إقتباسات وأشعار حزينة 🖤🤍🌿

واحد صاحبي بيحكيلي بيقول:" كنت قاعد عند خطيبتي وبنتغدا كلنا وسط أهلها وبنضحك وخلصنا أكل وشالت الأطباق ، ولاقيتها خارجة من المطبخ بالشاي وقالت يا جماعة عاوزة اقولكم حاجه انتبهنا كلنا لكلامها وقالت ( انا مش عاوزة اكمل ف الجوازة دي وما عنديش اسباب) ودخلت الأوضة وسابتنا في ذهول!!! انا فضلت ساكت ماعنديش كلام اقوله أهلها بيبصولي وبيبصوا علي باب اوضتها المقفول ، محدش فاهم حاجه نهائي! دخلت والدتها كمحاولة منها انها تتكلم معاها وتعرف السبب وهي رافضة وبتعيط ، انا حسيت الكلمه صدمتني وبقيت مش عارف المفروض اعمل ايه!! وكتب كتابنا اللي كتبناه من شهر!! وفرحنا اللي كمان15يوم ده!! والشقة اللي اختارنا كل ركن فيها علي ذوقنا!! دعوة فرحنا اللي عليها اسمي جنب اسمها!! كل حاجه بتدور ف عقلي ، كل حاجة بتقول ازاي دا يحصل!! فوقت من دوشة عقلي علي صوت والدتها وهي بتزعق وبتقول لباباها ادخل شوف بنتك دي اتجننت وانا والله ما هسيبها ودخل والدها وبرضو نفس النتيجة وصوته كان عالي بسبب عِندها وإصرارها إننا منتجوزش بدون اي اسباب ، وانتهي كلام والدها بأنه كان هايمد ايده عليها ويضربها فدخلت الاوضة ولحقته قبل مايضربها وقولتله "بعد اذنك يا عمي ممكن تسيني اتكلم معاها شوية:' رد " استني يا بني دي مش عاوزة تعامل غير كده.. جاية بعد كتب الكتاب بشهر وقبل ماتتجوز ب أسبوعين عاوزة متكملش ، عاوزة تبقي ف الآخر واخدة لقب مطلقة ويُحسب عليها وخلاص ، الناس هتقول علينا ايه) ومصمم يضربها لولا أن انا واقف بينهم وماسك ايده قبل ما يضربها وقولتله " عمي بعد اذنك ، انا عارف انها بنت حضرتك وحقك عليها وعليا كبير ، بس دي مراتي دلوقتي والمشكلة بيننا وانا هحلها وعد مني سيبني بس معاها شوية " بصلي وهو متعصب وسابنا وخرج قعدت علي طرف السرير وبصيت لها وهي بتعيط جامد ومنهارة وبتترعش وقولتلها مش هضغط عليكي ووعد مني هنفذلك كل اللي تطلبيه بس بعد مانخلص كلام ، انا عملتلك حاجة زعلتك مني؟ هزت راسها بالنفي واني مش مزعلها قولتلها اومال مالك مين زعلك بس؟ مش عاوزة تتجوزيني ليه؟! ردت " انا مش عاوزة اتجوز اصلا " قولتلها ليه؟ مش بتحبيني؟ اهتمام ومهتم بكل حاجة وجبتلك كل حاجه تتمنيها ف شقتنا ولو تطلبي عينيا هجيبهالك ناقصك ايه؟ ردت وهي ف عينيها الدموع( الأمان)، ناقصني الأمان...فكرة اني احب حد جامد واتعلق بيه وممكن يروح مني مُخيفة ليا' قولتلها يروح منك ؟! ازاي ممكن توضحي؟ قالت : "يزهق منها وبكل سهولة يتجوز واحدة غيرها ، او يقسي عليها ، يمل وجودها ويمل كلامها ويمل حبها واهتمامها ، يبطل يكون حنين عليها " كل دي طرق تخليه يروح منها قولتها : طب واللي يعمل حاجه واحدة بس من الحاجات دي تفتكري انه كان بيحبها!! ردت وقالت : اكيد حبها ، بس مع الوقت كل ده بيروح ابتسمت وقولتلها : "فيه فرق بين حب وإعجاب وتسلية وفرق بين حب ومودة واحترام وبيت واستقرار وكملت كلامي وانا بقولها رغم ان الحب صعب يروح مع الوقت لو كان حب حقيقي ، بس خليني معاكي انه ممكن يروح ممكن ، بس لما يكون فيه بيت وأسرة مترابطة واحترام وحنية بين الطرفين لو الحب راح الحنية هتداويه وهترجعه من تاني واقوي من الاول ، انتِ أكيد عارفة ان مافيش اتنين مش بينهم مشاكل ، يمكن المشاكل تضعف حبهم ، بس ترجع الحنية بينهم تقوي الحب واحدة بواحدة لحد مايرجعوا اقوي من الاول ، ف لو هو إنسان عنده مبدأ وحبها حب حقيقي متضعفوش المشاكل بل بالعكس بتقويه بالتالي مش هيقدر يروح لوحده تانيه ويتجوز عليها ، ولا هيقدر يقسي عليها ويكسر قلبها ، ولا هيمل وجودها وكلامها وحبها بل بالعكس هيتجدد ف قلبه من تاني وستات العالم كلها مش هتساوي وجودها ف قلبه " ردت : عارفة إني معقدة وبخاف اوي قولتلها: انتِ مش معقدة ، انتِ محتاجة تطمني وده حقك مش هتمل وجودي؟ =هحبه مع الوقت اكتر مش هتقسي عليا؟ = لو العالم كله قسي عليكي انا اللي هحميكي مش هتتجوز عليا أبداً؟ =من ساعة ماشوفتك مش شايف بنات غيرك والله طبعت كروت دعوات الفرح؟؟ =جاهزة ومستنية رضاكي إنت أعظم انتصاراتي❤🥺 ‏"وَمِن آياتِِه أَنْ خَلَقَ لكُم مِن أَنفِسِكُم أَزوَاجًا لِتسْكنُوا إِلَيها وَجَعلَ بَينَكُم مَوَدّةً وَرَحمَة" أزواج لتسكنوا إليها، مشاعر السّكينة أعلى من مشاعر الحُب، لا تحل السكينة إلا بتمام الحب واكتماله، لذلك تعمُر قلوبنا الطمأنية ونحن برفقة من نحب، كذلك المودّة والرحمة من تجلّياته العظيمة