WIN BAC

فات افريل فات ماي فات جوان قرين 15ساعة عشرة سوايع وحتا ساعتين اهم شي ماستسلمناش للخر فاتت سمانت لباك جا جويلية وانا فخورة بكل واحد فيكم علبالي تعبتو. ياربي ميخيب حتا واحد فيكم ياربي نجاح ليكم قاع ياربي قاع ديرو شاباغيين ياربي راك عارف بلي تعبو متردهمش بدموع لحزن ياربي ردهملنابزغاريت ودموع لفرح ياربي😭

بصح تبقى ذكرى سعيدة كي شفت 15.18 مت بالسعادة مالڨري مكانش المعدل لي حاباتو و ستنيتو مي بصح والله فرحت اول مرة نحس حققت انجاز و شفت والديا فرحو دنيا و ما فيها 😭 و الحمد لله دك راني طروازيام صديلة ( كان اكثر تخصص نكرهو و كنت نقول مانديروش بصح كون يولي بيا زمان نديرو غير هو)

كان خلاوكم في نيتكم؛ وليلة 12 قالولكم غدوة النتائج باه ميطوالوش النهارات عليكم بزاف :)

و كي لحقت 14 بدات جيني لحظة ادراك لواش راه يصرا كي خرج بابا من الخدمة و جا قعد قابلني فالصالون و دار النهار ممبعد جاو لافامي يشوفو كي لحقت و قعدت بلا ستراس حتى لحقت 15.59 فتحلي السيت وليت نرعش كي تريسيتي عام كامل مسريسيتش خلفتها فهديك الدقيقة 😂 و ياا خاوتي وش نقولكم مت و حييت و مقدرتش نمشي رجليا فشلو يديا يرعشو باش نكتب رقم التسجيل نكتب و نغلط و العملية هديك معرفتش نحلها 😂😂😂😂 اياياي كي نتفكر وش صرا فيا هديك دقيقة نشبع ضحك

ختكم من جماعة 2024 لي خلعوهم صباح ربي وهوما راقدين وقالوهم بلي اليوم النتائج :)

انا نشفا كي حطولنا بلي غدوة النتائج مت بالسعادة بسك أخيرا راح نتهنى انا رقدت هديك ليلة عادي دارنا واحد مرقد انا رقدت بالنوم و نضت الاز و ماما تخزر فيا بهيدك الخزرة الواعرة درنا شغل عاادييي والو ستراس لي يقولك متفطرش و تتكوبا لابيتي مكاش منها كليت حتى شبعت

جا الوقت وجاو فاميلتي واللي يشوفني يحسبني جيت الاولى وطنيا تالمون كنت مرتاحة 😂 و قلتلهم ماكانش اللي يفتح يشوفها من غيري انا والحمد لله جبتو 17,01 و حاليا راني طالبة طب سنة رابعة و مازال في حياتي ما فرحت كيما هاذاك النهار العقوبة عندكم ان شاء الله كثرو الدعاء ❤️

ايا صحا ختكم أميرة منا في عام الباك ماكانش عندها مصطلح سموه الستراس 😂 لا نهار الباك لا نهار النتائج ووصلت بيا الجرأة عرضت كامل فاميلتي يشوفو معايا النتيجة و انا حرفيا ما عارفة لا نجيبو لا ما نجيبوش 😂

نحكيلكم كيفاش فاتو النتائج عندي انا ؟ 😂

السلام عليكم بالنسبة للناجحين كي تجيبو البيلتا خبو الرقم السري لي فيها ( كاين لي ينشرها ستوري ) + دعواتكم لي وشكرا .

انا رقدت هي وصلت 4 وقتنا خرج على 4 قعدت انا اخر واحد في وين نسكن مشفتش اسكو نجحت ولا لا ريزو دارها بيا ايا قلت سيبو منجحتش فقدت امل قلت باينة محبش يخرج اسمي مافيهاش دار كل مالقاو واش يهدرو روحت قفلت على روحي غطيت على راسي ورقدت خمس دقايق هكذاك زدمو عليا عايلة كاملة في عرش لشومبرا راك نجحتي راك نجحتي ديتي 15 فيق راك ديت 15 وتزغريت من شوك قعدت نقوللهم فيها خير فيها خير لعام جاي ان شاء الله 😂

حبيت نقولكم لي عندهم فضاء أولياء شوفو غي لتم خاوتي يخرجلكم نتائج قبل لوقت

المهم ميساء أكثر بنادم كانت تستريسي بزاااااف خاصة كنت خايفة ما نديش مليح و لا ما شفتش تصحيح ما والو كنت ما نرقدش ليل من كثرة تخمام مهم مور باك مت و صاي نعقل نهار قالو على 10 بلي باك ليوم ما كنتش راقدة حتى شفت بلي يقولو ليوم بكيت زادني خوف💔💔💔 المهم جات صحبتي و كنا نسناو تجي 16h..... عند 15h30 بداو يقولو لي جاو لوالا في جزائر و أنا قعدت داخلة خارجة من سيت و في SMS الحمد لله الأم كان عندها فضاء الأولياء تقدر تشوف قبل 16h.....جات 15h40 شافت مبروك بتقدير جيد جدا معدل 16🔥 علابالكم بكيت بكيت بكيت ما تأمنوش لأن ما كنتش نتوقع ندي نقطة شابة هكذا كامل في دار بكاو و فوت أحلى أيام الحمد لله يا ربي😭

نحكيلكم كيفاه فاتو نتائج عندي؟

أنا لي كملت مع باك هذي عامين و خفت😔😂 ربي يكون معاكم خاوتي

✅✅

رسميا

الاعلان عن نتائج البكالوريا يوم الاحد 12 جويلية على الساعة 10

للآباء والأمهات: في أيام نتائج الباك، أولادكم يحتاجوا منكم الرفق قبل العتاب، والكلمة الطيبة قبل اللوم. إن فرحوا فشاركُوهم فرحتهم، وإن خابتهم النتيجة فكونوا لهم سندًا لا عبئًا، فبعض الكلمات قد تُجبر القلب… وبعضها قد تكسره. قال رسول الله ﷺ: “إنَّ اللهَ رفيقٌ يحبُّ الرِّفقَ في الأمرِ كلِّه” 🤍

تربطش روحك برقم، وما تخليش كلمة من الناس تهز ثقتك في نفسك. الناس تشوف النتيجة فقط، بصح أنت وحدك تعرف شحال تعبت، شحال صبرت، وشحال قاومت باش تكمل. ولهذا افتخر بنفسك لأنك وصلت لهذي المرحلة وواجهت عام كامل بكل ما فيه❤️❤️🤝. ارضَ بما كتبه ربي، وخلي عندك يقين بلي الخير فيما اختاره الله. إن كانت فرحة، فاحمد الله عليها. وإن كانت خيبة، فاعرف بلي ربي يقدر يخبيلك طريق خير مما كنت تتمنى. الباك مهم، بصح ماشي هو الحياة كاملة، وماشي هو النهاية. أنت أكبر من نتيجة، وأقوى من تعثر، وقدّامك فرص كثيرة بإذن الله. المهم أنك درت لي عليك، والباقي خليه على ربي، لأنه لا يضيع أجر من أحسن عملاً💕�

نصيحة لكل طالب باك: مهما كانت النتيجة لي راح تشوفها، حاول تستقبلها بقلب راضي🫶🏻🤍. إذا نجحت، احمد ربي وافرح بتعبك، وإذا ما جاتش كما كنت حاب، ما تخليش لحظة وحدة تكسرك ولا تخليك تنسى كل واش درت طول العام🌸. تذكر بلي عام الباك ما كانش مجرد امتحان وخلاص، كان تعب وسهر، خوف، ضغط، دموع، تعب نفسي وجسدي، وأيام صعيبة بزاف. كنت تقرا وانت مقلق، وتفيق بكري، وتسهر حتى للليل، وتعيش ضغط ما يعرفو غير لي جربو. وهاد كامل ما يروحش هباءً، لأن التعب لي تعبتو راه محسوب عند ربي قبل الناس🌸. إذا كانت النتيجة مليحة، فهذي نعمة من ربي وتاج فوق تعبك. وإذا ما كانتش كما تمنيت، ما تعنيش بلي أنت فاشل، وما تعنيش نهاية الطريق، وما تنقص حتى حاجة من قيمتك. النتيجة مجرد محطة، ماشي حكم على مستقبلك كامل، وماشي مقياس لذكائك ولا لقيمتك كإنسان.🤍