ادبیات ائوی

#6 #موسیقی #سیل_گئتسین موسیقی: #روسلان_صفراوغلو سؤزلر: #رامین_عدالت_اوغلو   اوخویور: #آلماخانیم_احمدلی غملی دایانما چالیش عکسینه سوسما دانیش سیل گؤزونون یاشینی، دَیمز اونا اونا سن نه‌لر ائتدین عؤمرونو هدر ائتدین آغریتما باشینی، دَیمز اونا (او کی سنی اینجیدیر او اوره‌یی پارچالا بؤل گئتسین جانینی دا سیخما اونا گؤره آغلاما گول گئتسین اؤزون اؤزونه ظولم ائیله‌مه‌یین بیر فایداسی یوخ اونو حیاتیندا مجبور ساخلاما سیل گئتسین)×2 قدرینی بیله‌نی سئو دردینی بؤله‌نی سئو حالینا یانان اولسون، چوخ سئوسین هرکسه اوزاق اولسون تک سنه دایاق اولسون عشقینی قانان اولسون، چوخ سئوسین (او کی سنی اینجیدیر او اوره‌یی پارچالا بؤل گئتسین جانینی دا سیخما اونا گؤره آغلاما گول گئتسین اؤزون اؤزونه ظولم ائیله‌مه‌یین بیر فایداسی یوخ اونو حیاتیندا مجبور ساخلاما سیل گئتسین)×2 #ادبیات_ائوى @AdabiyatEvi

#اؤیکوجوک #حیکایه #اورکده_بوغولموش_آرزولار یازیچی: #حسین_واحدی آنا، اوشاغین قولوندان چكه-چكه، كوچه‌دن ائوه آپارماق ایسته‌ییردی، قیزجیغاز ایسه، آغلایا- آغلایا، "منه دوندویما آل، من دوندویما ایستیرم!" -دئییردی. آنا قونشولارین یانیندا اوزو قیزارا-قیزارا اوشاغی ائوه آپاردی. چورویوب پاسلانمیش قاپینی ایشیلله‌ییب، حیطه گیردی‌لر.  اوشاغین آغلاماق سسی ائوی آلتینا آلمیشدی. اوشاق حیطده قالیب گؤز یاشلاری اونون تكجه یولداشی اولدو. آنا، اوتاقدان، گئجه یاغیش یاغان زامان ایچه‌ری‌یه قویان قابلاری حیطه گتیریب تاوان‌دان دامان سولاری كردی‌یه بوشالتدی. قیزجیغاز، باشین حیطده اولان بؤیوك تاغارا دایاییب، درین یوخویا جومموشدو. قاپی دؤیولدو، آنا قاپینی آچماغا گئتدی، قاپینی آچارکن اَرینی گؤروب: "آى كیشی نه اولدو؟" "یئنه قاییتدین؟" –حزین سسله دئدی. کیشی باشینی آشاغی سالیب، اوزوجو سسله: «اوچ ساعاتدی، فحله مئیدانیندا بونا-اونا یالوارماقدان یورولدوم، ایش یوخویدو» -دئییب، یاواشجا ایچه‌ری گیردی. #ادبیات_ائوى @AdabiyatEvi

تکجه سن عزیزیم یوخسان، ندنسه هوشون ییغا بیلمیر باشینا، دونیام ایچیمده گزیشیر گؤز یوماندا من مینلر منه اوخشار بوغولموش آدام هارداسا گؤزلری باغلی بیر اوغلان کئچمیشه قاریشیب ایتیر اؤزونده من سنی یوخویا وئره بیلمیرم یوخلوغون آییق‌دیر شهْرین گؤزونده بیر بیر اوشاق سسی سؤنور دونیادا آللاه دا جان وئریر دونیادان اوزاق گئجه آدلی جلّاد، خاطیره، خیال هانسینا سؤیکَنسم، قان آپاراجاق آبیرسیز کیشی تک، هاچان گؤره‌سن آیریلیغین قیریش دوشمور اوزونه تانری بخت بؤلن‌ده، سَرسم باشیمی بلکه ده چوخ گؤردو سنین دیزینه یان یؤره‌میز دولو یاد تانیش‌لارلا هر کس اؤز کؤچونو سورور دونیادا پیچاق تک قانیمدان دیریلیر یاشام هر شئی بو دونیادا دَییشیب داها چؤرک داشدان چیخیر آما عزیزیم سئوگی چیخمایاجاق داش‌ اوره‌ییندن بو ائو اوچوغوندان اؤزونه ائو تیک اؤز کؤچونو سورن‌ هر کس کیمی سن #سجاد_گل_نژاد #ادبیات_ائوى @AdabiyatEvi

#شئعیر تکجه سن یوخسان عزیزیم شئعیر و سس: #سجاد_گل_نژاد #ادبیات_ائوى @AdabiyatEvi

#باش_ساغلیغی 🖤 گلن بیردیر، گئدن بیردیر، قالان بیر، گلن قالماز، گئدن گلمز، عجب سرّ. بیر اوّل وار، بیر آخیر وار، دئییرلر، بو بیر سؤزدور، نه اوّل وار، نه آخیر... #میرزا_مهدی_شکوهی آلدیغیمیز آجی خبره گؤره آذربایجانین آدلیم و دَیَرلی شاعیری، علی جوادپور جناب‌لاری‌نین آناسی وفات ائدیب. بئله‌لیکله ادبیات ائوی طرفیندن اونون محترم عائله‌سینه تسلیت دئییریک. #ادبیات_ائوى @AdabiyatEvi

اینسانین دوشونجه‌سی دیل‌ده باش وئریر. هابئله، اینسانین وارلیغی دیلده گئرچک‌لشد‌ییی زاماندان او، باشقا جانلی‌لاردان سئچیلمه‌یه باشلاییر. ارسطو اینسانین حئیوان‌لارا اوستونلویونون باشلیجا نه‌دَنینی «نطق»ده گؤردوکده یانیلمیر. ▪️قاپالی توپلوم استعاری (یعنی شعر دیلی ایله) دانیشیر، آچیق توپلوم ایسه، مجازی. بیز استعاری دانیشیقدان مجازی دانیشیغا کئچمه‌لی‌ییک. ▪️صنعتين باشليجا گؤره‌وی بيلگي‌لنديرمک دئييل، ائتکي‌لنديرمک‌دير. مسئله بوراسيندادير: ياشامين آرخاسيندا حقيقی دونيا يوخدور، حقيقت ياشامين اؤزونده‌‌دير. صنعت اولای اولاراق ياشامی ياراديرسا، دئمک حقيقت ده اونون تؤره‌مه‌سی‌دير. ▪️تاريخه جنسيّت گؤزويله باخارکن بونو آيدين گؤروروک:‌ قادين، کيشی‌لرين گؤزونده دوغانین سيمگه‌سينه چئوريلير. اينسان، دوغانی [طبيعتی] جايناغينا آلير، کيشی ايسه قادينی. بونون اوزون کئچميشی وار. قادين، نئجه دئيَرلر، اؤزونون دوغال کيم‌لييی ايله تاريخين يئتيرمه‌سی‌دير؛ قادين وارليغينا گؤز يومولموش کيشی‌لرين تاريخی. ▪️بیز باشقا بیر دیل‌ده کائناتدا اولدوغوموزو، وارلیغیمیزین ائوینده اولدوغوموزو حس ائده بیلمه‌ریک. بو یالنیز آنا دیلینده باش وئره بیلر. ▪️اونوتماياليم؛ ياشام گله‌جک کيمی‌دير، اؤنجه‌دن يارانماييب، اونو عمل‌لريميزله ياراديريق. ياشام وئريلميش دئييل، اؤنجه موجوديتی يوخدور، لحظه‌ده يارانير. ياشامين مادی گوجو بيليم‌ده، فلسفه‌ده، صنعت‌ده‌دير. ▪️منجه، آناليق قادينين لذت آلديغی بير وظيفه‌دير، آما کيشی‌لر بو وظيفه‌نی ايسته‌نيلن قدر قوتسال‌لاشديراندا، سانکی بونو دئمک ايسته‌‌ييرلر: سن اوتور اوشاق دوغ، من توپلومو یؤنه‌ته‌جه‌یم. ▪️دیل دوشونجه‌نین آنلاتیم اورتامی، بیچیمی، ظرفی کیمی نظرده توتولسا بیله، اینسان وارلیغی‌نین آنلامی دوشونجه‌دن دئییل، اوندان آسیلی‌دیر. ▪️تک‌سسلی شعر بوتون سس‌لری باتيرماق ايسته‌يير. دئوريم، اوشاق‌لارينی اودور. چوخ‌ سسلی شعر ايسه ديره‌نيش اوجاغينا سو جالايير. ▪️دیل مسئله‌سی آز ساییلی سؤزلرله ساهمانا سالیناسی دئییل. دیل دالغالی، اوج-بوجاقسیز بیر دنیزدیر. ▪️ادبیات، شعرله نثردن اولوشور. آنجاق توپلومدا تکجه شعر یازیلیرسا، دئمک، توپلوم گئری قالیب. ▪️دیلی گلیشدیریب زنگین‌لشدیرمکده باش ووراجاغیمیز بیرینجی خزینه قوتادغو بیلیک، دیوان‌-لغات-التورک و دده قورقود کیمی اثرلردیر. اوسته گل فولکلور و شفاهی دیلی. لاکین علمی و فلسفی دیلین احتیاجلاری باخیمیندان بونلارداکی سؤز داغارجیغی اولدوقجا کیچیک‌دیر. بونا گؤره سؤز تؤرتمک قاچیلمازدیر. یازیچی: #ائیواز_طاها #ادبیات_ائوی @AdabiyatEvi

#مقاله #سئچیلمیش_سؤزلر یازیچی: #ائیواز_طاها #ادبیات_ائوی @AdabiyatEvi

گونلرین بیر گونونده یوخسوللوقدان، قارا گوندن جانا گلمیش بیر کیشی قرارا گلدی کی، گئدیب قارا چوخاسینی تاپسین. بیر آز سودان، چؤرکدن گؤتوروب یولا دوشدو. گئتدی، گئتدی یولون اوستونده بیر قوردا راست گلدی. قورخدو، دولانیب آیری طرفدن گئتمک ایسته‌دی. آنجاق قورد گوجو-بالله ایله باشینی قالدیریب «قورخما» –دئدی، سنینله ایشیم یوخدو. کیشی قوردون یانینا گئتدی. قورد سوروشدو: – هارا گئدیرسن؟ + قارا چوخامین دالینجا. – اونو تاپسان، منیم ده مشکلومو اونا یئتیر، باشیم چوخ آغریییر. سوروش، گؤر، بونون درمانی نه‌دیر؟ کیشی قبول ائدیب، اوندان آیریلدی. گئتدی، گئتدی بیر اکینچی‌یه یئتیشدی. اکینچی یئر شوخوملاییردی. اونا سلام وئریب «یورولمایاسان» –دئدی. اکینچی اونون هارا گئتدییینی سوروشدو. او دئدی: – قارا چوخامی تاپماغا. + اونو تاپسان، منیم ده مشکلومو دئ، بو یئره نه قدر قوللوق ائدیرم، هئچ نه یئتیرمیر. گؤر، بونون سببی نه‌دیر؟ کیشی قبول ائدیب اوندان آیریلدی. گئتدی، گؤردو بیر شاه، هاراسا اوردو چکیر. شاها سلام وئردی. شاه اوندان هارا گئتدییینی سوروشدو. کیشی دئدی: – قارا چوخامی تاپماغا. + اونو تاپسان، منیم ده مشکلومو یئتیر. من هانسی پادشاه‌لا دؤیوشورم، سونوندا مغلوب اولورام. سوروش، گؤر، بونون سببی نه‌دیر؟ کیشی قبول ائدیب آیریلدی. گئتدی، نهایت قارا چوخاسینی تاپدی، اؤز وضعيت‌ینی، یولدا باشینا گلن ماجرانی اونا دانیشدی. قارا چوخا دئدی: – شاها دئیرسن «سنین دؤیوش‌لرده مغلوب اولماغین اونا گؤره‌دیر کی، قادینسان!» اکینچی‌یه گلدیک‌ده ایسه اونا دئیرسن کی، او یئرین آلتیندا قیزیل وار، اونو چیخارسا اکینی یئتیرر. قوردا دئیرسن کی، اونون باش آغریسی‌نین درمانی بیر آخماغین بئینیدی، اونو یئسه باشی‌نین آغریسی کئچر. کیشی سوروشدو: – بس من نه ائتمه‌لییم؟ + سنین باختینی آچمیشام، گئت، ایشین دوزه‌لر. کیشی قارا چوخادان آیریلیب قاییتدی. گلیب شاها یئتیشدی. دؤیوش‌لرده مغلوب اولماسی‌نین سببینی سؤیله‌دی. شاه دئدی: – دوزدور، من قادینام، گل منی آل، سن شاه اول، من سنین آروادین اولوم. کیشی: – یوخ، منیم شاه اولماغا احتیاجیم یوخدو، آرتیق قارا چوخامی تاپمیشام دئییب، آیریلدی. گلیب اکینچی‌یه یئرین آلتینداکی خزینه‌دن خبر وئردی. ایکیسی کؤمکله‌شیب یئری قازدیلار، قیزیلی چیخارتدیلار. اکینچی تکلیف ائتدی کی، گل، بو قیزیلی بؤلک. سن نه قدر ایسته‌ییرسن گؤتور. کیشی، یوخ، منیم قیزیلا احتیاجیم یوخدور، آرتیق قارا چوخامی تاپمیشام -دئییب، اوندان آیریلدی. گلیب قوردا چاتدی. قورد دئدی: – هه. نه اولدو، باش آغریمین درمانینی اؤیره‌نه بیلدین‌ می؟ + اؤیرندیم، اونون درمانی بیر آخماق آدامین بئینیدی. قورد اونون باشینا گلن ماجرانی سوروشدو. کیشی بوتون احوالاتی دانیشدی. قورد بیر آز فکرلشدیک‌دن سونرا دئدی: – من باخیرام، دونیادا سندن آخماغی یوخدو. باختینا چیخان نه شاهلیغی قبول ائدیب‌سن، نه ده قیزیلی بؤلوب‌سن. سندن آخماغینی تاپماق اولماز. قورد بو سؤزو دئییب، جوموب کیشی‌نین بئینینی یئدی. قایناق: آذربایجان شفاهی خالق ادبیاتی کلیاتی یازیچی: #جلیل_عبدالله حاضیرلایان: #یوسف_شیرین_پور #ادبیات_ائوی @AdabiyatEvi

#فولکلور فولکلوروموزدا قاراچوخا #ادبیات_ائوی @AdabiyatEvi

گونئی آذربایجانلی‌لارین قاراباغا یازدیغی شعرلر و حیکایه‌لر آنتولوژییاسی، «اؤنجه وطن (گونئی‌دن قاراباغا)» آدیندا باکی شهرینده چاپ اولونوبدور. بو کیتابی، نرگیز اسماعیلووا و علی چاغلا ترتیب ائدیب‌دیرلر. کیتاب، «یاراسا نشریاتی» طرفیندن چاپ و نشر  اولونوبدور. ادبیات ائوی طرفیندن تبریک دئییریک. #ادبیات_ائوى @AdabiyatEvi