قوم امشِي صلِّ

يوم الجمعة عارفين حنقول ليكم شنو صح ؟👀 #قوم_امشي_صلِّ💚

حصل وقعت في ذنب وبعد ما عملته حسيت إنك خلاص من أهل النار وإنه مستحيل ربنا يتوب عليك من الذنب ده، وخلاص قنعته من مغفرة ربنا ليك عشان الذنب أكبر من إنه يغتفر وبعدها بقيت تفكر في إنك بتصلي عشان إنت منافق وبتصوم نفاق وبتتصدق نفاق وأي عمل صالح نفاق؛ لأنك مذنب قبل كده بذنب لا يغتفر ؟ طيب إنت عارف إنه ده مدخل معروف من مداخل الشيطان ؟ النفس اللوامه حاجة كويسة شديد بس {قَالَ وَمَن يَقْنَطُ مِن رَّحْمَةِ رَبِّهِ إِلَّا الضَّالُّونَ} ربنا رحيم بفرح بالعبد الأول ما يعرف إنه أذنب .. يهرول طوالي للتوبة ويوعده وعد صادق بعدم الرجوع ويطمع في مغفرته ورضاه، أما غير كده فدي أفكار شيطانية بييأسك بيها؛ عشان ما تعمل البحبه منك ربنا وتستمر في الذنب فحتى ولو ضعفت نفسك مره وإتنين وتلاته .. أرجع تاني وتالت ورابع إلى قيام الساعة فباب التوبة مفتوح ورحمة ربنا وااسعه💚 #قوم_امشي_صلّ💚

كم مرة بنمر على استوريات أو بنفتح جروبات الواتساب ونلقاها مليانه نقاشات عادية؟ وكم مرة بنقرا آية وبتهزنا من جوة أو بنمر على معنى لحديث وبنقول في سرنا: "سبحان الله"؟ الـ 30 ثانية الـ بتاخدها عشان تعمل نشر للفائدة دي في حسابك هي أسهل استثمار لمستقبلك الاخروي.🍃 إنت ما محتاج تكون شيخ أو داعية عشان تنفع الناس إنت محتاج بس تكون مُذكِّر. لعل آية بتفسيرها البسيط تنزلها في إستوري تقع في عين زول ضايقه به الدنيا وتكون مواساة ليه ولك الأجر! ولعل حديث أو لطيفة دينية ترسلها في جروب يصحح مفهوم زول ولك الأجر! قال ﷺ: "إذا مات ابن آدم انقطع عمله إلا من ثلاث: صدقة جارية، أو علم يُنتفع به، أو ولد صالح يدعو له" "من دل على خير فله مثل أجر فاعله" "إِنَّ مِمَّا يَلْحَقُ الْمُؤْمِنَ مِنْ عَمَلِهِ وَحَسَنَاتِهِ بَعْدَ مَوْتِهِ: عِلْمًا عَلِمَهُ وَنَشَرَهُ..." المسألة كلها احتساب أجر ونية صالحة قبل الضغطة على كلمة نشر. جروباتنا وإستورياتنا ممكن تكون مجرد تسلية وممكن تكون أعظم تجارة مع الله وتدير لينا حسنات حتى ونحن نايمين أو بعد ما نغادر الدنيا دي. من الليلة قبل ما ترفع أي فائدة انوي بيها نفع الغير وتذكير الغافل وخلّي أثرك ممتد. 💚 وتذكّر: رُبَّ عملٍ صغيرٍ تُعظِّمُه النيّة. فلا تستصغر شير أو لطيفة قرآنية أو تذكير بسيط فيمكن يكون سبب في هداية شخص أصلح نيتك وخلي السوشيال ميديا حقتك شاهدة ليك لا عليك وابدأ مشروعك الأخروي من الآن💚 #قوم_امشي_صلِّ💚

لمّا أمك تقول ليك: تعالي غسلي العدة يا بنت، أول حاجة بتجي في بالك شنو ؟🤔 ليه ليه أنا بس ؟🫩 هي العدة دي بتولد ؟! قبل شوية ما غسلتها معقولة ياخ ؟ لكن تعالي أقول ليك حاجة ممكن تغيّر نظرتك للشغل دا كله لو قلت ليك إن الكنس وغسيل العدة والطبخ ممكن يبقوا عبادة ؟ أي والله بس احتسبي الأجر 💚 • لمن تساعدي أمك استحضري نية بر الوالدين • لمن تجهزي الأكل انوي إطعام المسلمين • لمن تملي موية في الجك أو الحفاظه دي سُقيا مسلم يعني إنتِ ممكن تكوني واقفة قدام الحلة حرانة وتعبانة وفي نفس اللحظة عداد حسناتك شغال واتخيلي معاي كمية الاستغفار والذكر الممكن يطلع من قلبك مع كل صحن وكباية بتغسليهم صابون في يدك، وذكر في لسانك، وحسنات في كتابك في أحلى من كدا؟ حتى اللحظات البتقولي فيها خلاص يا جماعة أنا تعبت لو صبرتي واحتسبتي التعب ذاته ربنا بيؤجرك عليه 💚. أها بعد الكلام السمِح دا، لو أمك نادتك هسي وقالت ليك تعالي غسلي العدة ما دايرين نسمع يوووه وأنا مالي 🤭.. أرفعي راسك فوق وقولي ليها: يا أمي أنا ماشة ألقط حسنات وأجيك. فـ يا دكتورة المطبخ ويا وزيرة النظافة من الليلة شغل البيت ما حرب شغل البيت ساحة غنائم أربطي حزام الحماس، وجهزي نيتك قبل مُكشاشتك. وتعبك دا والله ما ضايع عند رب كريم ربنا يتقبل منكم ويجعل بيوتكم مليانة بركة وسعادة ويرزقكم بر أمهاتكم 💚. #قوم_امشي_صلِّ💚

من بودكاست فاهم | (سلسلة تذوق العبادات - الذكر) د. أحمد العربي > قال النبي ﷺ: ”من قال حين يصبح (اللهمَّ إني أصبحتُ أشهدُكَ وأشهدُ حملةَ عرشِكَ، وملائكتَكَ وجميعَ خلقِك بأنَّك أنت اللهُ لا إلهَ إلا أنتَ وحدك لا شريكَ لك، وأنَّ محمَّدًا عبدُك ورسولُك) من قالها حين يصبح أربع مرات أُعتق من النار.“ > قال النبي ﷺ: ”من قال حين يصبح (بسمِ اللَّهِ الَّذي لا يضرُّ معَ اسمِهِ شيءٌ في الأرضِ ولا في السَّماءِ وَهوَ السَّميعُ العليمُ) ثلاث مرات لم يضره شيء“ > قال النبي ﷺ: من قال حين يصبح (حسبيَ اللهُ الذي لا إلهَ إلَّا هوَ، عليهِ توكَّلْتُ وهوَ ربُّ العرشِ العَظيمِ) كفاه الله ما أهمه في دينه ودنياه.“ > قال النبي ﷺ: ”من قال حين يصبح (رَضيتُ باللَّهِ ربًّا، وبالإسلامِ دينًا، وبِمُحمَّدٍ ﷺ رسولًا) ثلاثاً، كان حقاً على الله أن يرضيه.“ قال النبي ﷺ: ”من صلَّى عليَّ حينَ يصبحُ عشرًا وحينَ يمسي عشرًا أدرَكتْهُ شفاعتي يومَ القيامةِ.“ تنويه: الحديث الأخير حكمه ضعيف ولكن المعنى صحيح بإذن الله. #قوم_امشي_صلِّ💚

الدولار حصل ٥ ألف ولسه حيزيد كمان .. البنزين زاد والسكر والدقيق زادوا .. المرتب بقى ما بكفي وأصلا البلد دي كدا إلا الواحد يتخارج منها يا رفيق أوقات الشدة والأزمات دي ياها أوقات الإختبار والصدق وحُسن الظن بالله فما تتعلق بالظروف والأسباب واتذكر كلام أحد الصالحين لم سألوه: أما ترى قد غلا السعر ؟ فقال : وما يغمكم من ذلك إن الذي يرزقنا في الرخص هو الذي يرزقنا في الغلاء 💚 فاستعن بالله ولا تعجز.. فمن رزقك وأنت لسه جنين حيرزقك إلى أن تلقاه في الآخرة فخزائن الله ملئ ولا تنفد #قوم_امشي_صلِّ💚

المراية… شكل ولا قلب؟ لما نكون طالعين مشوار، طبيعي نقيف قدام المراية مرة ومرتين… وأحيانًا نقول: "آخر مراجعة بس" ونرجع نطالع نفسنا مرات كتيرة 😂 بنظبط اللبس، بنرتب الشكل وبنتأكد إنو كل حاجة تمام. لكن في مراية أهم… مراية القلب. 💚 آخر مرة راجعت قلبك كانت متين؟ - نزعت منو الحسد؟ - طهرتو من الغفلة؟ - استغفرت عن الذنوب البقت تتراكم؟ الله سبحانه وتعالى قال:

{ یَـٰبَنِیۤ ءَادَمَ قَدۡ أَنزَلۡنَا عَلَیۡكُمۡ لِبَاسࣰا یُوَ ٰ⁠رِی سَوۡءَ ٰ⁠ تِكُمۡ وَرِیشࣰاۖ وَلِبَاسُ ٱلتَّقۡوَىٰ ذَ ٰ⁠لِكَ خَیۡرࣱۚ ذَ ٰ⁠لِكَ مِنۡ ءَایَـٰتِ ٱللَّهِ لَعَلَّهُمۡ یَذَّكَّرُونَ }

يعني باختصار: ألبسوا واتزينوا… لكن لا تنسوا اللبسة الأعظم: لباس التقوى. 🌿 اللباس البخليك جميل عند الله، حتى لو ما كنت لابس أغلى الماركات. قال النبي ﷺ:

”إن الله لا ينظر إلى صوركم ولا إلى أموالكم، ولكن ينظر إلى قلوبكم وأعمالكم“

فقبل ما تسأل: "شكلي مرتب؟" اسأل نفسك: قلبي نضيف؟ #قوم_امشي_صلِّ💚

تَوكلْتُ في رِزْقي عَلَى اللَّهِ خَالقي وأيقنتُ أنَّ اللهَ لا شكٌ رازقي وما يكُ من رزقي فليسَ يفوتني وَلَو كَانَ في قَاع البَحَارِ الغَوامِقِ سيأتي بهِ اللهُ العظيمُ بفضلهِ ولو لم يكن مني اللسانُ بناطقِ ففي أي شيءٍ تذهبُ النفسُ حسرةً وَقَدْ قَسَمَ الرَّحْمَنُ رِزْقَ الْخَلاَئِقِ "جَلِيس"💚 بسمِ اللهِ نبتدئ وبِهِ نستعين♡ رابط المجلس ⤵️💚: https://t.me/Gom9li?livestream نافذة التعليقات⤵️💚: #جليس #قوم_امشي_صلِّ💚

يقول الإمام ابن القيم رحمه الله: "لا تحمل هم الرزق فإنه من الله، فقط احمل همًا واحدًا كيف ترضي الله؛ لأنه لو أرضيت الله، رضي عنك وأرضاك وكفاك وأغناك" من الأمور البتشغل بالنا في أغلب أوقاتنا هي مسألة الرزق بكل أنواعه وأشكاله، بس هل نحنا بنفكر فيه بالطريقه الصاح ؟ وهل تفكيرنا فيه حسن التوكل على الله؟ وهل بنتوكل ولا بنتواكل؟ والمطلوب مننا شنو عشان نحصل عليه بالطريقه الصاح ؟ دي كلها أسئلة حنعرف أجوبتها مع جليس الإثنين، د. يزيد المنير جزاه الله عنَّا خيراً 🌿 في محاضرة بعنوان : (تغدوا خماصاً وتعود بطاناً)

📆 يوم الإثنين | ٢٩ ذو الحجة ١٤٤٧هـ الموافق ١٥ مايو ٢٠٢٦م ⏰ الساعة | ٨:٣٠ مساءًا بتوقيت الخرطوم — ٩:٣٠ مساءًا بتوقيت القاهرة ومكة المكرمة أحبِّ البقاع 💚 📍 على قناتكم قوم امشي صلِّ على التيليجرام

فكونوا معنا حضوراً وأضبطوا المنبهات .. وما تنسوا تكلموا الأصحاب #جليس #قوم_امشي_صلِّ💚

ما تيسَّر من سورة النور – الشيخ المنشاوي رحمه الله 💚

{اللَّهُ نُورُ السَّمَاوَاتِ وَالْأَرْضِ ۚ مَثَلُ نُورِهِ كَمِشْكَاةٍ فِيهَا مِصْبَاحٌ ۖ الْمِصْبَاحُ فِي زُجَاجَةٍ ۖ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِن شَجَرَةٍ مُّبَارَكَةٍ زَيْتُونَةٍ لَّا شَرْقِيَّةٍ وَلَا غَرْبِيَّةٍ}

#قوم_امشي_صلِّ💚

ياخ والله فلـم من المـوت عديـل ياصحـبي💀 تذكـر لما رشحـت الفلـم الزابط داك لصحبـك؟ وصحبـك عجبـه رشحو لأخـوه، وأخـوه رشحو لصاحبه، وصاحبه رشحو في قروب 500 نفر. أنـت بهناك عايش عادي، بتصلي، بتنوم، بتاكل؛ بس عداد سيئاتـك جاري وما وقـف للحظـة ❗ النبي ﷺ قـال: "من دل على شـر كان له مثـل وزر من فعلـه" عارف يعنـي شنـو؟ ذنـب الزول الحضر + ذنـب الزول الوراهو + ذنب الزول الوراهو... كله في صحيفتك أنـت. تخيل متَ وأنـت خليت وراك "صدقة جاريـة" بس في السيئـات والعيـاذ بالله. كل ضغطة Play = سيئة جديدة وانت في قبرك. من الليلـة ومن البوسـت دا، قبـل ترسل "ارح المسلسل دا زابـط" اسـأل نفسك سـؤال واحـد بـس: أنا بستحمل أشيـل ذنـب النـاس دي كلها يـوم القيامـة؟ لو الإجابـة لا... قوم هسي احـذف أي ترشيـح كتبتـه، أي بوست فيه أغنيـة، أي رابـط ممكن يجـر زول للحـرام. قبل ما ربـنا يأخـذ أمانتـه من الدنـيـا وأنـت شايـل الجبـل دا في ضهـرك😞. #قوم_امشي_صلِّ💚

أنت تحاول! أعلم يا وجه الخير أنك تحاول.. تسقط حينًا وحينًا تعود لتلحق بالركب، تضعف نفسك أحيانا فتجرفك لطريق لا تطيقه، لكنك سرعان ما تركض نحو النور مرة أخرى. أتدري كيف علمت هذا ؟ لأني مثلك، وكذلك هم.. فلا ينتابنك اليأس، جاهد حتى تنتقل إلى جوار ربها روح مجاهدة ترجو الإستقامة حتى آخر رمق !💚 #قوم_أمشي_صلِّ💚

ما تخلي الشيطان يوسوس ليك ويخليك تفكر إنو خلاص ربنا ما حيقبل توبتك ولا حيغفر ليك عن ذنبك لأن دي مهمته وربنا ذكر لينا الحاجة دي، فقال سبحانه: {إِنَّمَا النَّجْوَىٰ مِنَ الشَّيْطَانِ لِيَحْزُنَ الَّذِينَ آمَنُوا} والنجوى هي الوساوس والقول الخفي البيقذفه الشيطان في قلوب المؤمنين وأنت مؤمن بربنا وبرحمته وإنو غفار لمن تاب وعمل صالحا عشان كدا ما تشتغل بكلامه واستغفر وتوب عن الذنب ولو عملته ألف ألف مرة ”فإنَّ اللهَ لا يَمَلُّ حتَّى تَمَلُّوا“ وأعمل خير واتصدق وأحسن توبتك ربنا ما حيغفر ليك بس لكن حيبدل ليك السيئات حسنات كمان 💚 #قوم_امشي_صلِّ💚

عارف يا عزيزي إن الذنب ممكن يكون سبب في دخولك الجنة؟ 🤔 أيوه…الذنب! تعال نشوف كلام ابن القيم رحمه الله: قد يكون الذنب سببًا في دخول العبد الجنة إذا قُرن بتوبة صادقة ،لأن الذنب يورّث انكسار القلب بين يدي الله،ويجعل العبد يُكثر من الاستغفار، ويبتعد عن العُجب والغرور، ويرجع إلى الله بصدق وخضوع. نحن بشر بنذنب، ودا ما معناه إننا نتكبر أو نغتر بأعمالنا الصالحة، لأن ما في زول ضامن نفسو، والمؤمن دائماً يعيش بين الخوف والرجاء. في واقعنا ممكن زول يعمل طاعات كثيرة ويحس إن ضمن الجنة، لكن الحقيقة إن الذنب بذكّرك دائماً إنك محتاج لله فتقوم ترجع، تستغفر، وتجدد التوبة. أما السلف الصالح، فكانوا شديدين في محاسبة أنفسهم، يعيشون بين الخوف والرجاء والطمع في رحمة الله. وقد قيل: البصراء لا يأمنون من أربع خصال: 1.ذنبٌ مضى ولم يُغفر لهم. 2.عملٌ صالحٌ لا يُقبل منهم. 3.نعمةٌ أُعطوا إياها وقد تكون استدراجًا. 4.فتنةٌ تأتيهم في دينهم عند الموت أو في حياتهم. عمر بن الخطاب رضي الله عنه قال: “لو نادى منادٍ من السماء: أيها الناس، إنكم داخلون الجنة جميعًا إلا رجلًا واحدًا، لخفت أن أكون هو…” فهذا عمر… فمن نحن؟ 💚 فلا تستصغر الذنب، لأنك إذا استصغرته عظم عند الله، وإذا عظمته وتبت منه بصدق، صغر بإذن الله ✨ #قوم_امشي_صلِّ💚

من خطب الحرم المكي | الشيخ أحمد بن طالب 💚 وصلوا وسلموا عباد الله على خير خلق الله محمد بن عبدالله، فقد أمركم الله بالصلاة والسلام عليه فقال: {إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} فاللهم صلِّ وسلم وزِد وبارك على عبدك ورسولك نبينا محمد. #قوم_امشي_صلِّ💚

اللهٌ إذا أراد بعبـدِه خيـرًا، فتـحَ له بابَ الدعـاء في اوقـاتِ الرجـاء💚. عارف يعنـي شـنـو؟🫣 يعني ربنا شايفك نايـم، و إختارك أنـتَ بالاسـم عشان تقـوم!. "فتـح له بـابَ الدعـاء" = قلبك بقى ما مُرتـاح إلا تناجـي ربنـا وتحكي وتشكي ليه. "أوقات الرجاء" = الأوقات الربنـا قال فيـها "أنا قريـب" ادعوني استجب لكـم" زي قيـام الليـل؛ الساعة 3 الفجـر ربنا نازل السماء الدنيـا وبقـول: من يدعونـي فأستجب له، من يسألنـي فأعطيه، من يستغفرنـي فاغفر له. تخيل ربنـا إختارك من بيـن كل الناس عشان تـصلي وتـدعي حتنـوم وتخلـي؟ قيام الليـل ما عبـادة زيـادة، دا اصطفـاء ناس نايمـة و ناس واقفـة بيـن يـدي ربنـا💚!. فأنـتَ أي واحـد فيهـم؟ ‏﴿‌‏قُمِ اللَّيْلَ إِلَّا قَلِيلًا﴾ #قوم_امشي_صلِّ💚

كتير مننا فاهم الصلاح دا غلط، قايلو إنك تبقى "درويش" لابس جلابية بيضا وقاعد في الزاوية، ومقفل على نفسك ومقاطع الدنيا! لا يا حبيبنا.. الصلاح دا مش "انعزال"، الصلاح دا "اتصال". عارف يعني شنو تكون صالح؟ يعني لما تقفل باب غرفتك عليك، وتكون براك تماماً، والإنترنت شغال، والفتن مية مية.. تذكر إنو "الله يراني". الصلاح بيبدأ من الحتة دي.. من "صلاح السريرة". صالح يعني: صلاتك في وقتها، ما مجمهة ومأخرة. صالح يعني: قلبك دا نضيف، ما فيهو حقد، ولا حسد، ولا "شmar" بياكل في حسناتك. صالح يعني: لسانك دا عفيف، ما بتخوض في أعراض الناس ولا بتجرح زول. الزيتونة: رب العباد قال: {إِلَّا مَنْ أَتَى اللَّهَ بِقَلْبٍ سَلِيمٍ}. صلح السيرفر الداخلي حقك أول، وخلي علاقتك مع الملك 100%.. بعد داك بتلقى نور الصلاح دا طلع في وشك وفي حياتك تلقائياً. يا صاحب السعادة.. ابدأ الليلة، صلح لابتوب قلبك، وامسح ملفات الذنوب بالاستغفار، وقول: "يا رب، أنا داير أبقى صالح لوجهك الكريم". #قوم_امشي_صلِّ💚

مواسم الطاعات جاءت مبشرة يا باغي الخير أقبل ففيها الخير لم يزل والكيّسُ من عمل فيها مخلصاً ومشى في درب الهدى بلا كسل فما انقضى واجب التقوى بآخرها بل بابها مشرع للصادقين بالعمل "جَلِيس"💚 بسمِ اللهِ نبتدئ وبِهِ نستعين♡ رابط المجلس ⤵️💚: https://t.me/Gom9li?livestream نافذة التعليقات⤵️💚: #جليس💚 #قوم_امشي_صلِّ💚