𝑺𝒊𝒎𝒑𝒍𝒆 𝑪𝒐𝒓𝒏𝒆𝒓 || رُكن بسيط

اقرأوا واتمني لو حد عنده اي اضافه ياريت يقولها 🤍

للأسف بقى فيه ناس أول كلمة على لسانها لما تتعصب أو تهزر: "يلعن دين..." دي مش شتيمة عادية، ولا كلمة تتقال وقت العصبية وتعدي. سبُّ الدين من أعظم الذنوب، وهو من نواقض الإسلام، وأمره خطير جدًا عند ربنا. متخليش لسانك يتعود على كلمة ممكن تضيع عليك آخرتك. ولو إنت متعود تقولها، فدي رسالة ليك قبل أي حد: تب إلى الله، واستغفره، واعزم إنك متقولهاش تاني. واتشهد كأنك داخل الاسلام جديد وعوّد لسانك بدلها على ذكر الله. قول: سبحان الله. الحمد لله. لا إله إلا الله. الله أكبر. يمكن كلمة ذكر ترفعك درجات... وكلمة سبّ تهوي بصاحبها. خلي بالك من لسانك... فإن أخطر الحروب أحيانًا بتبدأ بكلمة، وأخطر الذنوب أحيانًا بتكون كلمة.

تعالوا نتكلم في الموضوع بالبلدي خالص. مبدئيًا... الشتيمة حرااام، سواء بقى اللي بتشتمه متقبل ده أو لا. يعني أما تقعد إنت وصاحبك تشتموا في بعض تحت مسمى "الهزار"... ده حرام. ومش روشنه خالص والله بتبقي تقيلل ع القلب كدا وانت كل كلامك شتيمه نيجي بقى اللي بيقعدوا يشتموا بالأم والأب، ويرموا الناس بقذف المحصنات، ويطعنوا في الأعراض... ودي من الكبائر عند ربنا، ومش حاجة تتقال في الهزار ولا تتاخد بخفة. لا ومنشكح أوي، وواقف يضحك، وأمه بتتشتم، أو بيشتم أم غيره... إنت عاقل ياسطا؟! بشتايم فيها اهانه لأمه واحيانا لشرفها ومبتسم ويرد بنفس الشتيمه وعاادي موضوع مستفززززز لا ويجي صنف تاني يقولك: "هو بيشتم ولسانه زفر... بس قلبه أبيض." يعني إيييي؟! لو قلبك طيب... جوارحك كلها هيبقى ليها نصيب من الطيبة، وأولها لسانك. سيدنا النبي ﷺ قال: «ألا وإن في الجسد مضغةً إذا صلحت صلح الجسد كله، وإذا فسدت فسد الجسد كله، ألا وهي القلب.» يعني لو القلب صلح بجد... هتلاقي لسانك بيطلع كلام طيب، مش شتايم وقلة أدب. وربنا سبحانه وتعالى قال: ﴿مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ﴾. كل كلمة بتطلع من لسانك مكتوبة عليك... فراجع نفسك قبل ما تتعود على ذنب يمكن إنت مستهون بيه، وهو عند الله عظيم.