𝑺𝒊𝒎𝒑𝒍𝒆 𝑪𝒐𝒓𝒏𝒆𝒓 || رُكن بسيط

مهمه.......ما تيجي نشوف🔻

شريف: بقولكوا إيه... فيه مطعم جديد فتح جنب الكافيه اللي بنقعد فيه، إيه رأيكوا نروح نجربه؟ حمادة: يلا بيناااا... بس بتاع إيه؟ شريف: مشويات، وشاورما، وحاجات كده. عبدالله: يلا يا عم... نروح نستكشفه. 😂 حمادة: يلا، هطلع روح الفوود بلوجر اللي جوايا. 😎 شريف: يلا يا جدعان... اقعدوا هنا. عبدالله: هنطلب إيه؟ حمادة: أنا داخل على الشاورما... شكلهم بيعملوها حلو. شريف: خلاص، يبقى كلنا شاورما. عبدالله: اشطا... بس هاتهم لحم وفراخ، نجرب الاتنين. حمادة: ماشي، أنا هروح أجيب الأوردر وأجيب حاجة نشربها... وجاي. حمادة: يلا بينااا... الأكل وصللل. 😋 شريف: أمال فين الحاجة اللي هنشربها؟ حمادة: شوية كده، والويتر هيجيبها. عبدالله: يلا ناكل على ما ييجي. (يبدأوا ياكلوا...) حمادة: الشاورما كريسبييي... ومن جوا جوسييي... والبطاطس جوسييي برضو. 😋 شريف: أهو ده الفوود بلوجر حافظ مش فاهم. 😂😂 عبدالله: يخربيتك يا حمادة، لو البطاطس جوسي يبقى المطعم تعبان. 😂😂 حمادة: ده أنا مطبق على فيديوهات الفوود بلوجرز كلهم. 😂😂

(الويتر ينزل المشروبات ويحطها على الترابيزة...) عبدالله: بتاع مين البيبسي ده يا ريس؟ الويتر: الأستاذ ده هو اللي طلبه... تبعكم يعني. حمادة: أيوه أنا... شكرًا يا صاحبي. (الويتر يمشي...) شريف: مالك يا عبده؟ ما هم تلاتة أهو... كل واحد ليه واحدة. عبدالله: يعني... إنتوا مش عارفين إن دي مقاطعة؟ حمادة: يا جدع! هو إنت لسه مقاطع يا حززززني؟ 😂 عبدالله: أيوه... لسه مقاطع يا حمادة. حمادة: يا عم، المقاطعة خلصت من زمان! الحرب وقفت، وإنت لسه بتكلمني في المقاطعة؟ عبدالله: مين قال إن الحرب خلصت؟... أو إن المقاطعة انتهت؟ حمادة: يا عم ما الأخبار كلها بتقول إن الحرب انتهت، والناس كلها بطلت تقاطع. عبدالله: بلاش تمشي ورا الناس يا حمادة... إنت هتتحاسب لوحدك. ومين قالك إن الحرب انتهت؟ ده كان مجرد اتفاق واتكسر بعدها على طول. لحد النهارده لسه فيه ناس بتموت... بس للأسف إحنا اللي اتعودنا.

شريف: معلش يا عبدالله... عايز أفهم بس. يعني إيه "هنتحاسب"؟ عبدالله: بص يا شريف... بالنسبالي دا مبدأ. وكل واحد فينا هيتحاسب على اختياراته. طول ما قدامي بديل مصري، وبنفس الجودة أو حتى قريب منها... ليه أختار حاجة عليها شبهة، وأنا أقدر أختار غيرها وضميري مرتاح؟ شريف: بصراحة... عندك حق.. حمادة: طب ما في حاجات مقدرش أستغنى عنها. عبدالله: وأنا برضه. وفي فعلًا حاجات ملهاش بديل، وساعتها الواحد بيكون مضطر يستخدمها، وده طبيعي. لكن اللي ليه بديل... ليه أسيبه وأروح لغيره؟ حمادة: يا عم ماشي... بس أنا اللي هفرق يعني؟ ما في ملايين مش مقاطعين. عبدالله: يا حمادة... مش لازم تبقى مع الأغلبية دايمًا، المهم تبقى مع الصح. وإنت متعرفش... يمكن موقف بسيط منك يبقى سبب إن غيرك يعمل نفس الحاجة. حمادة: يا عم مش هتفرق بقى... غيري يعمل كده. عبدالله: بص يا حمادة... أنا بكلمك عن نفسي. المقاطعة دي من الحاجات القليلة اللي أقدر أعملها، مع الدعاء والتبرع لو أقدر. بحس إني على الأقل بعمل اللي في إيدي عشان إخواتنا. شريف: بصراحة... كلامك خلاني أفكر. حمادة: أنا لسه مش مقتنع يا جدعان... ومش حاسس إنها تستاهل أبطل حاجة بحبها عشانها. عبدالله: بص يا حمادة... أنا بحس إن المقاطعة تحدي، بتتحدى فيه نفسك إنك تبطل حاجة بتحبها لله أولًا، وبعد كده عشان إخواتك اللي بيموتوا كل يوم دول. شريف: بص يا حمادة... أنا فهمت عبدالله. هو شايف إن الموضوع تحدي ديني، وفيه وفاء لإخواتنا في غزة. وإحنا كل اللي نقدر نعمله إننا نقاطع، وندعي، ولو ربنا قدرنا نتبرع. حمادة: إنتوا اتفقتوا عليا يعني؟ 😒😂 عبدالله: يا عم لا، أنا كل اللي عايز أوصلهولك إن مش كل حاجة بنمشي فيها ورا الأغلبية. ساعات يبقى عندك مبدأ مقتنع بيه، وتمشي عليه حتى لو كنت لوحدك. وفي الآخر... أنا بريح ضميري. طول ما فيه شبهة في الموضوع، وطول ما قدامي بديل، ليه أخاطر؟ أفضل أبعد عن الشبهة، وربنا أعلم. شريف: عامةً... أنا أعلنت رجوعي للمقاطعة. 🙋🏻😂 حمادة: للأسف... اقتنعت. 😒😂 عبدالله: جدع يا حمادة. 😂😂 حمادة: يا صاااحبي... الويتر: نعم يا باشا؟ حمادة: رجّع دول... وهات V Cola بدلهم. 😂 الويتر: تحت أمرك يا هندسة. شريف: كده الفوود بلوجر بقى مقاطع رسمي. 😂😂

المقاطعة مبدأ.....🔻

𝑾𝒓: 𝑬𝒃𝒓𝒂𝒉𝒊𝒎 𝑺𝒂𝒃𝒆𝒓

قناة العبث اللي حابب يدخل 💙

💙💙