الخَريــــطــة || Daamii's map ✨

ليزيرجونس لي الحالة فيها ثما مخلطة بزاف وعليها ضغط كبير بصح باقي ليسارفيس هايلين ما شاء الله سيرتو La médecine interne. كاين مشاكل كيما النظافة والبيروقراطية بصح ميش لذيك الدرجة تاع السوء لي توقعتها.. سيرتو النظافة روماركيت بلي الشعب بحد ذاتو سواء المريض ولا العائلة تاعو لي جي معاه هوما لي يوسخو الحالة أما عمال النظافة ربي يجازيهم راهم يخدمو خدمتهم على أكمل وجه.

إنَّا للَّــهِ وإنَّا إليـهِ راجِــعُون.. انتقلَت جدَّتِي إلى رحمةِ اللَّه. دعواتكم لها بالرَّحمة والمغفرة ولذويها بالصَّبر والسِّلوان 🩵.

دعواتكم لقريبَتِي بالشِّفاء العاجل إذا كاين أمل ولا عالأقل أنو يخفف عليها لأنها تعيش لحظاتها الأخيرة.

كلي هنا صح تعرفو بلي الحياة هذي ما عندها حتى معنى والموت قادر يجيك في أي لحظة في وسط اللحظات السعيدة وفي وسط المخططات غير المكتملة وفالأيام العادية بكل بساطة، وكل واحد فينا بأفكارو وطموحاتو وأهدافو وأحلامو تقدر تنتهي قصتو في يوم عشوائي بلا ما سابق إنذار. ومن جهة وحدوخرة الواحد لازم ديما يحمد ربي على نعمة أنه على قيظ الحياة فقط بغض النظر عن المعاناة لي راه يعيشها. ضكا حنا نخلصو السطاج تاعنا ونزربو نروحو لديارنا ما بينا ما علينا ونكملو حياتنا عادي، وفالعالم الآخر كاين عائلات راهم يبكيو على الموت تاع أشخاص عزاز عليهم ومزالهم تحت تأثير الصدمات.

هذ الأيام الأخيرة كانت صعيبة عليا بزاف لأنو إحدى قريباتي مرضت وتوجب عليا أنني نوڤف معاها فمصلحة الاستعجالات وهذ الشي كان تزامنا مع بداية السطاج تاعي فالـCHU. وبالرغم من أنو حالتها كانت نوعا ما ميؤوس منها ومكانش أمل كبير باه تعيش وتولي كيما كانت إلا أنو كاين حادثة صرات ثما فالـservice تاع Les urgences وين جابو واحد في نفس العمر تاعنا تعرض لحادث بالدراجة النارية وحالتو كانت صعيبة بزااااف، وجاو معاه زوج صحابو على أمل أنو يمنع وما يموتش.. لكن للأسف قدر ربي أنو يدي أمانتو وعرفو صحابو بلي صاي صاحبهم مات وجاتهم صدمة حرفيا منيش رايحة ننسى هذاك المنظر لي شفتو بعدما كانو عايشين حياتهم عادي وخرجو مع بعض باه يلعبو ويفرحو وفجأة بلا ما يديرو حساب بلي واحد فيهم رايح يرجع لدارو فالصندوڤ. حتى أنو خالتو كانت تهدر معايا وهي تبكي وتڤولي صح إذا مات ولا لالا وإذا كاين أمل باه يولي يعيش (هذي هي المرحلة الأولى من الصدمة لي اسمها الإنكار). بلا ما نحكيو على هذاك لي انتـ//ـحر فالغابة والعائلة تاعو كامل كانت مصدومة وأكثر حاجة حيرتني كي جابو معاهم ولاد صغار وخلاوهم يشوفو أهلو يبكيو ويعيطو (فلان شنق روحو فلان شنق روحو)..

Hhh.

الصورة تكفي

هذاك لي قاتلو جحيم الوعي عاللول ضحك مباعد نحى الرياج ثمثم تحسبني ما شفتكش راني شفتك يخي حالة يخي زعم أنا واعي منضحكش.

ڤولولهم يرجعولنا التريسيتي راني حنموت مالسخانة.

+ الحاجة الوحيدة لي مزالها ما صراتش أنو خطي ما ولاش مداير هكذا ويا ربي ميوليش هكذا يا ربي 🤲🏻.

كنت نقرعج فكونطي الڤديم تاع لنسطا ونشوف السطوريات من 2021 (ذاك الوقت ثماتك وين جبنا البيام وطالعين لليسي) لڤيت روحي مدايرة هذ السطوري 🤣✨. مالڤري مزال المشوار مطول ومزال ما لحڤتش مامبا 2035 بصح جاني أكبر Flash back فحياتي ضكا أنو فذاك الوقت مكانش علابالي بلي بعد خمس سنوات رايحة نولي لهذ السطوري مرة أخرى وأنا محققة حلمي فكلية الطب 🩵🥹 ديما الوضع لي رانا عايشين فيه حاليا كان في وقت ما هدف خدمنا عليه ودعاء كررناه بزاف في صلولتنا وفأوقات الاستجابة وحلم رانا ضكا عايشينو بصح ديما عقولنا مبرمجة على أنها تشوف الجزء الفارغ من الكأس للأسف وننساو بلي رانا غارقين في بحر من النعم بلا ما نفيقو.

آخر منشور للزميلة رحمها الله 😓

🔻أنباء عن وفاة طبيبة التخدير و الإنعاش حديثة التخرج بمستشفى باب الواد ، بسكتة قلبية عثر عليها في غرفة مناوبة 💔💔

وخا نندب وخاااا.

نعطيكم طريقة ✨خنفشارية✨ تحفظو بيها كيفاه تركبو les électrodes périphérique كي تكونو ديرو ECG: _ أولا رتبو les membres بهذا الطريقة: 1- La cheville gauche. 2- Le poignet gauche. 3- Le poignet droit. 4- La cheville droite. بعدها تفكرو مراحل نمو التفاحة🍎: في البداية يكون لونها أخضر 💚 من بعد يولي لونها أصفر 💛 ومن بعد يولي أحمر ❤️ وكي تفسد فالنهاية رايح يولي لونها أكحل 🖤. طابقو الترتيب تاع les membres لي اعتمدناه عاللول مع الترتيب تاع ألوان التفاح وركبوه هكذا: 1- La cheville gauche →💚. 2- Le poignet gauche → 💛. 3- Le poignet droit → ❤️. 4- La cheville droite → 🖤. وتدا ✨.

بداو.

راهم بداو.