Let's Study Together🥼🩺

ذرك نشارك معاكم مصادر لي قتلكم فقط إضافة درس ميراث وربا اكل جاكم صعيب بصح على فكرة في بكالوريا دائما يطيح على شكل مسألة مراحش طيح كل تفاصيل ووو حاولو تحلو مسائل بزاف برك

موادي علمية bac 25 18.5 علوم 16.5 مات (قصتها قصة ) 15 فيزيك

مات كي نتفكرها نحس بذل والله 😂😂😂😂 في ميزكم واش درت غلطة في جدول إشارة دالة مساعدة راحت دالة كاملة في خبر كان 😂 خرجت فرحانة وموضوع جا ساهل ووو قتلهم ورولي رسم كيفاه جاكم ومن ثم اتت صاعقة حكمتني ضبابة عشية كامل وانا نبكي 7 نقاط كامل راحت وفي الاخير الحمد لله بلاك ربي شافلي فيها خير

مواد العلمية علوم 18.5 فيزيا 18 مات وصمة عار 13

متسقسوينيش غير على لمات سبب خراب بيتي 😂😂😂😂

هكذا نظن هدرت على كل شي يخي لي عندو تساؤلات يقولي

عربية ثاني مكنتش مهتمة بيها بزاف ديت 14.5 ويعني كانت على قد اهتمامي لانك تهمل مادة تنقص العلامة عربية حتان لخر وباه قريت شوي وفي دفعتنا كانت صرات خلوطة وبزاف مداوش مليح لانو الموضوع كان ساهل مرة وفي لخر دارو كونطر خطة في تصحيح 😂 اقراو شعر ومقال مليح ميش تقراو شعر برك لاني قتلكم اتوقعو كل شي

مهم تجربة فاتت ومن الأخطاء نتعلمو

انجليزية انا جيل فرنسي ميش امريكي 👽 مكنتش نحبها نهائيا مقريتهاش ديت 14 حسيت كون قريتها غير شوي ندي علامة مليحة

نقولكم على فرنسية وانجليزية وخلاص فرنسية ديت 16.5 شفتو سمانة قبل لباك باه قريتها قريت على فيديو في اليوتوب برك شوفو الأستاذة سالي تشرح مليح بصح نصيحة تقراوها مديروش غلطة تاعي انا كنت منديرش cr كنت نكتب paragraphe ومن زهري نحس جامي كتبت ابال كنت منعرفش منهجية ولي خيرتو طاحت فيه ابال ويا فرحة ما تمت كتبت وحدة بصح بلا منهجية 😂😂 والحمد لله وخلاص عندكم تغلطو كيفي

هدرت بزاف 😬😬😬😬😬

لازم تتوسعي يا زينة 😂 او كيفاه انت تحسبي مصحح فلسفة غير يليكيدي ابدا يدقق في مقال إلى اقصى حد بصح كي نقولك تتوسعي ميش لازم تحفظي اني قتلك يكفي انك تفهمي الحجة واش تقول اذا قدرتي احفظيها نورمال ومن بعد اشرحيها باسلوبك

لي سقسيتي ميش شرط كيما حفظتي بصح كاين عناصر ملازمش تغلطو فيهم حنا رانا نهدرو بأسلوب انكم تخدمو على الامتياز بإذن الله (لازم ولا نقتلكم😂)

واعتامدو على اسلوبكم باه مصحح يعرف بلي صح حاب تتفوق ميش تحط مقال كيما حفظتو لأنهم يعرفو يفرقو بين واحد حفظ واحد راه يكتب باسلوبو

فلسفة ديت 15 صراحة مكنتش مهتمة بيها ومن بعد ندمت قلت كون قريت شوي أكثر ندي فيها علامة مليحة كنت ندير طريقة تخطيط مقالة ندير غير مقدمة والخاتمة لي نحفظوهم والعرض والحجج كنت نفهم برك +هاذي مانيش من نوع لي حفظ مقالات ولا مقترحات قريت واش قدرت برك وخيرت الاستقصاء ثاني اقراو منهجيات مليح مليح

احفظو الخرائط عليهم 3.5 وتحليل الوثيقة عليه 3.5 ومقال تتعلمو ديرو مقال منهجية صحيحة تديو بإذن الله

جغرافيا حفظتها في مدة قصيرة والحمد لله ديت في اجتماعيات 17.5 قتلكم أخطاء كانت في تاريخ لاني نسيت شوي تواريخ وموضوع لي خيرتو كان فيه شوي تواريخ

وكنت ندير نفس الطريقة تاع تاريخ تاع مصطلحات ودرس فقط شيء لي عاوني في جغرافيا اني كنت نعرف ندير مقال مليح وقراءة الوثيقة يسما مكانش عندي مشكل نهائيا وثاني شفت الاستاذ امين

جغرافيا أسهل مادة عرفها التاريخ 😂 كانو عناصر يتكرو بزاف تاع قوة والضعف ووو تحفظ مثلا تاع أمريكا نفسهم تلقاهم في صين

وهكذا كملت حفظ تاريخ وحفظت مقرر كامل شوي تواريخ مشفيتش مليح نقصت العلامة 😂