، حیه‌طینی بوتون پیشیک آلاجاق دییه کیشی‌نی قورخوتدولار" آخی پیشیک بالالارین ایکیسی دیشی و دوغان ایدیلار. هم ده ساخلاماقلاری عهده‌سیندن گلمیردی. آنالاری ائو پیشیگی اولدوغونا اونلار دا ائوه داداندیلار، اونلاری ائوده ساخلاماق هر جهتدن کیشی اوچون چتین اولوردو. اونوچون بو صوبح پیشیک‌بالالاری آنالاری ایله بیرگه ائودن اوزاق بیر یئرده آزدیرماغا آپارماق ایسته‌دی. آمما آناپیشیک کیشی‌نین الیندن زویویوب آرخا کوچه‌یه قاچدی. ناچار یالنیز بالالاری آپاردی. ایندی ایسه آنا پیشیگین ناله‌سینه دؤزه بیلمیردی. قارغیشیندان قورخوردو. آنا پیشیک اونا آرخا چئویریردی، سانکی نه ائتدییینی بیلیب، اوندان کوسموشدو! اؤز- اؤزونه دئدی: " نه فرق ائدیر، منیم ده ایکی قیز بالام، کورپه ایکن آناسیز قالدیلار. اونلاری بیر شکیل چتینلیک‌له رحمتلیک آنامین یاردیمی ایله بویوتدوم. اره وئردیم.  ایندی ایسه بو قیریلمش الیم‌له او پیشیک بالالاری آناسیز قویموشام! من نئجه اینسانام آخی؟! ناراحاتلیقدان اللرینی اووشدوردو. یوخ بئله اولماز موطلق صاباح بیر چاره ائتمه‌لی‌یم" فیکیر- خیالدان یاتا بیلمه‌دی، سانکی یئرینه تیکان تؤکموشدولر. صوبحه یاخین هوشلاندی. یوخودا گؤروردو پیشیک بالالاری مطبخ پیچاقی ایله ات تاختاسی اوستونده قیمه- قیمه دوغراییر، اونلار ایسه جیر سسلری ایله چیغیریب مییولداشیرلار! هؤوله‌سک قان‌-تر ایچینده یاتاقدان قالخدی. هاوا تزه ایشیقلانمیشدی. آنا پیشیگی سله‌نین ایچینه قویوب ماشینا آپاردی. ماشینی یاندیریب یولا دوشدو. پیشیک‌لری آزدیردیغی باییر یئره یئتیشدی. سله‌نی ماشیندان گؤتوروب آنا پیشیگی یئره قویدو. آنا پیشیک یئری اییله‌ییب، اؤز اؤزل دیلی ایله بالالارینی سسله‌دی. بالالاریندان خبر اولمادی. بو احوالدا بیر یئنی‌یئتمه اوغلان الینده نئچه سنگگ اونلارا یاخینلاشدی. - سلام دایی. صاباحین خئییرلی. آی آللاه...بو گوزل پیشیک سنین دیر؟ - هن بالام، منیم دیر. اَلی سینمیش کیمی دونن بونون بالالارینی ائله بورادا آزیتمیشام، دونندن بو آللاهین دیلسیز یارانیشی‌نین آرام- قراری یوخدور، هئچ نه یئمیر، یالنیز هر یئری اییله‌ییب بالالارینی آختاریر.  اؤزوم ده پشیمان اولموشام. - آی دایی سنه خوش خبر. من حئیوانلاری اوزللیک‌له پیشیک‌لری چوخ سئوه‌رم. دونن بونون بالالارینی بورادا تاپدیم. آج- سوسوز مییولداشیردیلار. اونلاری توتوب ائویمیزه آپاردیم. آخی ائویمیز ائله بورادا دیر، باخ او قهوه‌ای قاپی بیزیم قاپیمیزدیر. حیه‌طده بویوک بیر نین واریمیزدی، قاری‌ننه‌م داها خسته‌دیر تویوق- جوجه ساخلایا بیلمیر، من پیشیک بالالاری او نینه سالمیشام، یئرلری راحات وایستی دیر آرخایین اول. بوللو یئمک ده وئریرم". اوشاغین گوزلریندن مرحمت، شفقت یاغیردی. - اوندا بالامسان، گل او بالالاری آنادان آییرمایاق، بو آنانی دا اونلارین یانینا آپار. تانریم هئچ بالانی، اوزللیک‌له کیچیک‌کن آناسیز قویماسین. آناسیزلیق چتین درد دیر. کیشی‌نین گوزلرینده یاش گیله‌‌لندی. اوشاقدان گیزلی قالسین دییه گوزلرینی یومدو، آمما یاش گوز قاپاغینی یاندیریب ایستی- ایستی سویوق یاناقلارینا سوزولدو. بو، اوغلانجیغازین گوزوندن گیزلی قالمادی، آمما کیشی اوتانماسین دییه باخیشینی یاییندیریب اؤزونو بیلمه‌مزلییه ووردو. کیشی اوغلانین یومشاجیق تئلینی سیغاللاییب اونونلا ساغوللاشدی و ماشینا ساری یولا دوشدو. اوغلان اوزاقدان اونا ال ائله‌دی و " آی دایی...، پیشیک‌لردن آرخایین اول، اونلاری گوزوم کیمی قورویاجام"،- دئدی. کیشی ده گولومسه‌ییب اونا ال ائله‌دی. " امینم گوزل اوره‌کلی بالام... سن ساریدان امینم...تانریم سنی عائیله‌نه چوخ گؤرمه‌سین"- دئدی. ماشینی یاندیردی، یولو اوستونده سحر یئمه‌یی اوچون ایستی چوره‌ک آلدی. ایندی ایسه سانکی اوستوندن داغ گؤتورولموشدو. ویجدان راحاتلیغی ایله سحر یئمه‌یی یئیه‌جکدی، آخی پیشیک‌لری امین اللره و شفقت‌لی، کیچیک یاشلی بؤیوک اوره‌یه تاپشیرماقدان آرخایین ایدی. https://t.me/Adabiyyatsevanlar

‌اوشاق ادبیاتی پیشیک‌بالالار(یئتی‌یئتمه‌لر اوچون) ✍یازان: سحرخیاوی ماشینی قاپیدا ساخلادی. آچاری کلید یئرینه سالیب قاپینی آچدی. یئنه همیشه کی کیمی قارانلیق دهلیزه کئچدی.پریزی ووروب چیراغی یاندیردی. هالین قاپیسینی آچیب ایچری گیردی. سویوق و قارانلیق هالین دا چیراغینی یاندیردی. الینده کی حصیردن توخونموش سَله‌نی یئره قویدو. بیر آن گؤزو پنجره‌یه ساتاشدی.  پیشیک‌بالالارین آناسی اوزگون، شیشه‌دن ایچری‌یه باخیردی. اونا یازیغی گلدی، پنجره‌نی آچدی، آنا‌پیشیک ایچری‌یه آتیلدی. قابدا قویدوغو قورو خوره‌یه گؤز اوجو ایله بئله باخمادی، سله‌یه ساری گئدیب، دووره‌سینه فیرلاندی، آیاقلارینی قووزاییب سله‌نین ایچینه باخدی، اییله‌مه‌یه باشلادی. سونرا اؤز پیشیک دیلی ایله ایتمیش بالالارینی سسله‌دی. کیشی بو منظره‌یه دؤزه بیلمه‌دی و یانلیش یاپدیغینی دوشوندو. درین بیر کؤکس اؤتوروب،ائوین یالقیزلیق و حوزونلو هاواسیندان چیخماق اوچون سوسیس آلماق بهانه‌سینه کوچه‌نین باشینداکی ماغازایا گئتدی. اورادا ماغازاچی قونشویا اوره‌ک سیررینی آچیقلادی. قونشو: " اولسون، حئیوان اینسان کیمی دئییل، یادداشی ضعیف‌دیر، ایکی گونلوک دیر، بالالارینی اونوداجاق"،- دئدی. کیشی" کئشکه سن دئدییین کیمی اولسون، آمما من گؤره‌ن بو آناپیشیک سان کی فرقلیدی، اونودان دئییل!"،- دئدی. بیرآز دا قونشوسو ایله دانیشیب- دردلشندن سونرا ائوه قاییتدی. هله ده آناپیشیک غریب ناله‌لی سسلر چیخاریب، ائوین هر کونج- بوجاغینی اییله‌ییب بالالارینی آختاریردی. کیشی ایسه اؤزونو گوناهکار حیس ائدیب، سویوق تر باسیب، بدنی‌ گیزیلده‌ییردی. بیر نئچه سوسیس پیشیرسه ده سان کی بوغازی بیچیلدی. شام یئیه بیلمه‌دی. یاتاغیندا اوزانیب گؤزونو تاوانا زیلله‌دی. یادینا بو آنا پیشیگی نئجه تاپماغی دوشدو. او گون آلا تورانلیقدا هله یاتاقدا ایدی. گور، سسلی-کویلو یاغیش یاغیردی، سان کی گؤی ییرتیلمیشدی. یاغیشین سسی، هم ده نارین پیشیک‌بالا جیویلتی‌لرینه اویاندی. اوّلجه یوخو گؤردویونو ساندی. قولاق یاپیرتدی. یوخ یوخو دئییلدی. هؤله‌سک یئریندن قالخیب آرخا حیه‌طه آچیلان هال قاپیسینی آچدی. ها گؤز گزدیردی بیر شئی گؤرمه‌دی. بئله ساندی نارین مییولتو سسلری دامدان گلیر. پیلله‌لردن داما قاچدی. دام یولونون قاپیسینی آچیب دیققتله باخدی، حتا نودان گیلیفینه ده باخدی، گور یاغان یاغیشدان باشقا دامدا هئچ نه یوخ ایدی. پیلله‌لردن آشاغی ائنیب چترینی گؤتوروب حیه‌طه چیخدی. هر یئره گوز گزدیردی، لاپبادان حیط‌ده کی مئیوه جعبه‌سی‌نین ایچینده ایکی تزه دوغولموش پیشیک بالا گؤردو. سان کی آنالاری اونلاری یاغیشدان قورویا بیلمه‌میشدی. بالاجا پناهسیز بدن‌لری گور یاغیشین آلتیندا ایسلانیب، تیر- تیر اَسیردی. ایسلاق پیشیک‌بالالاری گؤتوروب ائوه گتیردی. سشوار توتوب بالاجا بدنلرینی قوروتدو. سورنگ ایله بوغازلارینا آزاجیق ایلیق سود تؤکدو. بیرآز تورالدیلار، ایندی ایسه نارین توکلری‌نین رنگی بلله‌نیردی. بیر باجی، بیر قارداشیدیلار. باجی‌نین رنگی آغ- ساری، قارداش ایسه یاشیل، اوستونده ده قارا زولاقلاری وار ایدی. یاغیش سَیرییه‌ندن سونرا گون چیخدی. هله گوی اوزونده فاطما ننه ده رنگارنگ خالچاسینی اوزاتدی. آنا پیشیک ده دیوار اوستونه گلدی. او دا برک ایسلانمیشدی. کیشی بیر جعبه ایچینه قالین و ایستی اَدیال سَردی، پیشیک بالالاری ایچینه قویدو، بیر پیشیک‌یولو دا آنالارینا آچدی. قاپینی آچیب جعبه‌نی قاپی‌نین قاباغینا قویدو. آنا‌پیشیک‌ین بالالارینی قبول ائتمه‌مه‌سیندن قورخوردو. آخی ائشیتمیشدی: "پیشیک بالالاردان اینسان قوخوسو گلسه، آنالاری داها اونلاری قبول ائتمیر!" قورخوردو ثاواب یئرینه، کاباب ائله‌سین، یازیق پیشیک بالالار آناسیز قالسین! آنا پیشیک اورکمه‌‌دن، دیواردان بالالاری‌نین یانینا دوشسون دییه، هالین قاپیسینی اؤرتوب، پرده‌نی کنارا ووروب یاواشجا پنجره‌دن گوددو. آغ-قارا آنا‌پیشیک بالالارینین مییولتوسونا دؤزمه‌ییب آشاغی ائندی، احتیاطلا جعبه‌یه ساری گلدی. پیشیک یولوندان ایچری گیردی. کیشی یاواشجا هالین قاپیسینی آچیب، جعبه‌نین اوستونه قویدوغو کارتونی کنار ائدیب باخدی. ایلاهی!.... پیشیک بالالار میشامیشلا آنالارینین دؤشوندن سود اَمیردیلر. هردن ایسه چؤهرایی باپ- بالاجا دوداقلارینین قیراغیندان سود آخیردی. سود، آنا و کورپه قوخوسو جعبه‌نین ایچینی بوروموشدو. آمما نه یازیق کی ارکک بالا سویوق دیمه‌‌یه داوام گتیرمه‌دی. ستلجم اولدو. کیشی اونو بایتارا آپاردی. ها داوا درمان ائله‌دی توختامادی و گونلرین بیر گونو دونیانین اوزونو دویونجا گورمه‌دن اؤلدو. آمما دیشی پیشیک بالا بؤیودو و ایندیکی آنا پیشیک اولدو. او دا اوچ اوشاق دوغدو.

اوشاق ادبیاتی اوشاق ادبیاتی هر هفته پنجشنبه گونو ادبیات سئونلر کانالیندا . اوشاق ادبیاتینا دایر یازیلارینیزی بیزه گوندرین . https://t.me/Adabiyyatsevanlar

فلسفی دوشونجه‌لر مؤلف کیمی تورال جعفرلی‌نین یارادیجیلیق دونیاسینا رنگ قاتیر. اونو دیگر یازیچیلاردان فرق‌لندیریر. مؤلف طرفیندن بؤیوک حساس‌لیقلا و اینجه یومورلا یازیلان «سقراط‌لا چای‌خانا صؤحبتلریم» رومانیندا اوخوجولارین دونیاگؤروشونه تأثیر ائده‌جک احوالاتلار، یاناشمالار دا بؤیوک اهميّت کسب ائدیر و بوتون بونلار بیر یازیچی کیمی تورال جعفرلی‌نین نؤوبتی اثرلری‌نین اوغوروندان خبر وئریر. هم ده یاخین زامانلاردا بیر مؤلف کیمی اونا چوخ‌ سایلی اوخوجو سئوگیسی و ماراغی اوچون زمینه یارادیر.  یازیچی اوچون ده ائله ان بؤیوک موکافات اوخوجودور!   https://t.me/Adabiyyatsevanlar

اونسوز دا معاش منی قانع ائله‌میر. آدی گئدیب، اؤزو ایشه گلمه‌ینلرین یئرینه ده ایشلمکدن بئزمیشم... تقسیط کارتیم، بیر ده ایکینجی عالی تحصیل اوچون گؤتوردویوم کرئدیت(وام) اولماسایدی  چوخدان رد اولوب گئتمیشدیم. «بختسیزلر» قصبه‌‌سینده اومیدلرله یاشاماق اؤزونو آلداتماغین ان آسان یولودور...». تورال جعفرلی «سقراط‌لا چایخانا صؤحبتلریم»  رومانیندا سقراطی تیپیک آذربایجانلی کیمی موحیطین تأثیری آلتیندا فورمالاشان «فیلسوف» کیمی تقدیم ائتمکله، نؤوبتی ایلکه امضا آتمیش اولدو. «یعنی، جمعيّت نئجه‌دیرسه، فردلر ده ائله‌دیر» پرنسیپی اثر بویو سلسله کاراکتئر داشیییر. لاکین مؤلف هم ده اوخوجو اوچون دوشونجه‌نین گوجو، اینتئللئکتین(اندیشمندانه، خرد ورزانه) اوستونلوکلری کیمی مسئله‌لری ده قابارتماقلا، گله‌جه‌یین علم، تحصیل اوزه‌رینده قورولماسینا اشاره ائدیر. «سقراط‌لا چای‌خانا صؤحبتلریم»ده عائله‌‌ قارشیلیقلی، آنلاشما، انسانلار آراسیندا مناسبتلر کیمی مسئله‌لر ده اؤنه چکیلیر.  بو باخیمدان، سقراط دا انساندیر، او دا دیگرلری کیمی ائولنمه‌یین، عائله‌‌ قورماغین سوسیو-پسیخولوژی طرفلرینی ایضاح ائتمه‌یه چالیشیر و بونونلا دا گنجلره فایدالی مئساژلار اؤتورور. لاکین تأسف کی،  سقراطی چوخلاری جدّییه آلمیر، اونون فیکیرلرینه اؤنم وئرمیر و مودریک بیر آدامین مادّی دورومونون آشاغی اولماسیندان دولایی اونا حؤرمت ائتمیرلر. طبیعی کی، بوتون بونلار سقراطی ناراحات ائتمیر. او داها چوخ جمعيّتین جاهل کوتله‌یه چئوریلمه‌سیندن ناراحاتدیر و بونو صؤحبتلرینده قئید ائتمکله، چیخیش یولونو گؤسترمه‌یه چالیشیر. آشاغیداکی دیالوقا دقت ائدک: «طبیعت انسانی اخلاقلی ائتسه ده، انسانین ایچینده‌کی حئیوانی قووا بیلمه‌دی. بو حئیوان انسانی اله وئردی، اونا ماغارا حیاتینی خاطیرلاتدی. بئله‌لیکله اینسان اخلاق آدلی بیر اویدورمانی فیکیرلشمکدن باشقا یول گؤرمه‌دی. معاصر انسان اوچون گئییم، پول اخلاقدان اوستون حساب اولونور. اصلینده ایسه بیر انسان اوچون اخلاق چؤرک و پالتاردان داها واجیبدیر -او گون تیکتوکدا گیج-گیج حرکتلر ائدن  یاری چیلپاق بیر قیزا شیر آتدیلار- صؤحبتین مغزینی ديیشمک ایسته‌دیم. -دئییرم  سنین ده بو شیت زارافاتلارین اولمایا دا. بئله پیس آدام دئییلسن، آنجاق یئرینی بیلمیرسن ده. سقراطین قاشلاری چاتاندا وضعيّتین نه یئرده اولدوغونو تئز آنلاییرام. -نییه؟- تعجب‌له سوروشورام. گویا هئچ نه‌دن خبریم یوخدو. -یئرینی بیلسن، ایندی سن دانیشاردین، من قولاق آساردیم. -تیکتوکا، فئیس‌بوکا مناسبتین نئجه‌دیر؟ -معاصر انسان بایاق دئدیییم ایچینده‌کی حئیوانی محض بو جور اورتاملاردا داها چوخ باییرا بوراخیر. هئچ کیم ایچینده‌کی حئیوانی کیتاب‌خانادا، اونیوئرسیتئتده، آکادمیادا گؤسترمک ایسته‌میر. چونکی باشا دوشور کی،  ایچینده‌کی حئیوان اوچون بئله یئرلر یاددیر، داردیر، سیخیجی‌دیر. آنجاق سنین دئدییین تیکتوک کیمی یئرلرده اینسان اؤز ایچینده‌کی حئیوانی سربست بوراخا بیلیر، انسانین اینستیکتیو(غریزه) یادینا دوشن ماغارا حیاتی بئله یئرلرده داها ال‌وئریشلی ایمکانلارا صاحب اولور. -بیلیرسن، بیر شیرین قیمتی نئچه‌یه‌دیر؟ دئییلنه گؤره، آلتی یوز ماناتدیر! گؤزومو آغاردیب سقراطین تورپ کیمی قیزاران بورنونا باخیرام. -آی آخماق، او شیری آتانلار دا سنین کیمی ایچینده حئیوانلا یاشایانلاردی دا». مؤلف سوسیال شبکه‌لرین انسان حیاتینا تأثیرینی سقراطین دوشونجه‌لری فونوندا تقدیم ائتمک‌له، اوخوجو اوچون سوسیال شبکه‌لرین ماهیّتینی و حقیقی طرفلرینی گؤسترمیش اولور. بو دا مؤلف طرفیندن گنجلرین پیس وردیشلردن اوزاق دورماسی اوچون چاغیریش کیمی باشا دوشوله بیلر. گنجلرین مطالعه‌یه، کیتابا  علمی یئنی‌لیکلره یؤنلندیرمه‌یین واجیب‌لییی بیر داها اورتایا چیخمیش اولور... «سقراط‌لا چای‌خانا صؤحبتلریم» هم ده تحصیلین، ساوادین، بیلییین آرخا پلانا کئچدییی، حقیقتده ایسه اینکیشافین، ترقّی‌نین اساس منبعی اولدوغو گئرچکلییینی بوتون وارلیغی ایله گؤسترمه‌یه چالیشان سقراطین معيّن معنادا اؤزو ایله موباریزه‌سی کیمی ده قبول اولونا بیلر. چونکی او، معاصر دونیادا یاشاماغین و دوزگون قرارلار قبول ائتمه‌یین نه قدر چتین و تهلوکه‌‌لی اولدوغونو درک ائدیر. روماندا مختلف سوسیال مسئله‌لره فلسفی پریزمادان یاناشیلماقلا، اجتماعی اهميّت کسب ائدن مسئله‌لره یئر آیریلیب، بیر طرفدن ده انسان پسیخولوگییاسی‌نین مرکّب‌لییی، حیله‌‌گرلیک، اونوتقانلیق، نانکورلوق کیمی مسئله‌لر روماندا اینجه دئتاللارلا تصویر اولونوب، تورال جعفرلی «سقراط‌لا چای‌خانا صؤحبتلریم» رومانیندا کوتله‌نی ایداره ائدن ساوادسیزلیق سیندروموندان قورتولماغین یوللاری حاقیندا سقراطین دیلی ایله مختلف آختاریشلارا جهد ائدیب.

چاغداش آذربایجان نثرینده بیر ایلک «تورال جعفرلی»نین «سقراط‌لا چای‌خانا صؤحبتلریم» رومانی حاقیندا   واحید علی‌اوغلو کؤچورن: ویدا حشمتی حاضیرلایان: ادبیات سئونلر «اگر سؤزلر سنی اؤزوندن چیخارا بیلمیرسه، دئملی یا عاغلین بونا ایمکان وئرمیر، یا دا دلی اولماق ایسته‌میرسن».  آلمان فیلوسوفو «لودویگ فویرباخ»ین بو فیکری ایله یازیما باشلاماق ایستردیم، چونکی بو یاخینلاردا اوخودوغوم و تأثیریندن اوزون مدت چیخا بیلمه‌دیییم(اصلینده هله ده تأثیرینده‌یم) رومان حاقیندا اوخوجو قئیدلریمی یازماقلا، محض سؤزون و دوشونجه گوجونون ایمکانلارینی بیر داها نظردن کئچیرمک فورصتینی الده ائتدیم... گنج یازیچی، فلسفه آراشدیرماچی‌سی  گله‌جه‌یینه بؤیوک اومیدلر بسله‌دیییم تورال جعفرلی‌نین «سقراط‌لا چای‌خانا صؤحبتلریم» آدلی رومانی چاغداش آذربایجان نثرینده بیر سیرا ایلک‌لرله دقتی جلب ائدیر. بلی، محض «ایلک»لرله بئله کی مؤلف آنتیک یونان فیلسوفو سقراطی معاصر دؤورده، هم ده آذربایجاندا تصویر ائتمکله، ایلکه امضا آتمیش اولدو. تورال جعفرلی‌نین فلسفه مأذونو اولماسی و فلسفه آراشدیرماچی‌سی کیمی فعالیّتی اونا گئنیش ایمکانلار وئرمکله یاناشی، هم ده اونا بیر مؤلف کیمی فلسفی فوندا رومان یازماغا ال‌وئریشلی زمینه حاضرلاییب. بو معنادا، مؤلف هم ده فلسه فنی ادبی کونتئکستده اوغورلا استفاده ائده‌رک  نؤوبتی ایلکه امضا آتیب، دیگر بیر طرفدن مؤلف روماندا معاصر دؤورون آکتوال مسئله‌لرینی اینسان کاراکتئری‌نین ضدّییّتلرینی آیدین، تمیز و دقیق ایفاده‌لرله اخذ ائتدیره‌رک، اوخوجونو متنین سئحرینه سالماق ایشی‌نین عهده‌سیندن گلیب و بئله‌لیکله  اوخوجونو متنه جلب ائده بیلیب. بو دا چوخ اؤنملی بیر فاکتوردور. اگر مؤلف اوخوجونو یازمیش اولدوغو متنه جلب ائده بیلمیرسه، دئمه‌لی اوغورسوزلوغا دوچار اولوب. بو معنادا، تورال جعفرلی اوخوجونو متنه جلب ائتمه‌یی اوستالیقلا باجاریب، نظره آلساق کی، «سقراط‌لا چای‌خانا صؤحبتلریم» مؤلفین ایلک رومانیدیر، بو دا گله‌جک اثرلر اوچون نیک‌بین دوشونمه‌یه اساس وئریر. روماندا حادثه‌‌لر «بختسیزلر» قصبه‌‌سینده جریان ائدیر.  عادی معیشت قایغیلاری ایله موباریزه آپاران قصبه‌‌ ساکینلری حیاتلارینی مونوتون، بوش و معناسیز، کئچیرمکله، سانکی اومیدسیزلیک ایچینده یوخ اولماغین آغریلاریندان ذؤوق آلیرلار. بئله اولان حالدا قصبه‌‌ قانونلاری اوچون یاد حساب اولونان، اؤز پرنسیپ‌لری و حیاتا باخیش بوجاغی ایله سئچیلن، ضیالی کیمی فیکیرلرینی جمعيّته چاتدیرماق ایسته‌ین قهرمانین اؤزونه یئنی دوست تاپماسی ایله حادثه‌‌لر یئنی مجرا آلمیش اولور. یئنی دوستون کیملییی ایسه روماندا ایلک واختلار سیرّ اولاراق قالیر، سونرا ایسه اوخوجو سقراط‌ین حیاتا و اینسانلارا اولان مناسبتی ایله تانیش اولور. بو تانیشلیق اؤزونده فرقلی و قریبه دوشونجه‌لرین مئیدانا چیخماسی ایله نتیجه‌لنیر. «بختسیزلر» قصبه‌‌سی‌نین ساکینلری کناردان عادی گؤرونن بیر حیات یاشاییرلار. لاکین گونلرین بیر گونو پئیدا اولان غیر عادی  قریبه بیر آدام قصبه‌‌نین حیاتینا، دونیایا باخیشینا قارشی چیخیر و بوتون دقتلری اؤزونه چکیر. همین آدام قدیم یونان فیلسوفلاریندان بیری اولان سقراط‌دیر. درین داخلی بحرانلار کئچیرن بیر-بیری‌نین آردینجا عاغیلا سیغیلماز حادثه‌‌لرله قارشیلاشان قصبه‌‌ ساکینلریندن بیری، سقراطی کشف ائدیر و اونونلا دوستلوق مناسبتلری قورور.  چای‌خانادا باش توتان صؤحبتلر اؤزونده فرقلی، یئنی و فایدالی موضوع‌لاری احتیوا ائدیر. روماندا حادثه‌‌لر کئچمیشله گله‌جه‌یین، قارانلیقلا ایشیغین، یئنی‌لیکله کؤهنه‌لییین قارشی دورماسی فونوندا جریان ائدیر. ایندی قصبه‌‌ ساکینلری‌نین نجات یولو هر ایکی قهرمان اوچون بؤیوک اؤنم داشیییر. سقراط و دوستو «بختسیزلر» قصبه‌‌سی‌نین ساکینلری‌نین دوشونجه‌لرینی، حیاتا باخیشلارینی دگیشه بیله‌جکلرمی؟ یوخسا اونلار دا قصبه‌‌ قانونلاری ایله یاشاماغا داوام ائده‌جکلر؟ بو سواللار اوّلجه کیلید کاراکتئرینی داشیسا دا، سونرا هر بیر سوالین آچاری اوخوجو اوچون تقدیم اولونور. اوخوجو روماندا هم اؤزونو هم ده اطرافینداکی اینسانلاری گؤرور، تانیییر. بو دا رومانی داها دا ماراقلی ائدیر. ایش حیاتیندا هامیمیزین قارشیلاشدیغی انسان کاراکتئری‌نین مختلف عئیبه‌جرلیکلری روماندا گوزگو افکتی وئریر. مثلا  آشاغیداکی متنه دقت ائدک: «ایشده مودیرله مباحثه ائتدیم. او منه آخماق دئدی. من ده اونا «یاراماز» دئدیم. نتیجه‌ده، من حاقلی چیخدیم. بو دا مسئله‌نی بیر آز بؤیوتدو. صحبت خادیمه‌لره کیمی گئدیب چیخدی. خادیمه‌لر ده منیم حاقلی اولدوغومو تصدیقله‌دیلر. آنجاق بونو اعتراف ائده بیلمه‌دیلر، چونکی ایشدن چیخماق انتحارا برابردیر بو زاماندا..‌.  مباحثه‌میزین سونوندا عریضه یازیب ایشدن چیخاجاغیمی بیلدیردیم. https://t.me/Adabiyyatsevanlar

صولحه سس وئرین اوخویور:علی نوروزی https://t.me/Adabiyyatsevanlar

ائلدار موغانلی سنه دئیه بیلمه‌دیک‌لریمی شیتیل- شیتیل عؤمرومه اکدیم؛ گونو گوندن بوی آتدی‌لار یاشادی‌لار یاشاتدی‌لار. سنه دئیه بیلمه‌دیک‌لریمی یارپاق- یارپاق گون‌لریمه سپدیم آی‌لاریما دویونله‌دیم؛ بعضا شیدیرغی یاز یاغیشی اولوب یاغدی‌لار کؤکسومه، بعضا کولک‌لی پاییز یاغمورو اولوب اسدی‌لر اوستومه. آت اوستونده ده‌ییشن ایل اولدو سنه دئیه بیلمه‌دیک‌لریم ماویلیکده کیشنه‌دی قانادی یئل‌لره میدان اوخودو سینه‌سی قاسیرغالارا شاهه قالخدی آتلی‌سی آت‌سیز چاپدی آرزولارین ائنین- بویون، آت‌سیزی بایراغ ائتدی رؤیالارین قیزیل دونون. سنی منه یاشاتدی سنی منده یاشاتدی سنه دئیه بیلمه‌دیک‌لریم؛ سنه دئمه‌دیک‌لریم. شهریور ۱۴۰۲- تهران قایناق:ایشیق سایتی

✍: عاصم اسدی سن‌دن تئز، اؤله‌جه‌یم اؤلوب، دیریله‌جه‌یم سن سئودیگین ماهنی‌یا، چئوریلیب، گله‌جه‌یم! https://t.me/Adabiyyatsevanlar

علی رشتبر قاییب سسلی ماهنیلاردا تاپا بیلمزسن، سوسقون شعیرلرده گل آختار منی. دوغویا باتییا  آتینی چاپما، بوراخدیغین یئرده گل آختار‌ منی. چؤکموشم ،بایقوشون اؤز دامیندایام، آلیشیق چؤپو تک کؤز کامیندایام... بیر یاریم سئوگینین آخشامیندایام، یورولما گل بیر ده... گل آختار‌ منی. قوشول سکوتومدان دوغولان سسه، اؤزونو چوخ یورما یولو سال کسه... سن گؤروش سازینی اوخشا، من ایسه _ یانیم پرده پرده، گل آختار منی. سنی آند وئریرم اولدوغون دینه، الینه مؤحتاجدیر بو وارلی سینه. او سولقون دنیزین جانی خترینه، وئرمه قوشا-قوردا ،گل آختار‌ منی. بیلمیرم کی داها کیمم نه‌می‌یم؟ قاییبام، بهمنم یا نسیمی‌یم؟ من کولو ساورولموش او دیل کیمی‌یم، ایرم آلتی* آذرده گل آختار‌ منی. *ایرم آلتی: ایرمی آلتینین‌ دئییم طرزی

مصطفی‌اسلام‌اوغلو گؤیه باخدیم، گؤزو یاشلی. یئره باخدیم، یئر یاسلی. سولار بوگون قان دادیندا. اسکی، یئنی، بؤیوک، کیچیک، قارا، قیزیل- بوتون دردلریم بوردا. سن هارداسان؟ سن و قوشلار، گؤزیاشینین گؤزیاشینا بنزه‌دییی قدر بنزه‌ییرسینیز. وورولان بیر جئیرانین، بالاسینا سؤیله‌دییی نغمه‌نی سؤیله‌ییر اونلار؛ بو صاباح یئنه قوندولار تئل هؤرگویه، منی آجیملا باش باشا بوراخمادیلار. سن هارداسان؟ هاوا سویوق، دیشاریدا قار یاغیر. هر زامان اللریم اوشویوردو، بو گون ایچیم اوشویور. حسرتین گلدی، خیالین گلدی، باااخ، عطرین ده گلیر! بو گون «یعقوب» اولدوم؛ هئئئی...! ائی آجیلارین قادینی! سن هارداسان ؟ https://t.me/Adabiyyatsevanlar