👑بيتُكٍ مملكتُك مع أم البنين 👑

#عالسرييييييع ✍✍ #لاتنسي_تنظيفها 🧼🚿 كاين بزاف حاجات في البيت ننساو نظفوها دوريا جيت نذكر نفسي وإياكن بيها ^^ ⬇️⬇️ 🔴دلو القمامة لاتنسي تنظيفه يوميا ✅ 🔴 أزرار الضوء و مكبس الباب لاتنسي تنظيفه ✅ 🔴 فيلتر الغسالة لاتنسي تنظيفه شهريا ✅ 🔴صفايات حوض المطبخ ، مناشف الميكروفيبر ، اسفنجات غسيل الصحون وقارورات المنظفات لاتنسي تنظيفهم وتعقيمهم ليلا ✅ 🔴 النباتات الاصطناعية لاتنسي تنظيفهم أسبوعيا✅ 🔴فيلتر المكيف الهوائي لاتنسي تنظيفه موسميا✅ 🔴 أدوات التنظيف (مكنسة، شفاط الماء ، مكنسة الزرابي اليدوية...الخ), لاتنسي تنظيفهم دوريا ✅ 🔴حاملة الصابون لاتنسي تنظيفها ✅ 🔴الحنفيات لاتنسي تنظيفهم وتعقيمهم✅ 🔴 أعلى الباب لاتنسي تنظيفه ✅ 🔴 الباب الخارجي للبيت وأمام البيت لاتنسي تنظيفهما✅ 🔴طيات الثلاجة و بلاستيك الداخلي للغسالة الملابس لاتنسي تنظيفهما✅ 🔴بيادن وقارورات الماء ماتنساوش تنظيفهم 🔴ارجل الطاولات والكراسي ماتنساوش تنظيفهم زيدو فالتعليقااااات ⬇️ #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

🔴اعلاااااااااااان 📢📢 #لكل_امرأة_تريد_الحصول_على_بيت_منظم 🌹 #دورة_الملكة_النشيطة (في دفعتها السادسة عشر 16)  👑 🏡 من تقديم  المدربة أم البنين السلفية صاحبة صفحة #بيتُكِ_مملكَتُكِ_مع_أم_البنين دورة تفاعلية 💯 غنية  بالمعلومات والتوجيهات لاكتساب مهارات منزلية بإذن الله. مكان الدورة: على التلغرام عبر تسجيلات صوتية. 🌹محاور الدورة: 🌸كلمة إفتتاحية والتعريف بالدورة وشرح طريقة التدريس والتدريب 🌸ركائز ومفاتيح تهم كل ملكة في مملكتها. 🌸من أين أبدأ⁉️ ( درس يخص التخلص من الفوضى بالتفصيل) 🌸تحدي السويعة ⏰( درس يخص برنامج شهري اسبوعي) 🌸روتيني اليومي مع جدول تنظيمي  📋🖋 🌸فن الترتيب  (كل مايخص ترتيب الاشياء) 🌸التنظيف مواد وأدوات🧴🚿🪣 🌸اخطاء في التنظيف تجعل بيتك اكثر اتساخا 🌸لاتضيعين أوقاتك في هذا .... 🌸 كيف حتى لاأعود للكركبة من جديد 🌸مشاكل شائعة في بيوتنا وكيفية معالجتها ✔️ 🌸عنايتُك بجمالك ✔️ 🌸الرٌَحلة ( افكار انتقال من بيت لآخر) ✔️ مدة الدورة :أسبوعين تبدأ الدورة يوم 12 جويلية 2026 ان شاء الله 🌸 #شهادات_المشتركات_سابقا⏬ https://t.me/Baytouki16/61?single ♦️لتفاصيل اكثر  راسلينا على الخاص📩⏬ @oum_elbanin

السلام عليكم لبنات 🌸 كنت قريت شوية سابقا من كتاب #بيت_أنيق_ودفتر_تخطيط للكاتبة لبنى الحو كي بديت نقراه تفاجأت بزاااف بتفكيرها لي يشبه تفكيري بزااااف و نفس الجمل لي نمدها لمتدرباتي هي كاتبتها بصيغة اخرى في الكتاب ونفس الظروف لي مرت عليها قبل ماتتعلم التنظيم مريت عليها حتى السند الداعم تقريبا نفسه ^^ سبحان الله وبحمده. دايما كي يقولولي المتدربات ( ياا أم البنين أنا نعجز نكمل في المهارة الفلانية وش ندير؟ نجاوبهم مباشرة #فورصي_روحك وديريها دوك تتعودي وتوليلك متعة ، #ماتتناقشيش_مع_روحك بزاف درنا برنامج و جداول مضبوطة في هذه الدورة تلحق ساعة الروتين الاسبوعي نوضي ماتهدريش مع نفسك كي شغل جعتي ورايحة تطيبي امر لابد منه ماتڨصريش مع نفسك ابدا وماتمديلهاش فرصة هذا كلامي دايما نعاودهولهم) ، نفس شي كي بديت نقرا اليوم لقيت لبنى الحو استدلت بيه، استدلت بقول مؤلف اجنبي في تعريف الإرادة ركزن جيدا : قال الإرادة هي القدرة على فعل ماهو غير محبب للنفس لتحقيق مصلحة او هدف✅ مانحبش هاديك الحاجة بصح نديرها خاطر عندي هدف منها وطبعا هدف النساء جميعا من ترتيب البيت هي الراحة النفسية...ولادها يعيشو في بيت هادئ نظيف ويتعلمو منها...زوجها يفتخر بيها ويرتاح فبيته وكذلك تلقى وقت لنفسها ومشاريعها وعلمها الشرعي...تبر والديها وتساعدهم ...الخ قالت لبنى الحو: تخيلي حياتك إذا تمكنتِ من إجبار نفسك على فعل مالاتحبين، حتى إن كان ثقيلا على قلبك، تخيلي كيف سيساعدك الأمر على تحقيق أهدافك التي تحبينها إن كانت ارادتك قوية للقيام بمهام ثقيلة على قلبك ، فما بالك بتلك الارادة في تحقيق ماتحبين؟ 🍭🍬وحكات قصة طريفة لاطفال صغار يحبو حلوة المارشاميلو فدارولهم مجموعة من العلماء اختبار ودارو كل طفل في غرفة قالولهم نروحو ونخلوكم مدة كي نولو لي نلقاوه ماكلاش قطعة الحلوى نزيدولو ثانية نص كلاها ماصبرش ونص صبر باش يدي الثانية والطريف أن هؤلاء العلماء ظلوا على تواصل مع الاطفال طيلة 30 سنة و راقبو حياتهم بصورة عامة لقاو بلي الاطفال لي صبرو وماكلاوش المارشاميلو كانت لهم قوة ارادة اكبر بصورة عامة في تحقيق اهدافهم في باقي اوجه الحياة بعد توفيق الله عز وجل. و مفهوم الارادة بالنسبة لي كأم البنين هي السعي الجدي والاخذ بالاسباب الشرعية بعد توفيق الله عز وجل 📍بطيئة في عملك ؟ فورصي روحك وامشي بنظام الدقائق وتعلمي السرعة في الإنجاز 📍ماتعرفيش تسيقي ؟ ابحثي ادخلي دورات تفرجي يوتيوب اتعلمي وطبقي 📍ولادك يدخلو بالصباط؟ يوميا عاودي الكلام..ديريلهم تابي وحدود امام البيت كافئيهم لي ميدخلش بيه يدي جائزة رمزية وكوني القدوة وماديريش وش ماتحبيش يديرو ✏️وقبل أن أختم دايما كي يجو باش يسجلو عندي الأخوات يسقسوني زعما تساعدني الدورة؟ نقولها إذا تطبقي وتبعي توجيهات حرفيا تساعدك بإذن الله، إذا تدخلي تضربي طلة تخزري وتخرجي ماتساعدكش وتبقاي دوري فحلقة مفرغة ، بمعنى اذا تعلمت اي امر سواء عندي او عند اخرى او في اليوتيوب لازم يُطبق وتشوفي اذا خرج عليك تحتافظي بيه كنظام في بيتك إذا مخرجش عليك تكملي رحلة البحث حتى تطيحي فشي لي يخرج عليك وعلى عاداتك ودينك ومبادئك وهذا هو سيستامي انا نجرب كلش ومانهابش ( في حدود الشرع طبعا) ، نفس شي ليوم لي لقيت لبنى الحو قالاتو : قالت: 📌نصيحة: قبل ان تقرئي الكتاب.. هذا الكتاب تفاعلي،أي أن قراءته من باب التسلية غير مجدية، ولن تشعري بالاستفادة الحقيقية منه إلا إذا تفاعلتِ معه وطبقت مافيه خطوة بخطوة، لذلك قبل قرائته اعقدي العزم ، وشمري عن ساعديك لتبدئي حياة جديدة كلها نظام ونظافة وأمل 🌹 و تنبيه اخير : الزمي نفسك بما يناسب نفسيتك وجسدك لكن اذا كان جسدك ونفسيتك يعيييطوووو بإشارات بلي راهم مراااااض اكيد لازم علاج عند اهل الاختصاص مانفورصيوش على حساب نفسيتنا و جسدنا لانو راح تولي فضغط والصحة حاااجة ماتعوضها ربي يديم عليكم العافية 🌸 وفقكن الله لما يحبه ويرضاه🌸 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

عجبني فنقلته بتصرف 🌸💯✅ أمور إذا عملناها واتعودنا عليها راح نحسو بلي بيتنا اصبح اكثر نظافة و ترتيبا 1. Garbage bag therapy جيبي كيس واجري اجري اجري في دارك وارمي اي شي مقطع مكسر مطاشي بجافال قديم اكياس قارورات بلاستيكية ساشيات اككسوارات مكسرة مرمية 2. Powe hour اضبطي الكرونو على مدة معينة كأنو عجوزتك راهي جايياتك ضيفة في تلك الساعة و اجري افرزي ركن من اركان بيتك دوك تلقاي روحك كملتيه ليه ليه يالخواااافة ^^ 3. Feel the urge to purge اتخلصي كل يوم من عشر كراكيب، حاجة مكسرة وعندها سنوات وماشي راح تتسڨم، لبسة قديمة مقطعة مطاشيا بجافال انت جميلة وتستحقين الاجمل 4. Change your mindset متقعديش تندبي في حظك انك بونيشة وواحد ماحاس بيك ولادك مرونين و و و هادي تاني دارك وتستحقين دار جميلة ونظيفة 5. Complete the cycle كل حاجة بدات خدمتها لازم تكمل الغسيل نشف انشريه استخدمتي المقص رجعيه لمكانه جا القضيان من برا ستفيه وارمي الاكياس نشف القش اطويه ..الخ 6. Five minute rule اي حاجة بتاخد اقل من خمس دقائق اعمليها فورا نفضي سريرك، امسحي حوض الحمام بعد الاستخدام امسحي مراية لو محتاجة تتمسح، امسحي رخامة المطبخ وانتي تطيبي 7. Clean as u cook راكي تطيبي وتستناي فحاجة تغلى اغسلي لمغارف امسحي طابلة فيضتي حليب غسلي كاسرونة فورا ماكانش لي راح ينظفها من غيرك اغسليها دوكا افضل ماتولي اصعب واصعب من بعد 8. Clear surface المطبخ...البيبليوتاك....الكوافاز....مدخل البيت حاولي يكونو فارغيييين من الكركبة باش ميولولكش عبارة عن مناطق ساخنة 9. اضبطي يوميا لكرونو مدة 15د وافرزي ركن صغير قجر...ايتاجاغ...علبة خياطة..بعد شهر راح تحسي بالفرق إن شاء الله 10. One in one out كي تشري حاجة جديدة ارمي حاجةفي مكانها وفكري قبل ما تشتري انتي محتجاها فعلا ولا مجرد شهوة عابرة 11One touch rule اي شي فيدك.ماتحطيهش في اي مكان وخلاص لالا كل حاجة ترجع فمكانها باش ميوليلكش دوبل ترافاي مفتاح...حقيبة...خاتم 12Tidy tote كي تدخلي تفرزي غرفة ما دايما خلي معك كيس تلمي فيه حاجات الزايدة باش ماتبقايش رايحة جاية 13. اضبطي الكرونو وشوفي شحال تاخذي تنظيف في كل ركن باش تعرفي بلي ماهوش امر صعب وياخذ وقت كيما راكي متخيلاوو 14. استمعي للقران ورددي الاذكار وسبحي واستغفري اثناء قيامك باشغالك المنزلية، استمعي دروس في اليوتيوب ننصحكم بمواعظ الشيخ عبد الرزاق البدر في اليوتيوب اكتبو مثلا موعظة على صلاة المراة الصالحة للشيخ عبد الرزاق البدر وهكذا مواعظه راااائعة 15. ماهيش افكاري هذا منشور لقيتو عجبني وتصرفت فيه تستفادو إن شاء الله 🌹واخيييرا 16 اختاري قاعدة وحدة وجربيها مدة معينة كي تتعودي عليها زيدي قاعدة اخرى وهكذا 🌹 دعواتكن منقول بتصرف

السلام عليكم ملكات 👑 🌸 #تسريب_من_دورة الملكة النشيطة 📌عندي تسياق وغسيل الملابس بصح ماشي الان راني عيانة من بعد نوضلهم 📌حبيت نحفظ القران بصح ماشي الان حتى نكبر ولادي و نزوج بنتي ونتفرغ ونشوف الوقت المناسب 📌حبيت نشري ارائك لكن ماشي الان حتى تكون دار ملكي سوف.....سوف...سوف لكن النتائج صفر هذا هو ⬇️ #التسوييييف 🔴التسويف : هو أننا نقوم بتأجيل مهامنا ومسؤوليتنا ثم تتراكم علينا الأعمال ونحسو بالضغط والإحباط والتوتر 🔴من أسباب التسويف : العشوائية يعني ماعندهاش المرأة خطة او برنامج تمشي عليه ماشية هكاك وخلاص تنوض ماعلابالهاش وش راح تطيب ولا تخرج ولا راح تسيق وهذا الشي يخليها تبانلها بلي مزال الحال ومزال عندها الوقت تولي تقولك خلي من بعد وخلاص. الأمر الثاني الكسل والتعب مثل المثال الأول تقدر مجرد كسل...او تقدر تعب حقيقي مرض عضوي او نفسي ..الخ ضعف الدافع او ميكونش اصلا يعني ماعندهاش هدف حابة تلحقلو السعي وراء المثالية مثل مثال حفظ القران لي مديتهولكم لفوق 🔴الحل: للتخلص من التسويف ياأخواتي قبل كل شي لازم الدعاء لان الله هو الموفق ثم 📌 يجب وضع خطة محكمة تتبعينها يعني كي تحددي هدف من اهدافك مثلا عناية بوجهك او عناية ببيتك او تربية اولادك هنا لازم خطة تتبعينها ماتمشيش عشوائيا لازم كل مهمة تتحدد تكون مربوطة بوقت معين ، مثلا ترتيب بيتك لازملك روتين يومي اسبوعي شهري موسمي ✅ 📌استعمال الكرونو لي لازم يحددلك وقتك اي مهمة تبدايها شعليه على مدة معينة 📌القيام بمهمتك بلا ماتناقشي نفسك راكي حددتي خطة وضعتي البرنامج والحلول خلاص هنا مانبقاوش نفكرو اذا نوضو نديرو او لا ماتناقشيش نفسك نوضي مباشرة كيما كي تجوعي بزاااف مراحش تبقاي تقولي ناكل ولالا ؟ اكيد كي تلحقي مرحلة جوع شديدة متوليش عندك وقت لحتى مناقشة فراسك تحوسي على الاكل مباشرة وإلا راح تدخلي فمضرة ، تعاملي مع باقي المهام الضرورية بنفس العقلية✅ 📌 الزمي نفسك ولاتدللينها كثيرا ربيها على الوسطية (كاين حاجة ضرورية تندار بالطريقة المناسبة لازم ) 📌انتبهي للاشارات لي يمدهالك جسمك ممكن يكون كاين مرض هو السبب ممكن مرض عضوي او نفسي او اي أمر آخر لاتتجاهلي اي اشارة غير طبيعية يمدهالك جسمك و توجهي لاهل الاختصاص. 📌كافئي نفسك: بعد اي مهمة لازم راحة او تديري أمر لي تحسي انو يريحك ✅ 🔴لازم تعي أنو التسويف فالحقيقة هو ظلم كبير لنفسك لانه يجعل إنجازاتك أقل بكثير من قدراتك يضيعللك الفرص ويكون سبب باش يحرمك من النجاح الناس تطلع ونتي تبقاي تشوفي وتتحسري وتشكي رغم قدراتك الممتازة إضافة على أن التسويف يفسد الراحة كما يفسد العمل تماما، قارني كي ترقدي ونتي منجزة لمهامك وكي ترقدي ونتي ماشي منجزة كيفاش يولي تأنيب ضمير وقنطة لذلك لازم تحاولي التخلص من هذه العادة السيئة، تخلصي منها وثبتي في مكانها عادة ايجابية ✅ #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

السلام عليكم ، صباح الأنوار #المنزل🏡 نشوفو بمثابة مؤسسة هامة ، به العديد من المهام التى يجب إدارتها بشكل جيد وبه العشرات من القرارات الهامة التي تؤخذ بجدية، فيه عدة طوارئ  لابد لها من حلول عملية، ويتم فيه بناء فريق عمل تماما مثل أي شركة💯 تأخذ فيه المرأة لقب مديرة البيت 🎀 ولإدارة هذه المؤسسة الجميلة لابد من مهارات نتعلموها ونطبقوها ومنها : #مهارة_التفويض: وهي تسليم مهام صحيحة إلى اشخاص مناسبين مع توجيهات واضحة ودقيقة وطبعا لازم تكون كاينة الوسائل الكافية لتحقيق نتيجة مرضية ✔️  مع المراقبة بدون ضغط. يعني : 🔴عادي اذا مديتي لوليدك لكبير يركبلك الضوء ماشي لازم تديريها بنفسك  🔴عادي اذا مديتي لزوجك يسيقلك البالكون او يغسلك النوافذ الخارجية او يطلعلك الافرشة الثقيلة يتشمسو فسطح 🔴اذا توفر المال عندك فعادي اذا جبتي معينة منزلية تساعدك في التنظيف الاسبوعي والشهري 🔴اذا كان عندك طارئ ما، ف عادي إذا كلفتي طباخة تطيبلك اطباق الاسبوع وتخبيهم 🔴اذاماتعرفيش تديري تحضيرات رمضانية او ماعندكش وقت لها وحبيتي تلتهاي فالعبادات في شهر شعبان(  مثلا رحي ثوم، تحضير صوص تومات، شباح سفرة   تنقي توابل وترحيها...الخ) فعادي اذا كلفتي اخت ثقة بهذا وشريتي من عندها كلش واجد صحي ونظيف مهارة #التفويض ماشي معناتها انك كسولة ولا انك استغلالية اصلا معظمهم راح تعود عليهم بالنفع لي ماتعودش عليه بالنفع المعنوي داخل دارك راح تعود عليه بالنفع المادي 👌 وماشي معنتها أنك تتركي المهمة بشكل نهائي لالا لانو راح تبقاي مسؤولة على النتائج النهائية لأنك صاحبة البيت ✔️ لكن هي مهارة راح تولي سبب كبير فنجاحك تخففلك الضغط، ترتاحي نفسيا، وتخليك تركزي على أولويات اخرى،تنقص عليك الاتهامات بالتقصير.....الخ علابالي بلي تجيك صعيبة في الأول خاصة الشخصيات القيادية لأنو تخافي انو النتيجة ماتخرجش مرضية او يصراو مشاكل  نقولك ماتخافيش توكلي على ربي ثم سلمي المهمة للشخص الصحيح مديلو الوسائل اللازمة اشرحيلو الخطة بايجابياتها وبمخاطرها بوضوح ودقة وراقبي من بعيد حتان يوالفو وتوالفي مثلا تفويض مهمة للإبن الأكبر ( وليدي راني لاتية ليوما فالمطبخ كي تكمل لماشينة  اطلع للسطح انشرلي الملابس فساش لانج وبالاك يطيحلك خاطر راه مكسر شوية  واذا صبت شتا هبطهم ) هنا وش درتي ؟ وزعتي مهمة لوليدك اللي تشوفيه اهل لها وكبير وناضج وضحتيلو انو كاين مخاطر ( يتكسر ساش لانج...تصب شتاء..)  ومديتيلو كل التعليمات اللي لازم يديرهم وراكي تراقبي من بعيد بلا ميحس روحو مضغوط وفنفس الوقت نتي تهنيتي متستناكش الماشينة حتى تكملي، وقيسي على ذلك بقية المهام المنزلية ✔️وماتحاوليش ديري كلش وحدك باش تفوزي بلقب الشاطرة على حساب صحتك النفسية والجسدية ✔️ ملاحظة📌: التفويض يحتاج للتدريب والتشجيع والمدح كرري مرة زوج ثلاثة ربعة شجعي امدحي تدريب حتى يوفق ربي ويوالفو بإذن الله والسلام عليكم 🌸 #بيتُكِ_مملكَتُكِ_مع_ام_البنين #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

#نصيحة_اليوم 💡 السلام عليكم حبيت ليوم أني أنبهكن لأمر ألا و هو #خطر _المواد_الكيماوية أخواتي انا صفحتي هي للتدابير المنزلية و تجارب بعض المنظفات كل مرة نجرب معكن منظف ونمدلكم رايي فيه، ونقدر نجرب ونمد القارورة مثلا نقدر نجربو ومانكملوش اصلا ...كيما نقدر نجربو ونستعملو عند الحاجة ماشي يوميا يعني يقدر يشدلي حتى العام لانو نستعملو احياناااا فقط عند الضرورة. كذلك كي نجرب ونطبق المنظفات القوية في بيتي التهوية تكون فبيتي عالية ( ومن الافضل تلبسو قفازات بافات ونظارات)،وجامي نستنشق المنظف دايما نطبقو على الحاجة ونخرج، تاني نقدر نكون جربت منتج العام ليفات ومنزيدش نشريه نمدلكم رايي فيه هاد العام وهكذا ...ماتتخيلونيش حاطة كمية كبيرة من المواد الكيماوية في بيتي ونبقى نخلط يوميا لا ابدا وماتتخيلوش انو نشري كل المواد لي في صفحتي دفعة واحدة مانيش مليونيرة كل مرة نشري امر والمنتجات يشدولي بزاف حتى للعام لاني مانستعملهمش يوميا غير إذا استدعات الحاجة لهم. كذلك التعطير احيانا اكتفي بتنظيف المكان بدون تعطيره بالمعطرات مع التهوئة بالمختصر المفيد صفحتي للتعريف بمواد التنظيف باش كي وحدة مثلا تلقى مشكل فبيتها تدخل لصفحتي تلقى الحل تجد ضالتها تلقى الحل بسهولة في صفحتي سواء تلقى المنتج او التدبيرة فقط ماشي معنتها وش نشري لازم تشرو هذا الامر خطير اولا من الجهة الصحية استنشاق المواد الكيماوية واستعمالها بطريقة دائمة يسبب امراضا خطيرة وشخصيا نعرف وحدة جاها سرطان الحنجرة من كثرة النظاف تخدم بيه بزاف حتى مرضت بيه عفانا الله واياكن ، حاذرو على صحتكم وصحيحة وليداتكم 👍 و ثانيا من الجهة المالية مراحش تصرفي شهرية راجلك على المنظفات خذي ماينفعك فقط كي تحصلي فحاجة ادخلي لصفحتي شوفي اذا تشري المنظف الفلاني او ماكالاه تخسري دراهمك هذا هو هدف صفحتي هدفها انو منخليكش تخسري دراهمك على منتجات مفيهاش منفعة وماتخرجيش بنتيجة بيها بل كي يكون عندك مشكل تاع تنظيف في بيتك تدخلي تلقاي منتج اذا فعال او لا وبالتالي نختصرلك الطريق تاع تشري وتجربي وتلقايه ميصلحش. ولست مسؤولة عن تهور بعض النساء و معاندتهم او استعمالهن الخاطئ للمنتجات كل وحدة مسؤولة على نفسها . إن شاء الله تكونو فهمتوني اخواتي 💎 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

الجارتان حليمة وزينب #مشكلة_الصراصير_وحلها 🌹حليمة: السلام عليكم وشراكي جارتي لعزيزة❓ 🌸زينب: الحمد لله بخير ونتي هادي غيبة❓ 🌹حليمة : جيتك ليوم كاش مانلقى عندك حل راني في مشكلة كبيرة، رحت عطلة رجعت لقيت لڨرلو غزااااااني فالدار الدنيا كامل تغلي بيه مالقيت وش ندير راني غير خايفة انا نقتلو وهو يخرج إذا نلقى عندك حل من فضلك. 🌸زينب: لاتقلقي لكل داء دواء بإذن الله الڨرلو لازمك تحاربيه دوك نفيدك ببعض الخطوات ديريهم بالتفصيل وان شاء الله خير ⬇️ 🔴اولا : لازم نعرفو أنو الڨرلو يحب السخانة إذا كان المكان سخون حاولي توفري البرودة ولو مؤقتا قيسما تحاربيه شعلي بزاف لكليماتيزور 🔴ثانيا: اغلقي التواقي، نفسي الدار وعسي تواقي ومن بعد اغلقي لانو يكثر فالصيف خاصة فلباطيمات واغلقي المجيريات تان بصاشي ولا نشاشف أو بوادن معمرين ماء و حليهم فقط اثناء الاستعمال ونقولك كذلك يدخل من المرحاض اعزكن الله حاولي تكون عندك غلاق للمرحاض و زيدي اغلقي كل الشقوق لي فلحيوط جيدا اي شقوق او ثقوب اخدميها يغلقهالك الزوج او الوالد 🔴ثالثا:تنقي الدنيا مليح واجتنبي الجافال نقي بمنظفات لي فيها زيت الصنوبر يقولو انو طارد للحشرات نقي مثلا بجال العملاق او البتراء لي مخدومين بزيت الأساسي تاع الصنوبر ونقي كذلك بالخل الابيض المخفف بالماء، نقي جيدا الحيوط الارضيات خرجي عليك الخردة الكراكيب الكراطن الاجهزة القديمة لي ماتستعمليهاش وأي شي يقدر يسكنلك فيه الڨرلو تخلصي منو 🔴رابعا بعد التنظيف حاولي تعمري الدنيا بالادوية تاعو وهنا نحذرك بالاكي وبالاكي على الأطفال ، الادوية تاعو عديييدة كاين جربتها كاين لالا انا نعتمد ساشيات الذهبيين قمة الروعة نخليهالكم في التعليقات ان شاء الله و اهلي يديرولو الطباشير يتباع عند الكانكيري يشروه ويخربشو بيه الطابلة الخشبية ملتحت وكل مكان فيه قالولي مليح طباشير تاع لقرلو خاص بيه ، بعد ماتعملي الخطوات لي قلتهملك شدي البودرة وديريها في كل الاماكن عتبة الباب...عتبة البالكونات ..داخل المرحاض ...وراء الثلاجة...وراء فرن المطبخ...في التواقي ...مور المرحاض عمري الحالة وخليها اسبوع وعاودي نقي الدنيا وعادوي نفس العملية مع البودرة حتى يبدا يروح ويختفي بإذن الله ونحذرك ونعاود البودرة وأدوية لڨرلو راهي مادة سامة وخطيرة اذا رفدوها الاولاد وحطوها في فمهم قادر يموتو لقدر الله او حكو عينيهم الامر خطير جدا كل وحدة مسؤوولة عن هذا الامر لي ولادها يخلطو بزاف تعتمد لفليتوكس فقط كاين فليتوكس ستوب بالليمون او بالك الاخضر خيرمن تضحي بولادها والخطوة الاخيرة نقولك لازم تكوني حريصة جدا على التنظيف وخاصة لفتات وبقايا الطعام لانو الحشرات يعتامدو تقريبا على الشم في الغذاء تاعهم وين يشم الماكلة ولفتات وغير ذلك يزغد لذلك كوني حريصة على الكنس بعد الاكل ، وعلى التسياق وكوني حريصة على الاكل في المطبخ فقط، كوني حريصة انك تغلفي الماكلة والخبز جيدا وتخبيه ، علابالي امر متعب لكن الله غالب خيرمن يهبلنا مع أنو هو مايدير والو لكنه مخلوق مقزز لايُحتمل ، وحبيت نقولك إذا سكنلك فكاش آلة حليها كامل فككيها فيس ب فيس و نقيها وديري فيها دوا لانو بقدر يسكن في اصصصصغر ثقب واذا سكنلك فالاجهزة لكبيرة لي ماتقدرش تتفكك للأسف هنا الامر صعيب تبقاي غير بالخطوات لي قلتهملك مدة طويلة بدون ملل او تختاصري الطريق وتشري جهاز اخر ماعندنا مانديرو افضل من انو تهبلي نفسيا، واجتنبي تشري الاجهزة والالات والاامور الخشبية المستعملة ، لانو غالبا المستعمل يكون فيه الڨرلو واذا دخلتيه للبيت يبدا ينتشر حاولي تشري الامور الجديدة افضل واذا كان ولابد انك تشري امر مستعمل فككيه ونقيه مليح وخليه ايامات في بالكون او ڨاراج او سطح باش تتأكدي مافيه والو ماتروحيش تدخليه مباشرة لبيتك وينتشر 🌹حليمة: شكرا لك وربي يجازيك خير لعزيزة دايما فالقمة وعمرك لابخلتيني 🌸زينب: بلا مزية دعواتك فقط والآن متابعات صفحتي الغاليات قولولي وش تقتارحو حلول اخرى لحليمة باش تحارب لڨرلو ^^ ❓ نسأل الله لي ولكن العافية والسلامة وأن يرزقني واياكن الطمأنينة والسلامة ويبعد عنا كل أذى 🌸 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/