БСТ | Яңылыҡтар

Белорет трассаһында мобиль элемтә булдырыла Район хакимиәте башлығы Андрей Иванюта белдереүенсә, ошо айҙа Архангел һәм Ҡолмаҫ ауылдары араһында 6 станция урынлаштырыла. Киләһе йылда Инйәргә тиклем тағы 5-әү файҙаланыуға тапшырыла. - Беҙҙең таулы район өсөн был үтә әһәмиәтле, - ти Андрей Иванюта.

Өфөлә «Традицияларҙың мең төҫө» тип исемләнгән күргәҙмә асылды Өфө художество галереяһында яңы күргәҙмә. Был юлы экспозицияға Башҡортостан рәссамдар союзы ағзаларының йыллыҡ эш һөҙөмтәләре - картиналар һәм скульптуралар сығарылды. «Традицияларҙың мең төҫө» тип исемләнгән күргәҙмәлә төрлө техникала башҡарылған һәм бер нисә стилдә биҙәлгән һынлы сәнғәт әҫәрҙәрен күрергә мөмкин. Тәжрибәле оҫталарҙан тыш, галерея залдарына Башҡортостан рәссамдар союзы ҡарамағындағы Йәш рәссамдар берлеге ағзалары эштәре лә сығарылды.

Быйыл дәүләт башлығы менән тура бәйләнеш 4 сәғәт тә 27 минут дауам итте Ошо ваҡыт эсендә Рәсәй Президенты 76 һорауға яуап биреп өлгөргән, уларҙың тиҫтәнән ашыуы махсус хәрби операцияға ҡағыла. Эксперттар фекеренсә, Пезиденттың был тәңгәлдәге яуаптары ил һаҡсыларының мәнфәғәттәре дәүләт кимәлендә яҡланыуын күрһәтә, йәш быуында илһөйәрлек тойғоларын нығытыуға булышлыҡ итә.

Өфөлә экологик лидерҙар бүләкләнде Өфөлә Тәбиғәтте һаҡлауға йүнәлтелгән федераль проекттарҙа ҡатнашҡан иң яҡшы муниципалитеттар, йәмәғәт ағзалары, ирекмәндәр, киң мәғлүмәт саралары хеҙмәткәрҙәре билдәләнде.

Башҡорт милли аш-һыуҙары китап булып донъя күрҙе Башҡорт аш-һыуҙары белгесенән тәмле китап. Иң шәп башҡорт милли аш-һыуҙары рецепттарынан төҙөлгән баҫма Зәйнәб Биишева исемендәге «Китап» нәшриәтендә донъя күрҙе. «Кумпан-Терра» ресторанында уҙғарылған «Башҡорт милли аш-һыуының иң яҡшы ризыҡтары» китабы исем туйында БЮТ ижади төркөмө булды.

Башҡортостандың киләһе йылға бюджеты 4 миллиард һум дефицит менән ҡабул ителде Төп финанс документ бөгөн Дәүләт Йыйылышы - Ҡоролтайҙың пленар ултырышында раҫланды. Бынан тыш, Парламент депутаттары ҡарамағына 4 тиҫтәнән ашыу ҡануни документ сығарылды.

Владимир Путин Курск йүнәлешендәге хәрбиҙәрҙең финанс проблемаһын хәл итергә вәғәҙәләне Бөгөн дәүләт башлығы тура эфирҙа Рәсәй халҡының һорауҙарына яуап бирҙе. Былтырғы кеүек үк, сара тура бәйләнеш һәм матбуғат конференцияһы форматында ойошторолдо.

Владимир Путин Башҡортостанда йәшәүсе ҡатындың һорауына яуап бирҙе Нефтекаманан Рәшиҙә Ғәйнетдинова Рәсәй президенты менән тура эфирға йәшәү өсөн мөһим бушлай дарыуҙар етмәүе тураһында һорау ебәргән. - Бөтә препараттарға ла аҡса тулы күләмдә бүленә. Был - сауҙаны ойоштороуға һәм ҡарарҙарҙы ваҡытында ҡабул итеүгә ҡағылышлы мәсьәлә. Барыһын да ваҡытында эшләү мөһим. Инсулиндар беҙҙә етерлек күләмдә. Тотҡарлыҡтар булмаҫҡа тейеш, - тип яуап бирҙе Путин.

Ҡариҙел районы Абдулла ауылында Ришат Миндияровтың исеме мәңгеләштерелде Ҡариҙел районы Абдулла ауылында билдәле радио һәм телевидение журналисы, Башҡортостандың атҡаҙанған матбуғат һәм киң мәғлүмәт хеҙмәткәре Ришат Миндияровтың исеме мәңгеләштерелде. Журналист исеме яҙылған иҫтәлекле таҡтаташ Бәрҙәш йылғаһы аша үткән аҫылмалы күпер ҡоролмаһына беркетелде. Сарала Ришат Миндияровтың ауылдаштары, яҡындары һәм хеҙмәттәштәре ҡатнашты.

Радий Хәбиров Салауат районы Мөрсәлим ауылынан Максим Шаһиморатовтың хыялын тормошҡа ашырҙы 5-се класс уҡыусыһы төбәк етәксеһе менән тура бәйләнешкә үҙенең хатын ебәрҙе. Максим уға робот-трансформер бүләк итеүҙе һорай һәм республика башлығы кабинетын күрергә, Яңы йыл алдынан уның менән осрашырға теләй. Бала саҡтан инвалид булыуына һәм өйҙә уҡыуына ҡарамаҫтан, Максим ижад менән әүҙем шөғөлләнә, ауыл мәҙәниәт йортонда художество түңәрәгенә йөрөй. Малайҙың үтенесе яуаһыҙ ҡалманы, ул Өфөгә башланғыс кластар уҡытыусыһы оҙатыуында Радий Хәбировҡа ҡунаҡҡа килде.

Радий Хәбиров яңы тәғәйенләүҙәр тураһындағы указға ҡул ҡуйҙы Радий Хәбиров Башҡортостан министрлыҡтары һәм ведомстволары етәкселәрен тәғәйенләү тураһындағы указға ҡул ҡуйҙы.

Башҡортостан Хөкүмәтендә яңы тәғәйенләүҙәр: вице-премьерҙар составы раҫланды Дәүләт Йыйылышы - Ҡоролтай депутаттары бөгөнгө пленар ултырышта Башҡортостан башлығына республика хөкүмәте вице-премьерҙарын тәғәйенләүгә ризалыҡ бирҙе.

Республикала янғынға ҡаршы махсус режим индерелә Яңы йыл һәм Раштыуа байрамдарын хәүефһеҙ үткәреү маҡсатында ошондай ҡарар ҡабул ителә. Айырым тәртип 27 декабрҙән 9 ғинуарға тиклем ғәмәлдә була. Бөтә район һәм ҡалаларҙа 28 декабрҙән 12 ғинуарға тиклем профилактик эштәр уҙғарыла. Иҫкәртеү эше алып барған төркөм составына газ һәм энергетика хеҙмәттәре белгестәре индерелә.

БСТ хеҙмәткәрҙәре Владимир Путиндың матбуғат конференцияһында ҡатнаша Хәбәрсе Руслан Батыргәрәев һәм оператор Артур Ханов тура бәйләнеш һәм конференция үтәсәк урында. «Путин менән тура бәйләнештә тәүге тапҡыр ҡатнашам. Мин әҙерләгән төп һорау импортты алмаштырыуға ҡағыла, шулай уҡ бензинға хаҡтар артыуы хаҡында. Шулай уҡ урбанизация темаһы ҡыҙыҡһындыра — йәштәрҙең ҡалаға күсеүе. Хатта плакаттарҙың береһен «Өфөнән ауылға» тип атаныҡ, — ти ул.

Әсәлек капиталы программаһы 2030 йылға тиклем оҙайтыла Премьер-министр Михаил Мишустин белдереүенсә, тағы 5 миллион ғаиләгә ярҙам итеү мөмкинлеге була. Әсәлек капиталы индексацияланасаҡ. Киләһе йылдың февраленән беренсе бала өсөн сертификат 676 мең һумға еткерелә. Икенсе бала өсөн тағы 217 мең һум өҫтәлә. Программа 2007 йылдан ғәмәлгә ашырыла. Ошо ваҡыт эсендә 14 миллиондан ашыу сертификат бирелгән.

Республикала яңы йыл каникулында спиртлы эсемлек һатыу сикләнә Сауҙа һәм хеҙмәттәр министрлығынан хәбәр итеүҙәренсә, 3, 4, 5 ғинуарҙа магазиндарҙа киске сәғәт 5-тән иртәнге 10-ға тиклем хәмер алып булмай. 6 ғинуарҙа 17 сәғәттән төнгө 11-гә тиклем араҡы һатыу тыйыла. Сикләүҙәр кафе һәм ресторандарға ҡағылмай.

Башҡортостан хөкүмәте премьер-министры урынбаҫарҙары билдәле булды Бөгөн Республика парламенты депутаттары пленар ултырышта вице-премьерҙарҙы хупланы. Премьер-министрҙың беренсе урынбаҫары-Иҡтисади үҫеш һәм инвестиция сәйәсәте министры итеп Рөстәм Моратов тәғәйенләнә. Беренсе вице-премьер вазифаһын шулай уҡ Урал Килсенбаев ала. Азамат Абдрахманов вице-премьер-Башҡортостан хөкүмәте аппараты етәксеһе була. Вице-премьерҙар вазифаһында Илшат Фәзрахманов һәм Александр Шельдяев эшен дауам итә. Улар Ауыл хужалығы һәм Сәнәғәт, энергетика һәм инновациялар министрлыҡтарын етәкләй. Премьер-министр урынбаҫары вазифаһында Ирек Сәғитов ҡала. Стәрлетамаҡтың элекке башлығы Рөстәм Ғәзизов шулай уҡ вице-премьер вазифаһын ала. Ер һәм мөлкәт мөнәсәбәттәре министры Наталья Полянская хөкүмәттә вице-премьер статусында эшләйәсәк. Башҡортостан министрлыҡ һәм ведомстволар етәкселәре Республика Башлығы Указы менән тәғәйенләнә.

Яңы йыл юғалтыуҙар һәм еңеүҙәр менән килмәксе Был турала Өфө нумерологтары билдәләне. Йондоҙҙар тормошта кәрәкмәгән әйберҙәрҙән баш тартырға йөръәт итеүселәргә бәхет вәғәҙәләй. Йылан йылы башланыуға тиклем ике аҙнанан кәмерәк ваҡыт ҡалып бара. Байрам төнө хәтерҙә ҡалһын өсөн, өҫтәлгә нимә әҙерләргә һәм нимә кейергә? Белгестәр яуабы киләһе яҙмала.

Тәтешле районында «Урал батыр» башҡорт халыҡ ҡобайыры көнө үтте Мифтахетдин Аҡмулла исемендәге Башҡорт дәүләт педагогия университенының «Башҡорт фольклоры» ғилми-тикшеренеү үҙәге башланғысында ул өсөнсө йыл тормошҡа ашырыла. Быйыл ул тәүге тапҡыр тәжрибә нигеҙендә районға сыҡты.

Өфөлә «Юлдаш Рlus» милли йәштәр фестиваленә йомғаҡ яһалды «Торатау» конгресс-холл сәхнәһендә «Юлдаш Рlus» милли йәштәр фестиваленә йомғаҡ яһалды. Быйыл радионың йомғаҡлау сараһы милли йәштәр фестивале булараҡ үтте. Ул Республика Башлығы гранты ярҙамында ойошторолдо. Һәләтле Башҡортостан йәштәрен асыусы иң ҙур музыкаль ваҡиғаларҙың береһе хаҡында киләһе яҙмала.