Bac Journey 💜

👩🏻‍🏫 أساتذة ومصادر مفيدة في الألمانية 🇩🇪

1️⃣ Deutsch mit Haddadi 2️⃣ Brahim Allemand 3️⃣ الألمانية مع الأستاذ حريزي 4️⃣ Chaouki Deutsch #الالمانية

💗القناة:https://t.me/bac_with_mikaa18

🇩🇪 كل ما تحتاجوه في اللغة الألمانية تلقاوه هنا! ✨

رح نجمعلكم كل ما يخص الألمانية في بلاصة وحدة باش تسهال عليكم القراية والمراجعة 🤍📚 📌 وش راح تلقاو؟ 👩🏻‍🏫 أساتذة ومصادر مفيدة 📖 دروس وملخصات 📝 فقرات جاهزة 📚 قواعد اللغة 🔤 تصريف الأفعال 📙مصطلحات وحدات الالمانية ✍🏻 تمارين ومواضيع 🎯 مواضيع بكالوريا للمراجعة والتدريب كلش منظم باش تلقاو واش تحتاجو بسهولة 🇩🇪✨ #الالمانية

💗القناة:https://t.me/bac_with_mikaa18

اذا حبيتي تكملي عربية شوفي هذي سلسلة

إييه تقدري إن شاء الله بصح ما ننصحكش تكملي لبرنامج كامل ضك خليه مع لفصل الأول باش تقراي كل درس مليح وتفهمي لمنهجية تاعو خاطر إذا كملتيه ضك وما رجعتيش تراجعيه رح تنساي بصح إذا كل أسبوع ترجعي تراجعي واش قريتي وتحلي مواضيع راح تثبتيه مليح يعني كمّليه نورمال مع فصل أول وكل أسبوع ديري مراجعة وحلّي مواضيع وإن شاء الله تقدري تضمني معدل ممتاز فالعربية

شوفي نظام غذائي اهم حاجة متكثريش ماكلة برا لانو اذا رح ديري ليكور تولي تاكلي برا سيي نقصي و لا ادي فطورك معاك و كاين مكملات غذائية تقدري تعاوني رحك بيهم كيما Vitamin D و Omega-3 وVitamin C وCalcium وB12 و multivitamines خيري 2 ولا يعاونوك و كي تعياي ريحي متضغطيش على روحك ريحي نهار و لا يومين و عاودي ولي تقراي و مراجعة نهائية اقلها تخليلها شهر باش تحلي بزاف مواضيع و سلاسل حنا نحطولكم في كل وحدة و اساتذة كاين محمد للرياضيات و سكي و ترير و جوفر و أمير و يونسي

📚 المكتسبات القبلية لي لازم تكونو مراجعينهم قبل ما تبداو العام الدراسي (باك 2027) السلام عليكم 🌸 قبل ما ندخلو في برنامج الباك كاين شوية دروس لازم تكونو راجعتوهم خاطر راح تحتاجوهم طول العام. إذا لقيتو روحكم ناقصين في وحدة منهم حاولو راجعوهم من ضم 💪

🧮 الرياضيات

✅ المتطابقات الشهيرة. ✅ التحليل. ✅ النشر. ✅ توحيد المقامات. ✅ حل المعادلات (درجة أولى، ثانية وثالثة). ✅ الحصر، المجالات والقيمة المطلقة. ✅ الدوال المرجعية ورسمها. ✅ تركيب الدوال. ✅ مجموعة تعريف الدالة. ✅ القراءة البيانية. ✅ الاشتقاق وقوانينو. ✅ النهايات والتفسير الهندسي تاعها. ✅ دراسة الإشارة. ✅ دراسة تغيرات الدالة. ✅ جميع حالات معادلة المماس. ✅ كيفاه ترسمي منحنى انطلاقًا من منحنى آخر. ✅ المناقشة البيانية. ✅ المتتاليات (العددية والهندسية). ✅ الوسط الحسابي والهندسي. ✅ قوانين المتتاليات والمجاميع. ✅ الاحتمالات. ✅ المتغير العشوائي. ✅ الأمل الرياضي. ✅ التباين والانحراف المعياري.

⚛️ الفيزياء

✅ كميات المادة وقوانينها. ✅ قانون الغاز المثالي. ✅ التركيز الكتلي والمولي والعلاقة بينهم. ✅ الكتلة الحجمية، الكثافة، النقاوة وتركيز المحلول التجاري. ✅ جدول التقدم، المتفاعل المحدد و Xmax. ✅ الأكسدة والإرجاع. ✅ حركة الأقمار الصناعية (أولى ثانوي). ✅ تمثيل القوى (الثقل، الاحتكاك، رد الفعل...). ✅ الحصيلة الطاقوية وانحفاظ الطاقة. ✅ حركة القذيفة. ✅ الأحماض والأسس. ✅ بنية الذرة، العدد الكتلي والعدد الشحني. ✅ الكيمياء العضوية (الإسترات، الكحولات والأحماض الكربوكسيلية).

🧬 العلوم الطبيعية

✅ الخلية الحيوانية. ✅ النمط الظاهري والنمط الوراثي. ✅ العلاقة بين النمط الظاهري والنمط الوراثي. ✅ الطفرات. ✅ ADN. ✅ آلية البلعمة. ✅ الزمر الدموية. ✅ الاستجابة المناعية الخلطية. ✅ الاستجابة المناعية الخلوية. ✅ بنية العصبون. ✅ كمون الراحة. ✅ كمون العمل. ✅ النقل المشبكي. ✅ المشبك المنبه والمثبط. ✅ الإدماج العصبي. ✅ الخلية النباتية. ✅ معادلات التركيب الضوئي. 🌷 إذا راجعتو هاذ المكتسبات مليح، راح تدخلو للسنة الدراسية وأنتوما مرتاحين وما تتعبوش مع الدروس الجديدة. بالتوفيق الباك 2027، وإن شاء الله كامل نجيبو المعدلات لي نحوسو عليها. 💙 #مكتسبات

💗القناة:https://t.me/bac_with_mikaa18

وملاحظة كي نقولك حل تمارين ماشي تحل نفس فكرة وتقول حليت بزاف حاول تنوع في أفكار باش كي يجيك تمرين جديد تعرف كيفاش تحلو

وعليكم السلام نبداو بمكتسبات قبلية ماشي لازم تقراهم بصح أحسن تراجع اساسيات باش تدخل عندك قاعدة مليحة ركز على واش راك ضعيف فيه وما تضيعش وقتك في حاجات راك فاهمهم ضك كيفاش تقرا كل مادة علوم تعتمد على منهجية بشكل كبير سما لازم تتعلم كيفاش تستغل وثائق وتدير فرضية و استنتاج ونص علمي ومن ناحية دروس افهم درس من استاذ لي ترتاحلو و لخص درس ودير مخطط شامل باش كي تجي تراجع تلقى افكار مرتبة ومن بعد شوف أفكار تمارين ماشي تحفظهم تعلم كيفاش تستخرج فكرة وتطبقها مثلا في وحدة تركيب بروتين تدرب على نصوص علمية فيها استنساخ وترجمة وتنشيط احماض امينية باش تولي تشفى عليهم وكل ما تحل تمارين متنوعة تتحسن منهجيتك رياضيات مادة أساسية وسهلة نسبيا إذا فهمت درس وطبقت تدي افهم درس ولخصو و اكتب أهم قوانين ومن بعد حل تمارين بزاف باش تشوف أكبر عدد من أفكار وننصحك باستاذ نوردين مهم ماشي تحفظ طريقة تمرين واحد تفهم كيفاش توصل للحل فيزياء طويلة شوية وتحتاج تمارين بزاف كل وحدة اقراها لخصها واكتب أهم القوانين وتحويلات وبروتوكولات تجريبية واسئلة نظرية هذو لازم تحفظهم ومن بعد ابدأ تمارين وحاول تحل عدد مليح من كل وحدة

سقسو مع ليل نجاوبكم

💌 NGL time!

سقسوني على الباك، القراية، التنظيم، العادات، ولا أي حاجة حابين تعرفوها عليا 👀 ونجاوب على أسئلتكم فالقناة 🤍👇 https://ngl.link/alaa11534

📚 أخطاء لازم تحذري منها في عام البكالوريا 🚨

السلام عليكم البنات 🌸 عام الباك ما يحتاجش غير القراية بزاف، يحتاج تعرفي كيفاه تقراي صح و كاين أخطاء صغيرة يديروهم بزاف تلاميذ ويضيعولهم الوقت والجهد حاولي تتفاديهم من البداية 👇🏻 1. 📱 القراية والهاتف قدامك: كل مرة تقراي وتفتحي تيليفون "غير دقيقة" راح يتشتت تركيزك حطيه بعيد وقت لقراية وخليه غير في وقت راحة. 2. 📖 تعاودي تقراي نفس الدرس بلا تطبيق: الفهم وحده ما يكفيش بعد ما تفهمي الدرس لازم تطبقي عليه بتمارين وأسئلة باش تعرفي اذا فهمتي 3.تخلي كلش لآخر لحظة: ما تستنايش حتى يقربو الاختبارات ولا الباك باش تبداي لقراية قسمي دروسك على الأيام وراجعي دايما. 4. ✍🏻 تحلي التمارين وتشوفي الحل مباشرة: إذا حصلتي حاولي وحدك قبل ما تشوفي الحل حتى لوكان غلطتي الغلطة راح تعلمك أكثر من تقراي الحل . 5. ❌ تتجاهلي الأخطاء ما تقوليش "غلطت وخلاص": حاولي تعرفي علاش غلطتي: ما فهمتيش الفكرة؟ نسيتي قانون؟ ولا تسرعتي؟ وسجلي الأخطاء 6. 🧠 تحفظي بلا ما تفهمي خصوصًا في المواد العلمية: حاولي تفهمي العلاقة بين الأفكار والقوانين قبل الحفظ باش تقدري تطبقي المعلومة في تمارين اخرى 7. 📚 تستعملي مصادر كثيرة بزاف: ما تحتاجيش 10 أساتذة و20 ملخص خيري مصادر قليلة ومليحة والتزمي بيهم باش ما تتشتتيش 8. 😴 تضحّي بالنوم باش تقراي أكثر: النوم جزء من القراية خاطر الراحة تساعدك على التركيز وتثبيت المعلومات ماشي كل ما نقصتي النوم زادت إنتاجيتك. 9. 📊 تقارني تقدمك بالآخرين: كل وحدة عندها طريقتها ركزي على مستواك أنتِ: واش كنتي تعرفي البارح وواش وليتي تعرفي اليوم. 10. 📝 متحليش مواضيع الباك في ظروف حقيقية: من وقت لوقت حاولي تحلي موضوع كامل بالوقت المحدد بلا تيليفون وبلا كتاب وبعدها صححي روحك وشوفي نقاط قوتك و ضعفك.

🌷 الخلاصة:

ماشي المهم تقراي ساعات طويلة فقط لمهم تعرفي كيفاه تستغلي وقتك وتصححي أخطاءك وتستمري الاستمرارية الصغيرة كل يوم خير من الحماس الكبير لي يدوم يومين. 💗

💗 القناة: https://t.me/bac_with_mikaa18

https://youtu.be/Ut2xz4ZKMKc?si=7Rpvi-WnC97vtR6P لي مقراوش مكتسبات فيزيك شوفو هذا كل نهار ديرو ساعة سمانة تكملوه

كملنا جلسة دراسية 1 فيها 2سوايع و لي كملت معانا هي Nes Rin

يا قوم بارطاجو قناة باش يستفاد أكبر عدد من تلاميذ لي عندهم باك

💗القناة:https://t.me/bac_with_mikaa18

حبيت نقول حاجة ذكور منقبلوكمش فشات تع لقناة لانو فيه غير لبنات باش نتفاداو اختلاط بصح كشما تستحقو ابعثو فرسائل قناة نجاوبوكم